19

ഗുരുഗ്രാമിലെ ഒരു ദമ്പതികൾ തങ്ങളുടെ സോഷ്യൽ മീഡിയ പേജായ 'ക്രിയേറ്റീവ് ഇൻട്രോവേർട്ട്സി'ലൂടെ പങ്കുവെച്ച ദൃശ്യങ്ങൾ ഇന്ന് ഇന്‍റർനെറ്റിൽ വലിയൊരു സംവാദത്തിന് തിരികൊളുത്തിയിരിക്കുകയാണ്.

നഗരജീവിതത്തിന്‍റെ തിരക്കുകളിൽ നിന്നും ആശങ്കകളിൽ നിന്നും മാറി, പുലർച്ചെ രണ്ടരയ്ക്ക് തങ്ങൾ താമസിക്കുന്ന ഫ്ലാറ്റിന്‍റെ പരിസരത്തുകൂടെ ഭയരഹിതമായി നടക്കുന്ന ദൃശ്യങ്ങളാണ് ഇവർ പുറത്തുവിട്ടത്.

ഇതൊരു വെറും വീടുമാറ്റമല്ല മറിച്ച് തങ്ങളുടെ ജീവിതനിലവാരത്തിൽ വന്ന വലിയൊരു പുരോഗതിയാണെന്ന് ഇവർ അവകാശപ്പെടുന്നു. സുരക്ഷിതമായ ഒരു ചുറ്റുപാടിൽ അർദ്ധരാത്രിയിൽ പോലും സ്വതന്ത്രമായി നടക്കാൻ കഴിയുന്നത് തങ്ങൾക്ക് ലഭിച്ച ഏറ്റവും വലിയ ആഡംബരമാണെന്നും വീഡിയോയിൽ ഇവർ പറയുന്നുണ്ട്.

ഈ വീഡിയോ പുറത്തുവന്നതോടെ ഡിജിറ്റൽ ലോകം രണ്ട് തട്ടിലായി തിരിഞ്ഞു. ഒരു വിഭാഗം ആളുകൾ ഈ ദമ്പതികൾക്ക് ലഭിച്ച സുരക്ഷിതത്വത്തെയും സമാധാനപരമായ അന്തരീക്ഷത്തെയും പ്രശംസിച്ചപ്പോൾ, മറ്റൊരു വിഭാഗം ഇതിലെ വിരോധാഭാസങ്ങളെയാണ് ചൂണ്ടിക്കാട്ടിയത്.

വൻകിട നഗരങ്ങളിൽ സുരക്ഷിതത്വം എന്നത് പണം നൽകി വാങ്ങേണ്ടി വരുന്ന ഒന്നായി മാറിയിരിക്കുന്നുവെന്നും, ഗേറ്റഡ് കമ്മ്യൂണിറ്റികൾക്ക് പുറത്തുള്ള സാധാരണക്കാരുടെ അവസ്ഥ ഇപ്പോഴും മാറ്റമില്ലാതെ തുടരുകയാണെന്നും പലരും കുറിച്ചു. മുംബൈ പോലുള്ള നഗരങ്ങൾ ഇത്തരം മതിൽക്കെട്ടുകൾ ഇല്ലാതെ തന്നെ ഇതിലും സുരക്ഷിതമാണെന്ന് വാദിക്കുന്നവരും കുറവല്ല.

സാമ്പത്തികമായി മുന്നോക്കം നിൽക്കുന്നവർക്ക് മാത്രം ലഭ്യമാകുന്ന ഈ 'സുരക്ഷിത മുറ്റങ്ങൾ' യഥാർത്ഥത്തിൽ ഒരു നഗരത്തിന്‍റെ സുരക്ഷാ മാനദണ്ഡമായി കാണാൻ കഴിയില്ലെന്നാണ് ഭൂരിഭാഗം പേരുടെയും വിമർശനം.

എങ്കിലും താമസസ്ഥലം തിരഞ്ഞെടുക്കുമ്പോൾ വീടിന്‍റെ സൗകര്യങ്ങളേക്കാൾ ഉപരിയായി വ്യക്തിസ്വാതന്ത്ര്യത്തിനും സുരക്ഷിതത്വത്തിനും ഇന്ന് ആളുകൾ എത്രത്തോളം പ്രാധാന്യം നൽകുന്നു എന്നതിന്‍റെ വ്യക്തമായ സൂചനയാണ് വൈറലായ ഈ ദൃശ്യങ്ങൾ നൽകുന്നത്. പൊതു ഇടങ്ങൾ എല്ലാവർക്കും ഒരേപോലെ സുരക്ഷിതമാകുന്ന കാലത്തെക്കുറിച്ചുള്ള ഗൗരവകരമായ ചർച്ചകൾക്കും ഈ കൊച്ചു വീഡിയോ വഴിമരുന്നിട്ടു.

Tags : ViralVideo GurugramDiaries TrendingNow CreativeIntroverts InternetSensation