മാറ്റം കൊതിച്ച് തെങ്ങണ ജംഗ്ഷൻ : Deepika.com Nattu Visesham

KOTTAYAM

മാറ്റം കൊതിച്ച് തെങ്ങണ ജംഗ്ഷൻ

Saturday, January 16, 2021 12:15 AM IST

തെങ്ങണ: തെങ്ങണയിലും പരിസരപ്രദേശങ്ങളിലും റോഡിന്‍റെ വശങ്ങളിൽ വർധിച്ചിരിക്കുന്ന വഴിവാണിഭം നിയന്ത്രിക്കാൻ നടപടി വേണമെന്ന് ആവശ്യം ഉയരുന്നു. റോഡരുകിൽ പെട്ടിവണ്ടികളിലാണ് വ്യാപകമായി വഴിവാണിഭം വർധിക്കുന്നത്. മാടപ്പള്ളി വില്ലേജ് ഓഫീസിന്‍റെ സമീപത്തും പെരുന്പനച്ചിയിലുമാണ് വഴിവാണിഭം വർധിച്ചത്.

വഴിയോരക്കച്ചവടക്കാർ പച്ചക്കറികളും ഏത്തക്കുലയും പഴവർഗങ്ങളും കച്ചവടം നടത്തുന്നതിനാൽ പഞ്ചായത്ത് ലൈസൻസ്, തൊഴിൽകരം, ഫുഡ് ആൻഡ് സേഫ്റ്റി, മെട്രോളജി, പൊല്യൂഷൻ പെർമിറ്റുകളും എടുത്ത് സെക്യൂരിറ്റിയും വാടകയും കൊടുത്ത് കച്ചവടം നടത്തുന്ന വ്യാപാരികളുടെ കച്ചവടം കുറയുന്നതായും ഇത് ഏറെ ബുദ്ധിമുട്ട് സൃഷ്ടിക്കുന്നതായും തെങ്ങണാ മർച്ചന്‍റ്സ് അസോസിയേഷൻ അഭിപ്രായപ്പെട്ടു.

വ്യാപാരികൾക്ക് ബാങ്ക് വായ്പപോലും തിരിച്ചടയ്ക്കാൻ പറ്റാത്ത സാഹചര്യമാണുള്ളതെന്നും ഭാരവാഹികൾ പറഞ്ഞു. അനധികൃത വഴിവാണിഭത്തിനെതിരേ മാടപ്പള്ളി ഗ്രാമപഞ്ചായത്ത്, പോലീസ്, പൊതുമരാമത്തുവകുപ്പ് അധികാരികൾ അടിയന്തര നടപടി സ്വീകരിക്കണമെന്നും അല്ലാത്തപക്ഷം പഞ്ചായത്ത് ഓഫീസ് ധർണ ഉൾപ്പെടെ നടത്താൻ വ്യാപാരിവ്യവസായി ഏകോപന സമിതി തീരുമാനിച്ചു. യോഗത്തിൽ പ്രസിഡന്‍റ് കെ.സി. ആന്‍റണി അധ്യക്ഷത വഹിച്ചു. പി.കെ. ഷാജി, തെങ്ങണാ ബഷീർ, ടോമിച്ചൻ മുക്കട, മാത്തുക്കുട്ടി തൂന്പുങ്കൽ, ഷാജി കൊല്ലംപറന്പിൽ, കെ.കെ. വത്സപ്പൻ, ശ്രീനി ശക്തി, സി.എ. റസാലി എന്നിവർ പ്രസംഗിച്ചു.