ബസിന്‍റെ കാര്യം എന്തായി? : Deepika.com Nattu Visesham

കോട്ടയം: സ്കൂൾ തുറന്നു കുട്ടികൾ വഴിയിലേക്ക് ഇറങ്ങുന്പോൾ പോകാൻ ബസ് കാണുമോ? യാതൊരു ഉറപ്പുമില്ല എന്ന സ്ഥിതിയിലാണ് കാര്യങ്ങൾ. കഴിഞ്ഞ കോവിഡ് കാലത്തിനു ശേഷം സ്കൂൾ തുറന്നപ്പോൾ വിദ്യാർഥികൾ നേരിട്ട ഏറ്റവും വലിയ പ്രശ്നമായിരുന്നു യാത്രാസൗകര്യങ്ങളുടെ അഭാവം. കോവിഡ് കാലത്ത് നഷ്ടത്തിലായ പല ബസുകളും സർവീസ് നിർത്തി. ചില സ്വകാര്യ ബസുകളാണെങ്കിൽ ഇപ്പോൾ സ്വന്തം സൗകര്യം അനുസരിച്ചാണ് സർവീസുകൾ നടത്തുന്നത്.
പണ്ടൊക്കെ വല്ലപ്പോഴും സംഭവിച്ചിരുന്ന ട്രിപ്പ് മുടക്കൽ ഇപ്പോൾ പതിവ് പരിപാടിയാണെന്നു നാട്ടുകാർ ചൂണ്ടിക്കാണിക്കുന്നു. ജി ഫോം നൽകി നികുതിയിൽ ഇളവു തേടി ഷെഡിൽ കയറ്റി ഇട്ട ബസുകൾ ഏറെയാണ്. ഇപ്പോഴും ഇത്തരത്തിൽ നികുതി ഇളവു വാങ്ങി പലതും ഷെഡിൽത്തന്നെയാണ്. ഇനി ഇവ പുറത്തിറക്കണമെങ്കിൽ വൻ തുക ചെലവഴിക്കണം.
എന്തു ചെയ്യും?
കഴിഞ്ഞ സ്കൂൾ സീസണിൽ സ്കൂളുകൾ മുഴുവനായി പ്രവർത്തിക്കാതിരുന്നിട്ടുപോലും വിദ്യാർഥികൾ യാത്രാ സൗകര്യമില്ലാതെ വലഞ്ഞു. കോവിഡിന്‍റെ ഭീഷണിയൊക്കെ അയഞ്ഞുനിൽക്കുന്ന സാഹചര്യത്തിൽ സ്കൂൾ- കോളജ് രംഗം പൂർണമായും സജീവമാകാനൊരുങ്ങുകയാണ്. ലക്ഷക്കണക്കിനു കുട്ടികൾ വലിയൊരു വിഭാഗം ഇപ്പോഴും പൊതുഗതാഗത സംവിധാനത്തെ ആശ്രയിക്കുന്നവരാണ്. ഇവർക്കു ആശങ്കകളില്ലാതെ സഞ്ചരിക്കാൻ ബസ് സർവീസ് ഉറപ്പാക്കുകയെന്നതിലേക്ക് ഇനിയും അധികാരികളുടെ ശ്രദ്ധ എത്തിയിട്ടില്ല എന്നതാണ് യാഥാർഥ്യം.
കെഎസ്ആർടിസിയും വലിഞ്ഞു
കോവിഡിനു ശേഷം സർവീസുകളിലുണ്ടായ പുനഃക്രമീകരണത്തിലൂടെ കെഎസ്ആർടിസിയും ഗ്രാമീണ സർവീസുകൾ വെട്ടിക്കുറച്ചു. കെഎസ്ആർടിസി ബസുകളെ ആശ്രയിച്ചിരുന്ന മേഖലകളിലും യാത്രാക്ലേശമാണ്. കൺസഷൻ കാർഡുകൾ പല റൂട്ടുകളിലും പുനരാരംഭിച്ചിട്ടില്ല.
ചെയിൻ സർവീസുകളിലടക്കം ബസുകളുടെ എണ്ണം വെട്ടിക്കുറയ്ക്കുകയോ ട്രിപ്പുകൾ പുനഃക്രമീകരിക്കുകയും ചെയ്തു. ഒറ്റപ്പെട്ട ഗ്രാമീണ മേഖലകളിലേക്കും മറ്റുമുണ്ടായിരുന്ന ഷെഡ്യൂളുകളും നിർത്തിവച്ചിരിക്കുകയാണ്.
ഒാടി മടുത്തു
സുഗമമായ യാത്രാ സൗകര്യം ഉറപ്പു വരുത്തിയില്ലെങ്കിൽ തെരുവിൽ കൂടി ബസുകളുടെ പിന്നാലെ ഭാരമേറിയ ബാഗും ചുമന്നുകൊണ്ട് ഒാടുന്ന കുട്ടികളുടെ ദയനീയ ചിത്രം ഇനിയുമേറെ കാണേണ്ടി വരും. സ്കൂൾ വിട്ടാൽ സമയത്തിനു വീട്ടിലെത്താൻ കഴിയാതെ കുട്ടികളും വിഷമിക്കും. അവരെ കാത്ത് വീട്ടിലിരിക്കുന്ന മാതാപിതാക്കൾ അതിലേറെ വിഷമിക്കും. വിദ്യാർഥികൾ കൈ കാണിച്ചാൽ ബസ് നിർത്താതിരിക്കുക, സ്കൂളുകളുടെ മുന്പിലെ സ്റ്റോപ്പുകളിൽ നിർത്താതിരിക്കുക, വിദ്യാർഥികൾക്കു സീറ്റ് നൽകാതിരിക്കുക, ബസ് സ്റ്റാൻഡുകളിൽ വിദ്യാർഥികളെ ബസിൽ ക‍യറ്റാതിരിക്കുക തുടങ്ങിയ പ്രശ്നങ്ങൾ തുടരുന്നുണ്ട്.
അധികൃതർ ചെയ്യേണ്ടത്
=സ്കൂളുകൾ പ്രവർത്തിക്കുന്ന മേഖലകളിലേക്കുള്ള ബസുകൾ യഥാസമയം സർവീസ് നടത്തുന്നുണ്ടെന്ന് ഉറപ്പാക്കണം
=പ്രത്യേകിച്ചു സ്കൂളിലേക്കു വരികയും പോവുകയും ചെയ്യേണ്ട സമയങ്ങളിൽ നിർബന്ധമായും സർവീസ് നടത്തിയിരിക്കണം
=ഈ സമയങ്ങളിലെ ബസ് മുടങ്ങേണ്ടി വന്നാൽ ആ റൂട്ടുകളിലേക്കു പകരം സംവിധാനം ഏർപ്പെടുത്തണം. അതിനു കെഎസ്ആർടിസിയുടെ സഹായം തേടണം.
=ബസുകൾ സ്റ്റോപ്പുകളിൽ നിർത്താതെ കുട്ടികളെ ഇട്ടോടിക്കുന്ന അവസ്ഥ ഒഴിവാക്കാൻ പോലീസ് ഇടപെടണം
=ബസ് പുറപ്പെടാൻ നേരത്തു മാത്രം കുട്ടികളെ കയറ്റുന്ന രീതി അവസാനിപ്പിക്കണം.