നടൻ മമ്മുട്ടിയുടെ മാസ് സിനിമാ ഡയലോഗുകളുമായി മോട്ടോർ വാഹനവകുപ്പ് മെട്രോ തൂണുകളിൽ ഉയർത്തിയ ബോധവത്കരണ ബോർഡുകൾ
കൊച്ചി: വെള്ളിത്തിരയില് കൈയടി നേടിയ സംഭാഷണങ്ങള്ക്ക് ഇനി നിരത്തുകളില് പുതിയ ദൗത്യം. മമ്മൂട്ടിയുടെ മാസ് ഡയലോഗുകള്ക്ക് റോഡ് സുരക്ഷയുടെ പാഠം പകരുന്ന പുതിയ അര്ഥം നല്കി കേരള മോട്ടോര് വാഹന വകുപ്പ്. വാഹനയാത്രക്കാരുടെ മനസില് സുരക്ഷാബോധം ഉറപ്പിക്കുകയെന്ന ലക്ഷ്യത്തോടെ സിനിമയില് മമ്മുട്ടി പറഞ്ഞ മാസ് ഡയലോഗുകള് മെട്രോ തൂണുകളിലെ കൗതുക കാഴ്ചകളായി.
വാഹനമോടിക്കുന്നവര്ക്കും കാല്നടയാത്രക്കാര്ക്കും ഉള്പ്പടെ എല്ലാ റോഡ് ഉപയോക്താക്കള്ക്കും ഉത്തരവാദിത്തബോധം പകരുന്ന സന്ദേശങ്ങളാണ് ടൗണ്ഹാള് മെട്രോ സ്റ്റേഷനു സമീപത്തെ തുണുകളില് നിറഞ്ഞിരിക്കുന്നത്. "സെന്സ് വേണം, സെന്സിബിലിറ്റി വേണം, സെന്സിറ്റിവിറ്റി വേണം' എന്ന ദി കിംഗ് സിനിമയിലെ പ്രശസ്തമായ സംഭാഷണത്തോടൊപ്പം "റോഡ് സെന്സും വേണം' എന്ന വാചകംകൂടി ചേര്ത്ത് റോഡിലെ അച്ചടക്കമില്ലായ്മയ്ക്കെതിരായ ശക്തമായ ഓര്മപ്പെടുത്തലായി.
"കോട്ടയം കുഞ്ഞച്ചന്' സിനിമയിലെ "കളി റോഡില് അല്ല അച്ചായാ...' എന്ന സംഭാഷണത്തെ "റോഡ് റേസ് ട്രാക്കല്ല' എന്ന സന്ദേശവുമായി ബന്ധിപ്പിച്ചിരിക്കുന്നു. വേഗതയും മത്സരബുദ്ധിയും റോഡില് അപകടത്തിന് വഴിയൊരുക്കുമെന്ന ഓര്മപ്പെടുത്തലാണിത്.
അടുത്തിടെ എറണാകുളം ജില്ലയില് കൗമാരക്കാര് ഓടിച്ച ആഡംബര കാറുകള് ഇടിച്ച് നാല് ഇരുചക്രവാഹന യാത്രക്കാര് മരിച്ച സംഭവത്തിന്റെ പശ്ചാത്തലത്തില് മാതാപിതാക്കള്ക്കുള്ള സന്ദേശവും പ്രചാരണത്തിലുണ്ട്. "പപ്പയുടെ സ്വന്തം അപ്പൂസ്' സിനിമയിലെ "ആരു പറഞ്ഞാലും നീ മാത്രം പറയരുത് ഗോപാ... മോനെ സ്നേഹിച്ചില്ലാന്ന്' എന്ന സംഭാഷണത്തിനൊപ്പം കുട്ടികള്ക്ക് വാഹനം ഓടിക്കാന് നല്കുന്നത് സ്നേഹപ്രകടനമല്ലെന്ന മുന്നറിയിപ്പും നല്കുന്നു. "സ്നേഹം കാണിക്കാനായി വണ്ടി ഓടിക്കാന് കൊടുത്തേക്കല്ലേ' എന്ന സന്ദേശം മാതാപിതാക്കളുടെ ഉത്തരവാദിത്തത്തിലേക്കാണ് വിരല്ചൂണ്ടുന്നത്.
"ഭീഷ്മപര്വം' സിനിമയിലെ "ചാമ്പിക്കോ' എന്ന പ്രയോഗത്തിനും പുതിയ രൂപം നല്കിയിട്ടുണ്ട്. 'നിയമം പാലിച്ചു മാത്രം' എന്ന സന്ദേശത്തിലൂടെ ഗതാഗതനിയമങ്ങളുടെ പ്രാധാന്യം ഓര്മിപ്പിക്കുന്നു. 'ചട്ടമ്പിനാട്' സിനിമയിലെ "നിര്ത്തിഗോ... ഇതിവിടെ നിര്ത്തിഗോ' എന്ന സംഭാഷണം ഉപയോഗിച്ച് ലൈന് അച്ചടക്കം പാലിക്കാത്തവര്ക്കും അപകടകരമായി വാഹനങ്ങള് വെട്ടിച്ചുമാറ്റുന്നവര്ക്കും മുന്നറിയിപ്പ് നല്കുന്നു.
മോട്ടോര് വാഹന വകുപ്പ് ഉദ്യോഗസ്ഥര് തന്നെയാണ് ഇത്തരമൊരു ആശയത്തിന് പിന്നില്. മോട്ടോര് വാഹന വകുപ്പ് ആവിഷ്കരിച്ച "ജീവസുയാത്ര മിഷന്റെ' ബ്രാന്ഡ് അംബാസഡറാണ് മമ്മുട്ടി.