ADVERTISEMENT

ADVERTISEMENT

സ്കൂൾ മാർക്കറ്റ് 2025 ആരംഭിച്ചു

അമ്പലപ്പുഴ: സ്കൂൾ മാർക്കറ്റ് 2025 ആരംഭിച്ചു. ആലപ്പുഴ ജില്ലാ പോലീസ് സഹകരണ സംഘം നടത്തുന്ന ഈ വർഷത്തെ സ്കൂൾ മാർക്കറ്റ് ജനറൽ ഹോസ്പിറ്റൽ ജംഗ്ഷനിലെ ടിഡി സ്കൂളിൽ ആരംഭിച്ചു. ആലപ്പുഴ ഡിവൈഎസ്പി മധു ബാബു ഉദ്ഘാടനം നിർവഹിച്ചു.

ടിഡി ഹയർ സെക്കൻഡറി സ്കൂൾ പ്രിൻസിപ്പൽ കെ.എൻ. പത്മം, എസ്ബിഐ മാനേജർ സുജാത, പോലീസ് സംഘടനാ ഭാരവാഹികൾ എന്നിവർ പങ്കെടുത്തു. പോലീസ് ഉദ്യോഗസ്ഥർക്കു പുറമേ പൊതുജനങ്ങൾക്കും ഇവിടെനിന്ന് 50 ശതമാനം വരെ വിലക്കുറവിൽ പഠനോപകരണങ്ങൾ വാങ്ങാവുന്നതാണ്. കേരള സർക്കാരിന്‍റെയും സഹകരണവകുപ്പിന്‍റെയും നിർദേശപ്രകാരം കഴിഞ്ഞ അഞ്ചു വർഷമായി സ്കൂൾ വിപണിയിലെ വില നിയന്ത്രിക്കാനായി പോലീസ് സഹകരണസംഘം സ്കൂൾ മാർക്കറ്റ് നടത്തിവരുന്നു.

ADVERTISEMENT

വില കുത്തനെ ഇടിഞ്ഞു; വെറ്റില കർഷകർക്ക് കണ്ണീർക്കാലം

ചാരുംമൂട:് കൃഷിയിടത്തില്‍ വിയര്‍പ്പൊഴുക്കി വെറ്റില കൃഷി നടത്തുന്ന കര്‍ഷകര്‍ക്ക് ഇത് കണ്ണീര്‍ക്കാലം. കൃഷി സജീവമായി വരുമ്പോള്‍ വെറ്റിലയുടെ വില കുത്തനെ ഇടിഞ്ഞത് കര്‍ഷകരെ പതിസന്ധിയിലാക്കുന്നു. ഒരാഴ്ച മുമ്പ് ഒരുകെട്ട് വെറ്റിലയ്ക്ക് 60 രൂപ വിലയുണ്ടായിരുന്നു. ഇപ്പോള്‍ 10 രൂപയ്ക്കു പോലും വാങ്ങാന്‍ ആളില്ലാത്ത സ്ഥിതിയിലാണ്. ഉയര്‍ന്ന പരിപാലനച്ചെലവ്, ഈറ്റ ക്ഷാമം തുടങ്ങിയവ നേരിടേണ്ടിവരുമ്പോഴാണ് വിലയും കുത്തനെ ഇടിഞ്ഞത്. തെക്കന്‍ ജില്ലകളിലെ വെറ്റില കര്‍ഷകരാണ് വില ഇടിവുമൂലം തീരാദുരിതം നേരിടുന്നത്. ഭൂരിപക്ഷം കര്‍ഷകരും വില ഇടിവിനെത്തുടര്‍ന്ന് കൃഷി വിട്ടൊഴിയുകയാണ്. ഒരു വര്‍ഷം മുമ്പ് ഒരുകെട്ട് വെറ്റിലയ്ക്ക് 220 രൂപ മുതല്‍ 240 വരെ വില കര്‍ഷകന് കിട്ടിയിരുന്നു. ഇതരസംസ്ഥാനങ്ങളില്‍നിന്ന് വെറ്റില കൂടുതലായി എത്തുന്നതും കര്‍ഷകര്‍ക്ക് ഇരുട്ടടിയായി. കൂടാതെ ഇടനിലക്കാരുടെ കടുത്ത ചൂഷണവും കര്‍ഷകര്‍ക്ക് വില ലഭിക്കാതിരിക്കാന്‍ കാരണമായി. നിത്യേനയുള്ള പരിചരണം കൊണ്ടാണ് വെറ്റില കൃഷി മെച്ചപ്പെടുന്നത്. ഉയര്‍ന്നകൂലി കാരണം കുടുംബാംഗങ്ങളെയും സഹായികളാക്കിയാണ് മിക്കകര്‍ഷകരും കൃഷി മുന്നോട്ടുകൊണ്ടുപോകുന്നത്. വിളവെടുത്ത് അടുക്കി ചന്തയില്‍ എത്തിക്കണമെങ്കില്‍ നാലുപേരുടെ സഹായം വേണം. ചരിത്രത്തില്‍ ആദ്യ മായിട്ടാണ് വെറ്റിലയുടെ വില ഇത്രയും ഇടിയുന്നതെന്ന് കര്‍ഷകര്‍ പറയുന്നു. പറക്കോട്, പന്തളം, താമരക്കുളം മാര്‍ക്കറ്റുകളില്‍ 10 രൂപയ്ക്കു പോലും വെറ്റില എടുക്കാന്‍ ആളില്ലാത്ത സാഹചര്യം വന്നതില്‍ കര്‍ഷകര്‍ ഏറെ ആശങ്കയിലുമാണ്. ഓണാട്ടുകരയിലാണ് ഏറ്റവും കൂടുതല്‍ വെറ്റില കൃഷി യുള്ള സ്ഥലങ്ങള്‍. വായ്പ എടുത്തും കടം വാങ്ങിയും കൃഷി ഇറക്കിയ വെറ്റില കര്‍ഷകര്‍ ഇന്ന് ആത്മഹത്യയുടെ വക്കിലാണ്. കച്ചവടക്കാര്‍ മനഃപൂര്‍വം വെറ്റില എടുക്കാതെ മാറിനിന്ന് വെറ്റിലയുടെ വില ഇടിക്കുന്നതായും കര്‍ഷകര്‍ ആരോപിക്കുന്നുണ്ട്. വെറ്റില കര്‍ഷകരുടെ രക്ഷയ്ക്കായി കൃഷിവകുപ്പും സര്‍ക്കാരും അടിയന്തരമായ ഇടപെടല്‍ ഉണ്ടാകണമെന്ന് കര്‍ഷകര്‍ ആവശ്യപ്പെടുന്നു.

കഠിന വെയിലും പൊടിശല്യവും; ജനജീവിതം ദുഃസഹം

തുറവൂർ: കഠിനവെയിലിനെയും റോഡിലെ പൊടിശല്യത്തെയും തുടർന്നു ദേശീയപാതയോരത്തെ ജനങ്ങളുടെ ജീവിതം ദുഃസഹമാക്കുന്നു. രാത്രി മഴയെത്തുടർന്ന് റോഡിലേക്ക് ഒഴുകുന്ന ചെളിയും മെറ്റൽപ്പൊടിയും ശക്തമായ വെയിലിൽ ഉണങ്ങുകയും വാഹനങ്ങൾ പോകുമ്പോൾ ഇത് അന്തരീക്ഷത്തിലേക്കു പടരുകയും ചെയ്യുന്നു. യാത്രക്കാർക്കും ദേശീയപാതയുടെ ഇരുവശത്തുമുള്ള താമസക്കാർക്കും വ്യാപാരികൾക്കും വളരെയധികം ബുദ്ധിമുട്ടാണ് ഉണ്ടാക്കുന്നത്. സിമന്‍റ് മിശ്രിതമായ പൊടിയാണ് അന്തരീക്ഷത്തിൽ നടക്കുന്നത്. ഇതുമൂലം കുട്ടികളിലും വയോജനങ്ങളിലും ശ്വാസകോശസംബന്ധമായ രോഗങ്ങളും വ്യാപിച്ചുകൊണ്ടിരിക്കുകയാണ്. അരൂർ മുതൽ ആലപ്പുഴ വരെ ഇരുചക്രവാഹനത്തിലും ബസിലും യാത്ര ചെയ്യുന്നവരും വൻ ദുരിതമാണ് അനുഭവിക്കുന്നത്. അരൂർ- തുറവൂർ ഉയരപാത നിർമാണവുമായി ബന്ധപ്പെട്ട് കുഴിച്ചെടുത്ത മണ്ണും ചെളിയും മറ്റു വസ്തുക്കളും റോഡിൽ തള്ളിയിരിക്കുന്നത് മൂലം ശക്തമായ വെയിലിൽ ഉണങ്ങി അന്തരീക്ഷത്തിൽ പടരുന്നത് പ്രദേശത്തെ വ്യാപാരികളെയും താമസക്കാരെയും ബുദ്ധിമുട്ടിലാക്കിയിരിക്കുകയാണ്. പൊടിശല്യവും ചെളിവെള്ളവും മൂലം ഒട്ടുമിക്കവ്യാപാരികളും കടകൾ അടച്ചിട്ടിരിക്കുകയാണ്. ദേശീയപാതയോരത്തെ വീടുകളിൽ താമസിക്കുന്നവരും പൊടി ശല്യവും മറ്റും മൂലം മറ്റു ബന്ധുവീടുകളിലേക്ക് താത്കാലികമായി താമസം മാറ്റിയിരിക്കുകയാണ്. കൂടാതെ ദേശീയപാതയോരത്തെ വൻ മതിലുകളും ജനജീവിതത്തെ ദുഃസഹമാക്കിയിരിക്കുകയാണ്. റോഡ് നിർമാണം നടക്കുന്ന സ്ഥലങ്ങളിൽ ഇട്ടിരിക്കുന്ന സിമന്‍റ് മിശ്രിതം വാഹനങ്ങൾ കടന്നുപോകുമ്പോൾ കാറ്റിൽ പടരുന്നതുമൂലവും ജനങ്ങൾ ദുരിതമനുഭവിക്കുകയാണ്. തുടർച്ചയായി ദേശീയപാത വിഭാഗം തന്നെ ഈ പ്രദേശങ്ങളിൽ വാഹനങ്ങളിൽ വെള്ളം പാമ്പ് ചെയ്യണമെന്നുള്ള ആവശ്യം ജനങ്ങൾ ഉയർത്തിയെങ്കിലും ദേശീയപാത നിർമാണക്കമ്പനി ഇത് ചെവിക്കൊള്ളുന്നില്ല. ഇരുചക്രവാഹനങ്ങളിലും ബസിലും മറ്റും യാത്ര ചെയ്യുന്നവരും ഏറെ ദുരിതമാണ് അനുഭവിക്കുന്നത്. ദിവസവും ആലപ്പുഴ മുതൽ അരൂർ വരെ യാത്ര ചെയ്യുമ്പോൾ തന്നെ പലരും വിവിധങ്ങളായ രോഗങ്ങൾ പിടിപെടുന്ന അവസ്ഥയാണ്. ദേശീയപാതയിലെ പൊടിശല്ല്യം നിയന്ത്രിക്കാനുള്ള നടപടി സ്വീകരിക്കണമെന്ന ആവശ്യം ശക്തമാകുന്നു.

പാസിംഗ് ഔട്ട് പരേഡ്

കറ്റാനം: കുറത്തികാട് പോലീസ് സ്റ്റേഷൻ പരിധിയിലുള്ള എസ്പിസി യൂണിറ്റുകളുടെ പാസിംഗ് ഔട്ട് പരേഡ് നടന്നു. കറ്റാനം പോപ്പ് പയസ് എച്ച്എസ്എസ്, സിഎംഎസ്എച്ച്എസ് എന്നീ സ്കൂളുകളുടെ സംയുക്ത പാസിംഗ് ഔട്ട് പരേഡാണ് കറ്റാനം പോപ്പ് പയസ് എച്ച്എസ്എസ് ഇൻഡോർ ഓഡിറ്റോറിയത്തിൽ സംഘടിപ്പിച്ചത്. കുറത്തികാട് സിഐയും എസ്പിസിയുടെ പിഎസ്എൽഒയുമായ പി.കെ. മോഹിത് മുഖ്യാതിഥിയായി സല്യൂട്ട് സ്വീകരിച്ചു. ഭരണിക്കാവ് പഞ്ചായത്ത് പ്രസിഡന്‍റ് ദീപ, സബ് ഇൻസ്‌പെക്ടർ എം.എസ്. എബി, കറ്റാനം പോപ്പ് പയസ് എച്ച്എസ്എസ് ഹെഡ്മാസ്റ്റർ ടി.കെ. സാബു, സിഎംഎസ്എച്ച്എസ് ഹെഡ്മിസ്ട്രസ് ശോശാമ്മ ജോഷ്വാ, മെംബർമാരായ മാത്യു ഫിലിപ്പ്, എ. തമ്പി, പിടിഎ പ്രസിഡന്‍റുമാരായ വർഗീസ് മത്തായി, എം.ഡി. ബിജു എന്നിവർ പ്രസംഗിച്ചു. കുറത്തികാട് എഎസ്‌ഐ രജീന്ദ്ര ദാസ്. എസ്, ഷിതിൻ രാജ്, രഞ്ചു ആർ. പിള്ള, കമ്യൂണിറ്റി പോലീസ് ഓഫീസർമാരായ ടോണി മാത്യൂസ് പണിക്കർ, ജെയ്സി ജോസ്, ശാന്തി ജോൺ, ആൻസി ജോസ് എന്നിവരുടെ നേതൃത്വത്തിലാണ് പാസിംഗ് ഔട്ട് പരേഡിന് നേതൃത്വം നൽകിയത്.

സ്മാർട്ട് അങ്കണവാടി ഉദ്ഘാടനം

ഹരിപ്പാട്: മുതുകുളം പഞ്ചായത്ത് രണ്ടാം വാർഡിൽ, ആലപ്പുഴ ജില്ലാ പഞ്ചായത്ത് 2022 -2023 വാർഷിക പദ്ധതിയിൽ ഉൾപ്പെടുത്തി നിർമിച്ച സമാർട്ട് അങ്കണവാടിയുടെ ഉദ്ഘാടനം രമേശ് ചെന്നിത്തല എംഎൽഎ നിർവഹിച്ചു. ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി അധ്യക്ഷത വഹിച്ചു. ജില്ലാ പഞ്ചായത്ത് പ്രതിപക്ഷ നേതാവ് ജോൺ തോമസ് താക്കോൽദാനം നിർവഹിച്ചു. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ അഡ്വ. ടി.എസ്‌. താഹ മുഖ്യപ്രഭാഷണം നടത്തി. മുതുകുളം ബ്ലോക്ക്‌ പഞ്ചായത്ത് മെംബർ ഗീത ശ്രീജി, മുതുകുളം പഞ്ചായത്തംഗങ്ങളായ യു. പ്രകാശ്, ശുഭ ഗോപകുമാർ, ബിന്ദു, ശ്രീജ ഇളങ്ങല്ലൂർ, സുസ്മിത, ഷീജ, മഞ്ജു അനിൽകുമാർ, ശ്രീലത, സുനിത, ജി. ലാൽമാളവ്യ, എ. അനസ് എന്നിവർ പ്രസംഗിച്ചു.

കാക്കത്തുരുത്ത് ടൂറിസം വികസന പ്രവർത്തനങ്ങൾ തുടങ്ങി

തുറവൂർ: കാക്കത്തുരുത്ത് ദ്വീപിനെ വർണാഭമാക്കാൻ എഴുപുന്ന പഞ്ചായത്തും സംസ്ഥാന ടൂറിസം വകുപ്പും സംയുക്തമായി ഏറ്റെടുത്ത കാക്കത്തുരുത്ത് ടൂറിസം ഡെസ്റ്റിനേഷൻ പ്രോജക്റ്റിന്‍റെ ശിലാസ്ഥാപനം പഞ്ചായത്ത് പ്രസിഡന്‍റ് ആർ. പ്രദീപ് നിർവഹിച്ചു. ടൂറിസം ഭൂപടത്തിൽ സ്ഥാനംപിടിച്ച കാക്കത്തുരുത്തിന്‍റെ അടിസ്ഥാന സൗകര്യ വികസനങ്ങളും ടൂറിസം സാധ്യതകളും വർധിപ്പിക്കാനായി പഞ്ചായത്തും ടൂറിസം വകുപ്പും ചേർന്ന് ഒരു കോടി രൂപയുടെ പദ്ധതിയിലൂടെ തീരദേശ നടപ്പാതയുടെ നിർമാണ പ്രവർത്തനങ്ങൾക്ക് തുടക്കം കുറിച്ചു. കാക്കത്തുരുത്ത് പ്രധാന കടവിൽനിന്നു തെക്കോട്ട് ഏകദേശം അഞ്ഞൂറ് മീറ്ററോളം നീളം കൽക്കെട്ട് ഉയർത്തി ഇന്‍റർലോക്ക് കട്ടവിരിച്ച നടപ്പാതയും കൈവരികളോടു ചേർന്ന് അലങ്കാര വിളക്കുകൾ, ഇരിപ്പിടം എന്നിവയോടെയുമുള്ള നിർമാണം പൂർത്തിയാക്കുന്നതോടെ വിനോദ സഞ്ചാരികളെ ദ്വീപിലേക്ക് ആകർഷിക്കാനും അതിലൂടെ ദ്വീപ് നിവാസികൾക്ക് മെച്ചപ്പെട്ട വരുമാനം ലഭ്യമാക്കാനും കഴിയുമെന്ന് പ്രസിഡന്‍റ് ആർ. പ്രദീപ് പറഞ്ഞു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ പി.കെ. മധുക്കുട്ടൻ അധ്യക്ഷത വഹിച്ചു.

ഉയരപ്പാത നിർമാണം: എംപിയുടെ പ്രസ്താവന തെറ്റെന്ന് സിപിഎം

തുറവൂർ: ഉയരപ്പാത നിർമാണവുമായി ബന്ധപ്പെട്ട് ആലപ്പുഴ എംപിയുടേതായി വന്ന വാർത്ത വസ്തുതാവിരുദ്ധമാണെന്ന് സിപിഎം നേതാവ് സി.ബി. ചന്ദ്രബാബു. 2022ലെ എഗ്രിമെന്‍റ് പ്രകാരം ഗതാഗതം തിരിച്ചുവിടുന്ന തുറവൂർ -കുമ്പളങ്ങി റോഡും തുറവൂർ-മാക്കേക്കടവ് റോഡും അറ്റകുറ്റപ്പണി നടത്തുന്നതിനാണ് എൻഎച്ച്എഐ പണം അനുവദിച്ചത്. ഇവിടെ ജനങ്ങൾ സമരരംഗത്തു വന്നതിനെത്തുടർന്ന് ഗവ. നിർദേശപ്രകാരം പൊതുമരാമത്ത് വകുപ്പ്, എൻഎച്ച്എഐ ഉദ്യോഗസ്ഥർ സംയുക്ത പരിശോധന നടത്തി നൽകിയ റിപ്പോർട്ട്‌ പ്രകാരമാണ് എൻഎച്ച്എഐ പ്രോജക്റ്റ്‌ ഡയറക്ടർ തയാറാക്കിയ എസ്റ്റിമേറ്റ് കൈമാറിയത്. 24 ഒക്ടോബറിലാണ് എംപി സ്ഥലം സന്ദർശിച്ചത്. അതിനു മുൻപേ നടപടികൾ നീങ്ങിയിരുന്നു. 2025 മാർച്ചിൽ വിശദമായ എസ്ടിമേറ്റ് എൻഎച്ച്എഐ അടക്കമുള്ള ഏജൻസികളുടെ അംഗീകാരത്തിനു സമർപ്പിച്ചു. അനുമതി ലഭിച്ചാൽ മാത്രമേ ടെൻഡർ നടപടിയിലേക്ക് കടക്കാൻ കഴിയൂ. അതുവരെ റണ്ണിംഗ് കോൺട്രാക്ട് വഴി കൂടുതൽ പ്രശ്നങ്ങളുള്ള ഭാഗത്ത്‌ പൊതുമരാമത്ത് വകുപ്പ് ഇന്‍റർലോക്ക് ടൈൽസ് വിരിച്ചും മറ്റ് തരത്തിലും യാത്രാസൗകര്യം ഏർപ്പെടുത്തുന്നുണ്ട്. മേൽപ്പറഞ്ഞ രണ്ടു റോഡുകൾ നന്നാക്കുന്ന കാര്യത്തിൽ മാത്രമേ എൻഎച്ച്എഐ നടപടിയുള്ളൂ. മറ്റ് ഇടറോഡുകൾ നന്നാക്കുന്ന കാര്യത്തിൽ ഇനിയും തീരുമാനമായില്ല. ആരോപണം രാഷ്ട്രീയ ലക്ഷ്യം വച്ചുള്ളതാണെന്നും സിപിഎം നേതാവ് പറഞ്ഞു.

നീറ്റ്: ഫോട്ടോ മാറി; സ്റ്റുഡിയോ തേടി വിദ്യാർഥികളുടെ നെട്ടോട്ടം

ആലപ്പുഴ∙ ഫോട്ടോ ചെറുതായി. സംഗതി കുടുങ്ങി. പോസ്റ്റ് കാർഡ് വലുപ്പത്തിലുള്ള ഫോട്ടോയ്ക്കു പകരം പാസ്പോർട്ട് വലുപ്പത്തിലുള്ള ഫോട്ടോയുമായി എത്തിയവരാണു കുടുങ്ങിയത്. ഒടുവിൽ സ്റ്റുഡിയോ തേടി അലച്ചിലായി. നീറ്റ് യുജി പരീക്ഷാകേന്ദ്രങ്ങൾക്കു സമീപം സ്റ്റുഡിയോ അന്വേഷിച്ചു വിദ്യാർഥികളുടെയും മാതാപിതാക്കളുടെയും നെട്ടോട്ടം. വിദ്യാർഥികൾ കൈവശം സൂക്ഷിക്കേണ്ട രേഖകൾക്കായി അവസാന നിമിഷങ്ങളിൽ പ്രിന്‍റ് എടുക്കാനായി ഡിടിപി കടകൾ തേടിയും വിദ്യാർഥികൾ ഓടി. അവധി ദിവസമായിരുന്നതിനാൽ കടകൾ കുറവായതും ബുദ്ധിമുട്ടായി. ജില്ലയിൽ ഏഴായിരത്തിലേറെ വിദ്യാർഥികൾ നീറ്റ് പരീക്ഷയെഴുതി. 27 കേന്ദ്രങ്ങളിലായിരുന്നു പരീക്ഷ. 8427 വിദ്യാർഥികളാണു പരീക്ഷയ്ക്കു രജിസ്റ്റർ ചെയ്തിരുന്നെങ്കിലും കുറച്ചുപേർ പരീക്ഷയ്ക്ക് എത്തിയില്ല. രാവിലെ 11നു തന്നെ വിദ്യാർഥികളുടെ തിരക്കായി. പരിശോധനകൾ പൂർത്തിയാക്കി ഒരുമണിയോടെ പരീക്ഷാ ഹാളിലെത്തി. രണ്ടു മുതൽ വൈകിട്ട് അഞ്ചുവരെയായിരുന്നു പരീക്ഷ. 12നു പരീക്ഷാ ഹാളിൽ പ്രവേശിച്ച വിദ്യാർഥികൾ കടുത്ത ചൂടിൽ തളർന്നു. പരീക്ഷാ കേന്ദ്രത്തിനു പുറത്തു കാത്തുനിന്ന മാതാപിതാക്കളും ചൂടിൽ വലഞ്ഞു.

മാവേലിക്കര നഗരസഭാ സ്ഥിരം സമിതിയിലേക്ക് മുന്‍ ചെയര്‍മാന് നറുക്കെടുപ്പിലൂടെ ജയം

മാവേലിക്കര: നഗരസഭ വികസന കാര്യ സ്ഥിരംസമിതിയില്‍ ഒഴിവുള്ള സ്ഥാനത്തേക്ക് കഴിഞ്ഞമാസം അവിശ്വാസത്തിലൂടെ പുറത്താക്കപ്പെട്ട നഗരസഭാ ചെയര്‍മാന്‍ കെ.വി. ശ്രീകുമാര്‍ നറുക്കെടുപ്പിലൂടെ തെരഞ്ഞെടുക്കപ്പെട്ടു. വികസന സ്ഥിരം സമിതി അധ്യക്ഷനായിരുന്ന നൈനാന്‍ സി. കുറ്റിശേരില്‍ നഗരസഭാധ്യക്ഷനായി തെരഞ്ഞെടുക്കപ്പെട്ട സാഹചര്യത്തിലാണ് വികസന സ്ഥിരം സമിതിയില്‍ ഒഴിവ് ഉണ്ടായത്. തിങ്കളാഴ്ച നടന്ന തെരഞ്ഞെടുപ്പില്‍ സിപിഎം പ്രതിനിധിയായി കെ.വി. ശ്രീകുമാറും കോണ്‍ഗ്രസ് പ്രതിനിധിയായി കെ. ഗോപനും മത്സരിച്ചു. ഇരുവര്‍ക്കും ഒന്‍പത് വോട്ടുകള്‍ വീതം ലഭിച്ചു. തുടര്‍ന്നു നടന്ന നറുക്കെടുപ്പില്‍ കെ.വി. ശ്രീകുമാര്‍ തെരഞ്ഞെടുക്കപ്പെടുകയായിരുന്നു. ഒന്‍പത് ബിജെപി കൗണ്‍സിലര്‍മാര്‍ യോഗത്തില്‍നിന്ന് വിട്ടുനിന്നു. കെ.വി. ശ്രീകുമാറിനെ പുറത്താക്കാനുള്ള അവിശ്വാസത്തെ പിന്തുണയ്ക്കുകയും നഗരസഭാ ചെയര്‍മാന്‍ തെരഞ്ഞെടുപ്പില്‍ നൈനാന്‍ സി. കുറ്റിശേരിലിന് അനുകൂലമായി വോട്ട് രേഖപ്പെടുത്തുകയും ചെയ്ത ബിനു വര്‍ഗീസ് തിങ്കളാഴ്ച കൗണ്‍സിലില്‍ ഹാജരായില്ല. കോണ്‍ഗ്രസ് കൗണ്‍സിലര്‍ ഫോണില്‍ ബന്ധപ്പെട്ടിട്ടും ബിനു വര്‍ഗീസ് എത്താന്‍ കൂട്ടാക്കിയില്ല. ഇതേത്തുടര്‍ന്നാണ് സിപിഎം, കോണ്‍ഗ്രസ് സ്ഥാനാര്‍ഥികള്‍ക്ക് തുല്യവോട്ട് ലഭിക്കുന്ന സാഹചര്യം ഉണ്ടായത്. വികസന സ്ഥിരം സമിതി അധ്യക്ഷസ്ഥാനത്തേക്കുളള തെരഞ്ഞെടുപ്പ് 12ന് നടക്കും. വികസനകാര്യ സ്ഥിരം സമിതിയില്‍ സിപിഎമ്മിന് ഭൂരിപക്ഷമായതോടെ അധ്യക്ഷ സ്ഥാനം കോണ്‍ഗ്രസിനു നഷ്ടമാകാന്‍ സാധ്യതയുണ്ട്. സ്ഥിര സമിതിയില്‍ കോണ്‍ഗ്രസ് പ്രതിനിധികളായി അനി വര്‍ഗീസ്, ലളിത രവീന്ദ്രനാഥ്, സിപിഎം പ്രതിനിധികളായി തോമസ് മാത്യു, ചിത്ര അശോക്, സ്വതന്ത്ര കൗണ്‍സിലര്‍ കെ.വി. ശ്രീകുമാര്‍ എന്നിവരാണ് ഇപ്പോഴുള്ളത്. ശ്രീകുമാര്‍ ഇപ്പോള്‍ സിപിഎം അനുകൂല നിലപാടിലാണ്.

മൂലം ജലോത്സവം: ആലോചനാ യോഗം

മങ്കൊമ്പ്: 2025 ജൂലൈ ഒൻപതിനു നടക്കുന്ന ചമ്പക്കുളം മൂലം ജലോത്സവത്തിന്‍റെ ആലോചനാ യോഗം ചമ്പക്കുളം ബ്ലോക്ക് പഞ്ചായത്ത് ഹാളിൽ നടന്നു. ചമ്പക്കുളം ബ്ലോക്ക് പഞ്ചായത്ത് പ്രസിഡന്‍റ് ജിൻസി ജോളിയുടെ അധ്യക്ഷതയിൽ കൂടിയ യോഗത്തിൽ മുൻ എംഎൽഎ കെ.കെ. ഷാജു മുഖ്യാതിഥിയായി. ജലോത്സവ സമിതിയുടെ നിലവിലെ സാമ്പത്തിക സ്ഥിതിയും വള്ളംകളി കുറ്റമറ്റ നടത്തിപ്പും സംബന്ധിച്ച് തഹസിൽദാർ പി.ഡി. സുധി പ്രസംഗിച്ചു. വള്ളംകളിയുടെ സുഗമമായ നടത്തിപ്പിനായി 85 അംഗ എക്‌സിക്യൂട്ടീവ് കമ്മിറ്റിയെ തെരഞ്ഞെടുത്തു. ചമ്പക്കുളം പഞ്ചായത്ത് പ്രസിഡന്‍റ് .ടി.ജി. ജലജാകുമാരി, നെടുമുടി പഞ്ചായത്ത് പ്രസിഡന്‍റ് മിനി മൻമഥൻ നായർ, ഹെഡ് ക്വാർട്ടേഴ്‌സ് ഡെപ്യൂട്ടി തഹസിൽദാർ എസ്. ഷൈല, സീനിയർ ക്ലർക്ക് സി. ജോസഫ് തുടങ്ങിയവർ പ്രസംഗിച

പാചകവാതക സിലിണ്ടര്‍ പൊട്ടിത്തെറിച്ച് വീട് തകര്‍ന്നു

ചേര്‍ത്തല: പുതിയ പാചകവാതക സിലിണ്ടര്‍ യോജിപ്പിച്ചശേഷം സ്റ്റൗ കത്തിക്കുന്നതിനിടെ പൊട്ടിത്തെറിച്ച് വീടിന്‍റെ ഒരുഭാഗം തകര്‍ന്നു. വീട്ടിലുണ്ടായിരുന്നവര്‍ അത്ഭുതകരമായി രക്ഷപ്പെട്ടു. കടക്കരപ്പള്ളി പഞ്ചായത്ത് 10-ാം വാര്‍ഡ് ആലുങ്കല്‍ ജംഗ്ഷനു സമീപം കണിയാംവെളിയില്‍ ടി.വി. ദാസപ്പന്‍റെ വീട്ടില്‍ കഴിഞ്ഞ ദിവസം രാവിലെയാണ് അപകടം. വീടിന്‍റെ അടുക്കളയോടു ചേര്‍ന്ന ഒരു ഭാഗവും ജനാലയും വാതിലുകളും ഫ്രിഡ്ജും വാഷിംഗ് മെഷീനും തയ്യല്‍മെഷീനും തകര്‍ന്നു. അപകട സമയത്ത് ദാസപ്പനും ഭാര്യ കനകമ്മയും മകന്‍ വിമലും വീട്ടിലുണ്ടായിരുന്നു. പൊട്ടിത്തെറി ശബ്ദം കേട്ടയുടനെ ഇവര്‍ പുറത്തേക്കോടി രക്ഷപ്പെടുകയായിരുന്നു. തീ സമീപമുള്ള പുരയിടത്തിലെ മരങ്ങളിലേക്കും പടര്‍ന്നു. ചേര്‍ത്തലയില്‍നിന്ന് അഗ്‌നിരക്ഷാസേനയെത്തി രക്ഷാപ്രവര്‍ത്തനം നടത്തി. ഏകദേശം അഞ്ചുലക്ഷം രൂപയുടെ നാശനഷ്ടമുണ്ടായതായി കണക്കാക്കുന്നു.

ആലപ്പുഴയില്‍ ആരവമുയര്‍ത്തി എന്‍റെ കേരളം വിളംബരജാഥ

ആലപ്പുഴ: എന്‍റെ കേരളം പ്രദര്‍ശന വിപണനമേളയുടെ വരവറിയിച്ച് നഗരത്തില്‍ ആയിരങ്ങള്‍ അണിനിരന്ന വര്‍ണാഭമായ വിളംബര ജാഥ. ഇന്നുമുതല്‍ 12 വരെ ആലപ്പുഴ ബീച്ചിലാണ് പ്രദര്‍ശനമേള നടക്കുന്നത്. കളക്ടറേറ്റില്‍നിന്ന് വൈകിട്ട് 4.30ന് ആരംഭിച്ച ജാഥ മന്ത്രി സജി ചെറിയാന്‍ ഫ്‌ളാഗ് ഓഫ് ചെയ്തു. ജാഥ പ്രദര്‍ശന നഗരിയായ ആലപ്പുഴ ബീച്ചില്‍ സമാപിച്ചു. പി.പി. ചിത്തരഞ്ജന്‍ എംഎല്‍എ, ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി, ജില്ലാ കളക്ടര്‍ അലക്‌സ് വര്‍ഗീസ്, നഗരസഭ അധ്യക്ഷ കെ.കെ. ജയമ്മ, എഡിഎം ആശ സി. ഏബ്രഹാം, സബ് കളക്ടര്‍ സമീര്‍ കിഷന്‍, ജില്ലാ ഇന്‍ഫര്‍മേഷന്‍ ഓഫീസര്‍ കെ. എസ്. സുമേഷ്, ജില്ലാ പഞ്ചായത്തംഗങ്ങള്‍, നഗരസഭാംഗങ്ങള്‍, മറ്റ് ജനപ്രതിനിധികള്‍ തുടങ്ങിയവര്‍ നേതൃത്വം നൽകി. ഏഴു ദിവസം നീളുന്ന എന്‍റെ കേരളം മെഗാ പ്രദര്‍ശനം ഇന്നു വൈകുന്നേരം മൂന്നിന്് ആലപ്പുഴ ബീച്ചിലെ വേദിയില്‍ കൃഷിമന്ത്രി പി. പ്രസാദ് ഉദ്ഘാടനം ചെയ്യും. മന്ത്രി സജി ചെറിയാൻ അധ്യക്ഷത വഹിക്കും.

നേതൃത്വത്തിനെതിരേ രൂക്ഷവിമർശനംഉന്നയിച്ച യുവനേതാവ് രാജിവച്ചു

കായംകുളം: സിപിഐ കായംകുളം മണ്ഡലം നേതൃത്വത്തിനെതിരേ രൂക്ഷവിമര്‍ശനം ഉന്നയിച്ച യുവനേതാവ് പാര്‍ട്ടിവിട്ടു. കായംകുളം ടൗണ്‍ സൗത്ത് ലോക്കല്‍ കമ്മിറ്റി അസിസ്റ്റന്‍റ് സെക്രട്ടറി ഷമീര്‍ റോഷനാണ് രാജിവച്ചത്. പാര്‍ട്ടിയില്‍ വര്‍ഗീയതയും സ്വജനപക്ഷപാതവും പിടിമുറുക്കിയിരിക്കുകയാണെന്ന് രാജിക്കത്തില്‍ ഷമീര്‍ ആരോപിച്ചു. സാമുദായിക പരിഗണനയ്ക്കാണ് പാര്‍ട്ടിയില്‍ മുന്‍ഗണന. കഴിഞ്ഞ ലോക്സഭാ തെരഞ്ഞെടുപ്പില്‍ മാവേലിക്കര മണ്ഡലത്തില്‍ കായംകുളത്തു കാരനായ യുവനേതാവിന് സീറ്റ് ലഭിച്ചത് സമുദായിക പരിഗണനയിലൂടെയാണ്. കഴിഞ്ഞ നഗരസഭ ഭരണകാലത്ത് വനിതാ നേതാവിന് വൈസ് ചെയര്‍പേഴ്സണ്‍ പദവിയും വനിതാ ക്ഷേമ ബോര്‍ഡ് അംഗത്വവും കിട്ടിയത് എങ്ങനെയെന്ന് പാര്‍ട്ടി പരിശോധിക്കണം. മറ്റൊരു നേതാവിനെ തഴഞ്ഞ് ഇപ്പോഴത്തെ മുനിസിപ്പല്‍ വൈസ് ചെയര്‍മാനെ പദവിയില്‍ അവരോധിച്ചതും സാമുദായിക പരിഗണന വച്ചാണോഎന്ന് കത്തില്‍ ചോദിക്കുന്നു. വിദ്യാര്‍ഥി, യുവജന പ്രസ്ഥാനങ്ങളില്‍ രണ്ടു പതിറ്റാണ്ട് കാലം പ്രവര്‍ത്തിക്കുകയും പോലീസ് മര്‍ദനത്തിനിരയായി ആരോഗ്യം നഷ്ടപ്പെടുകയും ചെയ്ത താന്‍ സിപിഐ പ്രതിനിധി എന്ന നിലയില്‍ കായംകുളം സര്‍വീസ് സഹകരണ ബാങ്കിലെ ജോലിക്ക് അപേക്ഷിച്ചിരുന്നു. എന്നാല്‍, തന്‍റെ സമുദായത്തിന് കായംകുളം സഹകരണബാങ്കില്‍ നിയമനം ഇല്ല എന്ന് പാര്‍ട്ടി മണ്ഡലം സെക്രട്ടറി മുഖത്തുനോക്കി പറഞ്ഞെന്നും റോഷന്‍ ആരോപിച്ചു. ആ ജോലി പിന്നീട് സംഘപരിവാറുകാരന് നല്‍കി. കമ്യൂണിസ്റ്റ് പാര്‍ട്ടിയുടെ നേതൃത്വത്തില്‍ ഇരുന്നുകൊണ്ട് പച്ചയായ വര്‍ഗീയത പറയുകയും നടപ്പാക്കുകയും ചെയ്യുന്ന ഇത്തരക്കാര്‍ കമ്മ്യൂണിസ്റ്റ് സംസ്‌കാരം കശാപ്പ് ചെയ്യുകയാണ് ചെയ്യുന്നതെന്നും ഇവരെ പാര്‍ട്ടിയും സമൂഹവും തിരിച്ചറിയേണ്ട സമയം അതിക്രമിച്ചിരിക്കുന്നുവെന്നും പറയുന്ന കത്തില്‍ ഇന്ത്യയില്‍ ഏറ്റവും അധികം വര്‍ഗീയത നടപ്പിലാക്കുന്ന രാഷ്ട്രീയ പാര്‍ട്ടി കേരളത്തിലെ കമ്യൂണിസ്റ്റ് പാര്‍ട്ടികളാണെന്നും അതിനാല്‍ വര്‍ഗീയ പാര്‍ട്ടിയില്‍നിന്ന് താന്‍ രാജവയ്ക്കുന്നുവെന്നും ഷമീര്‍ റോഷന്‍ പറയുന്നു. അടുത്തിടെ പാര്‍ട്ടി നിലപാടുകളില്‍ പ്രതിഷേധിച്ച് ഷമീര്‍ റോഷന്‍ ഫെയ്സ്ബുക്കില്‍ പോസ്റ്റ് ചെയ്ത കുറിപ്പില്‍ പാര്‍ട്ടി അംഗങ്ങളും അനുഭാവികളുമായ നിരവധി പേര്‍ അനുകൂലിച്ച് അഭിപ്രായം രേഖപ്പെടുത്തിയിരുന്നു. സിപിഐ മണ്ഡലം സമ്മേളനങ്ങള്‍ നടക്കുന്ന വേളയിലെ യുവനേതാവിന്‍റെ രാജിയും ആരോപണങ്ങളും സമ്മേളനങ്ങളില്‍ ചര്‍ച്ചയാകുമെന്നാണ് സൂചന.

എടത്വ പള്ളിയില്‍ ചെറിയപ്രദക്ഷിണം ഇന്ന്; തിരുനാള്‍ പ്രദക്ഷിണം നാളെ

എടത്വ: സെന്‍റ് ജോര്‍ജ് ഫൊറോന പള്ളിയില്‍ വിശുദ്ധ ഗീവര്‍ഗീസ് സഹദായുടെ ചെറിയ പ്രദക്ഷിണം ഇന്നു നടക്കും. വിശുദ്ധ ഗീവര്‍ഗീസ് സഹദായുടെ അത്ഭുത തിരുസ്വരൂപവും വഹിച്ചുകൊണ്ടുള്ള തിരുനാള്‍ പ്രദക്ഷിണം നാളെയും നടക്കും. ഇന്നു വൈകിട്ട് 3.45ന് ബിഷപ് ജൂഡ് പോള്‍ രാജിന്‍റെ കാര്‍മികത്വത്തില്‍ നടക്കുന്ന വിശുദ്ധ കുര്‍ബാനയ്ക്കുശേഷം അഞ്ചിന് വിശുദ്ധ ഗീവര്‍ഗീസിന്‍റെ ചെറിയ രൂപവും വഹിച്ചുകൊണ്ടുള്ള പ്രദക്ഷിണം പള്ളിക്ക് ചുറ്റുമായി നടക്കും. ഫാ. യോഹന്നാന്‍ കട്ടത്തറ മുഖ്യകാര്‍മികത്വം വഹിക്കും. പ്രദക്ഷിണത്തിന് രൂപങ്ങളും കുടയും കുരിശും വഹിക്കുന്നത് തമിഴ്‌നാട്ടിലെ രാജാക്കമംഗലം തുറക്കാരാണ്. കൊടിയേറ്റിന് തലേന്ന് തന്നെ ഇവര്‍ പള്ളിയിലെത്തി താമസം തുടങ്ങിയിരുന്നു. ഇന്നു രാവിലെയോടെ തുറക്കാര്‍ മുഴുവന്‍ പേരും പള്ളിയിലെത്തും. പള്ളിയുടെ മുന്‍വശത്തെ പമ്പാനദിയില്‍ മുങ്ങിക്കുളിച്ച് വിശുദ്ധന്‍റെ തിരുസ്വരൂപ ദര്‍ശനത്തിനുശേഷമാണ് ഇവര്‍ പ്രദക്ഷിണത്തില്‍ പങ്കെടുക്കുക. പ്രദക്ഷിണത്തിനു മുന്‍പായി പലരും തലമുണ്ഡനം ചെയ്യുന്ന രീതിയുണ്ട്. പ്രദക്ഷിണത്തിനുശേഷം ഇവര്‍ പള്ളിയില്‍നിന്നുള്ള അവകാശ നേര്‍ച്ചകളായ ഉപ്പ്, കുരുമുളക്, മലര്‍, മത്സ്യബന്ധന വലയില്‍ കെട്ടാനുള്ള നൂല്‍ എന്നിവ വികാരി ഫാ. ഫിലിപ്പ് വൈക്കത്തുകാരന്‍റെ കൈയില്‍നിന്ന് സ്വീകരിച്ചാണ് മടക്കയാത്ര. തിരുനാളിന്‍റെ ഒന്‍പതാം ദിനമായ ഇന്നലെ അഭൂതപൂര്‍വമായ ജനത്തിരക്കാണ് പള്ളിയില്‍ അനുഭവപ്പെട്ടത്. കെഎസ്ആര്‍ടിസി ഡിപ്പോ മുതല്‍ പള്ളിവരെയുള്ള പാത ഭക്തരെക്കൊണ്ട് തിങ്ങിനിറഞ്ഞു. തിരുസ്വരൂപം ദര്‍ശിക്കാനുള്ള നീണ്ട ക്യൂ പള്ളിക്കു ചുറ്റും കാണാം. തിരക്ക് ഏറിയതോടെ രാവിലെ 4.30 മുതല്‍ തമിഴിലും മലയാളത്തിലും മാറിമാറിയാണ് വിശുദ്ധ കുര്‍ബാനയും തിരുക്കര്‍മങ്ങളും നടക്കുന്നത്. തിരുവനന്തപുരം, പാറശാല, കൊല്ലം, നെയ്യാറ്റിന്‍കര, കോട്ടയം, ആലപ്പുഴ, എറണാകുളം, തൃശൂര്‍ എന്നിവിടങ്ങളില്‍നിന്ന് കെഎസ്ആര്‍ടിസി സ്‌പെഷല്‍ സര്‍വീസുകള്‍ നടത്തുന്നുണ്ട്. ആലപ്പുഴനിന്നും കുട്ടനാടിന്‍റെ വിവിധ ഭാഗങ്ങളില്‍നിന്നും ജലഗതാഗതവകുപ്പും പ്രത്യേക സര്‍വീസുകള്‍ ആരംഭിച്ചിട്ടുണ്ട്. നാളെ വിശുദ്ധ ഗീവര്‍ഗീസ് സഹദായുടെ അദ്ഭുത തിരുസ്വരൂപവും വഹിച്ചുകൊണ്ടുള്ള പ്രദക്ഷിണത്തില്‍ ലക്ഷക്കണക്കിന് വിശ്വാസികള്‍ പങ്കെടുക്കും. തിരുസ്വരൂപം പള്ളിക്ക് വലം വയ്ക്കുമ്പോള്‍ വിശ്വാസികള്‍ തളിര്‍ വെറ്റില, പൂക്കള്‍ എന്നിവ തിരുസ്വരൂപത്തില്‍ അര്‍പ്പിക്കും. പള്ളി പരിസരങ്ങളും സെന്‍റ് അലോഷ്യസ് കോളജും സ്‌കൂളും സെന്‍റ് മേരീസ് സ്‌കൂളും ജോര്‍ജിയന്‍ സ്‌കൂളും ചുറ്റുമുള്ള വീടുകളും പരിസരപ്രദേശങ്ങളും തീര്‍ഥാടകരെക്കൊണ്ടു നിറഞ്ഞു. രോഗികള്‍ക്കായി എടത്വ മഹാജൂബിലി ഹോസ്പിറ്റലിന്‍റെ നേതൃത്വത്തില്‍ പള്ളിപരിസരത്ത് താത്കാലിക ക്ലിനിക്ക് ആരംഭിച്ചു. ഇന്നും നാളെയും നടക്കുന്ന പ്രദക്ഷിണത്തിനുള്ള ഒരുക്കങ്ങൾ പൂര്‍ത്തിയായതായി ജനറല്‍ കണ്‍വീനര്‍ തോമസ് ജോര്‍ജ് ആലപ്പാട്ട് പറത്തറ, ജോയിന്‍റ് കണ്‍വീനര്‍മാരായ റോബിന്‍ കളങ്ങര, ജയിന്‍ മാത്യു കറുകയില്‍, പബ്‌ളിസിറ്റി കണ്‍വീനര്‍ സോജന്‍ സെബാസ്റ്റ്യന്‍ കണ്ണന്തറ എന്നിവര്‍ പറഞ്ഞു. നേര്‍ച്ചഭക്ഷണം വിതരണം ആരംഭിച്ചു എടത്വ: തിരുനാളിനോടനുബന്ധിച്ച് പള്ളിയില്‍ എത്തുന്ന തീര്‍ഥാടകര്‍ക്ക് നേര്‍ച്ച ഭക്ഷണം വിതരണം ആരംഭിച്ചു. തിരുനാള്‍ കോ-ഓര്‍ഡിനേറ്റര്‍ ഫാ. ഏലിയാസ് കരിക്കണ്ടത്തില്‍ ഭക്ഷണം ആശീര്‍വദിച്ചു. പ്രധാന തിരുനാള്‍ ദിനമായ നാളെ വരെ 3500 ഓളം നേര്‍ച്ചഭക്ഷണം ഒരുക്കിയിട്ടുണ്ടെന്ന് നേര്‍ച്ചഭക്ഷണ കണ്‍വീനര്‍ ബാബു പള്ളിത്തറ അറിയിച്ചു. ഫാ. അനീഷ് കാമിച്ചേരി, കൈകാരന്മാരായ പി.എസ്. ടോമിച്ചന്‍ പറപ്പള്ളി, ജയിംസ് കളത്തൂര്‍, ജനറല്‍ കണ്‍വീനര്‍ തോമസ് ജോര്‍ജ് പറത്തറ, ജയിന്‍ കറുകയില്‍, റോബിന്‍ കളങ്ങര, വിന്‍സെന്‍റ് കെ.പി, സ്റ്റീഫന്‍ പറപ്പള്ളി, ബാബു വള്ളോംതറ, ജോബി കണ്ണമ്പള്ളി, ഷൈജു മണക്കളം, ദിലീപ് മോന്‍ തൈപ്പറമ്പില്‍, സാജു കൊച്ചുപുരയ്ക്കല്‍ എന്നിവര്‍ ഭക്ഷണ വിതരണത്തിന് നേതൃത്വം നല്‍കി. എടത്വ പള്ളിയില്‍ ഇന്ന് രാവിലെ 4.30ന് വിശുദ്ധ കുര്‍ബാന (തമിഴ്)- ഫാ. ജെനീസ്, 5.45 ന് സപ്ര, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന -ഫാ. ജോസഫ് വേളങ്ങാട്ടുശേരി, 7.30ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന -റവ. ഡോ. മാത്യു ചങ്ങങ്കരി (വികാരി ജനറാള്‍ ചങ്ങനാശേരി അതിരൂപത) 9ന് വിശുദ്ധ കുര്‍ബാന (തമിഴ് സീറോ മലബാര്‍) - മാര്‍ ജോര്‍ജ് രാജേന്ദ്രന്‍ (തക്കല രൂപത മെത്രാന്‍) 10.30ന് വിശുദ്ധ കുര്‍ബാന (തമിഴ്) -ഫാ. ദുരൈസ്വാമി, ഉച്ചയ്ക്ക് 12 ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - ഫാ. വര്‍ഗീസ് നമ്പിശേരിക്കളം. ഉച്ചകഴിഞ്ഞ് 2.15ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന ഫാ. ജോസഫ് ചൂളപ്പറമ്പില്‍, 3.45 ന് വിശുദ്ധ കുര്‍ബാന (തമിഴ്) - ബിഷപ് ഡോ. ജൂഡ് പോള്‍ രാജ്, വൈകിട്ട് അഞ്ചിന് പ്രദക്ഷിണം -ഫാ. യോഹന്നാന്‍ കട്ടത്തറ. ഇന്നും നാളെയും മദ്യനിരോധനം എടത്വ: എടത്വ പള്ളി തിരുനാള്‍ പ്രമാണിച്ച് പള്ളിക്ക് രണ്ടു കിലോമീറ്റര്‍ ചുറ്റളവില്‍ ഇന്നും നാളെയും മദ്യനിരോധനം ഏര്‍പ്പെടുത്തിയതായി ജില്ലാ കളക്ടര്‍ അറിയിച്ചു. നേര്‍ച്ച എത്തിച്ച് ആനപ്രമ്പാല്‍ സ്‌നേഹഭവന്‍ എടത്വ: ഇത്തവണയും പതിവ് തെറ്റിക്കാതെ എടത്വ പള്ളിയിലേക്ക് നേര്‍ച്ച എത്തിച്ച് ആനപ്രമ്പാല്‍ സ്‌നേഹഭവന്‍. എടത്വ പള്ളിയില്‍ വിശ്വാസികളായി എത്തുന്ന ആയിരക്കണക്കിന് ഭക്തര്‍ക്ക് നേര്‍ച്ച വിതരണത്തിനുള്ള വറുത്ത അരിയും മലരും ശര്‍ക്കരയും ഒന്നിച്ചാക്കിയാണ് പള്ളിയിലെത്തിക്കുന്നത്. തുടര്‍ച്ചയായ 18-ാ മത്തെ വര്‍ഷമാണ് വിശുദ്ധ ഗീവര്‍ഗീസ് സഹദായുടെ തിരുനാളിന് നേര്‍ച്ച നല്‍കാനായി സ്‌നേഹഭവന്‍ സെക്രട്ടറി ജോണിക്കുട്ടി തുരുത്തേലും അന്തേവാസികളും ചേര്‍ന്ന് തലച്ചുമടായി നടന്നാണ് നേര്‍ച്ച പള്ളിയില്‍ എത്തിക്കുന്നത്. പള്ളിയിലെത്തിച്ച നേര്‍ച്ച വികാരി ഫാ. ഫിലിപ്പ് വൈക്കത്തുകാരന്‍ ഏറ്റുവാങ്ങി.

ക്ഷേത്രത്തിലെ കാണിക്കവഞ്ചി കുത്തിത്തുറന്ന് മോഷണം

ഹരിപ്പാട്: ക്ഷേത്രത്തിലെ കാണിക്ക വഞ്ചി കുത്തിത്തുറന്ന് മോഷണം. ചെറുതന ആയാപറമ്പ് പുളിവേലിൽ ശ്രീ മഹാവിഷ്ണു ക്ഷേത്രത്തിൽ കഴിഞ്ഞദിവസം രാത്രിയിലാണ് മോഷണം നടന്നത്. കാണിക്ക മണ്ഡപത്തിന്‍റെ പൂട്ട് തകർത്ത് ഉള്ളിൽ സൂക്ഷിച്ചിരുന്ന ഇരുമ്പിന്‍റെ കാണിക്കവഞ്ചി ക്ഷേത്രപാചകപ്പുരയിൽ എത്തിച്ച് കുത്തിത്തുറന്ന് പണം മോഷ്ടിക്കുകയായിരുന്നു. ചുറ്റുമതിലുള്ള ക്ഷേത്രത്തിന്‍റെ ഗേറ്റ് താഴിട്ട് പൂട്ടിയ നിലയിലായിരുന്നു. ജീവനക്കാർ ക്ഷേത്രത്തിലെത്തി പതിവ് ജോലികൾക്കുശേഷം പാചകപ്പുരയിൽ ചെന്നപ്പോഴാണ് മോഷണവിവരം അറിയുന്നത്. വീയപുരം പോലീസിൽ അറിയിച്ചതിനെത്തുടർന്ന് ഫോറൻസിക് വിദഗ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തി. പഞ്ചായത്തംഗം മായാദേവി, സബ് ഗ്രൂപ്പ് ഓഫീസർ അനുദീപ്, ഉപദേശകസമിതി പ്രസിഡന്‍റ് കെ. മോഹനകുമാർ, സെക്രട്ടറി ടി.കെ. അനിരുദ്ധൻ, കമ്മിറ്റി അംഗങ്ങളായ കെ. വാമദേവൻ, കാർത്തികേയൻ നായർ, പി.കെ. പുഷ്കരൻ എന്നിവർ സംഭവസ്ഥലത്ത് എത്തി.

വേനല്‍മഴ: കൊയ്ത നെല്ല് വെള്ളത്തില്‍

പള്ളിപ്പാട്: കഴിഞ്ഞദിവസം വൈകിട്ട് പെയ്ത കനത്ത മഴയിലും കാറ്റിലും പള്ളിപ്പാട്ട് വിവിധ പാടശേഖരങ്ങളിലെ നെല്ല് മുഴുവന്‍ വെള്ളത്തിലായി. കോയിക്കലേത്ത് കിഴക്ക്, വൈപ്പിന്‍കാട് തെക്ക് പാടശേഖരങ്ങളിലെ കര്‍ഷകർക്കാണ് കൂടുതല്‍ ദുരിതം. കോയിക്കലേത്ത് കിഴക്ക് പാടശേഖരത്തില്‍ കൂലി വര്‍ധന ആവശ്യപ്പെട്ട തൊഴിലാളികളുമായുള്ള തര്‍ക്കം കഴിഞ്ഞ ദിവസം പരിഹരിച്ചു. എന്നാല്‍, കനത്ത മഴയില്‍ ചാക്കില്‍ കെട്ടിവച്ചിരുന്ന നെല്ലുപോലും വെള്ളം കയറി മുങ്ങിയത് കര്‍ഷകര്‍ക്ക് ഇരുട്ടടിയായി. സംഭരണത്തിനു മില്ലുകാര്‍ എത്തിയെങ്കിലും നനഞ്ഞ നെല്ല് എടുക്കാന്‍ അവര്‍ തയാറായില്ല. നെല്ല് വീണ്ടും ഉണക്കി നല്‍കേണ്ട അവസ്ഥയിലാണ്. മില്ലുകാര്‍ ആവശ്യപ്പെട്ട കിഴിവ് നല്‍കാന്‍ സമ്മതിച്ച നെല്ലാണ് തൊഴില്‍ തര്‍ക്കം മൂലം കരയ്ക്കു കയറ്റാന്‍ രണ്ടു ദിവസം വൈകിയത്. കൃഷിയുടെ വിളവു കുറഞ്ഞതുമൂലം നിരാശയിലായിരുന്ന കര്‍ഷകര്‍ക്ക് ഇതുമൂലം നഷ്ടത്തിന്‍റെ ആഴം വര്‍ധിച്ചു. നെല്ല് ഉണക്കി എടുക്കാനുള്ള ചെലവുകൂടി ആകുമ്പോള്‍ കൃഷി വന്‍ സാമ്പത്തിക ബാധ്യതയായി. കഴിഞ്ഞവര്‍ഷം ഒരേക്കറില്‍ 20 മുതല്‍ 25 ക്വിന്‍റല്‍ വരെ നെല്ല് ലഭിച്ച പാടശേഖരങ്ങളില്‍ ഈ വര്‍ഷം എട്ടുമുതല്‍ 12 ക്വിന്‍റല്‍ വരെയാണ് ശരാശരി വിളവ്. ഇതു ചെലവിനു പോലും തികയാത്ത അവസ്ഥയും. സര്‍ക്കാര്‍ നിശ്ചയിച്ചതിലും കൂടുതല്‍ ചുമട്ടുകൂലി കൊടുക്കാന്‍ കര്‍ഷകര്‍ നിര്‍ബന്ധിതരായി. പാടശേഖരത്തില്‍ കിടക്കുന്ന നെല്ല് കരയ്ക്കു കയറ്റാനുള്ള തത്രപ്പാടിലാണ് കര്‍ഷകര്‍. വൈപ്പിന്‍കാട് തെക്ക് പാടശേഖരത്തില്‍ കിടക്കുന്ന നെല്ല് ഇനിയും പൂര്‍ണമായി കരയ്ക്ക് എത്തിക്കാന്‍ കഴിഞ്ഞിട്ടില്ല. നഷ്ടം കുറയ്ക്കാന്‍ നെല്ല് വില വര്‍ധിപ്പിക്കുകയും മില്ലുകാര്‍ക്ക് നല്‍കുന്ന നെല്ലിന്‍റെ വില താമസിക്കാതെ ലഭിക്കാന്‍ നടപടി സ്വീകരിക്കുകയും വേണമെന്നാണ് കര്‍ഷകരുടെ ആവശ്യം.

അവശതകള്‍ ശരീരത്തെ കീഴ്‌പ്പെടുത്താന്‍ നോക്കി, പക്ഷേ, അഭയന്‍റെ യാത്ര തുടരും

പൂച്ചാക്കല്‍: അവശതകള്‍ ശരീരത്തെ കീഴ്‌പ്പെടുത്താന്‍ പലവട്ടം ശ്രമിച്ചിട്ടും പിടികൊടുക്കാതെ അറുപതാമത്തെ വയസിലും അഭയന്‍ എന്ന ചുമട്ടുതൊഴിലാളി ഇന്നും ഉന്‍മേഷവാനാണ്. പുലര്‍ച്ചെ അഞ്ചിന് ഉണര്‍ന്ന് കുളികഴിഞ്ഞ് വീട്ടിലുള്ള കൃഷ്ണ വിഗ്രഹത്തില്‍ മാലചാര്‍ത്തി കീര്‍ത്തനവും ചൊല്ലിക്കഴിഞ്ഞാല്‍ പിന്നെ പൂച്ചാക്കലിലാ ണ് തൈക്കാട്ടുശേരി പഞ്ചായത്ത് നാലാം വാര്‍ഡില്‍ ദേവീസദനത്തില്‍ കെ. അഭയന്‍റെ ലോകം. 35 വര്‍ഷമായിട്ട് പൂച്ചാക്കല്‍ ടൗണില്‍ തലച്ചുമട് തൊഴിലാളിയാണ് അഭയന്‍. രണ്ടുവര്‍ഷം മുമ്പ് ലോറിയില്‍നിന്നു പഞ്ചസാര ഇറക്കുമ്പോള്‍ കാലില്‍ പഞ്ചസാര ചാക്ക് വീണ് കാലിന് ഗുരുതരമായി പരിക്കു പറ്റിയിരുന്നു. ഒരുവര്‍ഷത്തോളം ജോലിക്കൊന്നും പോകാന്‍ പറ്റാത്ത അവസ്ഥയായിരുന്നു. എന്നിരുന്നാലും വിശ്രമിക്കാന്‍ അഭയന് സമയം ഉണ്ടായിരുന്നില്ല. കുടുംബം മുന്നോട്ടുപോകണമെങ്കില്‍ അഭയന്‍ പണിക്കുപോയെ പറ്റു. ചെറുപ്പത്തിലെ കാലുകള്‍ക്കു പോളിയോ ബാധിച്ച ഭാര്യ ജൈലജയുടെയും തിരുവനന്തപുരം ശ്രീ ഉത്രാടം തിരുനാള്‍ ആശുപത്രിയില്‍ ജനറല്‍ മെഡിസിനു പഠിക്കുന്ന മകള്‍ ഭാഗ്യശ്രീയുടെയും പ്രതീക്ഷകള്‍ അച്ഛന്‍ അഭയന്‍ മാത്രമാണ്. അപകടത്തെത്തുടര്‍ന്നു കാലുകള്‍ക്ക് ചെറിയ സ്വാധീനക്കുറവ് ഉണ്ടെങ്കിലും ചുമട് എടുക്കുന്ന കാര്യത്തില്‍ അഭയന്‍ മുന്‍പന്തിയിലുണ്ട്. ഭാര്യ ജൈലജ ലോട്ടറി വിറ്റുകിട്ടുന്ന ചെറിയ വരുമാനവും അഭയന് ആശ്വാസമാണ്. ഐക്യമില്ലാതെ തൊഴിലാളികള്‍ പരസ്പരം വഴക്കിട്ടും ഭിന്നിച്ചും നിന്നിരുന്ന കാലത്ത് തൊഴിലാളികളെ സംഘടിപ്പിച്ചതും ഈ തൊഴിലാളിയാണ്.

അരയ്ക്കു താഴേക്കു തളർന്ന യുവാവ് വേമ്പനാട്ടുകായൽ നീന്തി കീഴടക്കി

വൈക്കം: രണ്ടര വയസിൽ പോളിയോ ബാധിച്ച് അരയ്ക്ക് താഴേക്കു തളർന്ന നാല്പതുകാരൻ വേമ്പനാട്ടുകായൽ നീന്തി കീഴടക്കി. ആലുവ മേത്തശേരി പുഷ്കരൻ-ലളിത ദമ്പതികളുടെ മകൻ രതീഷാണ് ആലപ്പുഴ ചേർത്തല വടക്കുംകര അമ്പലക്കടവിൽ നിന്നും കോട്ടയം വൈക്കം ബീച്ചിലേക്ക് ഏഴു കിലോമീറ്റർ നീന്തി ചരിത്രം കുറിച്ചത്. ഞായറാഴ്ച രാവിലെ 7.31ന് അർജുന അവാർഡ് ജേതാവ് ക്യാപ്റ്റൻ സജി തോമസ് ഫ്ലാഗ് ഓഫ് ചെയ്ത നീന്തൽ 9.31 നാണ് അവസാനിച്ചത്. വൈക്കം കായലോര ബീച്ചിലേക്ക് നീന്തിക്കയറിയ രതീഷിനെ വൈക്കം നഗരസഭാ ചെയർപേഴ്സൺ പ്രീത രാജേഷ്, വൈസ് ചെയർമാൻ പി.ടി. സുഭാഷ്, വാർഡ് കൗൺസിലർ ബിന്ദു ഷാജി എന്നിവർ ചേർന്ന് സ്വീകരിച്ചു. ശാരീരിക പരിമിതികളെ മനക്കരുത്തുകൊണ്ട് പരാജയപ്പെടുത്തിയ രതീഷിനെ പരിശീലകൻ സജി വാളശേരി, മാതാവ് ലളിത, മകൻ ഇഷാൻ, രതീഷിന്‍റെ സുഹൃത്തുക്കൾ തുടങ്ങിയവർ അഭിനന്ദിച്ചു. വൈക്കം നഗരസഭാ അധികൃതർ, ഫയർ ഫോഴ്സ് ഉദ്യോഗസ്ഥർ, രതീഷിന്‍റെ സുഹൃത്തുക്കൾ, വാളശേരി റിവർ സ്വിമ്മിംഗ് ക്ലബ് അംഗങ്ങൾ എന്നിവർ ഉപഹാരങ്ങൾ നൽകി അനുമോദിച്ചു. നീന്തൽ പരിശീലകൻ സജി വാളശേരിയെ നഗരസഭ വൈസ്ചെയർമാൻ പി.ടി. സുഭാഷ് പൊന്നാട അണിയിച്ചു. നീന്തുന്നതിന് ശാരീരിക പരിമിതികൾ തടസമായില്ലെന്നും ഏറെ സന്തോഷത്തോടെയാണ് കായൽ നീന്തിയതെന്നും രതീഷ് പറഞ്ഞു. 15000 ലധികം പേരെ സൗജന്യമായി നീന്തൽ അഭ്യസിപ്പിച്ചിട്ടുണ്ടെങ്കിലും രതീഷിന്‍റെ വിജയം തന്നെ ഏറെ സന്തോഷിപ്പിക്കുന്നതായി പരിശീലകൻ സജി വാളാശേരി പറഞ്ഞു.

വഴിത്തർക്കം: യുവാവിനെ മർദിച്ച പ്രതികൾ പിടിയിൽ

ഹരിപ്പാട്: വഴിത്തര്‍ക്കത്തെ ത്തുടര്‍ന്ന് യുവാവിനെ മര്‍ദിച്ച പ്രതികള്‍ പിടിയില്‍. പള്ളിപ്പാട് തെക്കേക്കര കിഴക്ക് ശ്രീകുമാര്‍ (44), വെട്ടിയാര്‍ ഗായത്രി നിവാസില്‍ രാഗേഷ് (39) എന്നിവരെയാണ് ഹരിപ്പാട് പോലീസ് അറസ്റ്റ് ചെയ്തത്. പള്ളിപ്പാട് കിഴക്കേക്കര മുണ്ടുചിറയില്‍ അനീഷി(39) നാണ് ഏപ്രില്‍ ഒന്നിന് രാത്രി മര്‍ദനമേറ്റത്. പ്രതിയായ രാഗേഷ് അനീഷിനെ ചുറ്റികകൊണ്ട് തലയ്ക്കു അടിക്കുകയും ശ്രീകുമാര്‍ ദേഹോപദ്രവം എല്പിക്കുകയും ചെയ്തു. തലയ്ക്കു ഗുരുതരമായി പരിക്കേറ്റ അനീഷിനെ ഹരിപ്പാട് താലൂക്ക് ആശുപത്രിയിലും തുടര്‍ന്ന് വണ്ടാനം മെഡിക്കല്‍ കോളജിലും പ്രവേശിപ്പിച്ചു. ആക്രമണത്തിനുശേഷം ഒളിവിലായിരുന്നു പ്രതികളെ ഇന്നലെ ഉച്ചയോടെ പള്ളിപ്പാടുനിന്നാണ് പോലീസ് പിടികൂടിയത്. ഹരിപ്പാട് എസ്എച്ച്ഒ മുഹമ്മദ് ഷാഫി, എസ്‌ഐഷൈജു, സിപിഓമാരായ അനന്തു, അനില്‍ കുമാര്‍, ഹരികുമാര്‍, നിഷാദ്, സജാദ് എന്നിവര്‍ ചേര്‍ന്നാണ് അന്വേഷണം നടത്തി പ്രതികളെ പിടികൂടിയത്.

ഹെല്‍ത്ത് സെന്‍റര്‍ ആരംഭിച്ചു

എടത്വ: എടത്വ മഹാജൂബിലി മെമ്മോറിയല്‍ ഹോസ്പിറ്റലിന്‍റെ നേതൃത്വത്തില്‍ ഹെല്‍ത്ത് സെന്‍റര്‍ പ്രവര്‍ത്തനം ആരംഭിച്ചു. വികാരി ഫാ. ഫിലിപ്പ് വൈക്കത്തുകാരന്‍ ഉദ്ഘാടനം ചെയ്തു. തിരുനാള്‍ കോ-ഓര്‍ഡിനേറ്റര്‍ ഫാ. ഏലിയാസ് കരിക്കണ്ടത്തില്‍, കൈക്കാരന്മാരായ പി.എസ്. ടോമിച്ചന്‍ പറപ്പള്ളി, ജയിംസ് കളത്തൂര്‍, വിന്‍സെന്‍റ് പഴയാറ്റില്‍, ആരോഗ്യ കമ്മിറ്റി കണ്‍വീനര്‍ കെ.പി. കുഞ്ഞുമോന്‍, ലിജി വര്‍ഗീസ്, റോബിന്‍ കളങ്ങര, സാം സക്കറിയാസ്, ജോബി കണ്ണമ്പള്ളി, ബാബു പള്ളിത്തറ, സാജു കൊച്ചുപുരയ്ക്കല്‍, ജോബിന്‍ മണലേല്‍, സിബിച്ചന്‍ തെക്കേടം, ഡോ. ബിനോയ് റസല്‍, മഹാജൂബിലി ഹോസ്പിറ്റല്‍ സിസ്റ്റേഴ്‌സ് എന്നിവര്‍ പങ്കെടുത്തു.

സര്‍ക്കാരിന്‍റെ നാലാം വാര്‍ഷികാഘോഷം; ജില്ലയിലെ വാര്‍ഷികാഘോഷം 6 മുതല്‍ 12 വരെ

ആലപ്പുഴ: സര്‍ക്കാരിന്‍റെ നാലാം വാര്‍ഷികാഘോഷങ്ങളുടെ ഭാഗമായുള്ള ജില്ലയിലെ ആഘോഷം 6 മുതല്‍ 12 വരെ ആലപ്പുഴ ബീച്ചില്‍ നടക്കും. പിണറായി വിജയന്‍ പങ്കെടുക്കുന്ന ജില്ലാതല യോഗം ആറിന് രാവിലെ 10.30ന് ആലപ്പുഴ പാതിരപ്പള്ളിയിലെ കാമിലോട്ട് കണ്‍വന്‍ഷന്‍ സെന്‍ററിലും നടക്കും. ജില്ലാതല യോഗത്തില്‍ ക്ഷണിക്കപ്പെട്ട 500 വ്യക്തികള്‍ പങ്കെടുക്കും. സര്‍ക്കാര്‍ സേവനങ്ങളുടെ ഗുണഭോക്താക്കള്‍, ട്രേഡ് യൂണിയന്‍, തൊഴിലാളി പ്രതിനിധികള്‍, യുവജനത, വിദ്യാര്‍ഥികള്‍, സാംസ്‌കാരിക, കായിക രംഗത്തെ പ്രതിഭകള്‍, പ്രൊഫഷണലുകള്‍, വ്യവസായികള്‍, പ്രവാസികള്‍, സാമുദായിക നേതാക്കള്‍ തുടങ്ങിയവര്‍ യോഗത്തില്‍ പങ്കെടുക്കും. ഇവരുമായി മുഖ്യമന്ത്രി സംവദിക്കും. ജില്ലയില്‍ നിന്നുള്ള മന്ത്രിമാരായ പി. പ്രസാദ്, സജി ചെറിയാന്‍, എംപിമാര്‍, എംഎല്‍എമാര്‍ തുടങ്ങിയവരും യോഗത്തില്‍ പങ്കെടുക്കും. പ്രദര്‍ശന വിപണനമേള സര്‍ക്കാര്‍ വാര്‍ഷികാഘോഷങ്ങളുടെ ഭാഗമായി 6 മുതല്‍ 12 വരെ ആലപ്പുഴ ബീച്ചില്‍ സംഘടിപ്പിക്കുന്ന എന്‍റെ കേരളം പ്രദര്‍ശന വിപണനമേളയില്‍ 200 ശീതീകരിച്ച സേവന- വാണിജ്യ സ്റ്റാളുകള്‍, ഭക്ഷ്യമേള, സിനിമ പ്രദര്‍ശനം, തീം സ്റ്റാള്‍ എന്നിവ സജ്ജീകരിച്ചിട്ടുണ്ട്. വിവിധ വകുപ്പുകളുടെ നേതൃത്വത്തില്‍ വ്യത്യസ്ത വിഷയങ്ങളില്‍ സെമിനാറുകള്‍, പ്രമുഖ കലാകാരന്മാരുടെ കലാസന്ധ്യ തുടങ്ങിയവയും അരങ്ങേറും. രാവിലെ 10 മുതല്‍ രാത്രി 9 വരെ നടക്കുന്ന മേളയില്‍ പ്രവേശനം സൗജന്യമാണ്. കൃഷി മന്ത്രി പി. പ്രസാദ് ചെയര്‍മാനും മന്ത്രി സജി ചെറിയാന്‍ കോ-ചെയര്‍മാനും ജില്ലാ കളക്ടര്‍ അലക്‌സ് വര്‍ഗീസ് ജനറല്‍ കണ്‍വീനറുമായ ജില്ലാതല സംഘാടകസമിതിയാണ് പരിപാടിക്കു നേതൃത്വം നല്‍കുന്നത്. ഉദ്ഘാടന സമ്മേളനം ആറിന് ആറിനു വൈകിട്ട് മൂന്നിന് മന്ത്രി പി. പ്രസാദ് എന്‍റെ കേരളം പ്രദര്‍ശന വിപണനമേളയുടെ ഉദ്ഘാടനം നിര്‍വഹിക്കും. മന്ത്രി സജി ചെറിയാന്‍ അധ്യക്ഷനാകും. ജില്ലാ കളക്ടര്‍ അലക്‌സ് വര്‍ഗീസ്, എംപിമാരായ കെ.സി. വേണുഗോപാല്‍, കൊടിക്കുന്നില്‍ സുരേഷ്, എംഎല്‍എമാരായ പി.പി. ചിത്തരഞ്ജന്‍, എച്ച്. സലാം, രമേശ് ചെന്നിത്തല, തോമസ് കെ. തോമസ്, യു. പ്രതിഭ, ദലീമ ജോജോ, എം.എസ്. അരുണ്‍കുമാര്‍, ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി, നഗസഭാ ചെയര്‍പേഴ്‌സണ്‍ കെ.കെ. ജയമ്മ, ജില്ലാ പോലീസ് മേധാവി എം.പി. മോഹനചന്ദ്രന്‍ തുടങ്ങിയവര്‍ പങ്കെടുക്കും. വിളംബരജാഥ അഞ്ചിന് മേളയുടെ പ്രചരണാര്‍ഥം സംഘടിപ്പിക്കുന്ന വിളംബരജാഥ അഞ്ചിന് തിങ്കളാഴ്ച്ച വൈകിട്ട് 4.30ന് കളക്ടറേറ്റില്‍ നിന്നാരംഭിച്ച് ആലപ്പുഴ ബീച്ചില്‍ അവസാനിക്കും. മന്ത്രി സജി ചെറിയാന്‍ ജാഥ ഫ്ളാഗ് ഓഫ് ചെയ്യും. മന്ത്രി പി. പ്രസാദ് പങ്കെടുക്കും. ദിവസവും സെമിനാറുകള്‍, കലാപരിപാടികള്‍ മേയ് ഏഴിന് രാവിലെ 10 മുതല്‍ കൃഷിവകുപ്പിന്‍റെ മാറുന്ന കാലം, മാറേണ്ട കൃഷിരീതി എന്ന വിഷയത്തില്‍ നടക്കുന്ന സെമിനാര്‍ എച്ച്. സലാം എംഎല്‍എ ഉദ്ഘാടനം ചെയ്യും. ഉച്ചയ്ക്കുശേഷം വനിതാ വികസനവകുപ്പിന്‍റെ നേതൃത്വത്തില്‍ സ്ത്രീകളിലെ ആത്മഹത്യ പ്രവണത എന്ന വിഷയത്തില്‍ സംഘടിപ്പിക്കുന്ന സെമിനാര്‍ ദലീമ ജോജോ എംഎല്‍എ ഉദ്ഘാടനം ചെയ്യും. വൈകിട്ട് ഏഴു മുതല്‍ മര്‍സി ബാന്‍ഡ് അവതരിപ്പിക്കുന്ന മ്യൂസിക് ഷോ നടക്കും. എട്ടിന് രാവിലെ പത്തുമുതല്‍ സംഘടിപ്പിക്കുന്ന സെമിനാര്‍ ജില്ലാ കളക്ടര്‍ അലക്‌സ് വര്‍ഗീസ് ഉദ്ഘാടനം ചെയ്യും. വൈകിട്ട് ഏഴുമുതല്‍ പ്രമോദ് വെളിയനാടും സംഘവും അവതരിപ്പിക്കുന്ന കേരള സംഗീത നാടക അക്കാദമി അവാര്‍ഡ് നേടിയ നാടകം മാടന്‍ മോക്ഷം അരങ്ങേറും. ഒമ്പതിന് രാവിലെ 10 മുതല്‍ കരിയര്‍ ഓറിയന്‍റേഷന്‍ പ്രോഗ്രാം തോമസ് കെ. തോമസ് എംഎല്‍എ ഉദ്ഘാടനം ചെയ്യും. ഉച്ചയ്ക്ക് രണ്ടുമുതല്‍ സാമൂഹ്യനീതിവകുപ്പിന്‍റെ നേതൃത്വത്തില്‍ ലഹരിയും കുറ്റകൃത്യങ്ങളും -സാമൂഹ്യപ്രതിരോധ പരിപാടികളില്‍ യുവജന പങ്കാളിത്തം എന്ന വിഷയത്തില്‍ സംഘടിപ്പിക്കുന്ന സെമിനാര്‍ നഗരസഭാ വൈസ് ചെയര്‍പേഴ്‌സണ്‍ പി.എസ്.എം. ഹുസൈന്‍ ഉദ്ഘാടനം ചെയ്യും. വികസന പ്രശ്‌നോത്തരി 10ന് ഉച്ചയ്ക്ക് 12 മുതല്‍ 1.30 വരെ ഡോ. ആര്‍ സേതുനാഥിന്‍റെ നേതൃത്വത്തില്‍ എന്‍റെ കേരളം വികസന പ്രശ്‌നോത്തരി നടക്കും. സര്‍ക്കാരിന്‍റെ വികസനവുമായി ബന്ധപ്പെട്ട പ്രശ്‌നോത്തരിയില്‍ ഹൈസ്‌കൂള്‍ വിദ്യാര്‍ഥികള്‍ക്ക് പങ്കെടുക്കാം. വിജയികള്‍ക്ക് ക്യാഷ് അവാര്‍ഡും പങ്കെടുക്കുന്നവര്‍ക്ക് സര്‍ട്ടിഫിക്കറ്റും ലഭിക്കും. ഭക്ഷ്യമേള മേളയില്‍ എത്തുന്നവര്‍ക്ക് രുചികരമായ ഭക്ഷണം ഒരുക്കാന്‍ 10,000 ചതുരശ്ര അടിയില്‍ കുടുംബശ്രീ അടക്കമുള്ള ഫുഡ് കോര്‍ട്ടുകളും ഒരുക്കിയിട്ടുണ്ട്. ഫുഡ് കോര്‍ട്ടില്‍ ഒരേസമയം 300 പേര്‍ക്ക് ഇരുന്ന് ഭക്ഷണം കഴിക്കാന്‍ കഴിയും. പുറത്തുനിന്നുള്ള പ്രമുഖ ഹോട്ടലുകളും ഭക്ഷ്യമേളയില്‍ പങ്കെടുക്കും. ബീച്ചില്‍ ക്രമീകരണങ്ങള്‍ അവസാനഘട്ടത്തില്‍ 72,000 ചതുരശ്ര അടിയില്‍ അത്യാധുനിക ജര്‍മന്‍ ഹാംഗറിലാണ് പ്രദര്‍ശനമേളയ്ക്കുള്ള പവലിയന്‍ ഒരുക്കുന്നത്. പന്തല്‍ ശീതീകരിച്ചതാണ്. സന്ദര്‍ശകര്‍ക്ക് ആശയക്കുഴപ്പമില്ലാതെ സ്റ്റാളുകള്‍ ചുറ്റിനടന്നു കാണാന്‍ പാകത്തിനാണ് പവലിയനുള്ളിലെ ക്രമീകരണങ്ങള്‍. ഭിന്നശേഷിക്കാരായ സന്ദര്‍ശകര്‍ക്ക് സുഗമമായി സഞ്ചരിക്കുന്നതിന് പ്രത്യേക റാമ്പും ലഭ്യമാക്കിയിട്ടുണ്ട്. എല്ലാ ദിവസവും വൈകിട്ട് നടക്കുന്ന കലാപരിപാടികള്‍ക്കായി 8000 ചതുരശ്ര അടിയിലുള്ള വിശാലമായ സദസും 2048 ചതുരശ്രയടി വിസ്തൃതിയുള്ള സ്റ്റേജും ഒരുക്കിയിട്ടുണ്ട്. പ്രദര്‍ശനമേളക്കെത്തുന്ന കുട്ടികള്‍ക്കായി 5000 ചതുരശ്ര അടിയില്‍ വിശാലമായ കളിസ്ഥലവും ഒരുക്കിയിട്ടുണ്ട്. 200 സ്റ്റാളുകള്‍ക്കു പുറമേ കിഫ്ബി, പിആര്‍ഡി, കൃഷി, ടൂറസം തുടങ്ങിയ വിവിധ വകുപ്പുകളുടെ വകുപ്പുകളുടെ തീം സ്റ്റാളും ഉണ്ട്. രാവിലെ 10 മുതല്‍ രാത്രി 9 വരെയാണ് പ്രദര്‍ശനസമയം. അഗ്നിരക്ഷാസേന, പോലീസ്, ആംബുലന്‍സ്, ആരോഗ്യ പ്രവര്‍ത്തകരുടെ സേവനം, കുടിവെള്ളം, ശുചിമുറി സംവിധാനം എന്നിവയും പ്രദര്‍ശന വേദിയില്‍ ഒരുക്കിയിട്ടുണ്ട്. സിനിമാസ്വാദകര്‍ക്കായി തിയറ്ററും കഴിഞ്ഞ വര്‍ഷങ്ങളില്‍നിന്ന് വ്യത്യസ്തമായി ഇത്തവണ 1500 ചതുരശ്ര അടിയിലുള്ള സിനിമ തിയറ്ററും പ്രദര്‍ശനമേളയിൽ ഒരുക്കുന്നുണ്ട്. കേരള സംസ്ഥാന ചലച്ചിത്ര വികസന കോര്‍പറേഷനും ചലച്ചിത്ര അക്കാദമിയും ചേര്‍ന്നാണ് ചലച്ചിത്ര പ്രദര്‍ശനം നടത്തുന്നത്. കൂടാതെ സര്‍ക്കാരിന്‍റെ വികസനപ്രവര്‍ത്തനങ്ങളുടെ വീഡിയോകളും ഇവിടെ പ്രദര്‍ശിപ്പിക്കും. സമാപനസമ്മേളനം 12ന് മേയ് 12ന് വൈകുന്നേരം ആറിന് നടക്കുന്ന സമാപന സമ്മേളനത്തില്‍ ജില്ലാ കളക്ടര്‍ അലക്‌സ് വര്‍ഗീസ് സ്വാഗതം ആശംസിക്കും. മന്ത്രി സജി ചെറിയാന്‍ ഉദ്ഘാടനം ചെയ്യും. മന്ത്രി പി. പ്രസാദ് അധ്യക്ഷനാകും.

എടത്വ പള്ളിയില്‍ എക്യുമെനിക്കല്‍ സംഗമം

എടത്വ: സെന്‍റ് ജോര്‍ജ് ഫൊറോനാ പള്ളിയിലെ വിശുദ്ധ ഗീവര്‍ഗീസ് സഹദായുടെ തിരുനാളിനോടനുബന്ധിച്ച് എക്യുമെനിക്കല്‍ സംഗമം നടന്നു. വിവിധ ക്രിസ്തീയ സഭകളെ പ്രതിനിധീകരിച്ച് സഭാ മേലധ്യക്ഷന്മാരും വൈദികരും ഇടവക പ്രതിനിധികളും പങ്കെടുത്തു. മാവേലിക്കര ഭദ്രാസനാധ്യക്ഷന്‍ ജോഷ്വാ മാര്‍ ഇഗ്‌നാത്തിയോസ് ഉദ്ഘാടനം ചെയ്തു. മലങ്കര ഓര്‍ത്തഡോക്‌സ് സുറിയാനി സഭ മെത്രാപ്പോലീത്ത മാത്യൂസ് മാര്‍ തേവോദോസിയോസ് അനുഗ്രഹ പ്രഭാഷണം നടത്തി. ഫൊറോന വികാരി ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. സിഎസ്‌ഐ മധ്യകേരള ഇടവക മുന്‍ ബിഷപ് റവ. തോമസ് കെ. ഉമ്മന്‍ പ്രാര്‍ഥനാ ശുശ്രൂഷ നിര്‍വഹിച്ചു. ഫാ. ജോസഫ് കെ. ജോര്‍ജ്, ഫാ. ബിജി ഗീവര്‍ഗീസ്, ഫാ. മാത്യു പി. ജോര്‍ജ്, ഫാ. ജേക്കബ് തോമസ് മുണ്ടിയതറ, ഫാ. ലിജു പി. ചെറിയാന്‍, ഫാ. ടോം വര്‍ഗീസ്, ഫാ. കെ. റോബിന്‍, ഫാ. ഏലിയാസ് കരിക്കണ്ടത്തില്‍, ജനറല്‍ കണ്‍വീനര്‍ തോമസ് ജോര്‍ജ് ആലപ്പാട്ട് പറത്തറ, ഫാ. അനീഷ് കമിച്ചേരി, ഫാ. തോമസ് കാരയ്ക്കാട്ട്, കൈക്കാരന്‍മാരായ പി.എസ്. ടോമിച്ചന്‍ പറപ്പള്ളി, ജയിംസ് കളത്തൂര്‍, വിന്‍സെന്‍റ് പഴയാറ്റില്‍, എക്യുമെനിക്കല്‍ കോ-ഓര്‍ഡിനേറ്റര്‍ റോബിന്‍ റ്റി. കളങ്ങര, സെക്രട്ടറി ആന്‍സി ജോസഫ് എന്നിവര്‍ പ്രസംഗിച്ചു.

എടത്വ പള്ളിയിലേക്ക് തീര്‍ഥാടക പ്രവാഹം

എടത്വ: സെന്‍റ് ജോര്‍ജ് ഫൊറോന പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് തീര്‍ഥാടക പ്രവാഹം. എട്ടാം ദിനമായ ഇന്നലെ പള്ളിയും പരിസരവും ഭക്തജനങ്ങളെക്കൊണ്ടു നിറഞ്ഞു കവിഞ്ഞു. തമിഴ് വിശ്വാസികളാണ് അധികവും. തമിഴ് കുര്‍ബാനയില്‍ പങ്കെടുക്കാന്‍ അഭൂതപൂര്‍വമായ തിരക്കാണ് അനുഭവപ്പെടുന്നത്. കഴിഞ്ഞദിവസം പരസ്യവണക്കത്തിനായി തിരുസ്വരൂപം ദേവാലയ കവാടത്തില്‍ പ്രതിഷ്ഠിച്ചതു മുതല്‍ തീര്‍ഥാടകരുടെ നിലയ്ക്കാത്ത ഒഴുക്കാണ്. തിരുസ്വരൂപം വണങ്ങാന്‍ ദക്ഷിണേന്ത്യയിലെ ഒട്ടുമിക്ക സംസ്ഥാനങ്ങളില്‍ നിന്നും ഭക്തജനങ്ങള്‍ എത്തുന്നുണ്ട്. പാര്‍ക്കിംഗ് സൗകര്യം ഏര്‍പ്പെടുത്തിയിരുന്ന സെന്‍റ് അലോഷ്യസ് കോളജ്, സെന്‍റ് മേരീസ് ഗേള്‍സ് ഹൈസ്‌കൂള്‍, ജോര്‍ജിയന്‍ പബ്‌ളിക് സ്‌കൂള്‍ എന്നീ ഗ്രൗണ്ടുകള്‍ വാഹനങ്ങള്‍ കൊണ്ട് നിറഞ്ഞുകവിഞ്ഞു. എടത്വ തിരുനാളിന് തിരക്കു കൂടിയതോടെ ടൗണില്‍ ഗതാഗതക്കുരുക്കും രൂക്ഷമായി. കെഎസ്ആര്‍ടിസിയുടെ താത്കാലിക ഡിപ്പോ സെന്‍റ് അലോഷ്യസ് കോളജ് ഗ്രൗണ്ടില്‍ പ്രവര്‍ത്തനം ആരംഭിച്ചിട്ടുണ്ട്.

ചെത്തിപ്പുഴ സര്‍ഗക്ഷേത്രയില്‍ ഇന്നുമുതല്‍ നാടകോത്സവം

ചങ്ങനാശേരി: സര്‍ഗക്ഷേത്ര-ഇടിമണ്ണിക്കല്‍ അഖില കേരള പ്രഫഷണല്‍ നാടക മത്സരം യവനിക സീസണ്‍ ഫോര്‍ ഇന്നാരംഭിക്കും. സര്‍ഗക്ഷേത്ര അങ്കണത്തില്‍ തയാറാക്കിയ പന്തലില്‍ കേരളത്തിലെ പ്രമുഖ നാടക സമിതികളുടെ നാടകങ്ങള്‍ ദിവസവും വൈകുന്നേരം 6.30ന് അരങ്ങേറും. ഫൈന്‍ ആര്‍ട്‌സ് സൊസൈറ്റി അംഗങ്ങള്‍ക്കും പുതുതായി അംഗത്വം സ്വീകരിക്കുന്നവര്‍ക്കും പ്രവേശന പാസ് വാങ്ങുന്നവര്‍ക്കും നാടകോത്സവത്തില്‍ പങ്കെടുക്കാം. സര്‍ഗക്ഷേത്ര കള്‍ച്ചറല്‍, ചാരിറ്റബിള്‍, അക്കാദമിക്, മീഡിയ സെന്‍ററിന്‍റെ നേതൃത്വത്തില്‍ ഭവനരഹിതയായ വിധവയ്ക്ക് വീട് നിര്‍മ്മിച്ചു നല്‍കുന്ന സര്‍ഗ ഭവനം പദ്ധതിയും നാടകോത്സവത്തിന്റെ ഭാഗമായി നടക്കും. ഇന്ന് വൈകുന്നേരം 6.15 ന് ചലച്ചിത്ര താരങ്ങളായ സ്മിനു സിജോ, കോട്ടയം രമേശ് എന്നിവര്‍ ചേര്‍ന്ന് നാടകോത്സവം ഉദ്ഘാടനം ചെയ്യും. സര്‍ഗക്ഷേത്ര രക്ഷാധികാരി ഫാ. തോമസ് കല്ലുകളം സിഎംഐ അധ്യക്ഷത വഹിക്കും. പാലാ കമ്യൂണിക്കേഷന്‍സിന്‍റെ ലൈഫ് ഈസ് ബ്യൂട്ടിഫുള്‍ എന്ന നാടകം അവതരിപ്പിക്കും.

കർഷകർക്ക് കനത്ത തിരിച്ചടി: കൊട്ടടയ്ക്ക വില കുറയുന്നു

പൂച്ചാക്കല്‍: കര്‍ഷകരുടെ പ്രതീക്ഷയ്ക്ക് മങ്ങലേല്‍പ്പിച്ച് കൊട്ടടയ്ക്കയുടെ വില താഴോട്ട്. ഈ സീസണില്‍ കിലോ 350-400 രൂപ വരെ ലഭിച്ചിരുന്ന സ്ഥാനത്ത് 300-305 രൂപയാണ് ഇപ്പോള്‍ വില. രണ്ടു വര്‍ഷം മുന്‍പ് 450-500 രൂപ വരെയും വില ലഭിച്ചിരുന്നു. വില കൂടിയതോടെ ധാരാളം കര്‍ഷകര്‍ കവുങ്ങ് കൃഷിയിലേക്ക് ഇറങ്ങിയിരുന്നു. പഴക്കടക്ക കിലോക്ക് 80 രൂപയും പച്ച അടയ്ക്ക 60 രൂപയുമാണ് വില. ഈ വര്‍ഷം എല്ലാ തോട്ടങ്ങളിലും വിളവുണ്ടായിട്ടുണ്ടെങ്കിലും മഹാളി ഉള്‍പ്പെടെയുള്ള രോഗങ്ങള്‍ മൂലം കവുങ്ങുകള്‍ വ്യാപകമായി നശിക്കുകയാണ്. ഇതേത്തുടര്‍ന്ന് അടയ്ക്കയുടെ വരവ് മുന്‍ വര്‍ഷങ്ങളെ അപേക്ഷിച്ച് കുറവാണ്. വിദേശ രാജ്യങ്ങളില്‍നിന്ന് വന്‍തോതില്‍ ഇറക്കുമതി തുടങ്ങിയതോടെ ആറു മാസമായി അടയ്ക്ക വില ഇടിയുകയായിരുന്നു. വില വര്‍ധിക്കുമെന്ന കണക്കുകൂട്ടലില്‍ കഴിഞ്ഞ വര്‍ഷം വന്‍തോതില്‍ അടയ്ക്ക കരുതി വച്ച കര്‍ഷകര്‍ക്കും വിലയിടിവ് തിരിച്ചടിയായി. മഹാളി രോഗത്തിനു പുറമേ മഞ്ഞളിപ്പ്, കൂമ്പുചീയല്‍, കായ്ചീയല്‍, ചുവട് ചീയല്‍, പൂങ്കുലയുണങ്ങല്‍ എന്നിവയും കവുങ്ങ് കൃഷിക്ക് വെല്ലുവിളിയാണ്. ഇതുമൂലം അടയ്ക്ക ഉത്പാദനം കുറഞ്ഞതിനിടെയാണ് ഇരുട്ടടിയായി വിലയും താഴ്ന്നത്. മ്യാന്‍മാര്‍, ശ്രീലങ്ക, ഇന്‍ഡോനേഷ്യ എന്നിവിടങ്ങളില്‍നിന്ന് ഇറക്കുമതി ചെയ്യുന്ന അടയ്ക്ക പാന്‍ മസാല വ്യവസായികള്‍ വന്‍തോതില്‍ ഉപയോഗിക്കുന്നുണ്ട്. കഴിഞ്ഞവര്‍ഷം സംസ്‌കരിച്ച് ഉണക്കി സൂക്ഷിച്ച അടയ്ക്കാണ് കര്‍ഷകര്‍ ഇപ്പോള്‍ വിപണിയിലെത്തിക്കുന്നത്. കവുങ്ങില്‍ കയറി അടയ്ക്ക ശേഖരിക്കാന്‍ കയറ്റക്കാരെ കിട്ടാത്തതും വളക്കുറവ് മൂലമുള്ള ഉത്പാദനക്കുറവും കര്‍ഷകര്‍ അനുഭവിക്കുന്ന മറ്റ് പ്രശ്‌നങ്ങളാണ്.

വേനല്‍ മഴ കനത്തു: കൊയ്ത്ത് ഉപേക്ഷിച്ച് കര്‍ഷകര്‍

മാന്നാര്‍: തുടര്‍ച്ചയായി പെയ്ത മഴ മൂലം ചെന്നിത്തല നേന്ത്രവേലി പാടശേഖരത്തിലെ 110 ഏക്കറിലെ കൊയ്യാനിരുന്ന നെല്ലുമുങ്ങി, കൊയ്ത്ത് ഉപേക്ഷിച്ച് കര്‍ഷകര്‍. കഴിഞ്ഞ പത്തു ദിവസമായി പെയ്ത മഴ കാരണമാണ് നൂറുമേനി വിളവ് ലഭിച്ച നെല്ലു പൂര്‍ണമായും മുങ്ങിയത്. ഇവിടത്തെ 29 കര്‍ഷകരാണ് ഇക്കുറി നേന്ത്രവേലി പാടശേഖരത്തില്‍ കൃഷിയിറക്കിയത്. ചെന്നിത്തല തൃപ്പെരുന്തുറ കൃഷിഭവന്‍റെ പരിധിയില്‍ വരുന്ന ചെന്നിത്തല 14 ാം ബ്ലോക്ക് (നേന്ത്രവേലി) പാടശേഖരത്തിലെ ബണ്ടിന്‍റെ ബലക്ഷയവും തണ്ണീര്‍മുക്കം ബണ്ട് തുറന്നതും പാടത്തില്‍ വെള്ളം കയറാന്‍ കാരണമായെന്നു കര്‍ഷകര്‍ പറഞ്ഞു. പുറം ബണ്ടിന്‍റെ ബലക്ഷയം കാരണം നേരിയ തോതില്‍ ആദ്യം വെള്ളം കയറി. സ്ഥിതി രൂക്ഷമായപ്പോള്‍ പാടശേഖരസമിതിയുടെ നേതൃത്വത്തില്‍ പമ്പിംഗ് നടത്തിയെങ്കിലും ശക്തമായ മഴ കാരണം പമ്പിംഗ് വിജയം കണ്ടില്ല. ഇത്രയും വെള്ളം പൂര്‍ണമായി വറ്റിയാല്‍ പോലും കൊയ്ത്ത് യന്ത്രം ഇറക്കാന്‍ കഴിയില്ലെന്നും അതിനാല്‍ കൊയ്ത്ത് ഉപേക്ഷിക്കുകയാണെന്നും പാടശേഖര സമിതി അറിയിച്ചു.

മുതുകുളത്തെ വിറപ്പിച്ച് തെരുവുനായ്ക്കൾ

മുതുകുളം: തെരുവുനായ്ക്കളുടെ ശല്യവും ആക്രമണവും വർധിച്ചതോടെ മുതുകുളം പഞ്ചായത്തിൽ ജനങ്ങൾ ഭീതിയിലാണ്. കഴിഞ്ഞ ദിവസം മുതുകുളം ഗ്രാമപഞ്ചായത്തിലെ നാല്, അഞ്ച് വാർഡുകളിലെ പത്തോളം പേർക്ക് തെരുവുനായ്ക്കളുടെ കടിയേറ്റു. വളർത്തുമൃഗങ്ങളെയും നായ്ക്കൾ കൂട്ടമായി ആക്രമിക്കുന്നതു പതിവായി. തെരുവുനായശല്യത്തിനെതിരേ പഞ്ചായത്ത് ഇടപെടാത്തതിൽ പ്രതിഷേധം ശക്തമാണ്. കഴിഞ്ഞ ഒരു വർഷത്തിനുള്ളിൽ നിരവധി പേർക്കാണ് തെരുവുനായ്ക്കളുടെ കടിയേറ്റത്. സാമൂഹികാരോഗ്യകേന്ദ്രം, മുതുകുളം പാണ്ഡവർകാവ്, ഷാപ്പുമുക്ക്, പുത്തൻചന്ത, കൊല്ലകൽ, ഇലങ്കം, വാരണപ്പള്ളിൽ, വെട്ടത്തുമുക്ക് തുടങ്ങിയ ഭാഗങ്ങളിലെല്ലാം തെരുവുനായശല്യം രൂക്ഷമാണ്. നായ്ക്കൂട്ടത്തെ പേടിച്ച് കുട്ടികളെ മുറ്റത്തേക്കിറക്കാൻ പോലും വീട്ടുകാർ ഭയപ്പെടുകയാണ്. മുതിർന്നവർ വടിയുമായാണ് പുറത്തേക്കിറങ്ങുന്നത്. മൂന്നു മാസം മുമ്പ് മുതുകുളത്തിന്‍റെ വടക്കൻ പ്രദേശത്ത് അഞ്ചുപേർക്ക് നായയുടെ കടിയേറ്റു. കൂടാതെ പാണ്ഡവർകാവ് ദേവീ ക്ഷേത്രത്തിലേക്കുവന്ന ഭക്തയെ തെരുവുനായ കടിച്ചു. ഏതാനും മാസം മുമ്പ് ക്ഷേത്രത്തിലെത്തിയ കൊച്ചുകുട്ടിക്കുനേരേ നായ്ക്കൂട്ടം പാഞ്ഞടുത്തെങ്കിലും അവിടെയുണ്ടായിരുന്ന യുവാക്കൾ രക്ഷകരായി. അഞ്ചാം വാർഡ് ആലുംചുവടിനു കിഴക്കു ഭാഗത്ത് തെരുവുനായയുടെ ആക്രമണത്തിൽനിന്ന് രക്ഷപ്പെടാൻ ശ്രമിക്കവേ സൈക്കിളിൽനിന്ന് വീണ് അഞ്ചാം ക്ലാസുകാരനു പരിക്കേറ്റ സംഭവവും ഉണ്ടായിട്ടുണ്ട്. കുട്ടി സമീപത്തെ വീട്ടിലേക്ക് ഓടിക്കയറിയാണ് നായ്ക്കൂട്ട ആക്രമണത്തിൽനിന്ന് രക്ഷപ്പെട്ടത്. ഇരുചക്രവാഹനക്കാർക്കും തെരുവുനായ്ക്കൾ വലിയ ഭീഷണി ഉയർത്തുന്നുണ്ട്. അപ്രതീക്ഷിതമായി റോഡിനു കുറുകെ ചാടുന്ന നായ്ക്കളെ ഇടിച്ച് ഒട്ടേറെ അപകടങ്ങളാണുണ്ടാകുന്നത്. മുമ്പ് മുതുകുളം സ്റ്റാർ ജംഗ്ഷനു സമീപം നായയെതട്ടി സ്കൂ‌ട്ടർ മറിഞ്ഞ് അമ്മയ്ക്കും മകൾക്കും പരിക്കേറ്റിരുന്നു. വന്ദികപ്പള്ളി പെട്രോൾ പമ്പിനു മുന്നിൽ സമാനമായ രീതിയിൽ ബൈക്ക് യാത്രക്കാരായ അമ്മയ്ക്കും മകനും അപകടമുണ്ടായിട്ടുണ്ട്. വെട്ടത്തുകടവ് റോഡിൽ രണ്ടു തവണ നായയെതട്ടി സ്‌കൂട്ടർ മറിഞ്ഞ് സ്ത്രീകൾക്കു സാരമായി പരിക്കേറ്റിട്ടുമുണ്ട്. കൂടാതെ, കോഴികൾ ഉൾപ്പെടെയുള്ള വളർത്തുപക്ഷികളെയും നായ്ക്കൂട്ടം കടിച്ചുകൊല്ലുന്നു. വീടിനു പുറത്തു സൂക്ഷിക്കുന്ന ഇരുചക്രവാഹനങ്ങളുടെ സീറ്റും കേബിളുമെല്ലാം കടിച്ചുകീറി നശിപ്പിക്കുകയും ചെയ്യുന്നുണ്ട്. മുതുകുളത്ത് തെരുവുനായ ശല്യം രൂക്ഷമായിട്ടും നിയന്ത്രിക്കാൻ യാതൊരു നടപടിയുണ്ടാകാത്തതു നാട്ടുകാരുടെ പ്രതിഷേധത്തിന് ഇടയാക്കുകയാണ്.

രോഗപ്രതിരോധ കുത്തിവയ്പ് വാരാചരണം സമാപിച്ചു

ആലപ്പുഴ: രോഗപ്രതിരോധ കുത്തിവയ്പ് വാരാചരണ സമാപനം ആലപ്പുഴ ജനറൽ ആശുപത്രിയിൽ നടത്തി. കുത്തിവയ്പുകളുടെ പ്രാധാന്യവും ആവശ്യകതയും വ്യക്തമാക്കുന്ന പോസ്റ്റർ പ്രദർശനം, പൊതുജനങ്ങൾക്കായി ബോധവത്കരണ ക്ലാസ് എന്നിവയും നടത്തി. ഡോ. കെ. വേണുഗോപാൽ പോസ്റ്റർ പ്രദർശനം ഉദ്ഘാടനം ചെയ്തു. മികച്ച പോസ്റ്റർ തയാറാക്കിയ ഡോ. ഗോവിന്ദിന് സൂപ്രണ്ട് ഡോ. ആർ. സന്ധ്യ ഉപഹാരം നൽകി. പിപി യൂണിറ്റ് മെഡിക്കൽ ഓഫീസർ ഡോ. എം. പ്രവീൺ ബോധവത്കരണ ക്ലാസ് നയിച്ചു. ആർഎംഒ ഡോ. എം. ആശ, എആർഎംഒ ഡോ. സെൻ, നഴ്സിംഗ് സൂപ്രണ്ട് റസി ബേബി, ജെപിഎച്ച്എൻമാരായ പ്രമീള, ഷൈനി എന്നിവർ പ്രസംഗിച്ചു.

രാസലഹരിയുടെ നീരാളിപ്പിടിത്തത്തിന്‍റെ ഉത്തരവാദിത്വം ഇടതുസര്‍ക്കാരിന്: സി.ആര്‍. മഹേഷ് എംഎല്‍എ

മാവേലിക്കര: രാസലഹരിയുടെ നീരാളിപ്പിടിത്തത്തില്‍ കേരളത്തിലെ യുവതയെ എത്തിച്ചതിന്‍റെ ഉത്തരവാദിത്വം ഇടതു സര്‍ക്കാരിനെന്ന് സംസ്‌കാര സാഹിതി സംസ്ഥാന ചെയര്‍മാന്‍ സി.ആര്‍. മഹേഷ് എംഎല്‍എ. കോണ്‍ഗ്രസ് മാവേലിക്കര ബ്ലോക്ക് കമ്മിറ്റി സംഘടിപ്പിച്ച ലഹരിവിരുദ്ധ സമ്മേളനം ഉദ്ഘാടനം ചെയ്യുകയായിരുന്നു എംഎൽഎ. കേരളത്തിലേക്ക് വന്‍തോതില്‍ ഇറക്കുമതി ചെയ്യപ്പെടുന്ന മയക്കുമരുന്നുകളുടെ ഉറവിടം കണ്ടെത്തി കുറ്റവാളികളെ നിയമത്തിന്‍റെ മുന്നില്‍ കൊണ്ടുവരുവാന്‍ സര്‍ക്കാര്‍ പരാജയപ്പെട്ടു. പ്രതിഭാധനരായ യുവത്വത്താല്‍ സമ്പന്നമായ കേരളത്തിന്‍റെ ഭാവിയെ തന്നെ ചോദ്യം ചെയ്യുന്ന തരത്തില്‍ ലഹരി വില്പന അനുദിനം വര്‍ധിക്കുവാന്‍ സംസ്ഥാന സര്‍ക്കാര്‍ മൗനാനുവാദം നല്‍കിയിരിക്കുന്നത് കേരള ജനതയ്ക്ക് പൊറുക്കുവാന്‍ പറ്റാത്ത തെറ്റാണെന്നും അതിനുള്ള മറുപടി അവര്‍ കരുതി വച്ചിരിക്കുകയാണെന്നും അദ്ദേഹം പറഞ്ഞു. ബ്ലോക്ക് പ്രസിഡന്‍റ് അനി വര്‍ഗീസ് അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് കെ.ആര്‍. മുരളീധരന്‍, നഗരസഭാ ചെയര്‍മാന്‍ നൈനാന്‍ സി. കുറ്റിശേരില്‍, വൈസ് ചെയര്‍പേഴ്‌സണ്‍ ടി. കൃഷ്ണകുമാരി, കെപിസിസി അംഗം കുഞ്ഞുമോള്‍ രാജു, യുഡിഎഫ് നിയോജകമണ്ഡലം ചെയര്‍മാന്‍ കെ. ഗോപന്‍, കോണ്‍ഗ്രസ് നൂറനാട് ബ്ലോക്ക് പ്രസിഡന്‍റ് ജി. ഹരിപ്രകാശ്, ലളിത രവീന്ദ്രനാഥ്, എം.കെ. സുധീര്‍ തുടങ്ങിയവര്‍ പ്രസംഗിച്ചു.

സഹകരണമേഖലയെ തകര്‍ക്കാന്‍ കേന്ദ്രശ്രമം: കെസിഇസി ജില്ലാ സമ്മേളനം

ചേർത്തല: സഹകരണ മേഖലയെ ഇല്ലാതാക്കാനായി കേന്ദ്രസർക്കാർ നടത്തുന്ന ആസൂത്രിത നീക്കങ്ങളെ ചെറുത്തു തോൽപ്പിക്കുന്നതിനുള്ള ഇടപെടലുകൾ നടത്താൻ കേരള കോ-ഓപ്പറേറ്റീവ് എംപ്ലോയീസ് കൗൺസിൽ (എഐടിയുസി) ജില്ലാ സമ്മേളനം തീരുമാനിച്ചു. കേരളത്തിലെ ബാങ്കിംഗ് പ്രവർത്തനത്തിന്‍റെ 40 ശതമാനത്തിന് മുകളിൽ കൈകാര്യം ചെയ്യുന്നത് സഹകരണ മേഖലയാണ്. സഹകരണ മേഖലയെ തകർത്തു കേരളത്തിന്‍റെ സാമ്പത്തിക ഭദ്രത ഇല്ലാതാക്കാനും ഈ രംഗം കോർപറേറ്റുകൾക്ക് എഴുതിക്കൊടുക്കാനുമായുള്ള കേന്ദ്രത്തിന്‍റെ ശ്രമത്തിന്‍റെ ഭാഗമാണ് ഈ ഇടപെടലുകളെന്ന് ബോധ്യപ്പെടും വിധമാണ് കേന്ദ്രം പ്രവർത്തിക്കുന്നത്. സംസ്ഥാന സർക്കാർ നടപ്പിലാക്കുന്ന ജനക്ഷേമ പ്രവർത്തനങ്ങൾക്ക് പൂർണ പിന്തുണ നൽകുന്ന സഹകരണ മേഖലയിലെ ജീവനക്കാരെ അവഗണിക്കുന്ന സമീപനമാണ് സർക്കാർ കൈക്കൊള്ളുന്നതെന്ന് സമ്മേളനം ആരോപിച്ചു. കെസിഇസി സംസ്ഥാന ജനറൽ സെക്രട്ടറി വിൽസൺ ആന്‍റണി സമ്മേളനം ഉദ്ഘാടനം ചെയ്തു. ജില്ലാ പ്രസിഡന്‍റ് ഗോപികൃഷ്ണൻ അധ്യക്ഷത വഹിച്ചു. സംഘാടക സമിതി ചെയർമാൻ എ.പി. പ്രകാശൻ സ്വാഗതം പറഞ്ഞു. ജില്ലാ സെക്രട്ടറി വി.എൻ. സുരേഷ്ബാബു കണക്കും റിപ്പോർട്ടും അവതരിപ്പിച്ചു. ഭാരവാഹികളായി വി.ഡി. ഷൂബിമോൻ (പ്രസിഡന്‍റ്), പി.ആർ. രതീഷ് (സെക്രട്ടറി), സനൽകുമാർ (ട്രഷറർ).

മാവേലിക്കര ടൗണ്‍ വികസനത്തിലെ അനിശ്ചിതാവസ്ഥ പരിഹരിക്കണം

മാവേലിക്കര: സമീപ നിയോജകമണ്ഡലത്തിലെ ടൗണുകളെല്ലാം കാലാനുസൃതമായി വികസന പാതയില്‍ സഞ്ചരിക്കുമ്പോള്‍ മാവേലിക്കര ടൗണിലെ വികസനം അനിശ്ചിതാവസ്ഥയില്‍ തുടരുന്നതില്‍ കേരള കോണ്‍ഗ്രസ്-ജേക്കബ് മാവേലിക്കര നിയോജകമണ്ഡലം കമ്മിറ്റി പ്രതിഷേധിച്ചു. വികസന കാര്യങ്ങളിലെ അലംഭാവം അവസാനിപ്പിച്ച് ടൗണ്‍ വികസനത്തിന്‍റെ മാസ്റ്റര്‍പ്ലാന്‍ തയാറാക്കി നടപ്പില്‍ വരുത്താനുള്ള ആര്‍ജവം കാട്ടണമെന്നും മണ്ഡലം കമ്മിറ്റി ആവശ്യപ്പെട്ടു. നിയോജകമണ്ഡലം കണ്‍വന്‍ഷന്‍ സംസ്ഥാന ജനറല്‍ സെക്രട്ടറി കോശി തുണ്ടുപറമ്പില്‍ ഉദ്ഘാടനം ചെയ്തു. നിയോജമണ്ഡലം പ്രസിഡന്‍റ് രാജന്‍ തെക്കേവിള അധ്യക്ഷത വഹിച്ചു. അഡ്വ. ഗോപകുമാര്‍, ബിജു മാത്യു ഗ്രാമം, ലിയോ തരകന്‍, മാത്യു ജോണ്‍ പ്ലാക്കട്ട്, അനില്‍ ജോര്‍ജ്, അജി നടവള്ളില്‍ എന്നിവര്‍ പ്രസംഗിച്ചു. ഒൻപത്, പത്ത് തീയതികളില്‍ കോട്ടയത്ത് നടക്കുന്ന പാര്‍ട്ടി സംസ്ഥാന സമ്മേളനം വിജയിപ്പിക്കുന്നതിന് യോഗം തീരുമാനിച്ചു.

നാഗ്പൂരിലെ തലച്ചോറിൽനിന്നുത്ഭവിക്കുന്ന തീരുമാനങ്ങളാണ് പാർലമെന്‍റിൽ നിയമങ്ങളായി മാറുന്നതെന്ന് എംപി

അന്പലപ്പുഴ: നാഗ്പൂരിലെ തലച്ചോറിൽനിന്നുത്ഭവിക്കുന്ന തീരുമാനങ്ങളാണ് പലപ്പോഴും പാർലമെന്‍റിൽ നിയമങ്ങളായി മാറുന്നതെന്ന് കെ.സി. വേണുഗോപാൽ എം പി. ഭരണാഘടനാ വിരുദ്ധമായ വഖ്ഫ് ഭേദഗതി പിൻവലിക്കണമെന്നാവശ്യപ്പെട്ട് അമ്പലപ്പുഴ താലുക്ക് ദക്ഷിണ മേഖലാ ജമാ അത്ത് അസോസിയേഷന്‍റെ നേതൃത്വത്തിൽ വളഞ്ഞവഴിയിൽ നടന്ന പ്രതിഷേധ സമ്മേളനം ഉദ്ഘാടനം ചെയ്യുകയായിരുന്നു എംപി. സ്നേഹമെന്ന വാക്കിനെ വെറുപ്പാക്കി മാറ്റിയിരിക്കുകയാണ് മോദി സർക്കാർ. ഭരണാധികാരികൾ തലച്ചോറു കൊണ്ടല്ല ഹൃദയം കൊണ്ടാണ് നിയമം നിർമിക്കേണ്ടത്. തലച്ചോറുകൊണ്ടു നിർമിക്കുന്ന നിയമത്തിൽ മനുഷ്യത്വം കാണില്ലെന്നും എം പി. പറഞ്ഞു. അസോസിയേഷൻ പ്രസിഡന്‍റ് സി.എ. സലിം ചക്കിട്ടപ്പറമ്പിൽ അധ്യക്ഷത വഹിച്ചു. വൈകിട്ട് പുന്നപ്ര വണ്ടാനം ഷറഫുൽ ഇസ്‌ലാം മസ്ജിദ് അങ്കണത്തിൽനിന്നാരംഭിച്ച റാലിയിൽ പതിനായിരത്തോളം പേർ പങ്കെടുത്തു. റാലി വളഞ്ഞവഴിയിൽ സമാപിച്ചു. എച്ച്. സലാം എംഎൽഎ മുഖ്യാതിഥിയായിരുന്നു. എൻ. അലി അബ്ദുള്ള മുഖ്യപ്രഭാഷണം നടത്തി. അസോസിയേഷൻ ജനറൽ സെക്രട്ടറി ടി.എ. താഹ പുറക്കാട്, ട്രഷറർ ഇബ്രാഹിംകുട്ടി വിളക്കേഴം, സി.ആർ.പി. അബ്ദുൾ ഖാദർ, നവാസ് പൊഴിക്കര, എച്ച്. ബഷീർ, യു. നാസർ, സലിം പഴയങ്ങാടി, വഹാബ് പറയൻ തറ, ലത്തീഫ് തോട്ടപ്പള്ളി, സാദിഖ് മുസ്ലിയാർ കരുമാടി എന്നിവർ പ്രസംഗിച്ചു.

അരൂര്‍-തുറവൂര്‍ സമാന്തരപാത ; അറ്റകുറ്റപ്പണിക്ക് അനുവദിച്ച തുക ചെലവഴിക്കുന്നതില്‍ ഗുരുതര അനാസ്ഥ: കെ.സി. വേണുഗോപാല്‍ എംപി

തുറവൂർ: ദേശീയപാത പുനര്‍നിര്‍മാണത്തിന്‍റെ ഭാഗമായി ഉയരപ്പാത നിര്‍മാണം നടക്കുന്ന അരൂര്‍-തുറവൂര്‍ മേഖലയില്‍ ദേശീയപാതയ്ക്കു സമാന്തരപാത ശക്തിപ്പെടുത്താന്‍ ദേശീയപാതാ അഥോറിറ്റി അനുവദിച്ച തുക രണ്ടു മാസമായിട്ടും ചെലവഴിക്കാത്തത് പൊതുമരാമത്തു വകുപ്പിന്‍റെ ഗുരുതര അനാസ്ഥയാണെന്ന് കെ.സി. വേണുഗോപാല്‍ എംപി. എട്ടരക്കോടി രൂപയാണ് ഇക്കഴിഞ്ഞ ഫെബ്രുവരി മാസത്തില്‍ ദേശീയപാതാ അഥോറിറ്റി സംസ്ഥാന പൊതുമരാമത്ത് വകുപ്പിനു കൈമാറിയത്. ഉയരപ്പാത നിര്‍മാണമേഖലയില്‍ ഗതാഗതക്കുരുക്കും അപകടമരണങ്ങളും പതിവായതോടെയാണ് കെ.സി. വേണുഗോപാല്‍ എംപി പ്രശ്‌നപരിഹാരത്തിനായി യോഗം വിളിച്ചുചേര്‍ത്തത്. സമാന്തരപാതകള്‍ അറ്റകുറ്റപ്പണികള്‍ നടത്തി ഗതാഗതം വഴിതിരിച്ചുവിടാന്‍ യോഗത്തില്‍ തീരുമാനമെടുത്തിരുന്നു. തുറവൂര്‍ - കുമ്പളങ്ങി റോഡും തുറവൂര്‍ - മാക്കേക്കടവ് റോഡും ശക്തിപ്പെടുത്തി പകരം ഗതാഗതമാര്‍ഗം തുറക്കാന്‍ തീരുമാനമെടുത്തെങ്കിലും പണം തടസമായി. ഇതിനിടെ വേണുഗോപാൽ ചെയർപേഴ്സണായ പബ്ലിക് അക്കൗണ്ട്സ് കമ്മിറ്റി അരൂർ - തുറവൂർ മേഖലയിൽ സന്ദർശനം നടത്തി നിർമാണ പ്രവർത്തനങ്ങളിലെ പ്രശ്നങ്ങൾ പഠിക്കുകയും ഗതാഗതക്കുരുക്ക് ഒഴിവാക്കാനുള്ള അടിയന്തര നടപടികൾ സ്വീകരിക്കാൻ ഗതാഗത മന്ത്രാലയത്തിന് നിർദേശം നൽകുകയും ചെയ്തിരുന്നു. കഴിഞ്ഞദിവസം ചേര്‍ന്ന ദേശീയപാതാ പുനര്‍നിര്‍മാണ അവലോകന യോഗത്തില്‍ എം.പി. ഇതിനെതിരേ രൂക്ഷമായ ഭാഷയില്‍ പ്രതികരിച്ചു. ദിവസേന ഒന്നരമണിക്കൂര്‍ വരെ നീളുന്ന ഗതാഗതക്കുരുക്കും നിരന്തരം ഉണ്ടാകുന്ന അപകടങ്ങളും കുറയ്ക്കാന്‍ തുക ലഭിച്ചിട്ടും ചെലവഴിക്കുന്നതില്‍ ഗുരുതരമായ അനാസ്ഥയാണ് പൊതുമരാമത്ത് വകുപ്പിന് ഉണ്ടായിരിക്കുന്നതെന്ന് എംപി കുറ്റപ്പെടുത്തി. ഉദ്യോഗസ്ഥരുടെ ഭാഗത്ത് ഗുരുതരമായ കൃത്യവിലോപമാണ് ഉണ്ടായതെന്നും സമാന്തരപാതകള്‍ ശക്തിപ്പെടുത്താന്‍ അടിയന്തര നടപടികള്‍ സ്വീകരിക്കണമെന്നും എംപി യോഗത്തില്‍ ആവശ്യപ്പെട്ടു.

കെഎസ്ആര്‍ടിസി താത്കാലിക ബസ് സ്റ്റാന്‍ഡ് ആരംഭിച്ചു

എടത്വ: എടത്വ പള്ളി തിരുനാളിനോടനുബന്ധിച്ച് തീര്‍ഥാടകര്‍ക്ക് യാത്രാസൗകര്യം ഒരുക്കുന്നതിന്‍റെ ഭാഗമായി എടത്വ കോളജ് മൈതാനത്ത് കെഎസ്ആര്‍ടിസി താത്കാലിക ബസ് സ്റ്റാന്‍ഡ് ആരംഭിച്ചു. ബസ് സ്റ്റാന്‍ഡിന്‍റെ പ്രവർത്തനോ ദ്ഘാടനം തിരുനാള്‍ കോ-ഓര്‍ഡിനേറ്റര്‍ ഫാ. ഏലിയാസ് കരിക്കണ്ടത്തില്‍ നിര്‍വഹിച്ചു. ജനറല്‍ കണ്‍വീനര്‍ തോമസ് ജോര്‍ജ് പറത്തറ അധ്യക്ഷത വഹിച്ചു. എടത്വ, ആലപ്പുഴ, കോട്ടയം, ഹരിപ്പാട് തുടങ്ങിയ സര്‍വീസുകള്‍ക്ക് പുറമേ തിരുവനന്തപുരം, പൂവാര്‍, കൊല്ലം, എറണാകുളം, ഇടുക്കി, കളിയിക്കാവിള തുടങ്ങിയ സ്ഥലങ്ങളിലേക്കും കെഎസ്ആര്‍ടിസിയുടെ സ്‌പെഷല്‍ സര്‍വീസ് ഉണ്ടായിരിക്കുമെന്നു കണ്‍വീനര്‍ കെ.പി. വിന്‍സെന്‍റ് അറിയിച്ചു. കൈക്കാരന്‍ വിന്‍സെന്‍റ് പഴയാറ്റില്‍, ഫാ. അനീഷ് കാമിച്ചേരി, കണ്‍ട്രോളിംഗ് ഇന്‍സ്പെക്ടര്‍ രശ്മിനാഥ്, ഓഫീസ് ഇന്‍ ചാര്‍ജ് മനോജ് കുമാര്‍, സ്റ്റേഷന്‍ മാസ്റ്റര്‍ അയ്യപ്പദാസ്, റോബിന്‍ കളങ്ങര, ജോബി കണ്ണമ്പള്ളി, ബാബു പള്ളിത്തറ എന്നിവര്‍ പങ്കെടുത്തു.

ദൈവദാസന്‍ പുത്തന്‍പറമ്പില്‍ തൊമ്മച്ചന്‍ ഇന്‍ഫര്‍മേഷന്‍ സെന്‍റര്‍ പ്രവര്‍ത്തനം ആരംഭിച്ചു

എടത്വ: എടത്വ പള്ളി തിരുനാളിനോടനുബന്ധിച്ച് തീര്‍ഥാടകര്‍ക്കായി ദൈവദാസന്‍ പുത്തന്‍ പറമ്പില്‍ തൊമ്മച്ചന്‍ ഇന്‍ഫര്‍മേഷന്‍ സെന്‍റര്‍ പള്ളിയുടെ വടക്കു വശത്തായി ആരംഭിച്ചു. ചങ്ങനാശേരി അതിരൂപത മെത്രാപ്പോലീത്താ മാര്‍ തോമസ് തറയില്‍ ഉദ്ഘാടനം നിര്‍വഹിച്ചു. വികാരി ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. ദൈവദാസന്‍ പുത്തന്‍പറമ്പില്‍ തൊമ്മച്ചന്‍ നാമകരണ നടപടി വൈസ്‌ പോസ്റ്റുലേറ്റര്‍ ഫാ. അനീഷ് കുടിലില്‍, എടത്വ റീജിയന്‍ പ്രസിഡന്‍റ് സാബു കരിക്കംപള്ളി, അംഗങ്ങളായ അജി വാഴപ്പറമ്പില്‍, മനോജ് മാത്യു പുത്തന്‍വീട്ടില്‍, ഷാജി കാഞ്ഞൂപ്പള്ളില്‍, സിബിച്ചന്‍ വേളാശേരി, റൂബി കരിക്കംപള്ളി, മേഴ്‌സി ഷാജി കാഞ്ഞൂപ്പള്ളില്‍, ജോസ് ആമ്പക്കാട്, കൈക്കാരന്മാരായ പി.എസ്. ടോമിച്ചന്‍ പറപ്പള്ളി, കെ.എം. ജയിംസ് കളത്തൂര്‍, വിന്‍സെന്‍റ് പഴയാറ്റില്‍, ജനറല്‍ കണ്‍വീനര്‍ തോമസ് ജോര്‍ജ് ആലപ്പാട്ട് പറത്തറ, പബ്ലിസിറ്റി കണ്‍വീനര്‍ സോജന്‍ സെബാസ്റ്റ്യന്‍ കണ്ണന്തറ എന്നിവര്‍ പ്രസംഗിച്ചു. ദൈവദാസൻ തൊമ്മച്ചന്‍റെ ജീവചരിത്രം, സഭാപ്രവര്‍ത്തനം എന്നിവയെക്കുറിച്ചുള്ള പുസ്തകങ്ങള്‍, ലഘുലേഖകള്‍ എന്നിവ ഈ കൗണ്ടറില്‍ നിന്നു ലഭിക്കും. എടത്വ പള്ളിയില്‍ ഇന്ന് എടത്വ സെന്‍റ് ജോര്‍ജ് ഫൊറോന പള്ളിയില്‍ രാവിലെ 4.30ന് വിശുദ്ധ കുര്‍ബാന (തമിഴ്) - ഫാ. സൈമണ്‍. 5.45ന് സപ്ര, മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - മാര്‍ സെബാസ്റ്റ്യന്‍ വാണിയപ്പുരയ്ക്കല്‍ (സീറോ മലബാര്‍ കുരിയ ബിഷപ്). 7.30ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - ഫാ. സ്‌കറിയ സ്രാമ്പിക്കല്‍. 10.00ന് വിശുദ്ധ കുർബാന (തമിഴ് സീറോ മലബാര്‍) - ഫാ. തോമസ് പൗവത്തുപറമ്പില്‍. ഉച്ചകഴിഞ്ഞ് 2.30ന് വിശുദ്ധ കുര്‍ബാന (തമിഴ്) - ഫാ. ദുരൈസ്വാമി. വൈകുന്നേരം 4.00ന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - റവ ഡോ. ജേക്കബ് പുതുമനമൂഴിയില്‍. 6.00ന് വിശുദ്ധ കുര്‍ബാന (തമിഴ്) - ഫാ. സൈമണ്‍. 7.00ന് മധ്യസ്ഥപ്രാര്‍ഥന (കുരിശടിയില്‍).

"ചെങ്ങന്നൂര്‍-ആലപ്പുഴ-എറണാകുളം ബോട്ട് സർവീസ് പുനരാരംഭിക്കണം'

ചെങ്ങന്നൂര്‍: മൂന്നു പതിറ്റാണ്ടുകള്‍ക്കു മുമ്പ് നിര്‍ത്തലാക്കിയ ചെങ്ങന്നൂര്‍-ആലപ്പുഴ-എറണാകുളം ബോട്ട് സര്‍വീസ് പുനരാരംഭിക്കണമെന്ന നാട്ടുകാരുടെ ആവശ്യം ശക്തമാകുന്നു. സീ കുട്ടനാട് മാതൃകയിലുള്ള വിനോദസഞ്ചാര പദ്ധതികളുമായി ബന്ധപ്പെടുത്തി ഈ ജലപാത പുനരുജ്ജീവിപ്പിക്കണമെന്നാണ് പ്രധാന ആവശ്യം. ഒരു കാലത്ത് ചങ്ങനാശേരി, ആലപ്പുഴ, എറണാകുളം എന്നിവിടങ്ങളിലെ യാത്രക്കാര്‍ക്കും വ്യാപാരികള്‍ക്കും ഒരുപോലെ ആശ്രയമായിരുന്ന ഈ ബോട്ട് സര്‍വീസ് 1992ലാണ് നിര്‍ത്തലാക്കിയത്. പിന്നീട് ഈ റൂട്ട് കാടുകയറി നശിച്ചു. ജലഗതാഗത വകുപ്പിന്‍റെ കല്ലിശേരിയിലെ സ്റ്റേഷന്‍ ഓഫീസ് കെട്ടിടവും ബോട്ട് ജെട്ടിയും കാലപ്പഴക്കത്തില്‍ ഇല്ലാതായി. പുതിയ ഇറപ്പുഴ പാലം നിര്‍മാണത്തിന് സ്ഥലം ഏറ്റെടുത്തപ്പോള്‍ ഓഫീസ് കെട്ടിടം പൂര്‍ണമായും പൊളിച്ചുമാറ്റി. ഈ ജലപാതയുടെ പ്രാധാന്യം തിരിച്ചറിഞ്ഞ നാട്ടുകാര്‍ ബോട്ട് സര്‍വീസ് പുനരാരംഭിക്കുന്നതിനായുള്ള ശ്രമങ്ങള്‍ പലപ്പോഴും നടത്തിയിരുന്നു. ചെങ്ങന്നൂരിന്‍റെയും കുട്ടനാടിന്‍റെയും ടൂറിസം സാധ്യതകള്‍ക്ക് പുതിയൊരു ഉണര്‍വ് നല്‍കാന്‍ ഈ ബോട്ട് സര്‍വീസിന് സാധിക്കുമെന്നാണ് അവരുടെ പ്രതീക്ഷ. സീ കുട്ടനാട് ടൂറിസം പദ്ധതിയുടെ മാതൃകയില്‍ ഈ റൂട്ടിനെയും വികസിപ്പിച്ചാല്‍ അത് സഞ്ചാരികള്‍ക്ക് ഒരു പുതിയ അനുഭവമായിരിക്കും. കായലുകളുടെയും പുഴകളുടെയും മനോഹരമായ കാഴ്ചകളിലൂടെയുള്ള യാത്രയും കുട്ടനാടിന്‍റെ ഗ്രാമീണ ജീവിതവും അടുത്തറിയാനുള്ള അവസരവും ഇതിലൂടെ ലഭിക്കും. ഈ ആവശ്യം അധികാരികളുടെ ശ്രദ്ധയില്‍ എത്തിക്കുന്നതിനായി നാട്ടുകാര്‍ ഒരു കൂട്ടായ്മ രൂപീകരിച്ച് പ്രവര്‍ത്തിക്കുന്നുണ്ട്. ജനപ്രതിനിധികളും ഈ വിഷയത്തില്‍ അനുകൂലമായ നിലപാട് സ്വീകരിച്ചാല്‍ വൈകാതെ തന്നെ ഈ സ്വപ്നം യാഥാര്‍ഥ്യമാകുമെന്ന പ്രതീക്ഷയിലാണ് നാട്ടുകാര്‍. കാലം കാത്തുവച്ച ഈ ജലപാതയുടെ പുനരുജ്ജീവനം ചെങ്ങന്നൂരിന്‍റെയും കുട്ടനാടിന്‍റെയും വിനോദ സഞ്ചാര മേഖലയ്ക്ക് ഒരു മുതല്‍ക്കൂട്ടു തന്നെയായിരിക്കും.

താത്കാലിക പോലീസ് സ്റ്റേഷന്‍ ആരംഭിച്ചു

എടത്വ: എടത്വ പള്ളി തിരുനാളിനോടനുബന്ധിച്ച് പള്ളി കോമ്പൗണ്ടില്‍ താത്കാലിക പോലീസ് സ്റ്റേഷന്‍ ആരംഭിച്ചു. പോലീസ് സ്റ്റേഷന്‍റെയും സിസിടിവിയുടെയും ഉദ്ഘാടനം എടത്വ സര്‍ക്കിള്‍ ഇന്‍സ്പെക്ടര്‍ എം. അന്‍വര്‍ നിര്‍വഹിച്ചു. വികാരി ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. തിരുനാള്‍ കോ-ഓര്‍ഡിനേറ്റര്‍ ഫാ. ഏലിയാസ് കരിക്കണ്ടത്തില്‍, കണ്‍വീനര്‍ ജോച്ചന്‍ ജോസഫ്, ഫാ. അജോ പീടികയില്‍, കൈക്കാരന്മാരായ പി.എസ്. ടോമിച്ചന്‍ പറപ്പള്ളി, ജയിംസ് കളത്തൂര്‍, വിന്‍സെന്‍റ് പഴയാറ്റില്‍, ജനറല്‍ കണ്‍വീനര്‍ തോമസ് ജോര്‍ജ് പറത്തറ, സിസിടിവി കണ്‍വീനര്‍ ഷൈജു മണക്കളം, ജെയിന്‍ കറുകയില്‍, റോബിന്‍ കളങ്ങര, ജോസി പരുമൂട്ടില്‍, ബാബു പള്ളിത്തറ, പി.വി. ജെറോം, ടോം ജെ. കൂട്ടക്കര, ജിന്‍സി ജോളി, ജോബി കണ്ണമ്പള്ളി, കെ.പി. കുഞ്ഞുമോന്‍, കെ.പി. വിന്‍സെന്‍റ്, സ്റ്റീഫന്‍ പറപ്പള്ളി, വറീച്ചന്‍ വേലിക്കളം എന്നിവര്‍ പ്രസംഗിച്ചു. ക്രമസമാധാന ചുമതലയ്ക്കായി 400 പോലീസുകാരുടെ സേവനം തിരുനാള്‍ കാലത്ത് ലഭ്യമാക്കിയിട്ടുണ്ട്.

ലഹരിക്കെതിരേ ഡ്രൈവിംഗ് സ്കൂൾ അസോസിയേഷൻ

ചെങ്ങന്നൂർ: ലഹരി മാഫിയകൾക്കെതിരേ പൊതുസമൂഹം വൻമതിൽ പണിയണമെന്ന് ചെങ്ങന്നൂർ ജോയിന്‍റ് ആർടിഒ ആർ. പ്രസാദ്. തലമുറകളെ ഇല്ലാതാക്കുക എന്ന ഗൂഢലക്ഷ്യത്തോടെ പ്രവർത്തിക്കുന്ന ക്ഷുദ്ര ശക്തികൾക്കെതിരേ പല്ലും നഖവും ഉപയോഗിച്ച് ഓരോ വ്യക്തിയും പ്രതിരോധിക്കണമെന്ന് അദ്ദേഹം പറഞ്ഞു. ചെങ്ങന്നൂരിലെ ഡ്രൈവിംഗ് സ്കൂൾ അസോസിയേഷന്‍റെ സാമൂഹ്യ പ്രതിബദ്ധതയോടെയുള്ള ഇത്തരം പ്രവർത്തനങ്ങൾ മാതൃകാപരമാണന്ന് അദ്ദേഹം കൂട്ടിച്ചേർത്തു. ചെങ്ങന്നൂർ മോട്ടോർ ഡ്രൈവിംഗ് സ്കൂൾ അസോസിയേഷന്‍റെ നേതൃത്വത്തിൽ നടന്ന ലഹരിവിരുദ്ധ വാഹന സന്ദേശയാത്രയുടെ ഉദ്ഘാടനത്തോടനുബന്ധിച്ച് പ്രസംഗിക്കുകയായിരുന്നു അദ്ദേഹം. തുടർന്ന് ലഹരിവിരുദ്ധ പ്രതിജ്ഞ ചൊല്ലിക്കൊടുക്കുകയും യാത്ര ഫ്ളാഗ്ഓഫ് ചെയ്യുകയും ചെയ്തു. മോട്ടോർ വെഹിക്കിൾ ഇൻസ്പെക്ടർ എസ്. അഭിലാഷ് ലഹരിവിരുദ്ധ സന്ദേശം നൽകി. അസിസ്റ്റന്‍റ് മോട്ടോർ വെഹിക്കിൾ ഇൻസ്പെക്ടർ എം. ശ്യാംകുമാർ, അസോസിയേഷൻ പ്രസിഡന്‍റ് സണ്ണി യോഹന്നാൻ, സെക്രട്ടറി സുനിൽ ഡി. വള്ളിയിൽ തുടങ്ങിയവർ പ്രസംഗിച്ചു. കാരയ്ക്കാട്, പുത്തൻകാവ്, ചെങ്ങന്നൂർ ടൗൺ, കല്ലിശേരി, പ്രാവിൻകൂട്, തിരുവൻവണ്ടൂർ, പാണ്ടനാട്, മാന്നാർ, ബുധനൂർ, പുലിയൂർ, ചെറിയനാട് എന്നീ പ്രദേശങ്ങളിലൂടെ സഞ്ചരിച്ച സന്ദേശയാത്ര കൊല്ലകടവിൽ സമാപിച്ചു.

ബന്ധുവീട്ടിലെത്തിയ യുവാവ് മുങ്ങി മരിച്ചു

എടത്വ: ബന്ധുവീട്ടിലെത്തിയ യുവാവ് പമ്പാനദിയില്‍ കുളിക്കുന്നതിനിടെ മുങ്ങി മരിച്ചു. തൃശൂര്‍ കൊടുങ്ങല്ലൂര്‍ ശങ്കരന്‍കുളത്തിയില്‍ ജിതിന്‍ മാത്യു (36) ആണ് മരിച്ചത്. ഇന്നലെ വൈകുന്നേരം 5.15ന് എടത്വ മങ്ങാട്ട് കടവിലാണ് അപകടം. ഭാര്യവീടായ നിരണത്ത് എത്തിയ ശേഷം ബന്ധുവായ എടത്വ പഞ്ചായത്ത് ഏഴാം വാര്‍ഡ് കുന്തിരിക്കല്‍ പള്ളിക്ക് സമീപം കല്ലൂപ്പറമ്പ് ബിനുവിന്‍റെ വീട്ടില്‍ ഇന്നലെ രാവിലെ എത്തിയതാണ് ജിതിന്‍ മാത്യു. സമീപത്തെ മങ്ങാട്ട് കടവില്‍ കുളിക്കുന്നതിനിടെ കാല്‍ വഴുതി ആഴത്തിലേക്ക് താഴ്ന്നു പോകുകയായിരുന്നു. ബന്ധുക്കളും നാട്ടുകാരും ചേര്‍ന്ന് നടത്തിയ തെരച്ചിലില്‍ ജിതിനെ നദിയില്‍നിന്ന് കണ്ടെത്തി എടത്വയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. എടത്വ പോലീസ് മേല്‍നടപടി സ്വീകരിച്ചു. ഇന്ന് വണ്ടാനം മെഡിക്കല്‍ കോളജില്‍ പോസ്റ്റ്മോര്‍ട്ടത്തിന് ശേഷം മൃതദേഹം ബന്ധുക്കള്‍ക്ക് വിട്ടുനല്‍കും. ഭാര്യ: ജാന്‍സി.

ചങ്ങനാശേരി അതിരൂപത 139-ാമത് ദിനാഘോഷം 20ന്

ചങ്ങനാശേരി: ചങ്ങനാശേരി അതിരൂപത 139-ാമത് ദിനാഘോഷം 20ന് രാവിലെ 9.30 മുതല്‍ 1.30 വരെ ചങ്ങനാശേരി മെത്രാപ്പോലീത്തന്‍ പള്ളിയിലെ കര്‍ദിനാള്‍ മാര്‍ ആന്‍റണി പടിയറ നഗറില്‍ നടക്കും. കേരളത്തിലെ അഞ്ച് ജില്ലകളില്‍ മുന്നൂറോളം ഇടവകകളിലായി എണ്‍പതിനായിരത്തോളം കുടുംബങ്ങളിലെ അഞ്ചുലക്ഷത്തോളം വരുന്ന വിശ്വാസികളുടെ പ്രതിനിധികളും വൈദികരും സന്യസ്തപ്രതിനിധികളും പരിപാടികളില്‍ പങ്കെടുക്കും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. അതിരൂപത നൽകുന്ന പരമോന്നത ബഹുമതിയായ എക്‌സലന്‍സ് അവാര്‍ഡ് അന്നു സമ്മാനിക്കും. തങ്ങളുടെ പ്രത്യേകമായ ഇടപെടല്‍കൊണ്ട് സഭയിലും സമൂഹത്തിലും ശ്രദ്ധേയമായ സംഭാവനകള്‍ നൽകിയവരെയും സംസ്ഥാന, ദേശീയ, അന്തര്‍ദേശീയ തലങ്ങളില്‍ അംഗീകാരം നേടിയ അതിരൂപതാംഗങ്ങളെയും പ്രത്യേകമായി ആദരിക്കും. അതിരൂപതയെ സംബന്ധിക്കുന്ന വിവിധ പ്രഖ്യാപനങ്ങളും അന്നു നടക്കും. 18ന് ഇടവകതല ആഘോഷങ്ങള്‍ അതിരൂപതാദിനത്തിന് മുന്നോടിയായി 18ന് അതിരൂപതയിലെ എല്ലാ പള്ളികളിലും ഇടവകതല ആഘോഷങ്ങള്‍ നടക്കും. അന്ന് ആഘോഷമായ വിശുദ്ധ കുര്‍ബാനയ്ക്കുശേഷം അതിരൂപത ദിനം വിളംബരം ചെയ്ത് പേപ്പല്‍ പതാക ഉയര്‍ത്തുകയും അതിരൂപത ആന്തം ആലപിക്കുകയും അതിരൂപതാദിന പ്രതിജ്ഞ ചൊല്ലുകയും ചെയ്യും. 19ന് ഛായാചിത്ര, ദീപശിഖാ പ്രയാണങ്ങള്‍ 19ന് കര്‍ദിനാള്‍ മാര്‍ ആന്‍റണി പടിയറയുടെ മാതൃ ഇടവകയായ മണിമല സെന്‍റ് ബേസില്‍ പള്ളിയില്‍നിന്നു ഛായാചിത്രപ്രയാണവും ധന്യന്‍ മാര്‍ തോമസ് കുര്യാളശേരിയുടെ കബറിടത്തിങ്കല്‍നിന്നു ദീപശിഖാ പ്രയാണവും അതിരൂപത യുവദീപ്തി എസ്എംവൈഎം, മിഷന്‍ ലീഗ് എന്നീ സംഘടനകളുടെ ആഭിമുഖ്യത്തില്‍ ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയിലേക്കു ക്രമീകരിച്ചിട്ടുണ്ട്. തുടര്‍ന്ന് ആഘോഷമായ സായാഹ്ന പ്രാര്‍ഥന. പരിപാടികളുടെ വിജയത്തിനായി അതിരൂപതാദിന ജനറല്‍ കണ്‍വീനര്‍ മോണ്‍. ആന്‍റണി എത്തയ്ക്കാട്ട്, മെത്രാപ്പോലീത്തന്‍ പള്ളി വികാരി ഫാ. ജോസഫ് വാണിയപ്പുരയ്ക്കല്‍, കോ-ഓര്‍ഡിനേറ്റര്‍ ഫാ. ജോബിന്‍ ആനക്കല്ലുങ്കല്‍ എന്നിവരുടെ നേതൃത്വത്തില്‍ വിവിധ കമ്മിറ്റികള്‍ പ്രവര്‍ത്തിച്ചുവരുന്നു.

പെട്രോൾ പമ്പിന് നേരേ ആക്രമണം: രണ്ടു പ്രതികൾ അറസ്റ്റിൽ

കായംകുളം: കൊറ്റുകുളങ്ങര പുത്തൻ റോഡ് ജംഗ്ഷന് സമീപം പെട്രോൾ പമ്പിൽ ആക്രമണം നടത്തിയ കേസിൽ രണ്ടു പ്രതികൾ പിടിയിലായി. കായംകുളം പത്തിയൂർ എരുവ പടിഞ്ഞാറ് കപ്പകശേരിത്തറയിൽ മുഹമ്മദ് റാഫി (23), കരുവറ്റുംകുഴി വടക്കോട്ട് വീട്ടിൽ വാടകയ്ക്ക് താമസിക്കുന്ന കൊറ്റുകുളങ്ങര കൂട്ടേത്ത് തെക്കതിൽ ബിലാദ് (23) എന്നിവരെയാണ് അറസ്റ്റ് ചെയ്തത്. കഴിഞ്ഞ ബുധനാഴ്ച പുലർച്ചെ ഒന്നോടെയായിരുന്നു സംഭവം. രണ്ടു ബൈക്കുകളിലായി അഞ്ചുപേർ പെട്രോൾ പമ്പിൽ എത്തി. ഇവർ 50 രൂപയ്ക്ക് പെട്രോൾ നിറച്ചതിനുശേഷം പണം ആവശ്യപ്പെട്ടപ്പോൾ പണം നൽകാതെ ജീവനക്കാരെ മർദിക്കുകയായിരുന്നു. സംഭവശേഷം പ്രതികൾ ഒളിവിൽപ്പോയിരുന്നു.

കാറ്റിലും കോളിലും വള്ളം തകർന്നു

മുഹമ്മ: ശക്തമായ കാറ്റിലും കോളിലും മത്സ്യബന്ധന വള്ളം ഭാഗികമായി തകർന്നു. മത്സ്യവലകളും നശിച്ചു. മുഹമ്മ പഞ്ചായത്ത് എട്ടാം വാർഡ് കൊച്ചുചിറയിൽ ഷൈജുമോന്‍റെ വള്ളമാണ് അപകടത്തിൽപ്പെട്ടത്. വെള്ളിയാഴ്ച വൈകുന്നേരം മുഹമ്മ ജെട്ടിക്കു വടക്കുവശം വല ഇടുന്നതിനിടെയാണ് തിരയിൽപ്പെട്ടത്. ജലഗതാഗത വകുപ്പ് ജീവനക്കാരനാണ് ഷൈജുവിനെ രക്ഷിച്ച് കരയിൽ എത്തിച്ചത്.

തീരദേശ ഹൈവേയുടെ പേരിൽ ആശങ്കയെന്ന് ജനകീയ കൂട്ടായ്‌മ

ആലപ്പുഴ: തീരദേശ ഹൈവേ പ്രാഥമിക വിജ്ഞാപനം ഉടൻ വരുമെന്നുള്ള അധികൃതരുടെ വെളിപ്പെടുത്തൽ തീരദേശജനത ആശങ്കയോടെയാണ് നോക്കിക്കാണുന്നതെന്ന് ജനകീയ കൂട്ടായ്‌മ. റോഡിന്‍റെ ഇരുവശങ്ങളിൽനിന്നും സമമായി സ്ഥലം ഏറ്റെടുക്കണമെന്നാണ് ജനങ്ങൾ ആവശ്യപ്പെടുന്നത്. വിഷയത്തിൽ തീരദേശ ഹൈവേ ജനകീയ കൂട്ടായ്‌മയുമായും ചർച്ച നടത്താമെന്ന കിഫ്ബി അധിക്യതരുടെ വാക്കും നാളിതുവരെ ഫലം കണ്ടിട്ടില്ല. റോഡിന്‍റെ ഒരുവശത്ത് 5.5 മീറ്ററും മറുവശത്ത് അര മീറ്റർ, ഒരു മീറ്റർ എന്നിങ്ങനെയാണ് ഇപ്പോൾ പിങ്ക് കല്ലുകൾ സ്ഥാപിച്ചിരിക്കുന്നത്. എന്നാൽ തെക്ക് അമ്പലപ്പുഴ മുതലുള്ള സ്ഥലമെടുപ്പിന് തീരുമാനം ആയിട്ടില്ലെന്നാണ് തീദേശജനത മനസിലാക്കുന്നത്. സ്ഥലം ഏറ്റെടുക്കുന്നതിനുമുമ്പ് പ്രദേശവാസികളുമായി ചർച്ചയ്ക്ക് അധികൃതർ തയാറാകണമെന്നും ഡിപിആർ എത്രയുംവേഗം പുറപ്പെടുവിക്കണമെന്നും തീരദേശ ഹൈവേ ജനകീയ കൂട്ടായ്‌മയുടെ പൊതുയോഗം ആവശ്യപ്പെട്ടു. യോഗത്തിൽ ജനറൽ കൺവീനർ സോളമൻ അറക്കൽ അധ്യക്ഷത വഹിച്ചു. എ.എക്സ്. ബേബി അരേശേരിൽ, പോളി ആന്‍റണി, ബൈജു കാരളശേരിൽ എന്നിവർ പ്രസംഗിച്ചു.

മാതൃവേദി-പിതൃവേദി പ്രവര്‍ത്തന വര്‍ഷോദ്ഘാടനം

ആലപ്പുഴ: പുത്തനങ്ങാടി സെന്‍റ് ജോര്‍ജ് പള്ളിയിൽ ഇന്നു രാവിലെ എട്ടിന് മാതൃവേദി-പിതൃവേദി പ്രവര്‍ത്തന വര്‍ഷോദ്ഘാടനം, മാര്‍ഗരേഖ പ്രകാശനം, സത്യപ്രതിജ്ഞ എന്നിവ നടക്കും. യൂണിറ്റ് പ്രസിഡന്‍റ് റോയി വേലിക്കെട്ടില്‍ അധ്യക്ഷത വഹിക്കും. ചങ്ങനാശേരി അതിരൂപത ഫാമിലി അപ്പൊസ്തലേറ്റ് ഡയറക്ടര്‍ ഫാ. സെബാസ്റ്റ്യന്‍ ചാവക്കാല ഉദ്ഘാടനം ചെയ്യും. ഫാ. ജോബിന്‍ തൈപ്പറമ്പില്‍ അനുഗ്രഹ പ്രഭാഷണം നടത്തും. ചങ്ങനാശേരി അതിരൂപത പിതൃവേദി പ്രസിഡന്‍റ് റോയി കപ്പാങ്കല്‍ മാര്‍രേഖ പ്രകാശനം ചെയ്യും. യൂണിറ്റ് സെക്രട്ടറി ജൂനിയ റിപ്പോര്‍ട്ട് അവതരിപ്പിക്കും. ഫൊറോന പ്രസിഡന്‍റ് ജിമ്മിച്ചന്‍, സെക്രട്ടറി ഷിബു ജോര്‍ജ്, അഞ്ജു ജോഷ് എന്നിവര്‍ പ്രസംഗിക്കും.

കരുവാറ്റ സെന്‍റ് ജോസഫ് പള്ളിയിൽ വിശുദ്ധ യൗസേപ്പ് പിതാവിന്‍റെ തിരുനാളിന് തുടക്കം

കരുവാറ്റ: സെന്‍റ് ജോസഫ് പള്ളിയിൽ വിശുദ്ധ യൗസേപ്പ് പിതാവിന്‍റെ തിരുനാളിന് ഭക്തിനിര്‍ഭരമായ തുടക്കം. തിരുനാള്‍ 11ന് സമാപിക്കും. ഇന്നു രാവിലെ ഏഴിന് വിശുദ്ധ കുര്‍ബാന. അഞ്ചുമുതല്‍ എട്ടുവരെ രാവിലെ 6.15ന് സപ്ര, 6.30ന് മധ്യസ്ഥ പ്രാര്‍ഥന, വിശുദ്ധ കുര്‍ബാന. ഒമ്പതിന് വൈകുന്നേരം 4.30ന് വികാരി ഫാ. ജയിംസ് പുളിച്ചുമാക്കല്‍ എംസിബിഎസ് കൊടിയേറ്റും. തുടര്‍ന്ന് പൂര്‍വികരുടെ അനുസ്മരണം, 5.15ന് മധ്യസ്ഥ പ്രാര്‍ഥന, വിശുദ്ധ കുര്‍ബാന - ഫാ. മാത്യു അഞ്ചല്‍. ഫാ. ജോര്‍ജ് തൈച്ചേരിയില്‍ വചനസന്ദേശം നല്‍കും. പത്തിന് രാവിലെ 6.15ന് സപ്ര, 6.30ന് മധ്യസ്ഥ പ്രാര്‍ഥന, ഏഴിന് തിരുനാള്‍ കുര്‍ബാന. ചങ്ങനാശേരി അതിരൂപത വികാരി ജനറാള്‍ ഫാ. ആന്‍റണി എത്തയ്ക്കാട്ട് മുഖ്യകാര്‍മികത്വം വഹിക്കും. പുന്നപ്ര കാര്‍മല്‍ എന്‍ജിനിയറിംഗ് കോളജ് ഡയറക്ടര്‍ ഫാ. ജസ്റ്റിന്‍ ആലുക്കല്‍ സിഎംഐ വചനപ്രഘോഷണം നടത്തും. വൈകുന്നേരം നാലിന് വചന പ്രഘോഷണവും ദിവ്യകാരുണ്യ പ്രദക്ഷിണവും. മല്ലപ്പള്ളി ദിവ്യകാരുണ്യ മരിയഭവന്‍ അസി. ഡയറക്ടര്‍ ഫാ. ജൂഡ് കൂലിപ്പറമ്പില്‍ എംസിബിഎസ് വചനസന്ദേശം നല്‍കും. ചങ്ങനാശേരി ചാസ് അസി. ഡയറക്ടര്‍ ഫാ. ജിന്‍സ് ചോരേട്ടു ചാമക്കാല ദിവ്യകാരുണ്യ പ്രദക്ഷിണത്തിന് കാര്‍മികത്വം വഹിക്കും. ഏഴിന് പാലാ കമ്യൂണിക്കേഷന്‍സ് അവതരിപ്പിക്കുന്ന ഗാനമേള. 11നു വൈകുന്നേരം നാലിന് ആഘോഷമായ റാസ കുര്‍ബാന. ചങ്ങനാശേരി അതിരൂപത യുവദീപ്തി എസ്എംവൈഎം ഡയറക്ടര്‍ ഫാ. ജോബിന്‍ ആനകല്ലുങ്കല്‍ മുഖ്യകാര്‍മികത്വം വഹിക്കും. ഫാ. ജോ കിഴക്കേമുറി വചനസന്ദേശം നല്‍കും. തുടര്‍ന്ന് തിരുനാള്‍ പ്രദക്ഷിണം, കൊടിയിറക്ക്, സ്‌നേഹവിരുന്ന്.

കൊച്ചുമകളുടെ റീൽസ് ഗോപിനാഥൻപിള്ളയെ എത്തിച്ചത് മോഹൻലാലിനൊപ്പം

ചെങ്ങന്നൂർ: തരുൺമൂർത്തിയുടെ സംവിധാനത്തിൽ മോഹൻലാൽ നായകനായി ഇറങ്ങിയ തുടരും സിനിമയിൽ അഭിനയിച്ചതിന്‍റെ സന്തോഷത്തിലാണ് 83 കാരനായ ഗോപിനാഥൻപിള്ള. ചെങ്ങന്നൂർ കല്ലിശേരി ഉമയാറ്റുകരയിലെ വള്ളിയിൽ വീട്ടിലിരുന്നു ഗോപിനാഥൻപിള്ള ആദ്യമായി സിനിമയിൽ അഭിനയിച്ചതിന്‍റെ ത്രില്ലിലാണ് സംസാരിക്കുന്നത്. ടാക്സി ഡ്രൈവറായ മോഹൻലാലിന്‍റെ അംബാസിഡർ കാറിൽ യാത്ര ചെയ്യുന്ന ഒരു സാധാരണക്കാരന്‍റെ വേഷത്തിലാണ് ഗോപിനാഥൻ പിള്ള അഭിനയിക്കുന്നത്. സിനിമയിലെ അദ്ദേഹത്തിന്‍റെ ഒരു ഡയലോഗ് ഇതിനോടകം ശ്രദ്ധ നേടിക്കഴിഞ്ഞു -ഈ വണ്ടിക്കൊരു കുലുക്കമാണെന്നും അടുത്ത പ്രാവശ്യം ഊബർ വിളിക്കത്തൊള്ളന്നു.- ഇതിനു മറുപടിയായി-അതെന്താ ഊബർ കുലുങ്ങത്തില്ലേ?- എന്ന് മോഹൻലാൽ ചോദിക്കുന്ന രംഗം രസകരമാണ്. കുറഞ്ഞസമയം മാത്രമാണെങ്കിലും ഗോപിനാഥൻപിള്ളയും മോഹൻലാലും ഒന്നിച്ചുള്ള ഈ രംഗം പ്രേക്ഷക ശ്രദ്ധ നേടി. കൊച്ചുമകൾ മിത്ര അദ്ദേഹം അറിയാതെ പകർത്തിയ ഒരു വീഡിയോയാണ് അദ്ദേഹത്തെ സിനിമയുടെ വെള്ളിത്തിരയിലേക്ക് എത്തിച്ചിരിക്കുന്നത്. മിത്രയുടെ മിത്രം എന്ന പേരിലുള്ള ഇൻസ്റ്റഗ്രാം അക്കൗണ്ടിൽ ഗോപിനാഥൻ പിള്ളയുടെ രസകരമായ നിമിഷങ്ങൾ കൊച്ചുമകൾ റീൽസായി പങ്കുവച്ചിരുന്നു. ഈ റീലുകളാണ് സംവിധായകൻ തരുൺ മൂർത്തിയുടെ ശ്രദ്ധയിൽപ്പെട്ടത്. ഗോപിനാഥൻപിള്ള ഈ സിനിമയിലെ ഒരു കഥാപാത്രത്തിന് അനുയോജ്യനാണെന്നു തോന്നിയ തരുൺ മൂർത്തി ഗോപിനാഥനുമായി ബന്ധപ്പെടുകയായിരുന്നു. സിനിമയിൽ അഭിനയിക്കണമെന്ന് ആഗ്രഹമുണ്ടായിരുന്നെങ്കിലും അപ്രതീക്ഷിതമായി അവസരം ലഭിച്ചപ്പോൾ ഗോപിനാഥൻപിള്ള ഒരല്പം പതറി. എന്നാൽ, ഭാര്യ ഓമനയും മക്കളും മരുമക്കളും കൊച്ചുമക്കളും ഒപ്പം നിന്നതോടെ അദ്ദേഹം സമ്മതം മൂളി. ഷൂട്ടിംഗ് ലൊക്കേഷനിൽ എത്തിയപ്പോൾ, തന്‍റെ ഇഷ്ടതാരങ്ങളിൽ ഒരാളായ മോഹൻലാൽ അടുത്തുവന്ന് സംസാരിച്ചത് ഗോപനാഥൻ പിള്ളയ്ക്ക് പറഞ്ഞറിയിക്കാനാവാത്ത അനുഭവമായിരുന്നു. എവിടെനിന്നാണ് വരുന്നത്, യാത്ര സുഖകരമായിരുന്നോ എന്നിങ്ങനെയുള്ള മോഹൻലാലിന്‍റെ സ്നേഹത്തോടെയുള്ള വാക്കുകൾ അദ്ദേഹത്തിന്‍റെ മനസിനെ സ്പർശിച്ചു. തുടരും സിനിമയിൽ സിനിമയിൽ അഭിനയിച്ച് ഏറെ പരിചയമുള്ള ഒരാളെപ്പോലെയാണ് ഗോപിനാഥൻപിള്ളയുടെ അഭിനയമെന്ന് സിനിമ കണ്ട അദ്ദേഹത്തിന്‍റെ നാട്ടുകാർ പറയുന്നു. മമ്മൂട്ടിയാണ് അദ്ദേഹത്തിന്‍റെ മറ്റൊര ഇഷ്ടനടൻ. സിനിമകളെല്ലാം ഇഷ്ടമാണെങ്കിലും ചെമ്മീൻ എന്ന സിനിമയോട് അദ്ദേഹത്തിന് ഒരല്പം ഇഷ്ടം കൂടുതലാണ്. ഭാര്യ ഓമനയും മകനും ഭാര്യയും കൊച്ചുമക്കളുമൊത്താണ് ജീവിതം.

മുഖഛായ മാറ്റി ജില്ലാക്കോടതിപ്പാലം: പൈലുകളുടെ നിർമാണം പുരോഗമിക്കുന്നു

ആലപ്പുഴ: നഗരത്തിന്‍റെ മുഖച്ഛായ മാറ്റുന്ന ജില്ലാ കോടതിപ്പാലത്തിന്‍റെ പുനർനിർമാണ ജോലികൾ പുരോഗമിക്കുന്നു. 90 മീറ്റർ നീളവും 60 മീറ്റർ വീതിയുമുള്ള പാലത്തിന് ആകെ 168 പൈലുകളാണുള്ളത്. ഇതിൽ 36 എണ്ണത്തിന്‍റെ നിർമാണം പൂർത്തിയാക്കി പൈൽ ക്യാപ് പ്രവൃത്തികൾ ആരംഭിച്ചു. കിഫ്ബി പദ്ധതിയിൽ ഉൾപ്പെടുത്തി വാടക്കനാലിന് കുറുകെ 120.52 കോടി രൂപ ചെലവിലാണ് പാലത്തിന്‍റെ പുനർനിർമാണം. ഇതിൽ സ്ഥലമേറ്റെടുപ്പിനായി 20.58 കോടി രൂപയും യൂട്ടിലിറ്റി ഷിഫ്റ്റിംഗിനായി 3.17 കോടി രൂപയും പ്രവൃത്തികൾക്കായി 3.64 കോടി രൂപയും ലഭ്യമായിട്ടുണ്ട്. പഴയ ജില്ലാ കോടതിപ്പാലം പൊളിച്ചാണ് പുതിയത് നിർമിക്കുന്നത്. വാഹനങ്ങളുടെ വേഗം ക്രമീകരിക്കാനാകുന്ന റൗണ്ട് എബൗട്ട് മാതൃകയിലാണ് നിർമാണം. കനാലിന്‍റെ ഇരുകരകളിലും നാലു വശങ്ങളിലേക്കായി ഫ്ലൈ ഓവറുകളും അടിപ്പാതയും റാംപ് റോഡുകളും എന്ന നിലയിലാണ് രൂപകൽപ്പന. കനാലിന് വടക്കേക്കരയിലാണ് പൈലിംഗ് ആരംഭിച്ചിട്ടുള്ളത്. പാലത്തിന്‍റെ ഗർഡറുകളുടെ പ്രവൃത്തികൾ ഉടൻ ആരംഭിക്കും. നിലവിലെ പാലം പൊളിച്ചതിനാൽ വാഹനഗതാഗതത്തിന് പഴയ പോലീസ് കൺട്രോൾ റൂമിന് കിഴക്ക് വശത്തായി താത്കാലിക സമാന്തര റോഡ് ഒരുക്കിയിട്ടുണ്ട്. ഫ്ലൈ ഓവറുകളുടെ നിർമാണത്തിനായി ജലഗതാഗതവകുപ്പിന്‍റെ ബോട്ട് ജെട്ടിയും ഓഫീസും പൊളിച്ചുനീക്കിയിരുന്നു. നിലവിൽ മാതാ ജെട്ടിയിലാണ് താത്കാലിക ബോട്ട് ജെട്ടിയും ഓഫീസും പ്രവർത്തിക്കുന്നത്.

13 വർഷത്തെ നിയമപോരാട്ടം; അങ്കണവാടിക്ക് സ്വന്തം കെട്ടിടം യാഥാർഥ്യമാക്കി

ചാരുംമൂട്: പതിമൂന്നു വർഷത്തെ നിയമപോരാട്ടത്തിനൊടുവിൽ അനിതകുമാരി അങ്കണവാടി കെട്ടിടം യാഥാർഥ്യമാക്കി. ഐസിഡിസി ഭരണിക്കാവ് ബ്ലോക്കിലെ താമരക്കുളം നലാം വാർഡ് പേരൂർ കാരാഴ്മ ആലുവിള നഗറിലെ 118-ാം നമ്പർ അങ്കണവാടിക്കാണ് സ്വന്തമായി കെട്ടിടം യാഥാർഥ്യമാകുന്നത്. വർഷങ്ങളായി വാർഡിന്‍റെ വിവിധ ഭാഗങ്ങളിൽ വാടകക്കെട്ടിടങ്ങളിലാണ് അങ്കണവാടി പ്രവർത്തിച്ചത്. 2013ൽ ഉമ്മൻ ചാണ്ടി മുഖ്യമന്ത്രിയായിരുന്ന കാലത്താണ് അങ്കണവാടി അധ്യാ പികയായ അനിത സ്വന്തമായി സ്ഥലം കണ്ടെത്തുതിന് ഇറങ്ങിത്തിരിക്കുന്നത്. കല്ലട ഇറിഗേഷന്‍റെ കനാൽ കടന്നുപോകുന്ന ഭാഗത്ത് വെറുതെ കിടക്കുന്ന സ്ഥലം അങ്കണ വാടിക്ക് കെട്ടിടം നിർമിക്കാൻ വേണ്ടി പതിച്ചുനൽകണമെന്ന ആവശ്യവുമായി മുഖ്യമന്ത്രിയായ ഉമ്മൻ ചാണ്ടിയെ നേരിൽ കണ്ടു. ഭൂമി നൽകുന്നതിനാവശ്യമായ അനുമതി മുഖ്യമന്ത്രി നൽകി. അഞ്ചു സെന്‍റ് ഭൂമി അനുദിക്കുകയായിരുന്നു. എന്നാൽ, ഭൂമി അളക്കാൻ സ്ഥലത്ത് എത്തിയ റവന്യു ഉദ്യോഗസ്ഥരെ ഒരു സംഘം ചെറുപ്പക്കാർ തടഞ്ഞു. തുടർന്ന് ചെങ്ങന്നൂർ ഡിവൈഎസ്പിയുടെ നിർദേശപ്രകാരം നൂറനാട് പോലീസ് എത്തി ഭൂമി അളന്ന് തിട്ടപ്പെടുത്തി. പിന്നീട് അയൽവാസി അങ്കണ വാടിക്ക് ലഭിച്ച സ്ഥലത്തിലൂടെയാണ് വീട്ടിലേക്കുള്ള വഴി എന്ന് കാണിച്ച് കേസ് കൊടുത്തു. ഒടുവിൽ നിയമപോരാട്ടത്തിലും വിധി അനിതയ്ക്ക് സഹായമായി. തുടർന്ന് കൊടിക്കുന്നിൽ സുരേഷ് എംപിയുടെ വികസ ഫണ്ടിൽനിന്ന് അനുവദിച്ച 15 ലക്ഷം രൂപ ഉപയോഗിച്ച് നിർമിച്ച ഹൈടക് അങ്കണവാടിയാണ് ഇപ്പോൾ യാഥാർഥ്യമാകുന്നത്. ഈ മാസം ഉദ്ഘാടനം നടത്താനാണ് തീരുമാനിച്ചിട്ടുള്ളതെന്ന് അനിത പറഞ്ഞു.

അശാസ്ത്രീയ ഓട നിര്‍മാണം, നാട്ടുകാര്‍ ദുരിതത്തില്‍

ആലപ്പുഴ: നാട്ടുകാരോ ജനപ്രതിനിധികളോ ആവശ്യപ്പെടാതെ ഒന്നരയടി ഉയരത്തില്‍ അശാസ്ത്രീയമായി ഓട നിര്‍മിച്ചതു മൂലം നാട്ടുകാര്‍ ദുരിതത്തില്‍. കഴിഞ്ഞ നാലു വര്‍ഷവും മഴക്കാലത്ത് അനുഭവിച്ച ദുരിതം ഇത്തവണയും ആവര്‍ത്തിക്കും. തോണ്ടംകുളങ്ങര വാര്‍ഡിലെ കൈചൂണ്ടിമാര്‍ക്കറ്റ് റോഡില്‍ നിര്‍മിച്ചിട്ടുള്ള ഓടയാണ് പ്രദേശത്തെ കുടുംബങ്ങളെയും നാട്ടുകാരെയും കെണിയില്‍ പെടുത്തിയിരിക്കുന്നത്. നാലുവര്‍ഷം മുന്‍പ് നഗരസഭയുടെ ഉപാധിരഹിത ഫണ്ടില്‍നിന്നു എട്ടു ലക്ഷം രൂപ ചെലവഴിച്ചാണ് ഓട നിര്‍മിച്ചത്. കണ്ടത്തില്‍ തോടുമായി ബന്ധിപ്പിക്കാന്‍ എന്ന പേരില്‍ റോഡിനു കുറുകെ ഓട നിര്‍മിച്ചതോടെ സുഗമമായ യാത്രയ്ക്കും തടസമായി. റോഡിന്‍റെ പടിഞ്ഞാറ് വശത്ത് ഒന്നരയടി ഉയരത്തില്‍ നില്‍ക്കുന്ന ഓട ഈ വശത്തെ 5 വീട്ടുകാര്‍ക്ക് പുറത്തേക്കിറങ്ങാന്‍ തടസമായി. ഓടയുടെ വടക്കേയറ്റം ഒരു വീട്ടുകാരുടെ ഗേറ്റിനു മുന്നില്‍ അവസാനിക്കുകയാണ്. മഴക്കാലത്ത് ഇവിടെ അരയ്‌ക്കൊപ്പം വെള്ളം കെട്ടിനില്‍ക്കും. സ്‌കൂള്‍ വിദ്യാര്‍ഥികളും നാട്ടുകാരും നീന്തിയാണ് പോകുന്നതെന്നു വീട്ടുകാര്‍ സങ്കടം പറഞ്ഞു. ഓടയുടെ പൊക്കത്തില്‍ റോഡ് ഉയര്‍ത്തി നിര്‍മിച്ച് വെള്ളക്കെട്ട് പരിഹരിക്കാനാണ് നീക്കം. അങ്ങനെ ചെയ്യുമ്പോള്‍ ഇതിനെക്കാള്‍ വലിയ ഭീഷണി നേരിടേണ്ടിവരും. രണ്ട് വശത്തെ വീടുകളുടെ മുറ്റവും പുരയിടവും കുറഞ്ഞത് ഒന്നരയടി താഴും. വാഹനങ്ങള്‍ റോഡിലേക്ക് ഇറക്കാന്‍ കഴിയാതെ വരും. ഇത് പരിഹരിക്കാന്‍ മുറ്റവും പുരയിടവും ഉയര്‍ത്തുമ്പോള്‍ വീടുകള്‍ താഴും- നാട്ടുകാര്‍ പറഞ്ഞു.

മുഹമ്മ ഫൊറോനാ പള്ളിയിൽ തിരുനാളിനു കൊടിയേറി

മുഹമ്മ: സെന്‍റ് ജോർജ് ഫൊറോനാ പള്ളിയിൽ വിശുദ്ധ ഗീവർഗീസ് സഹദായുടെ തിരുനാൾ വികാരി ഫാ.ആന്‍റണി കാട്ടൂപ്പാറയുടെ കാർമികത്വത്തിൽ കൊടിയേറി. 11 ന് സമാപിക്കും. ഒൻപതുവരെ ദിവസവും ജപമാല, വിശുദ്ധ കുർബാന, മധ്യസ്ഥ പ്രാർഥന എന്നിവ ഉണ്ടാകും. 10ന് കുട്ടികളുടെ വിശുദ്ധ കുർബാന സ്വീകരണം, സപ്ര, വിശുദ്ധ കുർബാന. പ്രധാന തിരുനാൾ ദിനമായ 11ന് രാവിലെ 6.15ന് സപ്ര, വിശുദ്ധ കുർബാന, തിരുനാൾ കുർബാന, തിരുനാൾ പ്രദക്ഷിണം, നേർച്ച വസ്തുക്കളുടെ ലേലം, സ്നേഹവിരുന്ന്.

വെളിയനാട് സെന്‍റ് സേവ്യേഴ്‌സ് പള്ളിയിൽ തിരുനാളിനു കൊടിയേറി

മങ്കൊമ്പ്: വെളിയനാട് സെന്‍റ് സേവ്യേഴ്‌സ് പള്ളിയിൽ വിശുദ്ധ ഫ്രാൻസിസ് സേവ്യറിന്‍റെ തിരുനാളിനു തുടക്കമായി. വികാരി ഫാ. ജോസഫ് കുറിയന്നൂർപറമ്പിൽ കൊടിയേറ്റി. ഇന്നു വൈകുന്നേരം 4.30ന് വിശുദ്ധ കുർബാന-ഫാ. ആന്‍റണി എത്തയ്ക്കാട്ട്. തുടർന്ന് പ്രദക്ഷിണം, ആകാശവിസ്മയം, ലൈറ്റ് ആൻഡ് സൗണ്ട് ഷോ. പ്രധാന തിരുനാൾ ദിനമായ നാളെ രാവിലെ 6.45ന് സപ്ര, വിശുദ്ധ കുർബാന, 9.15ന് റാസ- ഫാ. ജേക്കബ് നടുവിലേക്കളം, വാഹനവെഞ്ചരിപ്പ്, വൈകുന്നേരം അഞ്ചിന് റംശാ, തിരുനാൾ പ്രദക്ഷിണം, കൊടിയിറക്ക്, ലദീഞ്ഞ്, സമാപനാശീർവാദം, നേർച്ചവസ്തുക്കളുടെ ലേലം, രാത്രി ഏഴിന് നാടകം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]