തലയോലപ്പറമ്പ്: വൈക്കം ഉപജില്ല 65ാമത് സ്കൂൾ കലോത്സവത്തിന് തലയോലപ്പറമ്പ് വൈക്കം മുഹമ്മദ് ബഷീർ സ്മാരക വിഎച്ച്എസ്എസിൽ ഇന്ന് തിരിതെളിയും. ഇന്ന് രാവിലെ 10ന് കെ. ബിനിമോൻ എം എൽ എ കലോത്സവം ഉദ്ഘാടനം ചെയ്യും. തലയോലപ്പറമ്പ് പഞ്ചായത്ത് പ്രസിഡന്റ് ജോസ് വേലിക്കകം അധ്യക്ഷത വഹിക്കും. വിശിഷ്ടാതിഥിയായി കോമഡി ഉത്സവം ഫെയിം ലിനു വൈക്കം പങ്കെടുക്കും. ജില്ലാ പഞ്ചായത്ത് അംഗം വിജയമ്മ ബാബു മുഖ്യപ്രഭാഷണം നടത്തും .
അറബിക് സാഹിത്യോത്സവം കടുത്തുരുത്തി ബ്ലോക്ക് പഞ്ചായത്ത് പ്രസിഡന്റ് തങ്കമ്മ വർഗീസും സംസ്കൃതോത്സവം വൈക്കം ബ്ലോക്ക് പഞ്ചായത്ത് പ്രസിഡന്റ് കെ.കെ. ശശികുമാറും ഉദ്ഘാടനം ചെയ്യും.
വൈക്കം ഉപജില്ലയിലെ വിവിധ സ്കൂളിൽ നിന്നായി 4300ഓളം വിദ്യാർഥികളാണ് മത്സരങ്ങളിൽ മാറ്റുരയ്ക്കുന്നത്. വൈക്കം മുഹമ്മദ് ബഷീർ സ്മാരക സ്കൂളാണ് മുഖ്യവേദി. മത്സരങ്ങളുടെ സുഗമമായ നടത്തിപ്പിനായി 15 വേദികളിലായാണ് മത്സരങ്ങൾ ക്രമീകരിച്ചിട്ടുള്ളത്. പങ്കെടുക്കുന്ന മുഴുവൻ മത്സരാർഥികൾക്കും ഒഫീഷ്യൽസിനും ആവശ്യമായ ഭക്ഷണം നൽകാനുള്ള ക്രമീകരണങ്ങൾ നടത്തിയിട്ടുണ്ട്. മത്സരങ്ങൾ ആരംഭിക്കുന്നതിനായുള്ള എല്ലാ ഒരുക്കങ്ങളും പൂർത്തിയാക്കിയതായി സംഘാടകസമിതി ജനറൽ കൺവീനർ ജി. രഞ്ജിത്ത്, ജോയിന്റ് കൺവീനർ സജിനി സെബാസ്റ്റ്യൻ, വൈക്കം എഇഒ കെ സി. ദീപ , പബ്ലിസിറ്റി കമ്മിറ്റി ചെയർമാൻ സമീൽ ഇബ്രാഹിം, ശ്രീകുമാർ, പബ്ലിസിറ്റി കൺവീനർ കെ.എം.ഷെമീർ എന്നിവർ അറിയിച്ചു.
Tags : Sub-district School Arts Festival Nttuvishesham Districtnews