കൃഷിയുടെ ഉപാസകൻ സഭയുടെ അമരത്തേക്ക് : Deepika.com Nattu Visesham

PATHANAMTHITTA

കൃഷിയുടെ ഉപാസകൻ സഭയുടെ അമരത്തേക്ക്

Saturday, January 16, 2021 10:48 PM IST

കോട്ടയം: ഹരിത ഇടവകകൾക്കും പരിസ്ഥിതി സംരക്ഷണത്തിനും കാർഷിക ഭദ്രതയ്ക്കും പ്രാധാന്യം നൽകുന്ന സിഎസ്ഐ മധ്യകേരള മഹായിടവകയുടെ അമരത്തേക്ക് ഒരു പൂർണ കർഷകൻ കടന്നു വരുന്നു. കേരളത്തിനും പുറത്തും കൃഷിയുടെ നൂതന സാധ്യതകൾ വികസിപ്പിച്ച റവ. ഡോ. സാബു കെ. ചെറിയാൻ പുതിയ ബിഷപ്പായി ചുമതലയേൽക്കുന്പോൾ സഭ വീണ്ടും ഹരിത സാധ്യതകളിലേക്കു കടക്കുകയാണ്.

ഒരു ഇടവകയും കുടുംബവും ഭക്ഷ്യ ഭദ്രതയിൽ സ്വയം പര്യാപ്തമാകണമെന്ന മിഷൻ ദർശനം സഭയ്ക്കു സമ്മാനിച്ചത് വിരമിച്ച ബിഷപ് റവ. ഡോ. തോമസ് കെ. ഉമ്മനാണ്. അദ്ദേഹത്തോടൊപ്പം മധ്യകേരള സഭയിലെ എല്ലാ ഇടവകകളിലും സ്ഥാപനങ്ങളിലും വൈദിക മന്ദിരങ്ങളിലും പച്ചക്കറി, പഴവർഗ കൃഷി ആരംഭിക്കണമെന്നും മണ്ണിനേയും പരിസ്ഥിതിയേയും പോഷിപ്പിക്കുന്ന ഹരിത സംസ്കാരം വളർത്തിയെടുക്കണമെന്നും നിശ്ചയിച്ചു. മുൻ ബിഷപിനൊപ്പം സഭയുടെ ഈ ദൗത്യം ഫലദായകമായി വളർത്തുകയും പോഷിപ്പിക്കുയും ചെയ്ത കർഷക സ്നേഹിയാണ് ബിഷപ് പദവിയിലെത്തുന്നത്. കോഴഞ്ചേരി പുന്നക്കാട് മലയിൽ അധ്യാപകരായിരുന്ന എം.കെ. ചെറിയാന്‍റെയും (പാപ്പിസാർ) ഏലിയാമ്മ (കുഞ്ഞമ്മ)യുടെയും ഏഴുമക്കളിൽ അഞ്ചാമത്തെ മകനായ റവ. ഡോ. സാബു കെ. ചെറിയാൻ. മാതാപിതാക്കളിൽനിന്നു ലഭിച്ച കർഷക പാരന്പര്യമാണു തുടർന്നു പോന്നത്.

ആന്ധ്രായിൽ ശുശ്രൂഷ വേളയിൽ പാടങ്ങൾ പാട്ടത്തിനെടുത്ത് നെല്ലും സൂര്യകാന്തിയും കൃഷി ചെയ്തു. സഭയുടെ മിഷൻ ഫണ്ട് സ്വരൂപിക്കാൻ നെൽകൃഷി വിപുലമാക്കി.

മൂലേടത്ത് താമസമാക്കിയപ്പോഴാണു വലിയ തോതിൽ കൃഷിയിറക്കി തണ്ണിമത്തൻ ഉൾപ്പെടെയുള്ളവ കൃഷി ചെയ്തു വിജയഗാഥ രചിച്ചത്. കഞ്ഞിക്കുഴിയിലും വാഴകൃഷി ഉൾപ്പെടെ വ്യത്യസ്തമായ കൃഷികൾ നടത്തി.

തോലശേരിയിലും കാവുംഭാഗത്തും വിപുലമായ വലിയ കൃഷിസ്ഥലം ഒരുക്കാൻ കഴിഞ്ഞു. പോത്ത്, കോഴി, മുയൽ, മത്സ്യം എന്നിവയേയും വളർത്തി മുഴുവൻ സമയ കർഷകനായി. അജപാലന സമയം കഴിഞ്ഞുള്ള മുഴുവൻ സമയവും കൃഷിക്കുവേണ്ടിയാണ് സാബു അച്ചൻ ചെലവഴിച്ചത്. ദൈവം തന്ന ഭൂമി ഉപയോഗിച്ച് ഫലം പുറപ്പെടുവിക്കണം അല്ലെങ്കിൽ പാപമാണെന്നാണ് ഇദ്ദേഹം കരുതിയിരുന്നത്. സാബു അച്ചന്‍റെ കൃഷി രീതികളിൽനിന്നു പ്രോത്സാഹനം ഉൾക്കൊണ്ട് സഭാംഗങ്ങൾ പലരും കൃഷി രീതിയിലേക്കും പ്രകൃതി സംരക്ഷണത്തിലേക്കും തിരിഞ്ഞിട്ടുണ്ട്.

വീട്ടമ്മമാർ അടുക്കള കൃഷി ആരംഭിച്ചു. യുവാക്കൾ കൂടുതൽ കൃഷിയിലേക്ക് ഇറങ്ങി. ലോക്ക്ഡൗണ്‍ കാലത്ത് ഓണ്‍ലൈൻ ആരാധനയിലൂടെ വിശ്വാസികൾക്ക് ആത്മീയ ശുശ്രൂഷ നൽകാനും കോവിഡ് കാലത്ത് നിരവധി സഹായങ്ങൾ പാവപ്പെട്ടവർക്കു നൽകുവാനും റവ.ഡോ. സാബു കെ. ചെറിയാനു സാധിച്ചിട്ടുണ്ട്.