കാഞ്ഞിരപ്പള്ളി: കുടിവെള്ളം മുട്ടിച്ച് സാമൂഹ്യവിരുദ്ധർ. ഇടക്കുന്നം തീരദേശം പ്രദേശത്ത് വല്ലപ്പുഴയിൽ ഷാനവാസിന്റെ വീട്ടുമുറ്റത്തെ കിണറ്റിലാണ് സാമൂഹികവിരുദ്ധർ കരിഓയിൽ ഒഴിച്ചത്.
വീട്ടുകാരെ കൂടാതെ അയൽവാസികളായ മൂന്നുപേർകൂടി ഉപയോഗിച്ചിരുന്നത് ഷാനവാസിന്റെ കിണറ്റിലെ വെള്ളമായിരുന്നു. ചൊവ്വാഴാച രാത്രിയിലാണ് സംഭവം. ഇന്നലെ രാവിലെയാണ് കിണറ്റിൽ കരിഓയിൽ ഒഴിച്ചത് ശ്രദ്ധയിൽപ്പെട്ടതെന്ന് ഷാനവാസ് പറഞ്ഞു. കരി ഓയിൽ വീണതോടെ കിണറ്റിലെ വെള്ളമാകെ ഉപയോഗശൂന്യമായി മാറി.
ഓയിൽ കിണറ്റിലെ വെള്ളത്തിന്റെ മുകളിലാകെ പരന്നുകിടക്കുകയാണ്. സ്ഥലത്തെത്തിയ വാർഡ് മെംബർ വി.ടി. രഞ്ജിത്ത് കാഞ്ഞിരപ്പള്ളി പോലീസിലും പാറത്തോട് ഫാമിലി ഹെൽത്ത് സെന്ററിലും വിവരമറിയിച്ചതിനെത്തുടർന്ന് ഹെൽത്ത് ഇൻസ്പെക്ടർ എൻ.ആർ. വിനോദ് കുമാർ, ജൂനിയർ ഹെൽത്ത് ഇൻസ്പെക്ടർ അജയ് കുമാർ എന്നിവർ സ്ഥലത്തെത്തി വെള്ളത്തിന്റെ സാമ്പിൾ ശേഖരിച്ചു. കോട്ടയത്ത് വാട്ടർ അഥോറിറ്റി ലാബിൽ വെള്ളം പരിശോധനയ്ക്ക് അയച്ചിട്ടുണ്ട്. കടുത്ത വേനലിലും വറ്റാത്ത കിണറായിരുന്നു ഇത്. കിണർ തേകിയതിനുശേഷം വരുന്ന വെള്ളത്തിലും ഓയിലിന്റെ അംശമുണ്ട്.