രാഹുൽ ഗാന്ധിയും അഖിലേഷ് യാദവും
ന്യൂഡൽഹി: യുപി പിടിച്ചാൽ ഡൽഹി പിടിക്കാം എന്നൊരു ചൊല്ല് ദേശീയ രാഷ്ട്രീയത്തിലുണ്ട്. രാജ്യത്തിന്റെ രാഷ്ട്രീയ ഗതി നിർണയിക്കുന്നതിൽ ഉത്തർപ്രദേശിനുള്ള നിർണായക സ്വാധീനമാണ് ഈ ചൊല്ല് സൂചിപ്പിക്കുന്നത്. യുപി നിയമസഭാ തെരഞ്ഞെടുപ്പ് അടുത്തിരിക്കെ രാഷ്ട്രീയ വാക്പോരുമായി നേതാക്കൾ സജീവമായി രംഗത്തെത്തിക്കഴിഞ്ഞു. ഭരണത്തുടർച്ച ലക്ഷ്യമിട്ട് മുഖ്യമന്ത്രി യോഗി ആദിത്യനാഥിന്റെ നേതൃത്വത്തിൽ ബിജെപി നീക്കങ്ങൾ ശക്തമാക്കുമ്പോൾ, അധികാരം തിരിച്ചുപിടിക്കാനുള്ള തന്ത്രങ്ങളുമായി സമാജ്വാദി പാർട്ടിയും കോൺഗ്രസും കളത്തിലിറങ്ങിക്കഴിഞ്ഞു. യോഗി ആദിത്യനാഥും സമാജ്വാദി പാർട്ടി അധ്യക്ഷൻ അഖിലേഷ് യാദവും തമ്മിലുള്ള നേരിട്ടുള്ള വാക്പോരും പ്രതിപക്ഷ സഖ്യത്തിലെ സീറ്റ് ചർച്ചകളും വരാനിരിക്കുന്ന തെരഞ്ഞെടുപ്പിന്റെ രാഷ്ട്രീയ ചിത്രം കൂടുതൽ സങ്കീർണമാക്കുകയാണ്. ഇതിനിടെയാണ് അയോധ്യയിൽനിന്ന് മത്സരിക്കാൻ യോഗി, അഖിലേഷ് യാദവിനെ വെല്ലുവിളിച്ചിരിക്കുന്നത്.
യോഗിയുടെ വെല്ലുവിളി അഖിലേഷ് ഏറ്റെടുക്കുമോ
ഉത്തർപ്രദേശ് രാഷ്ട്രീയത്തിലെ ഏറ്റവും പുതിയ ചർച്ച അയോധ്യ മണ്ഡലത്തെ ചുറ്റിപ്പറ്റിയാണ്. അയോധ്യയിൽനിന്ന് മത്സരിക്കാൻ അഖിലേഷ് യാദവിന് ധൈര്യമുണ്ടോയെന്ന ചോദ്യവുമായി യോഗി ആദിത്യനാഥ് നേരിട്ടെത്തിയതോടെയാണ് രാഷ്ട്രീയപ്പോര് പുതിയ വഴിത്തിരിവിലെത്തിയത്. അഖിലേഷ് യാദവ് അയോധ്യയിൽനിന്ന് മത്സരിക്കാൻ തയാറായാൽ താനും അവിടെനിന്ന് ജനവിധി തേടാൻ തയാറാണെന്നായിരുന്നു യോഗിയുടെ പ്രഖ്യാപനം. നേരത്തേ അഖിലേഷ് യാദവും യോഗിയെ അയോധ്യയിൽ മത്സരിക്കാൻ വെല്ലുവിളിച്ചിരുന്നു.
നേരിട്ടുള്ള പോരാട്ടത്തിന് ധൈര്യമില്ലാത്തവരാണ് പിന്നിൽനിന്ന് ആക്രമിക്കുന്നതെന്ന പരിഹാസവും യോഗി ഉയർത്തി. അതേസമയം നിയമസഭാ തെരഞ്ഞെടുപ്പിൽ ബിജെപിക്ക് കനത്ത തിരിച്ചടിയുണ്ടാകുമെന്ന വിശ്വാസത്തിലാണ് അഖിലേഷ്. 2024-ലെ ലോക്സഭാ തെരഞ്ഞെടുപ്പിൽ അയോധ്യ ഉൾപ്പെടുന്ന ഫൈസാബാദ് മണ്ഡലത്തിലുണ്ടായ ബിജെപിയുടെ പരാജയമാണ് ഈ രാഷ്ട്രീയ ഏറ്റുമുട്ടലിന് കൂടുതൽ പ്രാധാന്യം നൽകുന്നത്. ബിജെപിയുടെ സിറ്റിംഗ് എംപി ലല്ലു സിംഗിനെ പരാജയപ്പെടുത്തി സമാജ്വാദി പാർട്ടിയുടെ അവധേഷ് പ്രസാദ് 54,567 വോട്ടിന്റെ ഭൂരിപക്ഷത്തിലാണ് മണ്ഡലം പിടിച്ചെടുത്തത്.
രാമക്ഷേത്ര നിർമാണവും വികസന പ്രവർത്തനങ്ങളും ബിജെപി പ്രധാന പ്രചാരണ വിഷയങ്ങളാക്കിയിട്ടും മണ്ഡലത്തിൽ തിരിച്ചടിയുണ്ടായത് പാർട്ടിക്ക് വലിയ രാഷ്ട്രീയ വെല്ലുവിളിയായിരുന്നു. ഈ പശ്ചാത്തലത്തിൽ അയോധ്യയെ കേന്ദ്രീകരിച്ചുള്ള യോഗിയുടെയും അഖിലേഷിന്റെയും വാക്പോര് കേവലം വ്യക്തിപരമായ വെല്ലുവിളിയല്ല, 2027-ലെ നിയമസഭാ തെരഞ്ഞെടുപ്പിന് മുന്നോടിയായുള്ള ശക്തിപരീക്ഷണം കൂടിയാണ്.
ദളിത് വിഭാഗത്തിൽനിന്നുള്ള അവധേഷ് പ്രസാദിനെ ജനറൽ സീറ്റിൽ മത്സരിപ്പിച്ചതിലൂടെ ദളിത്, ഒബിസി, മുസ്ലിം വോട്ടുകൾ ഏകീകരിക്കാൻ എസ്പിക്ക് സാധിച്ചുവെന്നാണ് വിലയിരുത്തൽ. അയോധ്യയിലെ വികസന പ്രവർത്തനങ്ങളുടെ ഭാഗമായി ഭൂമിയും കടകളും ഏറ്റെടുത്തതിലുള്ള പ്രാദേശിക അതൃപ്തി, നഷ്ടപരിഹാരത്തെക്കുറിച്ചുള്ള പരാതികൾ, ഭരണഘടന മാറ്റുമെന്ന പ്രചാരണം തുടങ്ങിയവയും ബിജെപിയുടെ പരാജയത്തിന് കാരണമായതായി റിപ്പോർട്ടുകളുണ്ട്.

യോഗിയുടെ തട്ടകത്തിൽ അഖിലേഷിന്റെ പടയോട്ടം
യോഗി ആദിത്യനാഥിന്റെ രാഷ്ട്രീയ തട്ടകമായ ഗൊരഖ്പൂരിൽത്തന്നെ പിഡിഎ രഥയാത്ര സംഘടിപ്പിച്ചാണ് അഖിലേഷ് യാദവ് ബിജെപിക്ക് വെല്ലുവിളി ഉയർത്തിയത്. കഴിഞ്ഞ 18ന് 20 കിലോമീറ്റർ നീണ്ട രഥയാത്രയിലൂടെ തെരഞ്ഞെടുപ്പ് പ്രചാരണത്തിന് അഖിലേഷ് തുടക്കമിട്ടു. പിന്നാക്ക വിഭാഗങ്ങൾ, ദളിതർ, ന്യൂനപക്ഷങ്ങൾ എന്നിവരെ ഒരുമിപ്പിക്കുകയെന്ന ലക്ഷ്യത്തോടെയാണ് പിഡിഎ രാഷ്ട്രീയത്തിന് എസ്പി പ്രാധാന്യം നൽകുന്നത്.
ഗൊരഖ്പൂരിൽ ലഭിച്ച ജനപിന്തുണ ബിജെപിയുടെ ശക്തികേന്ദ്രങ്ങളിൽ വിള്ളലുണ്ടാകുന്നതിന്റെ സൂചനയാണെന്നാണ് അഖിലേഷിന്റെ അവകാശവാദം. ഇന്ന് തെരഞ്ഞെടുപ്പ് നടന്നാൽ ഗൊരഖ്പൂരിൽ ബിജെപിക്ക് ഡബിൾ സീറോ ആയിരിക്കും ലഭിക്കുകയെന്നും അദ്ദേഹം പരിഹസിച്ചു. യോഗിയുടെ സ്വന്തം തട്ടകത്തിൽത്തന്നെ ശക്തിപ്രകടനം നടത്താനായത് എസ്പിയുടെ തെരഞ്ഞെടുപ്പ് തന്ത്രത്തിലെ നിർണായക നീക്കമായാണ് രാഷ്ട്രീയ നിരീക്ഷകർ വിലയിരുത്തുന്നത്.
പടയൊരുക്കവുമായി ബിജെപി കേന്ദ്രനേതൃത്വം
2027ൽ അധികാരം നിലനിർത്തുകയെന്ന ലക്ഷ്യത്തോടെയാണ് ബിജെപി അണിയറയിൽ തന്ത്രങ്ങൾ ഒരുക്കുന്നത്. ക്രമസമാധാനവും വികസനവും മുൻനിർത്തിയാണ് ബിജെപി പ്രചാരണ തന്ത്രങ്ങൾ ആവിഷ്കരിക്കുന്നത്. മുൻ എസ്പി സർക്കാരുകളുടെ കാലത്ത് അക്രമങ്ങളും കർഫ്യൂവും പതിവായിരുന്നുവെന്നും എന്നാൽ ബിജെപി സർക്കാർ അധികാരത്തിലെത്തിയശേഷം സമാധാനം പുനസ്ഥാപിച്ചെന്നും ബിജെപി അവകാശപ്പെടുന്നു. റോഡുകൾ പുനരുദ്ധരിക്കുകയും വികസന പ്രവർത്തനങ്ങൾ നടപ്പാക്കുകയും ചെയ്തുവെന്നുമാണ് യോഗി ഉയർത്തിക്കാട്ടുന്നത്.
ഇതിനുപുറമെ, ജനങ്ങളിലേക്ക് നേരിട്ടിറങ്ങുന്ന ജൻ ആശീർവാദ് യാത്രകൾ സംഘടിപ്പിക്കാനും മഥുര കേന്ദ്രീകരിച്ച് മഥുര മൻഥൻ എന്ന പേരിൽ പാർട്ടി യോഗങ്ങൾ നടത്താനും ബിജെപി പദ്ധതിയിടുന്നുണ്ട്. കേന്ദ്രനേതൃത്വത്തിന്റെ മേൽനോട്ടത്തിൽ താഴെത്തട്ടിലുള്ള സംഘടനാ സംവിധാനങ്ങൾ ശക്തിപ്പെടുത്തി 2024ലെ ലോക്സഭാ തെരഞ്ഞെടുപ്പിലുണ്ടായ തിരിച്ചടി മറികടക്കുകയാണ് ലക്ഷ്യം. ഹിന്ദുത്വ രാഷ്ട്രീയവും വികസന നേട്ടങ്ങളും ഒരുപോലെ പ്രചാരണായുധമാക്കാനാണ് ബിജെപിയുടെ നീക്കം.

181 സീറ്റിൽ കണ്ണുവെച്ച് കോൺഗ്രസ്
പ്രതിപക്ഷ നിരയിൽ കോൺഗ്രസും സമാജ്വാദി പാർട്ടിയും തമ്മിലുള്ള സഖ്യചർച്ചകളാണ് മറ്റൊരു നിർണായക ഘടകം. ലോക്സഭാ തെരഞ്ഞെടുപ്പിൽ ഇരുപാർട്ടികളും ഒന്നിച്ചുനിന്ന് നേടിയ മുന്നേറ്റത്തിന്റെ ആത്മവിശ്വാസത്തിലാണ് കോൺഗ്രസ് കൂടുതൽ നിയമസഭാ സീറ്റുകൾ ആവശ്യപ്പെടുന്നത്. 403 നിയമസഭാ സീറ്റുകളുള്ള ഉത്തർപ്രദേശിൽ 181 സീറ്റുകൾ കോൺഗ്രസ് ആവശ്യപ്പെട്ടതായി അഖിലേഷ് യാദവ് അടുത്തിടെ വെളിപ്പെടുത്തിയിരുന്നു. ലോക്സഭാ തെരഞ്ഞെടുപ്പിൽ ലഭിച്ച നേട്ടം നിയമസഭാ തെരഞ്ഞെടുപ്പിലും ആവർത്തിക്കാമെന്ന പ്രതീക്ഷയിലാണ് കോൺഗ്രസ്.
എന്നാൽ ഇത്രയും വലിയൊരു സീറ്റ് വിഹിതം എസ്പി അംഗീകരിക്കുമോയെന്നതാണ് പ്രധാന ചോദ്യം. സഖ്യത്തിനുള്ളിലെ സീറ്റ് വിഭജന ചർച്ചകൾ നിർണായക ഘട്ടത്തിലേക്ക് കടക്കുമ്പോൾ പ്രിയങ്ക ഗാന്ധിയുടെ സജീവ ഇടപെടലും കോൺഗ്രസിന്റെ നീക്കങ്ങൾക്ക് കരുത്തുപകരുമെന്നാണ് പ്രതീക്ഷ. ബിജെപിയെ പരാജയപ്പെടുത്താൻ പ്രതിപക്ഷ ഐക്യം അനിവാര്യമാണെന്ന തിരിച്ചറിവ് ഇരുപാർട്ടികൾക്കുമുണ്ടെങ്കിലും സീറ്റ് വിഭജനത്തിൽ വിട്ടുവീഴ്ചയ്ക്ക് തയ്യാറാകുമോയെന്നത് കണ്ടറിയണം.
ബിജെപിക്കും എസ്പിക്കും കോൺഗ്രസിനും ജീവൻമരണ പോരാട്ടം
തെരഞ്ഞെടുപ്പ് ഫലം ബിജെപിക്കും എസ്പിക്കും കോൺഗ്രസിനും ഒരുപോലെ നിർണായകമാണ്. യോഗിയുടെ ഭരണനേട്ടങ്ങളും ഹിന്ദുത്വ രാഷ്ട്രീയവും ഒരു വശത്ത്; അഖിലേഷിന്റെ പിഡിഎ പരീക്ഷണവും സാമൂഹിക കൂട്ടായ്മകളും മറുവശത്ത്. ഇതിനിടയിൽ കൂടുതൽ രാഷ്ട്രീയ ഇടം കണ്ടെത്താനുള്ള ശ്രമത്തിലാണ് കോൺഗ്രസ്.
2024ലെ ലോക്സഭാ തെരഞ്ഞെടുപ്പിലെ തിരിച്ചടി ബിജെപിക്ക് മുന്നറിയിപ്പായപ്പോൾ, അതേ വിജയം നിയമസഭയിലും ആവർത്തിക്കാമെന്ന പ്രതീക്ഷയിലാണ് പ്രതിപക്ഷം. അയോധ്യയിലെ രാഷ്ട്രീയ വെല്ലുവിളി മുതൽ ഗൊരഖ്പൂരിലെ ശക്തിപ്രകടനം വരെ നീളുന്ന പോരാട്ടം വരും മാസങ്ങളിൽ കൂടുതൽ കടുക്കുമെന്നുറപ്പ്. 2027ൽ യുപിയുടെ കിരീടം ആർക്കെന്ന ചോദ്യത്തിന് ഉത്തരം നൽകുക രാഷ്ട്രീയ തന്ത്രങ്ങളും ജാതി സമവാക്യങ്ങളും സഖ്യനീക്കങ്ങളും തന്നെയാകും.
Tags : UP Assembly Election UP Election Uttar Pradesh Politics Yogi Adityanath Akhilesh Yadav BJP Samajwadi Party Congress Political War of Words