പാലാ നഗരസഭ കൗൺസിൽ യോഗത്തിൽ നിന്ന്.
കോട്ടയം: പാലാ നഗരസഭ കൗൺസിൽ യോഗത്തിനിടെ ചെയർപേഴ്സന്റെ മൈക്ക് തട്ടി മാറ്റിയ സംഭവത്തിൽ കൗൺസിലർ ബിനു പുളിക്കകണ്ടത്തിനെതിരെ പൊലിസിൽ പരാതി. നഗരസഭാ ചെയർപേഴ്സൺ മായ രാഹുലാണ് പാലാ പൊലിസിൽ പരാതി നൽകിയത്.
കൗൺസിൽ യോഗത്തിൽ ചെയർപേഴ്സൺ സംസാരിക്കുന്നതിനിടെയാണ് ബിനു പുളിക്കകണ്ടം മൈക്ക് തട്ടി മാറ്റിയത്. നഗരസഭയിലെ ശുചീകരണ പ്രവർത്തനങ്ങളുമായി ബന്ധപ്പെട്ട് നടപ്പാക്കുന്ന പദ്ധതികൾ കൗൺസിലിൽ ചർച്ച ചെയ്തില്ലെന്ന് ആരോപിച്ചായിരുന്നു പ്രതിഷേധം.
സംഭവത്തെ തുടർന്ന് യുഡിഎഫ് കൗൺസിലർമാരും ഡയസിന് മുന്നിലെത്തി പ്രതിഷേധിച്ചു. ഇതിനിടെ അജണ്ടകൾ പാസാക്കിയതായി പ്രഖ്യാപിച്ച ചെയർപേഴ്സൺ മായ രാഹുൽ യോഗത്തിൽ നിന്ന് ഇറങ്ങിപ്പോയി.
നഗരസഭയുടെ പൊതുമുതലിന് നാശനഷ്ടമുണ്ടാക്കിയെന്നും കൗൺസിൽ യോഗത്തിൽ ഭീകരാന്തരീക്ഷം സൃഷ്ടിച്ചെന്നുമാണ് പരാതിയിലെ ആരോപണം. സംഭവത്തെ തുടർന്ന് വനിതാ കൗൺസിലർമാർക്ക് മാനസിക ബുദ്ധിമുട്ടുണ്ടായതായും പരാതിയിൽ പറയുന്നു.
Tags : Binu Pulickakandam Pala Municipality Pala Kottayam Kerala Police Complaint Deepika DeepikaNewspaper BreakingNews NewsUpdate Headlines CurrentAffairs DailyNews InDepth NewsFlash