പുനലൂരില് നിര്ത്തിയിട്ടിരുന്ന കാറുകള്ക്കു മുകളിൽ കൂറ്റന് മരക്കൊമ്പ് ഒടിഞ്ഞുവീണത് മാറ്റിയപ്പോള്.
കൊല്ലം : പുനലൂരില് നിര്ത്തിയിട്ടിരുന്ന കാറുകള്ക്കുമീതെ കൂറ്റന് മരക്കൊമ്പ് ഒടിഞ്ഞുവീണതിനെ തുടര്ന്നുണ്ടായ അപകടത്തില് കാര് ഡ്രൈവര് പരിക്കേല്ക്കാതെ രക്ഷപ്പെട്ടു. പുനലൂര്-മൂവാറ്റുപുഴ ഹൈവേയില് പുനലൂര് ഹൈസ്കൂള് ജംഗഷനില് ആമക്കുളത്തിനോടു ചേര്ന്നായിരുന്നു അപകടം നടന്നത്. ജല അഥോറിറ്റി ജീവനക്കാരന്റെ കാറും നെല്ലിപ്പള്ളി കല്ലാര് സ്വദേശിയുടെ ടാക്സി കാറുമാണ് അപകടത്തില്പ്പെട്ടത്.
ഇതില് ടാക്സി കാറിലെ ഡ്രൈവറാണ് പരിക്കേല്ക്കാതെ രക്ഷപ്പെട്ടത്. കാറിന് കേടുപാടുണ്ടായി. കൂറ്റന് ബദാം മരത്തിന്റെ കൊമ്പാണ് ഒടിഞ്ഞുവീണത്. ഈസമയം മഴയോ കാറ്റോ ഉണ്ടായിരുന്നില്ല. ജല അഥോറിറ്റി ജീവനക്കാരന്റെ കാര് സ്ഥിരമായി ഈ മരത്തിനു കീഴെയാണ് നിര്ത്തിയിടാറുള്ളത്.
ടാക്സി കാര് മരത്തിനു കീഴിലായി നിര്ത്തിയിടാന് ശ്രമിക്കുമ്പോഴാണ് കൊമ്പ് ഒടിഞ്ഞുവീണത്. സ്ഥലത്തുണ്ടായിരുന്നവര് ഓടിക്കൂടി ചില്ലകള് നീക്കിയശേഷം ഡ്രൈവർ പുറത്തിറക്കുകയായിരുന്നു. പിന്നീട് പുനലൂര് ഫയര്സ്റ്റേഷനില് നിന്ന് സേനാംഗങ്ങള് എത്തി ചില്ലകള് മുറിച്ചുനീക്കി രണ്ടു കാറുകളും പുറത്തെടുത്തു.
മണ്ഡലകാലമായതോടെ നിരന്തരം വാഹനങ്ങള് പോകുന്ന പാതയിലാണ് അപകടം നടന്നത്. ഇതരസംസ്ഥാനക്കാരായ തീര്ഥാടകരുടെ വാഹനങ്ങള് ശബരിമലയ്ക്ക് പോകുന്നത് ഈ പാത വഴിയാണ്.
മണ്ഡലകാലത്തിനു മുന്നോടിയായി പാതകളിലെ അപകടനിലയിലുള്ള മരങ്ങളും കൊമ്പുകളും നീക്കണമെന്ന് അവലോകനയോഗത്തില് അധികൃതര് നിര്ദേശം നല്കിയിരുന്നെങ്കിലും ഇത് പൂര്ണമായി നടപ്പാക്കിയിട്ടില്ല. അതാണ് അപകടകാരണമായത്.
Tags : Tree branch Nattuvishesham District News