വിവാഹമോചന വാർത്തകൾ വിവാദമാകുന്നതിനിടെ പുതിയ പോസ്റ്റുമായി നടൻ വിജയ്. തമിഴ്നാട്ടിലും പോണ്ടിച്ചേരിയിലും പ്ലസ്ടൂ പരീക്ഷ എഴുതുന്ന വിദ്യാർഥികൾക്ക് വിജയാശംസകളുമായാണ് താരം എത്തിയത്. താരത്തിന്റെ പാർട്ടിയുടെ ഔദ്യോഗിക പേജിലൂടെയാണ് ആശംസകൾ നേർന്നത്.
വിജയ്യുടെ വാക്കുകൾ
‘തമിഴ്നാട്ടിലും പുതുച്ചേരിയിലും പന്ത്രണ്ടാം ക്ലാസ് പൊതുപരീക്ഷ എഴുതുന്ന എന്റെ പ്രിയപ്പെട്ട സഹോദരീസഹോദരന്മാർക്ക് ആശംസകൾ. നാളത്തെ സമ്പൽസമൃദ്ധമായ സമൂഹം സൃഷ്ടിക്കാൻ പോകുന്ന നിങ്ങൾ ഓരോരുത്തരും, ഉത്കണ്ഠയും ഭയവുമില്ലാതെ ധൈര്യത്തോടെ ഈ പരീക്ഷയെ നേരിടുക. നിങ്ങളുടെ ഉന്നത വിദ്യാഭ്യാസത്തിലെ മികവിന് മുൻകൂറായി ആശംസകൾ! നല്ലതേ വരൂ! വിജയം നിശ്ചയം.’
വ്യക്തിജീവിതത്തിലെ വിവാദങ്ങളോട് മൗനം പാലിച്ചുകൊണ്ടുള്ള പോസ്റ്റ് ചർച്ചയായി. വിജയ്യുടെ ഭാര്യ സംഗീത സ്വർണലിംഗം വിവാഹമോചനത്തിനായി കോടതിയെ സമീപിച്ചതാണ് വിവാദങ്ങളുടെ തുടക്കം.
ചെങ്കൽപേട്ട് കുടുംബകോടതിയിൽ സംഗീത ഹർജി ഫയൽ ചെയ്തതായി തമിഴ്–ദേശീയ മാധ്യമങ്ങൾ റിപ്പോർട്ട് ചെയ്തു. ഹർജി ഫയലിൽ സ്വീകരിച്ച കോടതി വിജയ്ക്ക് നോട്ടീസയച്ചു. ഏപ്രിൽ 20ന് ഹാജരാകണമെന്നാണ് നിർദേശം.
Tags : vijay sangeetha divorce movie news