മഞ്ചേരി: യുവതലമുറയുടെ മാനസികവും ശാരീരികവുമായ ക്ഷമതയെ കാര്ന്നുതിന്ന് രാജ്യത്തെ പടുകുഴിയിലാഴ്ത്തുന്ന മയക്കുമരുന്ന് മാഫിയക്കെതിരേ ജനങ്ങളെ അണിനിരത്തി പ്രതിരോധം തീര്ക്കാനൊരുങ്ങുകയാണ് തൃക്കലങ്ങോട് ഗ്രാമപഞ്ചായത്ത്.
2026-27 വാര്ഷിക പദ്ധതിയില് ഉള്പ്പെടുത്തിയ ലഹരിവിരുദ്ധ കാമ്പയിനിന്റെ ഭാഗമായി സംസ്ഥാന സര്ക്കാരിന്റെ ഓപറേഷന് തൂഫാന്റെ ചുവടുപിടിച്ച് ലഹരിക്കെതിരേ ജനകീയ പ്രതിരോധം തീര്ക്കാനാണ് പദ്ധതി.
പഞ്ചായത്തിലെ 24 വാര്ഡുകളെയും കോര്ത്തിണക്കിയാണ് ലഹരിവിരുദ്ധ സേന രൂപീകരിക്കുന്നത്. ഓരോ വാര്ഡില്നിന്നു സന്നദ്ധരായ നാല് സ്ത്രീകളെയും ആറ് പുരുഷന്മാരെയും ഉള്പ്പെടുത്തി പത്ത് അംഗങ്ങളെയാണ് തെരഞ്ഞെടുക്കുക. ഇത്തരത്തില് 24 വാര്ഡുകളില്നിന്നായി ആകെ 240 പേര് അടങ്ങുന്ന ശക്തമായ ലഹരിവിരുദ്ധ സേന പഞ്ചായത്ത് തലത്തില് പ്രവര്ത്തനസജ്ജമാകും.
പോലീസ്, എക്സൈസ്, ആരോഗ്യ വകുപ്പ് ഉദ്യോഗസ്ഥര്, ലഹരിവിരുദ്ധ സേനാംഗങ്ങള്, അയല്ക്കൂട്ട പ്രസിഡന്റ്-സെക്രട്ടറിമാര്, അങ്കണ്വാടി വര്ക്കേഴ്സ്, റിട്ടയേഡ് പോലീസ് - എക്സൈസ് ഉദ്യോഗസ്ഥര്, പാലിയേറ്റീവ് വോളണ്ടിയര്മാര്, മെക് 7 അംഗങ്ങള്, റിട്ട. അധ്യാപകര് ഉള്പ്പെടെയുള്ള ജീവനക്കാര്, ക്ലബ് ഭാരവാഹികള്, വായനശാല ഭാരവാഹികള്,
രാഷ്ട്രീയ പാര്ട്ടി പ്രതിനിധികള്, യുവജന വിദ്യാര്ഥി സംഘടന പ്രതിനിധികള്, മതസംഘടന പ്രതിനിധികള്, വ്യാപാരി വ്യവസായി പ്രതിനിധികള്, തുടങ്ങി വ്യത്യസ്ത മേഖലയില് ഉള്ളവരെ പങ്കെടുപ്പിച്ചു കൊണ്ട് ലഹരിവിരുദ്ധ പ്രവര്ത്തനങ്ങളുടെ കാമ്പയിന് ഉദ്ഘാടന സംഗമം നടത്താനാണ് തീരുമാനം.
Tags : Local News Nattuvishesham Malappuram