30

തിരുവനന്തപുരം: കേരളത്തില്‍ പിഎം ശ്രീ പദ്ധതി നടപ്പാക്കേണ്ടെന്ന് എഐസിസി നേതൃത്വം മുഖ്യമന്ത്രി വി.ഡി.സതീശന് നിര്‍ദ്ദേശം നല്‍കി. എഐസിസി പ്രസിഡന്‍റ് മല്ലികാര്‍ജുന്‍ ഖാര്‍ഗെ, രാഹുല്‍ ഗാന്ധി, പ്രിയങ്കാ ഗാന്ധി, സംഘടന ചുമതലയുള്ള എഐസിസി ജനറല്‍ സെക്രട്ടറിമാരായ ദീപാദാസ് മുന്‍ഷി, കെ.സി. വേണുഗോപാല്‍ ഉള്‍പ്പെടെയുള്ള നേതാക്കള്‍ നേരത്തെ ഇക്കാര്യത്തില്‍ തീരുമാനം കൈക്കൊണ്ട് മുഖ്യമന്ത്രി വി.ഡി. സതീശനോട് നിര്‍ദേശം നല്‍കുകയായിരുന്നു.

ന്യൂഡല്‍ഹിയില്‍ ചേര്‍ന്ന കോണ്‍ഗ്രസിന്‍റെ മീറ്റിംഗിലാണ് എഐസിസി നേതൃത്വം മുഖ്യമന്ത്രി വി.ഡി.സതീശനോട് ഇക്കാര്യത്തിലുള്ള ഹൈക്കമാന്‍ഡിന്‍റെ നിലപാട് വ്യക്തമാക്കിയത്. മുഖ്യമന്ത്രിയും ഈ മീറ്റിംഗില്‍ പങ്കെടുത്തു.

കോണ്‍ഗ്രസ് ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാര്‍ ആരും പിഎം ശ്രീ പദ്ധതിയുമായി മുന്നോട്ട് പോകരുതെന്നാണ് എഐസിസി നല്‍കിയിരിക്കുന്ന നിര്‍ദേശം. വിദ്യാഭ്യാസ മേഖലയെ കാവിവല്‍ക്കരിക്കാനുളള ബിജെപിയുടെ നീക്കങ്ങളെ ചെറുക്കാന്‍ വേണ്ട ബദല്‍ നടപടികള്‍ സ്വീകരിക്കണമെന്നാണ് ഹൈക്കമാന്‍ഡിന്‍റെ നിര്‍ദേശം.

വിദ്യാഭ്യാസരംഗത്തെ വിദഗ്ധരെ ഉള്‍പ്പെടുത്തി സെമിനാറുകളും ക്ലാസുകളും സംഘടിപ്പിക്കണമെന്നും പുതിയ പദ്ധതി നടപ്പാക്കാന്‍ കോണ്‍ഗ്രസ് ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാര്‍ തയാറാകണമെന്നാണ് ഹൈക്കമാന്‍ഡ് നല്‍കിയിരിക്കുന്ന നിര്‍ദേശം. യുവാക്കള്‍ ബിജെപിയുടെ ആശയങ്ങളില്‍ ആകൃഷ്ടരാകാതെ നോക്കണമെന്നുള്‍പ്പെടെയുള്ള നിര്‍ദേശങ്ങളാണ് ഹൈക്കമാന്‍ഡ് മുഖ്യമന്ത്രിക്ക് നല്‍കിയിരിക്കുന്നത്.

കഴിഞ്ഞ എല്‍ഡിഎഫ് സര്‍ക്കാരിന്‍റെ കാലത്ത് ഒപ്പിട്ട പിഎം ശ്രീ പദ്ധതിയില്‍ നിന്നും സംസ്ഥാനത്തിന് പിന്‍മാറാന്‍ സാധിക്കില്ലെന്ന നിലപാടാണ് മുഖ്യമന്ത്രി വി.ഡി.സതീശനുള്ളത്. യുഡിഎഫിലെ പ്രധാന ഘടകകക്ഷിയായ ലീഗിന് പിഎം ശ്രീയോട് യോജിപ്പില്ല. പിഎം ശ്രീയുടെ ഭാഗമായാല്‍ കൂടുതല്‍ കേന്ദ്ര ഫണ്ട് ലഭിക്കുമെന്നും ഇത് വിദ്യാഭ്യാസ മേഖലയ്ക്ക് കൂടുതല്‍ പുരോഗതി ഉണ്ടാകുമെന്ന് കോണ്‍ഗ്രസ് പാര്‍ട്ടിയിലെ ഒരു വിഭാഗം അഭിപ്രായപ്പെടുന്നു.

എന്നാല്‍ എല്‍ഡിഎഫ് നേതാക്കള്‍ കോണ്‍ഗ്രസിനെയും യുഡിഎഫ് സര്‍ക്കാരിനെയും കടന്നാക്രമിക്കുന്ന സ്ഥിതിയും നിലനില്‍ക്കുന്ന ഘട്ടത്തിലൂടെയാണ് മുഖ്യമന്ത്രിയും വിദ്യാഭ്യാസ മന്ത്രിയും ഉള്‍പ്പെടെ കടന്ന് പോകുന്നത്. പിഎം ശ്രീ പദ്ധതിയില്‍ നിന്നും കേരളം പിന്‍മാറിയാല്‍ വിദ്യാഭ്യാസ മേഖലക്ക് ലഭിക്കുന്ന ഫണ്ട് മുഴുവനും വെട്ടിക്കുറയ്ക്കില്ലെന്ന് കേന്ദ്ര വിദ്യാഭ്യാസ മന്ത്രി ലീഗ് എംപിയുടെ ചോദ്യത്തിന് ലോക്‌സഭയില്‍ മറുപടി നല്‍കിയിരുന്നു.

സംസ്ഥാനത്തെ നിലവിലെ സാമ്പത്തിക സ്ഥിതി പരിഗണിച്ച് കുടുതല്‍ കേന്ദ്രസഹായം ലഭിക്കുന്നത് വികസനത്തിന് ആക്കം കൂട്ടുമെന്ന നിലപാടാണ് മുഖ്യമന്ത്രിയ്ക്കും മറ്റ് മന്ത്രിമാര്‍ക്കുമുള്ളത്. എഐസിസിയുടെ നിര്‍ദേശം എങ്ങനെ നടപ്പിലാക്കുമെന്ന് മന്ത്രിസഭ ചര്‍ച്ച ചെയ്ത് തീരുമാനിക്കും.
കോണ്‍ഗ്രസ് ഭരിക്കുന്ന സംസ്ഥാനങ്ങളില്‍ പിഎം ശ്രീക്ക് ബദലായി മാതൃകപരമായ മറ്റ് പദ്ധതികള്‍ നടപ്പിലാക്കണമെന്നാണ് എഐസിസിയുടെ കര്‍ശന നിര്‍ദേശം.

Tags : PMSHRI Kerala AICC ChiefMinister VDSatheesan