സുരേഷ് ഗോപിയുടെ ഓഫീസ് ആക്രമിച്ച സംഭവം; ശക്തമായ പ്രതിഷേധമെന്ന് ബിജെപി
Tuesday, August 12, 2025 9:50 PM IST
തിരുവനന്തപുരം: കേന്ദ്രമന്ത്രി സുരേഷ് ഗോപിയുടെ ക്യാമ്പ് ഓഫീസ് സിപിഎം പ്രവർത്തകർ ആക്രമിച്ചതിൽ ബിജെപി പ്രതിഷേധം ശക്തമാക്കുന്നു. മന്ത്രിയുടെ ഓഫീസ് ആക്രമിച്ചത് അത്യന്തം അപലപനീയമാണെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് പറഞ്ഞു.
ജനാധിപത്യപരമായ പ്രതിഷേധങ്ങളുടെ മറവില് അക്രമം നടത്താനാണ് ലക്ഷ്യമെങ്കില് അത് അനുവദിക്കില്ല. ക്യാമ്പ് ഓഫീസ് ആക്രമിച്ച സംഭവത്തിൽ പ്രതിഷേധിച്ച് ബുധനാഴ്ച സംസ്ഥാന വ്യാപക പ്രതിഷേധ പരിപാടികൾ സംഘടിപ്പിക്കുമെന്നും ബിജെപി അധ്യക്ഷൻ അറിയിച്ചു.
ജനാധിപത്യപരമായ സമരങ്ങളെ ബിജെപി അംഗീകരിക്കും. സുരേഷ് ഗോപിക്കെതിരെ സിപിഎമ്മും കോണ്ഗ്രസും ചേര്ന്ന് നടത്തുന്ന വ്യാജ പ്രചാരണങ്ങള് എല്ലാ ജനാധിപത്യ മര്യാദകളും ലംഘിക്കുന്നതാണെന്നും രാജീവ് ചന്ദ്രശേഖര് പറഞ്ഞു.