ചെറുതോണി: കേരള കോണ്‍ഗ്രസ് സംഘടനാ തെരഞ്ഞെടുപ്പുകള്‍ക്കു മുന്നോടിയായി 30ന് കൊന്നത്തടി, ഒക്ടോബര്‍ ഒന്നിന് കാമാക്ഷി, രണ്ടിന് അറക്കുളം, കുടയത്തൂര്‍, വാഴത്തോപ്പ്, മുരിക്കാശേരി, തോപ്രാംകുടി, കട്ടപ്പന, കാഞ്ചിയാര്‍, മൂന്നിന് കഞ്ഞിക്കുഴി, മരിയാപുരം മണ്ഡലം കമ്മറ്റി യോഗങ്ങള്‍ കൂടുന്നതിന് പാര്‍ട്ടി ഇടുക്കി നിയോജകമണ്ഡലം കമ്മിറ്റി യോഗം തീരുമാനിച്ചു.
ഒക്ടോബര്‍ നാല് മുതല്‍ 14 വരെ വാര്‍ഡ് തെരഞ്ഞെടുപ്പുകളും 15 മുതല്‍ 19 വരെ മണ്ഡലം തെരഞ്ഞെടുപ്പുകളും നവംബര്‍ നാലിന് ഇടുക്കി നിയോജകമണ്ഡലം കമ്മിറ്റി തെരഞ്ഞെടുപ്പും നടത്തും. നവംബര്‍ അവസാനം ജില്ലാ തെരഞ്ഞെടുപ്പും ഡിസംബര്‍ 10ന് സംസ്ഥാന കമ്മിറ്റി തെരഞ്ഞെടുപ്പും നടക്കും.
നിയോജകമണ്ഡലം റിട്ടേണിംഗ് ഓഫീസറെയും 11 മണ്ഡലം റിട്ടേണിംഗ് ഓഫീസര്‍മാരെയും യോഗം നിശ്ചയിച്ചു. വാര്‍ഡ് റിട്ടേണിംഗ് ഓഫീസര്‍മാരെ മണ്ഡലം യോഗങ്ങളില്‍ തീരുമാനിക്കും.
ചെറുതോണി പാര്‍ട്ടി ഓഫീസില്‍ ചേര്‍ന്ന യോഗം സംസ്ഥാന ഡെപ്യൂട്ടി ചെയര്‍മാന്‍ കെ. ഫ്രാന്‍സിസ് ജോര്‍ജ് ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് ജോയി കൊച്ചുകരോട്ട് അധ്യക്ഷത വഹിച്ചു. ജില്ലാ പ്രസിഡന്‍റ് പ്രഫ. എം.ജെ. ജേക്കബ്, സംസ്ഥാന ഉന്നതാധികാര സമിതിയംഗം അഡ്വ. തോമസ് പെരുമന, സംസ്ഥാന ജനറല്‍ സെക്രട്ടറി നോബിള്‍ ജോസഫ്, കര്‍ഷക യൂണിയന്‍ സംസ്ഥാന പ്രസിഡന്‍റ് വര്‍ഗീസ് വെട്ടിയാങ്കല്‍, വി.എ. ഉലഹന്നാന്‍, ഫിലിപ്പ് മലയാറ്റ്, സിനു വാലുമ്മേല്‍ തുടങ്ങിയവര്‍ പ്രസംഗിച്ചു.