കോടഞ്ചേരി: പൊതു സമൂഹത്തെ വെല്ലുവിളിച്ചു ഭീഷണിയുടെ മുൾമുനയിൽ നിർത്താൻ ലക്ഷ്യമിട്ട് വർഗീയ കക്ഷികൾ നടത്തുന്ന പ്രവർത്തനങ്ങളെ നിയന്ത്രിക്കുവാനും ഇത്തരക്കാർക്കെതിരേ നിയമ നടപടി സ്വീകരിക്കാനും ഭരണാധികാരികൾ തയ്യാറാകണമെന്ന് കത്തോലിക്ക കോൺഗ്രസ് താമരശേരി രൂപത ജനറൽ ബോഡി യോഗം ആവശ്യപ്പെട്ടു.
28 - ന് ശനിയാഴ്ച കോടഞ്ചേരിയിൽ നടക്കുന്ന കത്തോലിക്ക കോൺഗ്രസ് 104-ാം വാർഷിക സമ്മേളനവും രൂപത പ്രതിനിധി സമ്മേളനവും ഉച്ചകഴിഞ്ഞ് നടക്കുന്ന റാലിയും പൊതുയോഗവും വിജയിപ്പിക്കുന്നതിനായി കോടഞ്ചേരി പാരിഷ് ഹാളിൽ ചേർന്ന യോഗത്തിൽ ആവശ്യം ഉയർന്നു.
സമൂഹത്തിൽ കലാപമഴിച്ചുവിടാൻ ഉതകുന്ന വിധത്തിൽ മനസാക്ഷിക്ക് നിരക്കാത്ത പ്രവർത്തനങ്ങൾക്കും ഭീഷണികൾക്കും നേതൃത്വം നല്കുന്ന തീവ്രവാദഗ്രൂപ്പുകളെ അടിയന്തിരമായി കണ്ടെത്തി കസ്റ്റഡിയിൽ എടുക്കാൻ പോലീസ് അധികാരികൾ തയ്യാറാകണമെന്ന് യോഗം ആവശ്യപ്പെട്ടു.
സമ്മേളനത്തോടനുബന്ധിച്ച് 28 - ന് രാവിലെ 9.45 - ന് പതാക ഉയർത്തും തുടർന്ന് പ്രതിനിധി സമ്മേളനം ഓരോ യൂണിറ്റിൽ നിന്നും അഞ്ച് പ്രതിനിധികൾ വീതം പങ്കെടുക്കും. തുടർന്ന് 1.30 ന് സംഘടനയുടെ വാർഷിക ജനറൽ ബോഡി യോഗത്തിൽ, വിവിധ രംഗങ്ങളിൽ മികച്ച പ്രവർത്തനങ്ങൾ കാഴ്ചവെച്ചവരെ ആദരിക്കും. തുടർന്ന് താമരശേരി രൂപതയിലെ വിവിധ സംഘടനകളുടെ നേതൃത്വത്തിൽ സമുദായ ശാക്തീകരണ വിശ്വാസ സംരക്ഷണറാലി നടക്കും. റാലിക്ക് ശേഷം കോടഞ്ചേരി ടൗണിൽ നടക്കുന്ന പൊതു സമ്മേളനം ബിഷപ്പ് മാർ റെമിജിയോസ് ഇഞ്ചനാനിയിൽ ഉദ്ഘാടനം ചെയ്യും. പൊതുസമ്മേളനത്തിലും വിവിധ യോഗങ്ങളിലും
കെസിഎഫ് സംസ്ഥാന പ്രസിഡന്‍റ് കെ.എഫ്. ഫ്രാൻസീസ്, കത്തോലിക്ക കോൺഗ്രസ് ഗ്ലോബൽ സമിതി പ്രസിഡന്‍റ് അഡ്വ. ബിജു പറയനിലം, ജനറൽ സെക്രട്ടറി രാജീവ് ജോസഫ്, രൂപത പ്രസിഡന്‍റ് ഡോ. ചാക്കോ കാളം പറന്പിൽ, സെക്രട്ടറി അനീഷ് വടക്കേൽ, ഗ്ലോബൽ ഭാരവാഹികളായ പ്രൊ. ജോസുകുട്ടി ഒഴുകയിൽ, ബെന്നി ആന്‍റണി, ട്രീസ സെബാസ്റ്റ്യൻ, ബേബി പെരുമാലിൽ, അഡ്വ. ജസ്റ്റിൻ പള്ളി വാതുക്കൽ, അമൽ സിറിയക്, ഷാജി കണ്ടത്തിൽ, സജി കരോട്ട്, വിവിധ സംഘടന നേതാക്കളായ അഗസ്റ്റിൻ, കെസിവൈഎം, മാതൃവേദി തുടങ്ങിയ വിവിധ സംഘടനകളുടെ രൂപത ഭാരവാഹികളും നേതൃത്വം നൽകും.