20

ഇന്ത്യൻ കായിക പത്രപ്രവർത്തന രംഗത്തെ പ്രമുഖനായ വിക്രാന്ത് ഗുപ്തയ്ക്കെതിരെ പാകിസ്ഥാൻ യൂട്യൂബർ മൊഹ്സിൻ അലി നടത്തിയ വധഭീഷണി സോഷ്യൽ മീഡിയയിൽ വലിയ കോളിളക്കം സൃഷ്ടിച്ചിരിക്കുകയാണ്.

ഒരു ലൈവ് സ്ട്രീമിംഗിനിടെ പരസ്യമായി തോക്ക് പുറത്തെടുത്ത് പ്രകോപനപരമായി സംസാരിക്കുന്ന മൊഹ്സിൻ അലിയുടെ ദൃശ്യങ്ങൾ പുറത്തുവന്നതോടെയാണ് വിവാദങ്ങൾക്ക് തുടക്കം.

തന്‍റെ പക്കലുള്ള ആയുധം വിക്രാന്ത് ഗുപ്തയെ വകവരുത്താൻ വേണ്ടി മാത്രമുള്ളതാണെന്ന് ആക്രോശിച്ച ഇയാൾ, വീടിനുള്ളിൽ വെച്ച് തോക്ക് പ്രവർത്തിപ്പിച്ചു കാണിക്കുകയും ചെയ്തു. സോഫയ്ക്ക് പിന്നിൽ നിന്നുകൊണ്ട് ഇയാൾ വായുവിലേക്ക് വെടിയുതിർക്കുന്നത് ദൃശ്യങ്ങളിൽ വ്യക്തമാണ്.

കായിക വിഷയങ്ങൾ ചർച്ച ചെയ്യേണ്ട പ്ലാറ്റ്‌ഫോമുകളെ അക്രമാസക്തമായ ഭീഷണികൾക്കായി ദുരുപയോഗം ചെയ്യുന്നതിനെതിരെ കടുത്ത അമർഷമാണ് ഇന്‍റർനെറ്റ് ലോകത്ത് ഉയരുന്നത്. അടച്ചിട്ട മുറിക്കുള്ളിൽ യാതൊരു സുരക്ഷാ മാനദണ്ഡങ്ങളും പാലിക്കാതെ ആയുധം പ്രയോഗിച്ച യൂട്യൂബറുടെ നടപടി അങ്ങേയറ്റം നിരുത്തരവാദപരമാണെന്ന് പൗരസമൂഹം കുറ്റപ്പെടുത്തുന്നു.

വിദ്വേഷം പ്രചരിപ്പിക്കുന്ന ഇത്തരം വീഡിയോകൾക്കെതിരെ യൂട്യൂബ് ഉൾപ്പെടെയുള്ള പ്ലാറ്റ്‌ഫോമുകൾ ഉടനടി നടപടി സ്വീകരിക്കണമെന്ന ആവശ്യവും ശക്തമായിട്ടുണ്ട്. സോഷ്യൽ മീഡിയയിൽ വൈറലായ ഈ വീഡിയോയ്ക്ക് താഴെ വലിയ രീതിയിലുള്ള പ്രതിഷേധ കമന്‍റുകളാണ് വന്നുകൊണ്ടിരിക്കുന്നത്.

മൊഹ്സിൻ അലിയുടെ പ്രവർത്തി ഭീകരവാദത്തിന് തുല്യമാണെന്ന് വിശേഷിപ്പിച്ച പലരും, മാധ്യമപ്രവർത്തകരുടെ സുരക്ഷ ഉറപ്പാക്കാൻ ഇന്ത്യൻ സർക്കാർ അന്താരാഷ്ട്ര തലത്തിൽ ഇടപെടണമെന്ന് ആവശ്യപ്പെടുന്നു.

രാജ്യങ്ങൾ തമ്മിലുള്ള സ്പോർട്സ് തർക്കത്തെ വ്യക്തിപരമായ ശത്രുതയായും അക്രമണോത്സുകതയായും മാറ്റുന്ന ഇത്തരം പ്രവണതകൾ ഗൗരവമായി കാണണമെന്നാണ് ഭൂരിഭാഗം ആളുകളുടെയും അഭിപ്രായം. സംഭവത്തിൽ പാക് അധികൃതർ അന്വേഷണം നടത്തണമെന്ന ആവശ്യവും ഇതിനോടകം ഉയർന്നു കഴിഞ്ഞു.

Tags : BreakingNews ViralVideo SocialMediaOutrage TrendingNow ShockingIncident