പരിപാടിയിൽ നിന്ന്
ദോഹ: സൂഫി സംഗീതത്തിന്റെ മാസ്മരിക ലോകം തുറന്നിട്ട് സൂഫി ഗായകന് ഉസ്താദ് ജാബിര് സുലൈം പാടുകയും പറയുകയും ചെയ്തപ്പോള് ദോഹയിലെ ഇന്സ്പെയര് ഹാളിലെ നിറഞ്ഞ സദസ് അപൂര്വമായൊരു അനുഭൂതിയുടെ നിറവിലായി.
ഖത്തര് മ്യൂസിക്കല് ആൻഡ് കള്ചറല് ക്ലബിന്റെ ആഭിമുഖ്യത്തിലായിരുന്നു പരിപാടി. റിയാസ് ഒരവങ്കര, റൗഫ് മലയില് ബഷീര്, ജാഫര് എന്നിവര് നേതൃത്വം നല്കുന്ന ക്ലബ് സംഘടിപ്പിച്ച ഈ സംഗീതവിരുന്ന് ദോഹയുടെ സാംസ്കാരിക കലണ്ടറില് വേറിട്ടൊരു അടയാളമായി മാറി.
ലോകത്ത് ഏറ്റവും പ്രിയപ്പെട്ടതെന്ന് കരുതുന്ന പലതും ഒരുനാള് അന്യമാകാമെന്ന ജീവിതയാഥാര്ഥ്യവും മരണത്തിന്റെ അനിവാര്യതയും ഓര്മിപ്പിച്ചുകൊണ്ട് ജാബിര് സുലൈമിന്റെ ആലാപനവും വാക്കുകളും സദസിനെ ആഴത്തിലുള്ള ചിന്തകളിലേക്ക് നയിച്ചു.

"ഷാമേ എ മെഹ്ഫില്' രണ്ടാം സീസണാണ് സംഗീതത്തിന്റെ അനിര്വചനീയമായ തലങ്ങളിലൂടെ ആത്മീയതയുടെ നിര്വൃതിയിലേക്ക് ആസ്വാദകരെ കൂട്ടിക്കൊണ്ടുപോയത്.
ഉസ്താദ് ജാബിര് സുലൈമിന്റെ മുഖ്യ സംഗീതാവതരണത്തിന് മുന്നോടിയായി സയ്യിദ് മഷൂദ് തങ്ങളും സിതാര ഷാഫിയും മറ്റു ഗായകരും ചേര്ന്നൊരുക്കിയ സംഗീതവിരുന്നും ശ്രദ്ധേയമായി.
ഷഫീര് വാടാനപ്പള്ളിയുടെ അതിമനോഹരമായ അവതരണവും പരിപാടിയെ സവിശേഷമാക്കി.
Tags : SufiMusic Qatar QatarMusicalClub CulturalEvent MusicNight