ഏറ്റുമാനൂര് - പൂഞ്ഞാര് സംസ്ഥാന പാതയിലെ ഭരണങ്ങാനം ടൗണിലെ ഗതാഗത കുരുക്ക്.
ഭരണങ്ങാനം: തുടര്ച്ചയായുണ്ടാകുന്ന റോഡപകടങ്ങള്ക്ക് അടിയന്തര പരിഹാര നടപടികള് സ്വീകരിക്കണമെന്ന് ആവശ്യപ്പെട്ട് മാണി സി. കാപ്പന് എംഎല്എയ്ക്ക് പൗരസമിതി നിവേദനം നല്കി. ഏറ്റുമാനൂര് - പൂഞ്ഞാര് സംസ്ഥാന പാതയിലെ ഭരണങ്ങാനം ടൗണില് അപകടങ്ങൾ തുടർക്കഥയാണ്.
അഞ്ച് സ്കൂളുകളിലെ ആയിരക്കണക്കിന് വിദ്യാര്ഥികളും തീര്ഥാടന കേന്ദ്രവും അമ്പലവും നിരവധി സര്ക്കാര് ഓഫീസുകളും വ്യാപാര സ്ഥാപനങ്ങളും നിറഞ്ഞ ഭരണങ്ങാനം ടൗണ് ജന ബാഹുല്യത്താലും വാഹനത്തിരക്കിനാലും വര്ഷങ്ങളായി വളരെയേറെ ബുദ്ധിമുട്ടുകയാണ്. റോഡ് കുറുകെ കടക്കുവാന് വിദ്യാര്ഥികളും യാത്രക്കാരും വളരെയേറെ കഷ്ടപ്പെടുന്നു.
കഴിഞ്ഞ ദിവസവും കാല്നടയാത്രക്കാരിയെ വാഹനം ഇടിച്ചു പരിക്കേല്പ്പിച്ചിരുന്നു. ചൂണ്ടച്ചേരി ഭാഗത്തു നിന്നും വിളക്കുമാടം, ഇടമറ്റം ഭാഗത്തു നിന്നുമുള്ള വാഹനങ്ങളും ഭരണങ്ങാനം ജംഗ്ഷനില് എത്തിച്ചേരുമ്പോള് ഗതാഗതകുരുക്ക് രൂക്ഷമാകുന്നു. ഭരണങ്ങാനം ടൗണില് തുടര്ച്ചയായിട്ടുണ്ടാകുന്ന റോഡപകടങ്ങളിൽ നിരവധി ആളുകള്ക്ക് ഗുരുതര പരിക്കേൽക്കുകയും മനുഷ്യ ജീവനുകള് പൊലിയുന്നതിനും കാരണമായതോടെ അടിയന്തരമായി റോഡ് സുരക്ഷ ക്രമീകരണങ്ങള് ഏര്പ്പെടുത്തി കര്ശന നടപടികള് സ്വീകരിച്ചു പൊതുജനങ്ങളുടെ സുരക്ഷ ഉറപ്പു വരുത്തേണ്ടതുണ്ടെന്ന് നാട്ടുകാര് ആവശ്യപ്പെട്ടു.
ടൗണില് റോഡ് സുരക്ഷ ക്രമീകരണങ്ങള് അടിയന്തരമായി നടപ്പിലാക്കുകയും പ്രവര്ത്തന രഹിതമായ സിഗ്നല് ലൈറ്റുകൾ പുനഃസ്ഥാപിക്കുകയും ഹോം ഗാര്ഡ് സേവനം ഏര്പ്പെടുത്തുകയും അനധികൃത പാര്ക്കിംഗ് നിരോധിക്കുകയും ചെയ്യണമെന്നാണ് ആവശ്യം.
ചൂണ്ടച്ചേരി റോഡില് പഞ്ചായത്ത് ഓഫീസ് ജംഗ്ഷന് മുതല് ഭരണങ്ങാനം ജംഗ്ഷന് വരെ വീതി കൂട്ടി വളവ് നിവര്ത്തുകയും വീതി കുറവിനു കാരണമാകുന്ന മരം വെട്ടി മാറ്റുകയും ചെയ്യണം. നടപ്പാതയില് കൈവരി സ്ഥാപിക്കുക, നിരീക്ഷണ കാമറ സ്ഥാപിക്കുക, സമാന്തര റോഡ് പദ്ധതികള് നടപ്പിലാക്കുക, മേരിഗിരി ഭാഗത്തെ അപകട വളവ് വീതി കൂട്ടി നിവര്ത്തുക, ഹൈവേയിലെ വെട്ടുകല്ലേല് ജംഗ്ഷന് - കോട്ടവഴി റോഡ് മൗത്ത് നിര്മിച്ചു വീതി കൂട്ടുക, ഭരണങ്ങാനം അല്ഫോന്സാ തീര്ഥാടന കേന്ദ്രത്തിനു സമീപം മുതല് മേരിഗിരി വരെ ഓട നിര്മിക്കുക എന്നിവ വര്ഷങ്ങളായി പൊതുജനങ്ങള് ആവശ്യപ്പെടുന്നതാണ്.
Tags : Ongoing road accidents nattuvisesham local news