പുൽപ്പള്ളി: ദേശീയ കർഷക തൊഴിലാളി ഫെഡറേഷൻ(ഡികെടിഎഫ്) മുള്ളൻകൊല്ലി മണ്ഡലം കമ്മിറ്റിയുടെ നേതൃത്വത്തിൽ പാടിച്ചിറ കുടുംബാരോഗ്യ കേന്ദ്രത്തിനു മുന്നിൽ ധർണ നടത്തി. ആദിവാസികളും ദുർബല ജനവിഭാഗങ്ങളിൽപ്പെട്ടവരും അടക്കം നൂറുകണക്കിനാളുകൾ ചികിത്സയ്ക്കു ആശ്രയിക്കുന്ന കുടുംബാരോഗ്യ കേന്ദ്രത്തിൽ സ്ഥിരം ഡോക്ടറെ നിയമിക്കണമെന്നു ആവശ്യപ്പെട്ടായിരുന്നു സമരം. കിടത്തിച്ചികിത്സയ്ക്കുള്ള കെട്ടിടവും ഡോക്ടേഴ്സ് ക്വാർട്ടേഴ്സും ഇവിടെയുണ്ട്. എങ്കിലും സ്ഥിരം ഡോക്ടർമാരെ നിയമിക്കാൻ ഉത്തരവാദപ്പെട്ടവർ തയാറാകുന്നില്ല. ഇത് പലപ്പോഴും ഒപി പ്രവർത്തനത്തെയും ബാധിക്കുകയാണ്.
പാടിച്ചിറയിൽ ചികിത്സയ്ക്കെത്തുന്നവർ ഡോക്ടറുടെ അഭാവത്തിൽ പുൽപ്പള്ളി സാമൂഹികാരോഗ്യകേന്ദ്രത്തിലേക്കോ സ്വകാര്യ ആശുപത്രികളിലേക്കോ പോകേണ്ട സ്ഥിതിയാണ്. ഈ പശ്ചാത്തലത്തിലാണ് ഡികെടിഎഫ് ധർണ സംഘടിപ്പിച്ചത്. കെപിസിസി ജനറൽ സെക്രട്ടറി കെ.കെ. ഏബ്രാഹം ഉദ്ഘാടനം ചെയ്തു. ഡികെടിഎഫ് മുള്ളൻകൊല്ലി മണ്ഡലം പ്രസിഡന്‍റ് സി.ഡി. തങ്കച്ചൻ അധ്യക്ഷത വഹിച്ചു.
ജില്ലാ പ്രസിഡന്‍റ് എക്കണ്ടി മൊയ്തൂട്ടി, ഷാജി ചുള്ളിയോട്, വർഗീസ് മുരിയൻകാവിൽ, ശിവരാമൻ പറക്കുഴി,വി.ടി. തോമസ്, പി.കെ. രാജൻ, ഷിനോജ് കളപ്പുര, സി.കെ. ജോർജ്, തോമസ് പാഴൂക്കാല, മാത്യു ഉണ്ണിയാപ്പള്ളി, ജോയി വാഴയിൽ, സ്റ്റീഫൻ പുകുടിയിൽ, വി.എം. പൗലോസ്, ക്ലീറ്റസ്, ലില്ലി തങ്കച്ചൻ, ലിസി സാബു, ത്രേസ്യാമ്മ കീരിക്കുന്നേൽ, പദ്മകുമാരി എന്നിവർ പ്രസംഗിച്ചു.