ഛിന്നഗ്രഹങ്ങളെ കണ്ടെത്തി ഇന്ത്യ ബുക്ക് ഓഫ് റിക്കാർഡ്സിൽ ഇടം നേടി 13കാരൻ : Deepika.com Nattu Visesham

KOTTAYAM

ഛിന്നഗ്രഹങ്ങളെ കണ്ടെത്തി ഇന്ത്യ ബുക്ക് ഓഫ് റിക്കാർഡ്സിൽ ഇടം നേടി 13കാരൻ

Friday, April 26, 2024 7:07 AM IST

വൈക്കം: ഛിന്നഗ്രഹങ്ങളെ കണ്ടെത്തി ഇന്ത്യ ബുക്ക് ഓഫ് റിക്കാർഡ്സിൽ ഇടം നേടി 13 കാരൻ. ഛിന്നഗ്രഹങ്ങളെ കണ്ടെത്തിയ ഇന്ത്യയിലെ ഏറ്റവും പ്രായം കുറഞ്ഞയാളെന്ന ബഹുമതിയാണ് വൈക്കം ചെമ്പ് തെക്കേച്ചിറ ഗിരിഷ്-ചിഞ്ചു ദമ്പതികളുടെ മകനായ ശ്രേയസ് കരസ്ഥമാക്കിയത്.

നാസയുടെ സഹകരണത്തോടെ 800 ലധികം ഛിന്നഗ്രഹങ്ങളെ കണ്ടെത്തിയതിൽ രണ്ടെണ്ണത്തിനാണ് ശ്രേയസിന് അംഗീകാരം ലഭിച്ചത്. നാസയുടെ പങ്കാളിത്തത്തോടെ ഓൺലൈൻ വഴി നടന്ന കാന്പയിനിലാണ് ശ്രേയസ് പുതിയ ഛിന്നഗ്രഹങ്ങളെ കണ്ടെത്തിയത്.

കുട്ടിക്കാലം മുതലേ ആസ്ട്രോളജിയിൽ തത്പരനായിരുന്ന ശ്രേയസ് 2021ൽ നാസയുടെ ഈ റിസർച്ച് ടീമിൽ അംഗത്വം നേടിയിരുന്നു. തുടർന്ന് 22ൽ നാസയുടെ സിറ്റിസൺ സൈന്‍റിസ്റ്റായി. മാസ് ഇന്ത്യ ഒബ്സർവേഷൻ ടീമായ മിൽക്കിവേ എക്സ് പോളർ ടീം അംഗമായി പ്രവർത്തിക്കുമ്പോഴായിരുന്നു ശ്രേയസ് രണ്ട് പുതിയ ഛിന്നഗ്രഹങ്ങളെ കണ്ടെത്തിയത്.

ഈ വർഷം ജനുവരിയിൽ തുടങ്ങിയ ഓൺലൈൻ കാന്പയിനിൽ ഫെബ്രുവരി അഞ്ച് മുതൽ 29വരെ നടത്തിയ ഗവേഷണത്തിലാണ് ശ്രേയസ് ഈ നേട്ടം കൈവരിച്ചത്. ഇതോടെയാണ് ഇന്ത്യ ബുക്ക്സ് ഓഫ് റിക്കാർഡ്സിൽ ഈ നേട്ടം കൈവരിച്ച ഇന്ത്യയിലെ ഏറ്റവും പ്രായം കുറഞ്ഞയാൾ എന്ന ബഹുമതി നേടിയത്.

ഒപ്പം നാസ കണ്ടു പിടിച്ച ഒരു നക്ഷത്രത്തിന് പേരിടാനുള്ള അവസരവും ഈ പതിമൂന്നുകാരന് ലഭിച്ചു. ജിഎസ്‌സി ഷൈനി ഫൈവ് എയ്റ്റ് വൺവൺ ടു നയൻ എന്ന് ശ്രേയസ് ആ നക്ഷത്രത്തിന് പേര് നൽകുകയും ചെയ്തു. കാക്കനാട് ജെംസ് മോഡേൺ അക്കാഡമിയിൽ ഏഴാം ക്ലാസ് വിദ്യാർഥിയാണ് ശ്രേയസ്. ശ്രേയസിന്‍റെ ഈ തിളക്കമാർന്ന നേട്ടം ഗിന്നസ് റിക്കാർഡ്സിലേക്കുള്ള പരിഗണയിലാണ്.