അമ്മയാണ്, സ്നേഹമാണ്! മൂർഖനിൽ നിന്ന് കുഞ്ഞുങ്ങളെ രക്ഷിച്ച് മക്ലിറ്റി യാത്രയായി

Monday, May 24, 2021 3:37 PM IST

തന്‍റെ കുഞ്ഞുങ്ങളെ അക്രമിക്കാൻ ശ്രമിച്ച മൂർഖൻ പാന്പിനെ നേരിട്ട നായ കുഞ്ഞുങ്ങളെ രക്ഷിച്ചെങ്കിലും പാന്പിന്‍റെ കടിയേറ്റു ചത്തു. നായയുടെ കടിയേറ്റ മൂർഖൻ പാന്പും ചത്തു.

കുമരകം ആപ്പിത്ര സ്കൂളിന് സമീപം കളന്പുകാട്ടുശേരി കുഞ്ഞുമോന്‍റെ വളർത്തുനായ "മക്ലിറ്റി'യാണ് ഞായറാഴ്ച രാത്രി പത്തിന് ചത്തത്. അഞ്ചുവയസുള്ള മക്ലിറ്റിയുടെ മൂന്നാമത്തെ പ്രസവം രണ്ടാഴ്ച മുന്പായിരുന്നു. മൂന്ന് കുഞ്ഞുങ്ങളാണ് ജനിച്ചത്.

ഇതുവരെ കണ്ണുതുറക്കാത്ത തന്‍റെ കുഞ്ഞുങ്ങളെ ആക്രമിക്കും എന്ന തോന്നലിനെത്തുടർന്നാണ് മൂർഖനെ മക്ലിറ്റി നേരിട്ടത്. നായയുടെ നിർത്താതെയുള്ള കുരകേട്ട് ഓടി കൂടിയ നാട്ടുകാർ ചത്ത് കിടക്കുന്ന പാന്പിനെയും അവശയായ നായയെയുമാണ് കണ്ടത്. നിമിഷങ്ങൾക്കുള്ളിൽ നായയും ചത്തുവീണു.

പാന്പിന്‍റെ ശല്യം വളരെ കൂടുതലുള്ള പ്രദേശമാണിതെന്ന് നാട്ടുകാർ പറഞ്ഞു. പാന്പിന്‍റെ ശല്യത്തിൽ നിന്ന് രക്ഷനേടാനാണ് നായയെ വളർത്തിയതെന്ന് ഉടമ കുഞ്ഞുമോനും വ്യക്തമാക്കി. ആപ്പീത്ര-മാഞ്ചിറ റോഡിൽ പല ഭാഗത്തും വഴിവിളക്കുകൾ തെളിയാറില്ലെന്നും നേരം ഇരുട്ടിയാൽ ഈവഴിയുള്ള യാത്ര സുരക്ഷിതമല്ലെന്നും നാട്ടുകാർ പറഞ്ഞു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.