മാള: പുതുതായി നിർമിച്ച പുത്തൻചിറ കിഴക്കുംമുറി സെന്റ് ജോസഫ് ഇടവക ദേവാലയത്തിന്റെ ആശീർവാദം നാളെ നടക്കും. ഉച്ചയ്ക്ക് 2.15ന് ബിഷപ്പുമാർക്ക് സ്വീകരണം നൽകും. തുടർന്ന് 2.30ന് ദേവാലയ വെഞ്ചരിപ്പ് ഇരിങ്ങാലക്കുട ബിഷപ് മാർ പോളി കണ്ണൂക്കാടൻ നിർവഹിക്കും. ആർച്ച്ബിഷപ് മാർ ജോർജ് പാനികുളം സന്ദേശംനൽകും.
തുടർന്ന് രാത്രി ഏഴിനു നടക്കുന്ന പൊതുസമ്മേളനം മന്ത്രി ഒ.ജെ. ജനീഷ് ഉദ്ഘാടനം ചെയ്യും. ബിഷപ് മാർ പോളി കണ്ണൂക്കാടൻ അധ്യക്ഷത വഹിക്കും. മുൻമന്ത്രിമാരായ കെ. രാജൻ എംഎൽഎ, ഡോ.ആർ. ബിന്ദു, മുൻ എംഎൽഎ വി.ആർ. സുനിൽകുമാർ, വികാരി ജനറാൾ മോൺ. ആന്റോ ആലപ്പാടൻ, മദർ ജനറൽ ഡോ. സിസ്റ്റർ ആനി കുര്യക്കോസ് സിഎച്ച്എഫ്, ഗ്രാമപഞ്ചായത്ത് പ്രസിഡന്റ് വി.എൻ. രാജേഷ് തുടങ്ങിയവർ ചടങ്ങിൽ പങ്കെടുക്കും.
ദേവാലയ വെഞ്ചരിപ്പിനോടനുബന്ധിച്ച് 22ന് രാവിലെ 7.30ന് ആദ്യകുർബാന സ്വീകരണവും വൈകിട്ട് ആറിന് പ്രവാസി സംഗമവും നടക്കും.
രാത്രി ഏഴിന് നാടകം. 23ന് മതബോധന ദിനാഘോഷം, വൈകിട്ട് 5.30ന് വിശുദ്ധ കുർബാന. രാത്രി ഏഴിനുള്ള പൊതുസമ്മേളനം വികാരി ജനറാൾ മോൺ. വിൽസൺ ഈരത്തറ ഉദ്ഘാടനം ചെയ്യും. തുടർന്ന് മതബോധന വിദ്യാർഥികളുടെ കലാപരിപാടികൾ അരങ്ങേറും. ഇടവകദിനമായ 24ന് വൈകിട്ട് 5.30ന് വിശുദ്ധ കുർബാന. രാത്രി ഏഴിന് പൊതുസമ്മേളനം വികാരി ജനറാൾ മോൺ. ജോസ് മാളിയേക്കൽ ഉദ്ഘാടനം ചെയ്യും. തുടർന്ന് കലാസന്ധ്യ, സമ്മാനദാനം എന്നിവ നടക്കും. 25ന് സമർപ്പിത സംഗമദിനത്തിൽ വൈകിട്ട് 5.30ന് സമൂഹബലി, സമർപ്പിത കൂട്ടായ്മ. തുടർന്ന് രാത്രി ഏഴിന് റിമി ടോമി നയിക്കുന്ന ഗാനമേള.
ഇടവക ദേവാലയ നിർമാണത്തോടനുബന്ധിച്ച് അർഹരായവർക്ക് അഞ്ചു വീടുകൾ നിർമിച്ചു നൽകുന്നുണ്ട്. ഇവയിൽ രണ്ടെണ്ണം നിർമാണം പൂർത്തീകരിച്ച് കൈമാറി. ശേഷിക്കുന്ന മൂന്നെണ്ണത്തിന്റെ പ്രവർത്തനങ്ങൾ പുരോഗമിക്കുകയാണ്. പരിപാടികൾ വിശദീകരിച്ച പത്രസമ്മേളനത്തിൽ ഇടവക വികാരി ഫാ. ജോൺ കവലക്കാട്ട്, കൈക്കാരൻ വിൽസൺ പയ്യപ്പിള്ളി, ജനറൽ കൺവീനർ ജോയ് മുരിങ്ങലത്ത്, നിർമാണ കമ്മിറ്റി സെക്രട്ടറി ലിജോ പയ്യപ്പിള്ളി തുടങ്ങിയവർ പങ്കെടുത്തു.
Tags : St. Josephs Church, Puthenchira, NattuVishesham DistricteNews