കൊച്ചി: അജൈവ മാലിന്യ സംസ്കരണത്തില് ഇതിനോടകം വലിയ പുരോഗതി സംസ്ഥാനം കൈവരിച്ചുവെന്ന് മുഖ്യമന്ത്രി പിണറായി വിജയന്. ബ്രഹ്മപുരത്തെ കൊച്ചി കോര്പറേഷന് ഭൂമിയില് ഭാരത് പെട്രോളിയം കോര്പറേഷന് ലിമിറ്റഡിന്റെ (ബിപിസിഎല്) നേതൃത്വത്തില് സ്ഥാപിച്ച സംസ്ഥാനത്തെ ആദ്യത്തെ ഖരമാലിന്യ അധിഷ്ഠിത കംപ്രസ്ഡ് ബയോഗ്യാസ് (സിബിജി) പ്ലാന്റിന്റെ ഉദ്ഘാടനം ഓണ്ലൈനായി നിര്വഹിക്കുകയായിരുന്നു മുഖ്യമന്ത്രി.
മാലിന്യ നിര്മാര്ജന രംഗത്ത് കേരളം കൈവരിച്ച നേട്ടങ്ങള് ലോകത്തിന് തന്നെ മാതൃകയാണെന്നും അദ്ദേഹം കൂട്ടിച്ചേര്ത്തു. രാജ്യത്തിന്റെ ഊര്ജ സ്വയംപര്യാപ്തതയിലേക്കുള്ള സുപ്രധാന ചുവടുവയ്പാണിതെന്ന് ചടങ്ങില് മുഖ്യപ്രഭാഷണം നടത്തിയ കേന്ദ്രമന്ത്രി സുരേഷ് ഗോപി പറഞ്ഞു.
ചടങ്ങില് മന്ത്രി എം.ബി. രാജേഷ് അധ്യക്ഷനായി. സാനിട്ടറി വേസ്റ്റ് പ്ലാന്റിന്റെ നിര്മാണോദ്ഘാടനവും അദ്ദേഹം നിര്വഹിച്ചു. മന്ത്രി പി. രാജീവ് വിശിഷ്ടാതിഥിയായിരുന്നു. സംസ്ഥാന സര്ക്കാരിന്റെ മാലിന്യ നിര്മാര്ജന സംരംഭങ്ങളെക്കുറിച്ചുള്ള കോഫി ടേബിള് ബുക്ക്, മന്ത്രി എം.ബി. രാജേഷ് കേന്ദ്രമന്ത്രി സുരേഷ് ഗോപിക്ക് നല്കി പ്രകാശനം ചെയ്തു.
മാലിന്യ സംസ്കരണ പ്രവര്ത്തനങ്ങളുടെ കണ്സോളിഡേറ്റഡ് റിപ്പോര്ട്ട് മന്ത്രി പി. രാജീവ് കേന്ദ്രമന്ത്രിക്ക് കൈമാറി.
സിബിജി ഗ്രീന് ബെല്റ്റ് മിയാവാക്കി ഫോറസ്റ്റ് പ്ലാന്റ് പരിസരത്തെ പരിസ്ഥിതി സൗഹൃദമാക്കുന്നതിന്റെ ഭാഗമായി സിബിജി ഗ്രീന് ബെല്റ്റ് മിയാവാക്കി ഫോറസ്റ്റ് പദ്ധതിക്കും ചടങ്ങില് തുടക്കക്കുറിച്ചു. മന്ത്രി എം.ബി രാജേഷ്, പി.വി.ശ്രീനിജിന് എംഎല്എ മേയര് അഡ്വ.വി.കെ.മിനിമോള് എന്നിവര് ചേര്ന്ന് തൈകള് നട്ടുകൊണ്ട് പദ്ധതിയുടെ ഉദ്ഘാടനം നിര്വഹിച്ചു.
Tags : nattu vishesham CBG plant inaugurated