ഉറപ്പും വിശ്വാസവുമായി മുന്നണികൾ : Deepika.com Nattu Visesham

എസ്.ആർ.സുധീർകുമാർ
കൊല്ലം: കഴിഞ്ഞ നിയമസഭാ തെരഞ്ഞെടുപ്പിനെ അപേക്ഷിച്ച് പോളിംഗ് ശതമാനം അൽപ്പം കൂടി വർധിക്കുമെന്ന സാഹചര്യത്തിൽ വോട്ടർമാരുടെ പ്രതികരണം ആർക്ക് അനുകൂലമാകുമെന്ന കാര്യത്തിൽ കണക്കുകൂട്ടലിന്‍റെ തിരക്കിലാണ് മുന്നണികളും സ്ഥാനാർഥികളും. പോളിംഗ് ശതമാനം വർ‌ധിക്കുന്നത് മൂന്ന് മുന്നണികളും പ്രതീക്ഷയോടെയാണ് കാണുന്നത്. എങ്കിലും അൽപ്പം ആശങ്കയും ആകാംക്ഷയും എല്ലാവരിലുമുണ്ട്.
കഴിഞ്ഞ ദിവസത്തെ കണക്കനുസരിച്ച് ജില്ലയിൽ 73.16 ശതമാനം പേരാണ് വോട്ട് രേഖപ്പെടുത്തിയത്. തെരഞ്ഞെടുപ്പ് ഉദ്യോഗസ്ഥർ, അവശ്യസേവന വിഭാഗത്തിലെ ജീവനക്കാർ, ഭിന്നശേഷിക്കാർ, കോവിഡ് രോഗികൾ, നിരീക്ഷണത്തിൽ കഴിയുന്നവർ, 80 വയസിന് മുകളിൽ ഉള്ളവർ തുടങ്ങിയവരുടെ തപാൽ വോട്ടുകൾ കൂടി വരുന്പോൾ പോളിംഗ് ശതമാനം കുറച്ചുകൂടി വർധിക്കും. ഇതിന്‍റെ കൃത്യമായ കണക്ക് ഔദ്യോഗികമായി ലഭ്യമല്ല. 2016-ലെ നിയമസഭാ തെരഞ്ഞെടുപ്പിൽ ജില്ലയിൽ 75.23 ശതമാനം പേരാണ് സമ്മതിദാനാവകാശം വിനിയോഗിച്ചത്. ഇക്കുറി അൽപ്പം കൂടി വർധനയുണ്ടാകുമെന്ന കാര്യം നിസംശയം പറയാം. 77 ശതമാനം വരെ ഇത് വർധിച്ചേക്കാം.
മൂന്നുമുന്നണികളുടെയും ബൂത്തുതല വിശകലനങ്ങൾ കഴിഞ്ഞു. ഇനി മണ്ഡലം തല വിശകലനങ്ങളും വിലയിരുത്തലുകളും ഉണ്ടാകും. പിന്നീട് ഇത് ജില്ലാതലത്തിൽ കൈമാറും. പ്രാഥമിക വിശകലനത്തിൽ എല്ലാ മുന്നണികളും വലിയ വിജയപ്രതീക്ഷയാണ് വച്ചുപുലർത്തുന്നത്.
കാര്യമായ അടിയൊഴുക്കുകൾ പല മണ്ഡലങ്ങളിലും നടന്നിട്ടുണ്ടെന്ന് നിസംശയം പറയാം. നിഷ്പക്ഷ വോട്ടുകളും നവാഗത വോട്ടുകളും ഏത് പക്ഷത്തേക്കാണ് പോയതെന്ന കാര്യത്തിൽ നേതൃത്വങ്ങൾക്ക് കൃത്യമായ വ്യക്തത വരുത്താൻ കഴിയാത്ത സ്ഥിതിയുമുണ്ട്. സ്ത്രീവോട്ടർമാരുടെ നിലപാടും വോട്ടെടുപ്പിൽ നിർണായകമാകാനാണ് സാധ്യത. കഴിഞ്ഞദിവസം ഉച്ചകഴിഞ്ഞാണ് സ്ത്രീ വോട്ടർമാർ കൂട്ടത്തോടെ വോട്ടിടാനെത്തിയത്. ഈ വരവ് എന്തോ കരുതിയാണെന്ന് വേണമെങ്കിൽ വ്യാഖ്യാനിക്കാം.
ഇതൊക്കെയാണെങ്കിലും എല്ലാ സീറ്റുകളിലും വിജയം ഉറപ്പാണെന്നാണ് ഇടതുനേതൃത്വത്തിന്‍റെ അവകാശവാദം. ഇതുപറയുന്പോഴും നൂറുമേനി വിജയം ഇക്കുറി എളുപ്പമല്ലെന്ന ചിന്തയും അവർക്കുണ്ട്. പരമാവധി എട്ട് സീറ്റുകൾ വരെ എൽഡിഎഫ് നേടിയേക്കാം. ഇടത് അനുകൂല തരംഗമുണ്ടായാൽ എല്ലാം തൂത്തുവാരാൻ അവർക്ക് കഴിഞ്ഞേക്കാം. അതിനുള്ള സാധ്യത വളരെ കുറവാണ്.
യുഡിഎഫും വലിയ ആത്മവിശ്വാസത്തിൽ തന്നെയാണ്. ആറുമുതൽ ഒന്പത് സീറ്റുകൾ വരെ തങ്ങൾക്ക് അനുകൂലമാകുമെന്നാണ് ജില്ലാ നേതൃത്വത്തിന്‍റെ വിശ്വാസം. ആറ് സീറ്റുകൾ അവർ ഉറപ്പിക്കുകയും ചെയ്യുന്നു. അട്ടിമറി വിജയങ്ങളും യുഡിഎഫ് പ്രതീക്ഷിക്കുന്ന കൂട്ടത്തിലുണ്ട്.
എൻഡിഎയും ഇതുപോലൊരു വിശ്വാസമാണ് വച്ചുപുലർത്തുന്നത്. ആറ് മണ്ഡലങ്ങളിൽ കടുത്ത മത്സരം കാഴ്ചവയ്ക്കാനായതായി ബിജെപി ജില്ലാ നേതൃത്വം വിലയിരുത്തുന്നു. ഒരു സീറ്റിൽ വിജയം ഉറപ്പെന്നും അവകാശപ്പെടുന്നു.
ചാത്തന്നൂരിൽ എൻഡിഎ അക്കൗണ്ട് തുറക്കുമെന്ന് അവർ തറപ്പിച്ച് പറയുന്നു. അവിടെ എൻഡിഎയും എൽഡിഎഫും തമ്മിലായിരുന്നു മത്സരമെന്നും യുഡിഎഫ് മൂന്നാം സ്ഥാനത്തായിരിക്കുമെന്നാണ് എൻഡിഎയുടെ വിലയിരുത്തൽ. ഇത് ശരിവയ്ക്കുന്ന നിലപാടിലാണ് എൽഡിഎഫ് എങ്കിലും വിജയം തങ്ങൾക്കായിരിക്കുമെന്ന് അവരും അവകാശപ്പെടുന്നു.
കഴിഞ്ഞ തവണ ഇവിടെ യുഡിഎഫ് മൂന്നാം സ്ഥാനത്തായിരുന്നു. എൻഡിഎയാണ് രണ്ടാമത് എത്തിയത്. അതുകൊണ്ടുതന്നെ 2016-ലെ നാണക്കേട് ഒഴിവാക്കി മണ്ഡലം തിരിച്ച് പിടിക്കുമെന്ന് യുഡിഎഫും അവകാശപ്പെടുന്നു.
ജില്ലയിൽ ഏറ്റവും കനത്ത പോളിംഗ് നടന്നത് കരുനാഗപ്പള്ളിയിലാണ്. 78.55 ശതമാനം പേർ ഇവിടെ വോട്ട് രേഖപ്പെടുത്തി. അന്തിമ കണക്കിൽ ഇവിടത്തെ പോളിംഗ് ശതമാനം 80 കടന്നാലും അത്ഭുതപ്പെടാനില്ല. യുഡിഎഫും എൽഡിഎഫും തമ്മിൽ കടുത്ത മത്സരമാണ് ഇവിടെ നടന്നത്. അട്ടിമറി വിജയം യുഡിഎഫ് പ്രതീക്ഷിക്കുകയും ചെയ്യുന്നുണ്ട്.
ഇഞ്ചോടിഞ്ച് മത്സരം നടന്ന ചവറയിലും കുന്നത്തൂരിലും പോളിംഗ് ശതമാനം ആദ്യകണക്കിൽ തന്നെ 75 കടന്നു. ചവറ ഷുവർ സീറ്റാണെന്നാണ് യുഡിഎഫ് വിലയിരുത്തൽ. കുന്നത്തൂരും ഇത്തവണ യുഡിഎഫ് ഉറപ്പിക്കുന്നു.
കൊട്ടാരക്കര, പുനലൂർ, ചടയമംഗലം, ഇരവിപുരം, ചാത്തന്നൂർ, പത്തനാപുരം, കൊല്ലം, കുണ്ടറ എന്നിവ നിലനിർത്താൻ കഴിയുമെന്നാണ് എൽഡിഎഫ് ജില്ലാ നേതൃത്വം കരുതുന്നത്. എന്നാൽ പത്തനാപുരത്തും കുണ്ടറയിലും കൊല്ലത്തും അട്ടിമറി വിജയം ലഭിക്കുമെന്ന പ്രതീക്ഷയിലാണ് യുഡിഎഫും.
തെരഞ്ഞെടുപ്പ് പ്രചാരണത്തിന്‍റെ തുടക്കത്തിലുണ്ടായിരുന്ന മേൽക്കൈ അതിനുശേഷം തുടരെ വന്ന വിവാദങ്ങളോടെ അവർക്ക് നഷ്ടപ്പെട്ടുവെന്നാണ് രാഷ്ട്രീയ നിരീക്ഷകരടക്കം കരുതുന്നത്. അഞ്ച് തീരദേശ മണ്ഡലങ്ങളുള്ള ജില്ലയിൽ ആഴക്കടൽ മത്സ്യബന്ധനവുമായി ബന്ധപ്പെട്ട് യുഡിഎഫ് ഉയർത്തിയ വിവാദങ്ങൾ ഏശിയാൽ ഇടതിന്‍റെ നില പരുങ്ങലിലാകും.
പ്രതീക്ഷയർപ്പിച്ച സീറ്റുകളിൽ പലതിലും ഫലം പ്രവചനാതീതമാണെന്ന സൂചനയാണ് ഇപ്പോഴത്തെ പോളിംഗ് ശതമാനം നൽ‌കുന്നത്.