മക്കൾ അടുത്തില്ല, പറമ്പ് ആരും നോക്കാനില്ല. ഇനി ടെൻഷൻ വേണ്ട, നിങ്ങളുടെ തൊടിയുടെ കാവലിന് ഡ്രോൺ എത്തി.
ടൊറന്‍റോയിൽ നല്ല തണുപ്പുള്ള ഒരു ഞായറാഴ്ച രാവിലെ. കോട്ടയം പാമ്പാടിക്കാരൻ രാജു കാപ്പിയും കുടിച്ച് ഫോൺ എടുത്തു. ഒരു ആപ്പ് തുറന്നു. പിന്നെ കണ്ടത്, തന്‍റെ നാട്ടിലെ പറമ്പ്! രാവിലെ തന്നെ ഡ്രോൺ എടുത്ത ഫ്രഷ് വീഡിയോ. തന്‍റെ റബ്ബർ മരങ്ങൾക്ക് ഇടയിൽ ആരോ വലിച്ചെറിഞ്ഞ പ്ലാസ്റ്റിക് കവർ വരെ വ്യക്തമായി കാണാം. അതിരിലെ കല്ലിന് ഒരു ഇളക്കം പോലുമില്ല.രാജു ചിരിച്ചു. 20 വർഷം പ്രവാസം. നാട്ടുകാരനെ ഏൽപ്പിച്ചാൽ പകുതി കൃത്യതയില്ല. ഇപ്പോൾ എന്‍റെ പറമ്പ് എന്‍റെ കൈക്കുള്ളിൽ തന്നെയുണ്ട്.
രാജുവിന്‍റെ കഥ ഒറ്റപ്പെട്ടതല്ല. ഇതാണ് ഇന്ന് കേരളത്തിന്‍റെ പുതിയ കഥ.ബന്ധുക്കൾ പോയി, ആപ്പ് വന്നു.ഒരുകാലത്ത് നമ്മൾ നാട്ടിലെ പറമ്പ് നോക്കാൻ ഏൽപ്പിച്ചിരുന്നത് ബന്ധുക്കളെയായിരുന്നു. പിന്നെ ,അടുത്ത വീട്ടിലെ ചേട്ടനെ ഏൽപ്പിച്ചേക്കാം എന്നായി. ഇന്ന് കാലം മാറി. ചേട്ടനും തിരക്കിലാണ്.
കേരളത്തിൽ 40 ലക്ഷത്തിലധികം വീടുകളും പറമ്പുകളും പൂട്ടിക്കിടപ്പുണ്ട് എന്നാണ് കണക്ക്. ഗൾഫിലും കാനഡയിലും യൂറോപ്പിലും ഇരുന്ന്, വാട്സാപ്പിൽ "പറമ്പ് എങ്ങനെയുണ്ട്?" എന്ന് ചോദിച്ച് മടുത്ത പ്രവാസിക്ക് മുന്നിലേക്കാണ് ഈ പുതിയ കാവൽക്കാർ വന്നത്.പേര് കേൾക്കാൻ ചെറുതാണ് - പ്രോപ്പർട്ടി ഗാർഡിയൻ ആപ്പുകൾ.

അവർ എന്തൊക്കെ ചെയ്യും?
ഇത് ശരിക്കും മാജിക്കാണ്!നിങ്ങൾ ഒരു വർഷത്തേക്ക് 15,000 രൂപ അടച്ചാൽ മതി. പിന്നെ നടക്കുന്നത് ഇതാണ്: ആകാശ കാവൽ: മാസത്തിൽ രണ്ടു തവണ നിങ്ങളുടെ പറമ്പിന്‍റെ മുകളിലൂടെ ഡ്രോൺ പറക്കും. 4K വീഡിയോയും ഫോട്ടോയും നിങ്ങളുടെ ഫോണിലെത്തും.
കള്ളനെ പിടിക്കും: അതിരിലെ കല്ല് ആരെങ്കിലും ഇളക്കിയോ? അടുത്ത പറമ്പുകാരൻ ഒരു അടി അകത്തേക്ക് കയറിയോ? ആപ്പ് തന്നെ അലാറം അടിക്കും.
എണ്ണി തരും: പറമ്പിൽ എത്ര തെങ്ങുണ്ട്? എത്ര കമുകുണ്ട്? എത്ര റബ്ബർ ടാപ്പ് ചെയ്യാൻ പാകമായി? കൃത്യമായ കണക്ക് റിപ്പോർട്ടായി കിട്ടും.
വൃത്തിയാക്കി തരും: "ചേട്ടാ, പറമ്പൊന്ന് വെട്ടി വൃത്തിയാക്കിയിട്ട് ഫോട്ടോ അയച്ചേ എന്ന് പറയേണ്ട. ആപ്പിൽ ഒരു ബട്ടൺ അമർത്തിയാൽ ആളെത്തും, വെട്ടും, ഫോട്ടോ അയക്കും.
കൊച്ചിയിലെ ഒരു സ്റ്റാർട്ടപ്പ് നടത്തുന്ന യുവാവ് പറഞ്ഞത് ഇങ്ങനെയാണ്: ഞങ്ങൾക്ക് ഇപ്പോൾ 2000 ത്തിലധികം പ്രവാസി കസ്റ്റമേഴ്സ് ഉണ്ട്. അവരിൽ പലരും രണ്ടു വർഷമായി നാട്ടിൽ വന്നിട്ടില്ല. പക്ഷേ അവരുടെ പറമ്പ് അവർ ദിവസവും കാണുന്നുണ്ട്.
ടെക്നോളജിയോ, അതോ ബന്ധങ്ങളുടെ അവസാനമോ?
ഇവിടെയാണ് നമ്മൾ ചിന്തിക്കേണ്ടത്. മക്കൾ അടുത്തില്ലാത്തതു കൊണ്ട് സീനിയർ ലിവിംഗ് വരുന്നത് പോലെ, നാട്ടുകാരെ വിശ്വസിക്കാൻ പറ്റാത്തതു കൊണ്ടാണ് ആപ്പ് വരുന്നത്.ഒരു ഡ്രോണിന് കാണിച്ചു തരാൻ പറ്റുന്നത്, വീണുകിടക്കുന്ന തേങ്ങയുടെ എണ്ണം മാത്രമാണ്. പക്ഷേ ആ തേങ്ങ വീണപ്പോൾ അയൽവീട്ടിലെ അമ്മ പറഞ്ഞ ,മോനെ സൂക്ഷിക്കണം എന്ന സ്നേഹം ,കാണിച്ചു തരാൻ ഒരു ആപ്പിനും പറ്റില്ലല്ലോ?
അതിര് കല്ല് സംരക്ഷിക്കാൻ ഡ്രോൺ മതി. പക്ഷേ, അതിരിലെ ബന്ധം സംരക്ഷിക്കാൻ?
നിങ്ങൾ എന്ത് വിചാരിക്കുന്നു? നിങ്ങളുടെ പറമ്പ് നോക്കാൻ നിങ്ങൾ ആരെയാണ് ഏൽപ്പിച്ചിരിക്കുന്നത്? കമന്‍റ് ചെയ്യൂ.

Tags : Property care