19

ഐപിഎൽ 2026 സീസണിലെ പഞ്ചാബ് കിംഗ്‌സ് - കൊൽക്കത്ത നൈറ്റ് റൈഡേഴ്‌സ് പോരാട്ടം മഴമൂലം ഉപേക്ഷിക്കപ്പെട്ടതിന് പിന്നാലെ സോഷ്യൽ മീഡിയയിൽ അരങ്ങേറിയ നാടകീയ സംഭവങ്ങൾ ക്രിക്കറ്റ് ലോകത്ത് വലിയ ചർച്ചയായി മാറിയിരിക്കുകയാണ്.

പഞ്ചാബ് കിംഗ്‌സ് ക്യാപ്റ്റൻ ശ്രേയസ് അയ്യറുടെ സഹോദരി ശ്രേഷ്ഠ അയ്യർ ഇൻസ്റ്റാഗ്രാമിൽ പങ്കുവെച്ച ഒരു വീഡിയോയാണ് ആരാധകർക്കിടയിൽ ചേരിതിരിവിനും ഒടുവിൽ വലിയ വിവാദത്തിനും വഴിതെളിച്ചത്.

ഈഡൻ ഗാർഡൻസിൽ വെച്ച് നടക്കേണ്ടിയിരുന്ന മത്സരം മഴമൂലം ഉപേക്ഷിക്കുകയും ഇരു ടീമുകൾക്കും ഓരോ പോയിന്‍റ് വീതം പങ്കുവെക്കുകയും ചെയ്തിരുന്നു.

ഈ സാഹചര്യത്തിലാണ് "പഞ്ചാബികളുടെ ഹൃദയം വലുതാണെന്നും അതുകൊണ്ട് കൊൽക്കത്തയ്ക്ക് ഒരു പോയിന്‍റ് ദാനമായി നൽകുന്നു" എന്ന അർത്ഥത്തിൽ ശ്രേഷ്ഠ ഒരു വീഡിയോ പോസ്റ്റ് ചെയ്തത്.

ടീമുകൾ തമ്മിലുള്ള ആരോഗ്യകരമായ തമാശയായി ഇതിനെ പലരും കണ്ടെങ്കിലും കൊൽക്കത്ത നൈറ്റ് റൈഡേഴ്സ് ആരാധകരുടെ പ്രതികരണം അപ്രതീക്ഷിതമായിരുന്നു. ശ്രേഷ്ഠയുടെ വാക്കുകൾ തങ്ങളുടെ ടീമിനെ അധിക്ഷേപിക്കുന്നതാണെന്ന് ആരോപിച്ച് ആയിരക്കണക്കിന് കെകെആർ ആരാധകർ അവർക്കെതിരെ രംഗത്തെത്തി.

സൈബർ ഇടങ്ങളിൽ കടുത്ത പരിഹാസങ്ങൾക്കും ട്രോളുകൾക്കും ശ്രേഷ്ഠ ഇരയായി. എന്നാൽ വിമർശനങ്ങൾ വെറും വാക്കുകളിൽ ഒതുങ്ങിയില്ലെന്നും വ്യക്തിപരമായ അധിക്ഷേപങ്ങളിലേക്കും കൊലവിളി ഉൾപ്പെടെയുള്ള ഭീഷണി സന്ദേശങ്ങളിലേക്കും കാര്യങ്ങൾ നീങ്ങിയെന്നും ശ്രേഷ്ഠ വെളിപ്പെടുത്തി.

താൻ വിചാരിച്ചതിലും വലിയ തോതിലുള്ള നെഗറ്റിവിറ്റിയാണ് ആ വീഡിയോ സൃഷ്ടിച്ചതെന്ന് അവർ തിരിച്ചറിഞ്ഞു. ഒടുവിൽ അനാവശ്യ വിവാദങ്ങൾ ഒഴിവാക്കാനായി ശ്രേഷ്ഠ ആ വീഡിയോ പിൻവലിക്കാൻ തീരുമാനിക്കുകയായിരുന്നു.

താൻ ചെയ്തത് തെറ്റാണെന്ന് കരുതുന്നില്ലെന്നും എന്നാൽ തന്‍റെ സഹോദരനായ ശ്രേയസ് അയ്യറുടെയും അദ്ദേഹത്തിന്‍റെ ടീമായ പഞ്ചാബ് കിംഗ്‌സിന്‍റെയും സൽപ്പേരിനെ ഇത് ബാധിക്കരുത് എന്ന ആഗ്രഹമുള്ളതിനാലാണ് വീഡിയോ മാറ്റുന്നതെന്നും അവർ വ്യക്തമാക്കി.

കേവലം തമാശയായി ചെയ്ത കാര്യത്തെ ഇത്രത്തോളം ഗൗരവമായി എടുക്കുമെന്ന് കരുതിയില്ലെന്നും ഭീഷണിപ്പെടുത്തുന്ന രീതിയിലുള്ള പെരുമാറ്റം വേദനിപ്പിക്കുന്നതാണെന്നും അവർ സോഷ്യൽ മീഡിയയിൽ കുറിച്ചു. മനുഷ്യർക്കിടയിൽ കുറച്ചുകൂടി കാരുണ്യവും പരസ്പര ബഹുമാനവും ഉണ്ടാകണമെന്ന സന്ദേശത്തോടെയാണ് അവർ ഈ വിവാദത്തിന് അന്ത്യം കുറിച്ചത്.

Tags : IPL2026 ShreyasIyer PBKSvKKR CricketNews IPLControversy