ചാവക്കാട്: കാറ്റിലും മഴയിലും ചാവക്കാട് മേഖലയിൽ മൂന്നിടത്ത് നാശം. കനത്തമഴയിൽ വടക്കേക്കാട് വീടിന്റെ ചുമർഇടിഞ്ഞുവീണു. 13-ാം വാർഡ് കല്ലൂർ പള്ളിക്കു തെക്കുഭാഗം കണ്ടന്പുള്ളി പരേതനായ മണിയുടെ ഭാര്യ പത്മിനി താമസിക്കുന്ന ഓടുമേഞ്ഞ വീടിന്റെ പിൻഭാഗത്തെ ചുമരാണ് ഇടിഞ്ഞുവീണത്. പത്മിനി ഒറ്റയ്ക്കാണ് ഇവിടെ താമസം. ചുമർ പുറത്തേക്കു വീണതിനാൽ അപകടം ഒഴിവായി.
പുന്നയൂർക്കുളത്ത് തൃപ്പറ്റ് കിട്ടപ്പടി റോഡിൽ ചേന്ദ്രാൻ ഗോപിയുടെ വീട്ടുമുറ്റത്തെ കിണർ വലിയ ശബ്ദത്തോടുകൂടി അരമതിലിനുതാഴെ ഇടിഞ്ഞു. ഇതോടൊപ്പം ചുറ്റുമുള്ള മണ്ണും കിണറ്റിലടിഞ്ഞു.
ശക്തമായ കാറ്റിൽ ബ്ലാങ്ങാട് ബീച്ചിൽ ഷെഡുകൾ തകർന്നു. മത്സ്യം സംസ്കരിക്കുന്ന രണ്ടു ഷെഡുകളാണ് കാറ്റിൽ തകർന്നത്. മേൽക്കൂര നിലംപതിച്ചു. വൈദ്യുതകന്പികൾ പൊട്ടിവീണു.