പാർലമെന്ററി സ്റ്റാൻഡിംഗ് കമ്മിറ്റി അംഗങ്ങൾ എൻ ഊര് സന്ദർശിക്കുന്നു.
കൽപ്പറ്റ: കേന്ദ്രാവിഷ്കൃത പദ്ധതികളുടെ പ്രവർത്തന പുരോഗതി വിലയിരുത്തുന്നതിനായി റൂറൽ ഡെവലപ്മെന്റ് ആൻഡ് പഞ്ചായത്തിരാജ് പാർലമെന്ററി സ്റ്റാൻഡിംഗ് കമ്മിറ്റി ജില്ലയിലെ വിവിധ സ്ഥലങ്ങളിൽ സന്ദർശനം നടത്തി.
ലോക്സഭാ എംപി സപ്തഗിരി ശങ്കർ ഉലക അധ്യക്ഷനായ 16 അംഗ സമിതിയാണ് സന്ദർശനം നടത്തിയത്. എൻ ഊര് ഗോത്ര പൈതൃക ഗ്രാമത്തിലെത്തിയ സംഘം എൻ ഊരിന്റെ ഭാവി വികസനത്തിനായി ദേശീയ ഗ്രാമീണ ഉപജീവന ദൗത്യം (എൻആർഎൽഎം) ഫണ്ടിന്റെ സാധ്യതകൾ ജില്ലാ കളക്ടർ വി. ചെൽസാസിനിയുമായി ചർച്ച ചെയ്തു. എൻ ഊരിലെ പണിയ നൃത്തം, കരകൗശല വസ്തുക്കൾ, കാർഷികവന ഉത്പന്നങ്ങളുടെ വിപണന ശാലകൾ സംഘം സന്ദർശിച്ചു.
വിനോദസഞ്ചാരികൾക്കായി ഒരുക്കിയിരിക്കുന്ന ഗൃഹ പൈതൃകം, ഗോത്രകലാ പൈതൃകം, ഗോത്ര വേഷാലങ്കാര പരിചയം, ഗോത്ര ഭക്ഷണംസംഗീത പൈതൃകം എന്നിവ സംബന്ധിച്ച് സമിതി അംഗങ്ങൾ വിശദമായി ചോദിച്ചറിഞ്ഞു. തുടർന്ന് കുടുംബശ്രീ സിഡിഎസിന്റെ നേതൃത്വത്തിൽ നടത്തുന്ന നൻമ ഫുഡ് പ്രോസസിംഗ് യൂണിറ്റ് സന്ദർശിച്ച സംഘം യൂണിറ്റിൽ വിനിയോഗിച്ച കേന്ദ്ര വിഹിത ഫണ്ട്, പ്രവർത്തന രീതി, ഉത്പന്നങ്ങളുടെ വിപണനം, വിറ്റുവരവ് എന്നിവയെ കുറിച്ച് ചോദിച്ചറിഞ്ഞു. ഫുഡ് പ്രോസസിംഗ് കേന്ദ്രത്തിലെ ഉത്പന്നങ്ങൾ കഴിച്ച് സംതൃപ്തി രേഖപ്പെടുത്തിയാണ് സമിതിയംഗങ്ങൾ മടങ്ങിയത്.
മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിൽ ഉൾപ്പെടുത്തി തരിയോട് ഗവ. ഹയർ സെക്കൻഡറി സ്കൂളിൽ നിർമിച്ച ചുറ്റുമതിൽ, പിഎംഎവൈ പദ്ധതി പ്രകാരം തരിയോട് പഞ്ചായത്തിലെ ഒന്പതാം വാർഡിൽ നിർമിച്ച ദേവയാനി സുകുമാരന്റെ വീട്, തൊഴിലുറപ്പ് പദ്ധതിയിൽ നിർമിച്ച കിണർ എന്നിവയും സമിതി സന്ദർശിച്ചു.
തരിയോട് പഞ്ചായത്തിലെ പത്താം മൈലിൽ തൊഴിലുറപ്പ് തൊഴിലാളികൾ നിർമിക്കുന്ന മഴക്കുഴി സന്ദർശിച്ച സംഘം തൊഴിലാളികളുമായി സംവദിച്ച് പ്രവർത്തനങ്ങൾ വിലയിരുത്തി.ജനാർദൻ മിശ്ര, കരംവീർ സിംഗ് ബോദ്, നാഗേന്ദ്ര റായ്, വിജയ് കുമാർ ദുബെ, നബ ചരണ് മാജി, ഇമ്രാൻ മസൂദ്, പി.ടി. ഉഷ, മിയാൻ അൽതാഫ് അഹമദ്, ബൈദ്യനാഥ് റാം, കൃഷ്ണ ദേവി പട്ടേൽ, ഭുമാരെ സന്ദീപൻറാവു ആസാറാം, രാജതി, ഭാസ്കർ മുരളീധർ ഭഗാരെ, സമീറുൽ ഇസ്ലാം, ജുഗൽ കിഷോർ എന്നിവരായിരുന്നു സമിതിയിലെ മറ്റ് എംപിമാർ. തദ്ദേശ സ്വയംഭരണ വകുപ്പ് സെക്രട്ടറി ഡോ. എം.ജി. രാജമാണിക്യം, കുടുംബശ്രീ എക്സിക്യുട്ടീവ് ഡയറക്ടർ വി. വിഘ്നേശ്വരി, ജല്ലാ കളക്ടർ വി. ചെൽസാസിനി, പാർലമെന്ററി കമ്മറ്റി എക്സിക്യുട്ടീവ് ഓഫിസർ അതുൽ സിംഗ്, എഡിഎം കെ. അജീഷ്, സബ് കളക്ടർ അതുൽ സാഗർ, തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ പി.സി. മജീദ്, തരിയോട് പഞ്ചായത്ത് പ്രസിഡന്റ് സൂസി ബാബു, വൈസ് പ്രസിഡന്റ് ഷമീം പാറക്കണ്ടി, ലീഡ് ബാങ്ക് മാനേജർ വിനീഷ് ബാബു, കാനറ ബാങ്ക് ജിഎം വിജയലക്ഷ്മി, കുടുംബശ്രീ എഡിഎംസി കെ.എം. സലീന, ജനപ്രതിനിധികൾ, മറ്റ് ഉദ്യോഗസ്ഥർ എന്നിവർ സംഘത്തോടൊപ്പം ഉണ്ടായിരുന്നു.