കൗൺസിൽ യോഗത്തിൽ എൽഡിഎഫ് കൗൺസിലർമാരുടെ പ്രതിഷേധത്തിൽ പങ്കെടുക്കാതെ സീറ്റിൽതന്നെ ഇരിക്കുന്ന കൗൺസിലർ എം.എൽ. റോസി - ടോജോ പി. ആന്റണി.
തൃശൂർ: കോർപറേഷൻ കൗൺസിൽ യോഗത്തിൽ വീണ്ടും നാടകീയ രംഗങ്ങൾ. കാൽമണിക്കൂറോളം വൈകി തുടങ്ങിയ യോഗം അവസാനിച്ചത് വെറും നാലുമിനിറ്റിനുള്ളിൽ. നികുതി വിഷയത്തിൽ ചർച്ച വേണമെന്നാവശ്യപ്പെട്ട് പ്രതിപക്ഷം നടുത്തളത്തിലിറങ്ങി പ്രതിഷേധിച്ചതോടെ അജൻഡകൾ പാസാക്കിയതായി അറിയിച്ച് മേയർ യോഗം പിരിച്ചുവിട്ടു.
യോഗം തുടങ്ങാൻ വൈകിയതിനെ പ്രതിപക്ഷ നേതാവ് ടി.ആർ. ഹിരൺ ചോദ്യംചെയ്തു. അരമണിക്കൂർ വരെ വൈകാമെന്നായിരുന്നു സെക്രട്ടറിയുടെ മറുപടി. തുടർന്ന് യോഗത്തിനെത്തിയ മേയർ ഖരമാലിന്യ സംസ്കരണവുമായി ബന്ധപ്പെട്ട പരിശീലന ക്ലാസുകളിൽ കൗൺസിലർമാർ പങ്കെടുക്കണമെന്ന് അറിയിച്ചു. ക്ലാസിൽ പങ്കെടുത്ത് സർട്ടിഫിക്കറ്റ് നേടുന്നവർക്കു മാത്രമേ ശുചിത്വ മിഷന്റെ ഐ ക്ലീൻ ചലഞ്ചിൽ പങ്കെടുക്കാനാകൂവെന്നും ഇവർക്ക് മാത്രമേ മേയർ റിലീഫ് ഫണ്ട് ലഭിക്കൂവെന്നുമുള്ള അറിയിപ്പ് മേയർ വ്യക്തമാക്കി. ഇതിനെതിരെ പ്രതിപക്ഷ കൗൺസിലർ അഡ്വ. അനീസ് അഹമ്മദ് രംഗത്തെത്തി. പങ്കെടുക്കാൻ പ്രോത്സാഹിപ്പിക്കുകയാണ് ഉദ്ദേശിച്ചതെന്നും വിവാദമായ ഭാഗം ഒഴിവാക്കിയെന്നും മേയർ വിശദീകരിച്ചു.
അടിയന്തര യോഗത്തിൽ ചർച്ചകൾ ഉണ്ടാകില്ലെന്നു പറഞ്ഞാണ് യോഗം ആരംഭിച്ചതെങ്കിലും അജൻഡകൾ തുടങ്ങുന്നതിനുമുമ്പ് നികുതി വിഷയം ചർച്ചചെയ്യണമെന്നാവശ്യപ്പെട്ട് എൽഡിഎഫ് കൗൺസിലർമാർ പോസ്റ്ററുകളുമായി നടുത്തളത്തിലിറങ്ങി. ഇതിനിടെ അജൻഡകൾ വായിക്കണമെന്നാവശ്യപ്പെട്ട് ബിജെപി കൗൺസിലർമാരും രംഗത്തെത്തി. നികുതി വിഷയത്തിൽ നേരത്തേ കോടതിയെ സമീപിച്ച മുൻ എൽഡിഎഫ് ഭരണസമിതി ഇപ്പോൾ സമരംനടത്തുന്നത് നാടകമാണെന്നായിരുന്നു ബിജെപിയുടെ ആരോപണം.
ഇതോടെ അജൻഡകൾ പാസാക്കിയതായി പ്രഖ്യാപിച്ച് മേയർ യോഗത്തിൽനിന്ന് ഇറങ്ങിപ്പോയി. പിന്നാലെ എൽഡിഎഫിന്റെയും ബിജെപിയുടെയം പ്രതിഷേധം ശക്തമായി. മുദ്രാവാക്യങ്ങളുമായി എൽഡിഎഫും കോർപറേഷൻ ഓഫിസിനു മുന്നിൽ പ്രതിഷേധം നടത്തി.
Tags : Protest, walkout, criticism Nattuvishesham DistrictNews