ചാത്തന്നൂർ: പഞ്ചായത്ത് ഉദ്യോഗസ്ഥരുടെ ഔദ്യോഗിക കൃത്യനിർവഹണം തടസപ്പെടുത്തി ഉദ്യോഗസ്ഥരെ അസഭ്യം വിളിക്കുകയും കൈയ്യേറ്റം ചെയ്യാൻ ശ്രമിക്കുകയും ചെയ്ത കേസിൽ രണ്ടുപേരെ ചാത്തന്നൂർ പൊലിസ് അറസ്റ്റ് ചെയ്യ്തു. മീനാട് വില്ലേജിലെ ഇടനാട് കുന്നുംപുറത്ത് വീട്ടിൽ സുധീഷ്(32), മീനാട് വില്ലേജിലെ ഇടനാട് വിളയിൽ വീട്ടിൽ ജയൻ (41) എന്നിവരെയാണ് അറസ്റ്റ് ചെയ്തത്.
ചൊവാഴ്ച വൈകിട്ട് 4.30 ഓടെ മീനാട് വില്ലേജിലെ കൊല്ലായിക്കൽ വാച്ചി ഭാഗത്ത് ചാത്തന്നൂർ പഞ്ചായത്ത് അസിസ്റ്റന്റ് എൻജിനിയറും സഹപ്രവർത്തകരും റോഡ് നവീകരണവുമായി ബന്ധപ്പെട്ട സൈറ്റ് പരിശോധന നടത്തിവരുന്നതിനിടെയാണ് സംഭവം.
പരിശോധനയ്ക്കിടെ സ്ഥലത്തെത്തിയ പ്രതികൾ ഉദ്യോഗസ്ഥരോട് തട്ടിക്കയറുകയും അസഭ്യം വിളിക്കുകയും കൈയ്യേറ്റം ചെയ്യാൻ ശ്രമിക്കുകയും ഔദ്യോഗിക കൃത്യനിർവഹണം തടസപ്പെടുത്തുകയും ചെയ്തു. തുടർന്ന് വനിതാ ഉദ്യോഗസ്ഥയുടെ ദൃശ്യങ്ങൾ മൊബൈൽ ഫോണിൽ പകർത്തുകയും അവരോട് മോശമായി പെരുമാറു കയും ചെയ്തു. സംഭവത്തിൽ അസിസ്റ്റന്റ് എൻജിനീയറുടെ പരാതിയിൽ ചാത്തന്നൂർ എസിപി രാകേഷിന്റെ നിർദ്ദേശപ്രകാരം ചാത്തന്നൂർ എസ്എച്ച് ഒ നിതിൻ നളൻ, എസ്ഐ മാരായ രാകേഷ് പണിക്കർ, ഷാജി, എഎസ്ഐ മാരായ ലാലു, വിജയൻ സിപിഒ കണ്ണൻ എന്നിവരടങ്ങിയ പൊലിസ് സംഘമാണ് ഇവരെ അറസ്റ്റ് ചെയ്തത്.