പത്തനംതിട്ട: സെന്സസുമായി ബന്ധപ്പെട്ട് സ്വയം വിവരം നല്കല് ജില്ലയില് പുരോഗമിക്കുന്നു. ഇന്നലെ വരെ 4123 പേരാണ് സെല്ഫ് എന്യുമറേഷന് പൂര്ത്തിയാക്കിയത്. രാജ്യസഭാ മുൻ ഉപാധ്യക്ഷന് പ്രഫ. പി.ജെ. കുര്യന്, ക്നാനായ റാന്നി ഭദ്രാസനം ബിഷപ് കുര്യാക്കോസ് മോര് ഇവാനിയോസ്, പത്തനംതിട്ട പ്രിന്സിപ്പല് ജില്ലാ ജഡ്ജ് എന്. ഹരികുമാര്, കോന്നി ഗ്രാമപഞ്ചായത്ത് പ്രസിഡന്റ് റോജി ഏബ്രഹാം, എഴുത്തുകാരന് ഡോ. ബി. രവികുമാര്, എഡിഎം ആര്. രാജലക്ഷ്മി തുടങ്ങിയവര് സ്വയം വിവരം നല്കി സെന്സസിന്റെ ഭാഗമായി.
സ്വയം വിവരങ്ങള് നല്കാന് 30 വരെ സൗകര്യമുണ്ട്. ഭവന പട്ടികപ്പെടുത്തലിനായി എന്യുമറേറ്റര് വീടുകളില് എത്തുന്നതിനു മുമ്പ് https://se.census.gov.in വെബ് പോര്ട്ടലിലൂടെ പൊതുജങ്ങള്ക്ക് സെല്ഫ്-എന്യുമറേഷന് ചെയ്യാം. ജൂലൈ ഒന്നു മുതല് 30 വരെയാണ് ഭവനപട്ടികപ്പെടുത്തല്. രാജ്യത്തെ 16-ാമത് ജനസംഖ്യാ കണക്കെടുപ്പ് 2026-27 വര്ഷങ്ങളില് രണ്ട് ഘട്ടങ്ങളിലാണ് നടത്തുന്നത്. പ്രാരംഭഘട്ടമായ ഭവനപട്ടികപ്പെടുത്തല് സംസ്ഥാനത്ത് ജൂലൈ ഒന്നിന് ആരംഭിക്കും.
സെസന്സ് ഉദ്യോഗസ്ഥരുടെ സംഗമം സംഘടിപ്പിച്ചു
പത്തനംതിട്ട: സെന്സസുമായി ബന്ധപ്പെട്ട് തിരുവല്ല താലൂക്ക് എന്യുമറേറ്റര്, സൂപ്പര്വൈസര് സംഗമവും ഒന്നാംഘട്ട ഉദ്ഘാടനവും പുഷ്പഗിരി മെഡിക്കല് കോളജ് കോണ്ഫറന്സ് ഹാളില് ജില്ലാ കളക്ടര് എ. നിസാമുദീന് ഉദ്ഘാടനം ചെയ്തു.
തിരുവല്ല സെന്സസ് ചാര്ജ് ഓഫീസറും തഹസില്ദാറുമായ ജോബിന് കെ. ജോര്ജ്, ഫീല്ഡ് ട്രെയിനര്മാരായ മത്തായി റ്റി. വര്ഗീസ്, ജി.കെ. ആഗ്നേയ്, ജേക്കബ് തോമസ്, ജി. റീനാമോള്, രഞ്ജിത്ത് ജോസഫ്, റോഷന് സാറ ഫിലിപ്പോസ്, മാനേഷ് ജേക്കബ് എന്നിവര് നേതൃത്വം നല്കി.