സ്ട്രോബെറി തൈര് പാനീയം
ഇതു പ്രാതലിനൊപ്പവും അല്ലാതെയും കഴിക്കാവുന്ന ഒരു പാനീയമാണ്. ഉണ്ടാക്കാൻ എളുപ്പം.
ആവശ്യമായവ: തണുപ്പിച്ച സ്ട്രോബെറീസ് 10-12 എണ്ണം കഷണങ്ങളാക്കി മുറിച്ചത്, ഒരു പഴം അരിഞ്ഞത്, തൈര്- ഒരു കപ്പ്, പാൽ- അര കപ്പ്, ഒരു വലിയ തവി തേൻ, ആവശ്യമെങ്കിൽ അല്പം പഞ്ചസാര. ഇതു നമ്മൾ ഉപയോഗിക്കുന്ന പഴങ്ങളുടെ മധുരംപോലെ തീരുമാനിക്കാം.
ഉണ്ടാക്കുന്ന വിധം:
*മുകളിൽ പറഞ്ഞവ എല്ലാംകൂടി ഒരു ബ്ലെൻഡറിൽ അടിച്ചെടുക്കുക.
* നാലു നീണ്ട ഗ്ലാസുകളിലേക്കു പകർന്ന് ഐസുകട്ടകൾ ചേർത്തിളക്കുക.
*മുകളിലായി ഒരു തവി സ്ട്രോബെറി ഐസ്ക്രീം ചെയ്താൽ വളരെ നന്നായിരിക്കും. സ്ട്രോയിട്ട് ജ്യൂസ് വിളന്പാം.
പരിപ്പ് സൂപ്പ്
ആവശ്യമായവ: തുവര പരിപ്പ്- ഒരു കപ്പ്, ചുമന്ന പരിപ്പ്- അര കപ്പ്, സവോള-1, മഞ്ഞ നിറത്തിലുള്ള കാപ്സിക്കം, വെളുത്തുള്ളി നാല് അല്ലി, ടൊമാറ്റോ-ഒന്ന്, ഇഞ്ചി അരിഞ്ഞത്- ഒരു ടീസ്പൂണ്, ഉപ്പും കുരുമുളകും ആവശ്യത്തിന്, ജീരകം പൊടിച്ചത്- ഒരു ടീസ്പൂണ്, അലങ്കരിക്കാൻ മാതള നാരങ്ങയുടെ മണികൾ.
ഉണ്ടാക്കുന്ന വിധം
* രണ്ടുതരം പരിപ്പ് ഒന്നിച്ചാക്കി ആവശ്യത്തിനു വെള്ളം ചേർത്ത് പാതി വെന്താൽ ഇറക്കിവയ്ക്കുക.
* ഇതിലേക്ക് സവോള കഷണങ്ങളാക്കിയത്, കാപ്സിക്കം നുറുക്കിയത്, ടൊമാറ്റോ കഷണങ്ങൾ, വെളുത്തുള്ളി, ഇഞ്ചി, ജീരകം, ഉപ്പ്, കുരുമുളക് ചേർത്ത് എല്ലാംകൂടി ഒന്നുകൂടി വേവിക്കുക. നല്ലതുപോലെ വെന്തുടഞ്ഞതിനുശേഷം ഇളക്കി സൂപ്പ് കപ്പുകളിൽ പകർന്ന് അലങ്കരിച്ചു വിളന്പാം.
ഓമന ജേക്കബ്