നിലമ്പൂര്: ഇഎസ്എ കരട് വിജ്ഞാപനത്തിനെതിരേ 19-ന് മലയോര ഹര്ത്താല് ആചരിക്കുമെന്ന് മലയോര സംരക്ഷണ സമിതി ഭാരവാഹികള് അറിയിച്ചു.
നിലമ്പൂര് താലൂക്കിലെ 11 വില്ലേജുകളെ ഇഎസ്എ പരിധിയില് ഉള്പ്പെടുത്തിയുള്ള കരട് വിജ്ഞാപനത്തില് നിന്നും ജനവാസ മേഖലകളെ പൂര്ണമായി ഒഴിവാക്കണമെന്നാവശ്യപ്പെട്ടാണ് ഹര്ത്താല്. കടകള് അടച്ചും വാഹനങ്ങള് സര്വീസ് നിര്ത്തിവച്ചും മുഴുവന് ജനങ്ങളും ഹര്ത്താലില് പങ്കാളികളാകണമെന്ന് ഭാരവാഹികള് അഭ്യര്ഥിച്ചു.
ഇഎസ്എ കരട് വിജ്ഞാപനത്തിനെതിരേ ആദ്യമായാണ് മലയോര ഹര്ത്താല് നടത്തുന്നത്. പ്രിയങ്കാ ഗാന്ധി എംപി, മന്ത്രിമാരായ എ.പി. അനില്കുമാര്, പി.കെ. ബഷീര്, എംഎല്എമാരായ ആര്യാടന് ഷൗക്കത്ത്, വി.എസ്. ജോയ്, ടി.പി. അഷറഫലി എന്നിവര് വിഷയത്തില് കാര്യമായ ഇടപെടല് നടത്തണമെന്നും ഭാരവാഹികള് ആവശ്യപ്പെട്ടു.
ഹര്ത്താലിന് മുന്നോടിയായി ഇന്നും നാളെയും വാഹന പ്രചാരണ ജാഥകള് നടക്കും. കരുവാരക്കുണ്ടില് മുന് മന്ത്രി പി. രാജീവ് പ്രചാരണ ജാഥകളുടെ ഉദ്ഘാടനം നിര്വഹിച്ചു. എടക്കര മേഖലാ ജാഥ ഇന്ന് രാവിലെ മൂത്തേടത്തു നിന്നും ആരംഭിച്ച് ചുങ്കത്തറയില് സമാപിക്കും. 18-ന് നിലമ്പൂര് മേഖലാ ജാഥ അടക്കാക്കുണ്ടില് നിന്നും ആരംഭിച്ച് കരുളായി അങ്ങാടിയില് സമാപിക്കും.
വാര്ത്താ സമ്മേളനത്തില് മലയോര സംരക്ഷണ സമിതി ചെയര്മാന് ഫാദര് മാത്യൂസ് വട്ടിയാനിക്കല്, ജനറല് കണ്വീനര് വി.എ. മുഹമ്മദ് റസാഖ്, സിപിഎം ജില്ലാ കമ്മിറ്റി അംഗം ഇ. പത്മാക്ഷന്, സിപിഎം ഏരിയാ സെക്രട്ടറിമാരായ കെ. മോഹന്, ടി. രവീന്ദ്രന്, ഡിവൈഎഫ്ഐ സംസ്ഥാന നേതാവ് പി. ഷെബീര്, അനന്തകൃഷ്ണന് എന്നിവര് പങ്കെടുത്തു.
Tags : begin today Nttuvishesham Districtnews