ഈ സാഹചര്യത്തെക്കുറിച്ച് വേണ്ടത്ര അവബോധമില്ലാത്തതിനാലും അത് കൈകാര്യം ചെയ്യാൻ പരിശീലനം ലഭിച്ച മാനസികാരോഗ്യ വിദഗ്ധരുടെ അപര്യാപ്തത മൂലവും ഈ പ്രശ്നത്തിന് പ്രത്യേക വെല്ലുവിളികളുണ്ട്. പ്രാഥമിക പ്രതിരോധം നമ്മുടെ സ്കൂളുകളിലും കോളജുകളിലും ആരംഭിക്കണം. അധ്യാപകർ, വിദ്യാർഥികൾ, രക്ഷിതാക്കൾ, സ്കൂൾ-കോളജ് മാനേജർമാർ, സർക്കാർ എന്നിവരിൽ ആത്മഹത്യ പ്രതിരോധിക്കേണ്ടതിന്‍റെ ആവശ‍്യകതയെയെക്കുറിച്ചുള്ള അവബോധം വർധിപ്പിക്കണം. എല്ലാ ആളുകൾക്കും ബാധകമായതിനാൽ ഇതിനെ സാർവത്രിക പ്രതിരോധം എന്നു വിളിക്കുന്നു.
എന്താണ് പരിഹാരം? ആത്മഹത്യ തടയുന്നതിനുള്ള പ്രധാന സംരംഭത്തെ ‘ലൈഫ് സ്കിൽസ് അപ്രോച്ച്’ എന്നാണ് വിളിക്കുന്നത്. വിദ്യാർഥികളെ ജീവിത നൈപുണ്യങ്ങൾ പഠിപ്പിക്കുക എന്നതാണ് പ്രധാന ഘടകം. ദേശീയ വിദ്യാഭ്യാസ നയം 2020 ഇത് ശിപാർശ ചെയ്യുന്നു. എന്താണ് ജീവിത നൈപുണ്യങ്ങൾ? ദൈനംദിന പ്രശ്നങ്ങൾ, വെല്ലുവിളികൾ, സമ്മർദം എന്നിവ നേരിടാൻ അനിവാര്യമായ കഴിവുകളാണിവ. ഉദാ: വിമർശനാത്മക ചിന്ത, ഭാവാത്മക ചിന്ത, തീരുമാനമെടുക്കൽ, പ്രശ്നപരിഹാരം, വ്യക്തിബന്ധങ്ങൾ, ഫലപ്രദമായ ആശയവിനിമയം, വികാരങ്ങളെ നേരിടൽ, സമ്മർദത്തെ നേരിടൽ, സ്വയം അവബോധം, സഹാനുഭൂതി.
ആത്മഹത്യ തടയൽ ജീവസംരക്ഷണത്തിന് അടിയന്തര മുൻഗണന നൽകണം. മാനസികാരോഗ്യ സേവനങ്ങൾ ലഭ്യമാക്കുക, കീടനാശിനികളുടെ വില്പന നിയന്ത്രിക്കുക, ഉത്തരവാദിത്വമുള്ള മാധ്യമ റിപ്പോർട്ടിംഗ്, വിദ്യാഭ്യാസ, ബോധവത്കരണ പരിപാടികൾ, ഉയർന്ന അപകടസാധ്യതയുള്ള ഗ്രൂപ്പുകൾക്ക് പ്രത്യേക ശ്രദ്ധ നൽകുക, ജീവിതനൈപുണ്യങ്ങൾ പഠിപ്പിക്കുക, പ്രതിസന്ധി കേന്ദ്രങ്ങൾ, ടെലിഫോൺ ഹെൽപ്പ് ലൈനുകൾ എന്നിവ പ്രധാനപ്പെട്ടതാണ്. കേന്ദ്ര-സംസ്ഥാന സർക്കാരുകളുടെ ഒരു സുപ്രധാന നയമായി ആത്മഹത്യ തടയൽ ഉൾപ്പെടുത്തണം. എല്ലാ താലൂക്കുകളിലും എല്ലാ ജില്ലയിലും മാനസികാരോഗ്യ സംരക്ഷണ സൗകര്യങ്ങൾ ലഭ്യമാക്കുക. പ്രധാനപ്പെട്ടതും അടിയന്തരവുമായ സന്ദേശം ഇതാണ്: ആത്മഹത്യകൾ തടയാവുന്നതാണ്. അത് ചെയ്യണം.
(തിരുവല്ല പുഷ്പഗിരി മെഡിക്കൽ കോളജിലും പാലാ മാർ സ്ലീവ മെഡിസിറ്റി സൈക്യാട്രി
വിഭാഗത്തിലും പ്രഫസറായ ലേഖകൻ വേൾഡ് ഫെഡറേഷൻ ഫോർ മെന്‍റൽ ഹെൽത്ത്, ലണ്ടൻ വൈസ് പ്രസിഡന്‍റുമാണ്)