ആശയരൂപീകരണ യോഗം മന്ത്രി എ.പി. അനിൽകുമാർ ഉദ്ഘാടനം ചെയ്യുന്നു.
കോഴിക്കോട്: പതിനഞ്ചാം പഞ്ചവത്സര പദ്ധതി രൂപീകരണത്തിന്റെ ഭാഗമായി സംസ്ഥാന ആസൂത്രണ ബോർഡിന്റെ നേതൃത്വത്തിൽ കോഴിക്കോട് പാളയം ഹോട്ടൽ കിംഗ് ഫോർട്ടിൽ സംഘടിപ്പിച്ച ആശയരൂപീകരണ യോഗം മന്ത്രി എ.പി. അനിൽകുമാർ ഉദ്ഘാടനം ചെയ്തു.
മുൻകാലങ്ങളിൽ നിന്ന് വ്യത്യസ്തമായി ജില്ലാതല യോഗങ്ങളിലൂടെ പൊതുജനങ്ങളുടെയും ജനപ്രതിനിധികളുടെയും ആശയങ്ങൾ കൂടി ഉൾക്കൊണ്ടുകൊണ്ടായിരിക്കും പദ്ധതി രൂപീകരിക്കുകയെന്ന് മന്ത്രി വ്യക്തമാക്കി. പന്ത്രണ്ടാം പഞ്ചവത്സര പദ്ധതിക്ക് ശേഷം രാജ്യത്തെ മറ്റ് സംസ്ഥാനങ്ങൾ പഞ്ചവത്സര പദ്ധതികൾ ഉപേക്ഷിച്ചപ്പോഴും കാർഷിക വിപ്ലവത്തിനും ദാരിദ്ര്യ നിർമ്മാർജ്ജനത്തിനും വ്യാവസായിക വളർച്ചയ്ക്കും അടിത്തറയിട്ട ഈ ആസൂത്രണ രീതി മുന്നോട്ട് കൊണ്ടുപോകാനാണ് കേരളം തീരുമാനിച്ചതെന്നും അദ്ദേഹം ചൂണ്ടിക്കാട്ടി.
സാമ്പത്തിക വളർച്ച, സാമൂഹിക നീതി, സാങ്കേതിക പുരോഗതി, പരിസ്ഥിതി സൗഹൃദവും സുസ്ഥിരവുമായ വികസനം എന്നിവ സമന്വയിപ്പിച്ച് ‘പുതുയുഗ കേരളം’ വികസന മാതൃകയ്ക്ക് രൂപം നൽകുകയാണ് പദ്ധതിയുടെ ലക്ഷ്യം. നിലവിലെ ആഗോള സാഹചര്യത്തിൽ വിദേശ വരുമാനത്തെയും സർക്കാർ ജോലികളെയും മാത്രം ആശ്രയിച്ച് മുന്നോട്ട് പോകാൻ കഴിയില്ലെന്നും തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിൽ പ്രാദേശിക തൊഴിലവസരങ്ങൾ സൃഷ്ടിക്കുന്നതിനും ചെറുകിട-വൻകിട സംരംഭങ്ങൾ തുടങ്ങുന്നതിനും പദ്ധതിയിൽ മുൻഗണന നൽകുമെന്നും മന്ത്രി പറഞ്ഞു.
കാർഷിക മേഖലയിലേക്കുള്ള ശക്തമായ തിരിച്ചുവരവ് അനിവാര്യമാണെന്നും അയൽസംസ്ഥാനങ്ങളെ അപേക്ഷിച്ച് ഉത്പാദന രംഗത്തുള്ള കുറവ് പരിഹരിക്കണമെന്നും അദ്ദേഹം ഓർമ്മിപ്പിച്ചു.പഞ്ചായത്തുകൾക്കുള്ള വിഹിതം ബജറ്റിന്റെ ഭാഗമായി തന്നെ നീക്കിവയ്ക്കുന്ന രാജ്യത്തെ ഏക സംസ്ഥാനമാണ് കേരളമെന്ന് മന്ത്രി പറഞ്ഞു.
പ്ലാൻ ഫണ്ടിനും തനത് ഫണ്ടിനും അപ്പുറമുള്ള വികസന സാധ്യതകൾ തദ്ദേശ സ്ഥാപനങ്ങൾ പ്രയോജനപ്പെടുത്തണമെന്നും അനുവദിക്കുന്ന തുക സാമ്പത്തിക വർഷത്തിന്റെ അവസാനത്തിലേക്ക് നീട്ടിവയ്ക്കാതെ സമയബന്ധിതമായി പൂർണമായും ചെലവഴിക്കണമെന്നും അദ്ദേഹം നിർദ്ദേശിച്ചു.
ചടങ്ങിൽ ഫൈസൽ ബാബു എംഎൽഎ അധ്യക്ഷത വഹിച്ചു. സംസ്ഥാന ആസൂത്രണ ബോർഡ് ഉപാധ്യക്ഷൻ കെ.എം. ചന്ദ്രശേഖർ ആമുഖപ്രഭാഷണം നടത്തി. മേയർ ഒ. സദാശിവൻ, എം.കെ. രാഘവൻ എംപി, ഷാഫി പറമ്പിൽ എംപി ഉള്പ്പെടെയുള്ളവര് പങ്കെടുത്തു.
കോഴിക്കോടിന്റെ വികസനത്തിന് നൂതന ആശയങ്ങൾ
കോഴിക്കോട്: പതിനഞ്ചാം പഞ്ചവത്സര പദ്ധതിയുടെ ഭാഗമായി കോഴിക്കോട് ജില്ലയുടെയും മലബാർ മേഖലയുടെയും സമഗ്ര വികസന കാഴ്ചപ്പാടുകൾ രൂപപ്പെടുത്തുന്നതിനായി സംസ്ഥാന ആസൂത്രണ ബോർഡിന്റെ ആഭിമുഖ്യത്തിൽ വിപുലമായ ആശയരൂപീകരണ യോഗം സംഘടിപ്പിച്ചു.
തിരുവനന്തപുരം അന്താരാഷ്ട്ര ചലച്ചിത്ര മേള, കൊച്ചി-മുസിരിസ് ബിനാലെ എന്നിവയ്ക്ക് സമാനമായി കോഴിക്കോടിനും മലബാർ മേഖലയ്ക്കും തനതായ സാംസ്കാരിക വികസന മുഖമുദ്ര സൃഷ്ടിക്കണമെന്ന് ജില്ലാ കളക്ടർ എം.എസ്. മാധവിക്കുട്ടി അഭിപ്രായപ്പെട്ടു. മലബാറിന്റെ ഇന്തോ- അറബിക് സാംസ്കാരിക പൈതൃകവും രുചിവൈവിധ്യവും കോർത്തിണക്കി ഗസൽ ഫെസ്റ്റിവൽ പോലെ ഇവന്റുകള് സംഘടിപ്പിക്കണമെന്നും നിർദ്ദേശിച്ചു. ഇന്ത്യയിലെ അംഗീകൃത 27 തണ്ണീർത്തടങ്ങളിൽ ഒന്നായ സരോവരത്തെ കയ്യേറ്റങ്ങളിൽ നിന്നും അനധികൃത നിർമാണങ്ങളിൽ നിന്നും സംരക്ഷിച്ച് ജൈവ ആവാസവ്യവസ്ഥയായി നിലനിർത്തണം.
ബീച്ചുകൾ ദത്തെടുത്ത് പരസ്യവരുമാനത്തിലൂടെയും ഡെപ്പോസിറ്റ് റീഫണ്ട് സംവിധാനത്തിലൂടെയും മാലിന്യമുക്തമാക്കാൻ സംരംഭകർ സന്നദ്ധത അറിയിച്ചു. അതിവേഗ റെയിൽപാത, കോഴിക്കോട്- വയനാട് അതിവേഗ റെയിൽ ഇടനാഴി, ബേപ്പൂർ തുറമുഖ വികസനം, കരിപ്പൂർ വിമാനത്താവള വികസനം, വിമാനത്താവള കണക്റ്റിവിറ്റി വർധിപ്പിക്കൽ എന്നിവയ്ക്ക് പദ്ധതിയിൽ മുൻഗണന നൽകണമെന്ന് മലബാർ ചേംബർ ഓഫ് കൊമേഴ്സ് പ്രതിനിധികൾ ആവശ്യപ്പെട്ടു.
ക്ഷീരകർഷക മേഖലയിൽ ഗുണമേന്മയുള്ള ബീജം (സെമൻ) ലഭ്യമാക്കുന്നതിനും മികച്ച ഇനം കന്നുകാലികളുടെ പ്രജനനം ഉറപ്പാക്കുന്നതിനും കൂടുതൽ ഫലപ്രദമായ സംവിധാനങ്ങൾ ഒരുക്കേണ്ടതിന്റെ ആവശ്യകത ചർച്ചയിൽ ഉയർന്നു. 20–30 വർഷങ്ങൾക്ക് മുമ്പ് തമിഴ്നാട്, കർണാടക, മഹാരാഷ്ട്ര തുടങ്ങിയ സംസ്ഥാനങ്ങൾക്ക് ലഭ്യമായിരുന്ന ഗുണമേന്മയുള്ള സെമൻ ഇന്ന് കേരളത്തിലെ കർഷകർക്ക് ആവശ്യത്തിന് ലഭ്യമാകാത്ത സാഹചര്യമുണ്ടെന്ന് വിലയിരുത്തലുണ്ടായി.
മികച്ച ഇനങ്ങളിലുള്ള കന്നുകാലികളെ വികസിപ്പിക്കുന്നതിനുള്ള സംവിധാനങ്ങൾ ഫാമുകളിലും കർഷകരുടെ തൊഴുത്തുകളിലും കൂടുതൽ കാര്യക്ഷമമായി നടപ്പാക്കേണ്ടതുണ്ട്.ക്ഷീരകർഷകരുടെ വരുമാനം വർധിപ്പിക്കുന്നതിനായി ഉൽപ്പാദിപ്പിക്കുന്ന ഓരോ ലിറ്റർ പാലിനും ഒന്നോ രണ്ടോ രൂപ വീതം ഇൻസെന്റീവ് നൽകുന്നതും പരിഗണിക്കേണ്ട നിർദേശമായി ഉയർന്നു. ഇത് കർഷകർക്ക് അധികവരുമാനം ഉറപ്പാക്കുന്നതിനൊപ്പം ക്ഷീരമേഖലയെ കൂടുതൽ സുസ്ഥിരമാക്കാനും സഹായിക്കുമെന്ന് വിലയിരുത്തി.
Tags : A.P. Anil Kumar Nattuvishesham Districtnews