ബിലാൽ കാസിസജി പുലിക്കാട്ടിൽ
ലണ്ടൻ: ബ്രിട്ടനിൽ സോഷ്യൽ മീഡിയയിലൂടെയും ഓൺലൈൻ ഗെയിമിംഗ് പ്ലാറ്റ്ഫോമുകളിലൂടെയും പ്രായപൂർത്തിയാകാത്ത പെൺകുട്ടികളെ ലൈംഗികമായി ചൂഷണം ചെയ്ത കേസിൽ ഇന്ത്യൻ വിദ്യാർഥിയായ 27 വയസുകാരൻ ബിലാൽ കാസിക്ക് 30 വർഷം തടവുശിക്ഷ.
ഇംഗ്ലണ്ടിലെ ചെസ്റ്റർ ക്രൗൺ കോടതിയാണ് ശിക്ഷ വിധിച്ചത്. കുട്ടികളെ ഓൺലൈൻ വഴി ലൈംഗികമായി ദുരുപയോഗം ചെയ്തതുൾപ്പെടെയുള്ള നിരവധി കുറ്റങ്ങൾ പ്രതി കോടതിയിൽ സമ്മതിച്ചിരുന്നു.
കൗമാരക്കാരനായ ബ്രിട്ടീഷ് യുവാവാണെന്ന് തെറ്റിധരിപ്പിച്ചാണ് ഇയാൾ പെൺകുട്ടികളുമായി സൗഹൃദം സ്ഥാപിച്ചിരുന്നത്. 10 മുതൽ 17 വയസുവരെയുള്ള പെൺകുട്ടികളെ ലക്ഷ്യമിട്ട് സ്നാപ്ചാറ്റ്, റോബ്ലോക്സ്, വിങ്ക് തുടങ്ങിയ സാമൂഹിക മാധ്യമങ്ങളും ഗെയിമിംഗ് പ്ലാറ്റ്ഫോമുകളും ഉപയോഗിച്ചായിരുന്നു ഇയാളുടെ പ്രവർത്തനം.
"റീസ്' എന്ന പേരിൽ വ്യാജ പ്രൊഫൈൽ സൃഷ്ടിച്ച് മറ്റൊരു ആൺകുട്ടിയുടെ ചിത്രങ്ങളും ഉപയോഗിച്ചാണ് പെൺകുട്ടികളുടെ വിശ്വാസം ഇയാൾ നേടിയെടുത്തിരുന്നത്. സൗഹൃദവും പ്രണയബന്ധവുമാണെന്ന് വിശ്വസിപ്പിച്ച് പെൺകുട്ടികളെ ലൈംഗിക സ്വഭാവമുള്ള ചിത്രങ്ങളും വീഡിയോകളും അയയ്ക്കാൻ നിർബന്ധിക്കുകയായിരുന്നു.
പിന്നീട് ഇവ പുറത്തുവിടുമെന്ന് ഭീഷണിപ്പെടുത്തി കൂടുതൽ ചിത്രങ്ങളും വീഡിയോകളും ആവശ്യപ്പെട്ടു. വഴങ്ങാത്തവരെ അധിക്ഷേപിക്കുകയും നേരത്തെ അയച്ച സ്വകാര്യ ദൃശ്യങ്ങൾ സുഹൃത്തുക്കൾക്കും മറ്റുള്ളവർക്കും കൈമാറുമെന്ന് ഭീഷണിപ്പെടുത്തുകയും ചെയ്തതായി അന്വേഷണത്തിൽ കണ്ടെത്തി.
ചെഷയർ പൊലിസിന്റെ നേതൃത്വത്തിൽ നടന്ന വിപുലമായ അന്വേഷണത്തിലാണ് കേസിന്റെ വ്യാപ്തി പുറത്തുവന്നത്. പ്രതിയുടെ മൊബൈൽ ഫോണിൽനിന്ന് ലഭിച്ച ഡിജിറ്റൽ വിവരങ്ങൾ പരിശോധിച്ചപ്പോൾ 180 പെൺകുട്ടികൾ ഇരകളായിരിക്കാമെന്ന് അന്വേഷണ ഉദ്യോഗസ്ഥർ കണ്ടെത്തി.
തുടർന്നുള്ള അന്വേഷണത്തിൽ 70 പെൺകുട്ടികളെ തിരിച്ചറിഞ്ഞു. കുറ്റകൃത്യങ്ങൾ നടന്ന സമയത്ത് ഇവരുടെ പ്രായം 11നും 17നും ഇടയിലായിരുന്നു. ഏറ്റവും പ്രായം കുറഞ്ഞ ഇരയ്ക്ക് 10 വയസായിരുന്നുവെന്ന് പ്രോസിക്യൂഷൻ വിഭാഗം അറിയിച്ചു.
തിരിച്ചറിഞ്ഞ 70 പെൺകുട്ടികളെയും പൊലിസ് നേരിട്ട് സന്ദർശിച്ച് അനുഭവങ്ങൾ വെളിപ്പെടുത്തുന്നതിനും ആവശ്യമായ സഹായം തേടുന്നതിനും അവസരം നൽകി. പ്രതിയുടെ ഫോണിൽ നടത്തിയ പരിശോധനയിൽ 400-ലധികം കുട്ടികളുടെ അശ്ലീല ചിത്രങ്ങളും വീഡിയോകളും കണ്ടെത്തി.
ബർമിംഗ്ഹാമിൽ നടത്തിയ മറ്റൊരു പരിശോധനയിൽ 500-ലധികം ചിത്രങ്ങളും വീഡിയോകളും കൂടി കണ്ടെത്തിയതായി അധികൃതർ വ്യക്തമാക്കി. 2021-ൽ 13 വയസുള്ള ഒരു പെൺകുട്ടി സ്നാപ്ചാറ്റിലൂടെ പ്രതിയുമായി സംസാരിക്കാൻ തുടങ്ങിയതോടെയാണ് കേസിലെ ആദ്യ പരാതി ഉയർന്നത്.
തന്റെ പ്രായമുള്ള കൗമാരക്കാരനാണെന്നാണ് പെൺകുട്ടി വിശ്വസിച്ചിരുന്നത്. പിന്നീട് ഇയാളുടെ പെരുമാറ്റം ലൈംഗിക ചുവയുള്ള സംഭാഷണങ്ങളിലേക്കും ചിത്രങ്ങൾ ആവശ്യപ്പെടുന്നതിലേക്കും മാറി.
പെൺകുട്ടി സൗഹൃദം മാത്രമേ ആഗ്രഹിക്കുന്നുള്ളൂവെന്ന് അറിയിച്ചപ്പോൾ ഇയാൾ അധിക്ഷേപിക്കുകയും നേരത്തേ അയച്ച ചിത്രങ്ങളും വീഡിയോകളും സുഹൃത്തുക്കൾക്ക് കൈമാറുമെന്ന് ഭീഷണിപ്പെടുത്തുകയും ചെയ്തു.
പിന്നീട് പെൺകുട്ടിയുടെ സ്നാപ്ചാറ്റ് അക്കൗണ്ട് ഹാക്ക് ചെയ്യപ്പെടുകയും സ്വകാര്യ ദൃശ്യങ്ങൾ സുഹൃത്തുക്കൾക്ക് അയച്ചുകൊടുക്കുകയും ചെയ്തു. തുടർന്ന് 2021 നവംബറിൽ പെൺകുട്ടി ഡെർബിഷെയർ പൊലിസിൽ പരാതി നൽകി.
ചെസ്റ്ററിലായിരുന്നു പ്രതിയുടെ അവസാനമായി അറിയപ്പെട്ടിരുന്ന താമസസ്ഥലമെന്ന അന്വേഷണ കണ്ടെത്തലിനെത്തുടർന്ന് കേസ് ചെഷയർ പൊലിസിന് കൈമാറി. ഇതിനിടെ ഇയാൾ രാജ്യം വിട്ടതായി കണ്ടെത്തി.
2023 ജൂലൈയിൽ ഹീത്രൂ വിമാനത്താവളത്തിലൂടെ ബ്രിട്ടനിൽ തിരിച്ചെത്തിയപ്പോഴാണ് ഇയാളെ അറസ്റ്റ് ചെയ്തത്. പിന്നീട് നടത്തിയ ഡിജിറ്റൽ പരിശോധനകളിലാണ് സമാനമായ രീതിയിൽ നിരവധി പെൺകുട്ടികളെ ലക്ഷ്യമിട്ടിരുന്നതായി വ്യക്തമായത്.
30 വർഷം തടവും എട്ടുവർഷത്തെ അധിക നിരീക്ഷണവും
2021 മുതൽ 2025 വരെയുള്ള കാലയളവിൽ നടന്ന കുറ്റകൃത്യങ്ങളുമായി ബന്ധപ്പെട്ട് ചെഷയർ പൊലിസും വെസ്റ്റ് മിഡ്ലാൻഡ്സ് പൊലിസും സംയുക്തമായാണ് അന്വേഷണം നടത്തിയത്.
ബിലാൽ കാസി 37 ലൈംഗിക കുറ്റകൃത്യങ്ങളിൽ കുറ്റസമ്മതം നടത്തിയതായി ചെഷയർ പൊലിസ് അറിയിച്ചു. കേസിൽ കൂടുതൽ കുറ്റങ്ങൾ ഉൾപ്പെട്ടിരുന്നതായും പ്രോസിക്യൂഷൻ വിഭാഗം വ്യക്തമാക്കി.
നവംബർ 13ന് ചെസ്റ്റർ ക്രൗൺ കോടതിയിൽ ജഡ്ജി സ്റ്റീവൻ എവററ്റ് പ്രതിക്ക് 30 വർഷത്തെ തടവുശിക്ഷ വിധിച്ചു. ഇതിനു പുറമേ എട്ടുവർഷത്തെ എക്സ്റ്റെൻഡഡ് ലൈസൻസ് കാലയളവും അനുവദിച്ചിട്ടുണ്ട്.
ജയിൽമോചനത്തിനു ശേഷവും ഈ കാലയളവിൽ കർശനമായ മേൽനോട്ടവും നിയന്ത്രണങ്ങളും പ്രതിക്ക് ബാധകമായിരിക്കും. ലൈംഗിക കുറ്റകൃത്യങ്ങൾ തടയുന്നതിനുള്ള പ്രത്യേക ഉത്തരവും, നിയന്ത്രണ ഉത്തരവും കോടതി പുറപ്പെടുവിച്ചു.
Tags :