മണ്ണ് കടത്തുന്നതിനിടെ പൊലിസ് പിടിച്ചെടുത്ത ലോറികള് റോഡരികിൽ നിർത്തിയിട്ട നിലയില്.
വണ്ടൂര്: വണ്ടൂര് മേഖലയില് അനധികൃതമായി ചെങ്കല്ലും മണ്ണും ഖനനം ചെയ്ത് കടത്തുകയായിരുന്ന 17 വാഹനങ്ങള് പൊലിസ് പിടികൂടി. 16 ലോറികളും ഒരു മണ്ണുമാന്തി യന്ത്രവുമാണ് പൊലിസ് കസ്റ്റഡിയിലെടുത്തത്.
വെള്ളാമ്പുറം റെയില്വേ അടിപ്പാതയ്ക്ക് സമീപം പ്രവര്ത്തിച്ചിരുന്ന അനധികൃത ചെങ്കല് ക്വാറിയില്നിന്ന് 13 മിനി ലോറികളും ഒരു മണ്ണുമാന്തി യന്ത്രവുമാണ് നിലമ്പൂര് ഡിവൈഎസ്പിയുടെ സ്ക്വാഡ് അംഗങ്ങളും പൊലിസും ചേര്ന്ന് പിടികൂടിയത്.
ഇതിനുപുറമേ, വെള്ളിയാഴ്ച രാത്രി 11-ഓടെ വണ്ടൂര്-പാണ്ടിക്കാട് റോഡില് പുളിയക്കോടുനിന്ന് അനധികൃതമായി മണ്ണ് കടത്തുകയായിരുന്ന മൂന്ന് ലോറികളും നൈറ്റ് പെട്രോളിംഗ് സംഘം പിടിച്ചെടുത്തു. മേഖലയില് മണ്ണ്-ക്വാറി മാഫിയകള് സജീവമാണ്. റവന്യു-ജിയോളജി വിഭാഗത്തിലെ ചില ഉന്നതരുടെ ഒത്താശയാണ് ഇവര്ക്ക് സഹായകമാകുന്നതെന്നാണ് ആരോപണം.
മന്ത്രി എ.പി. അനില്കുമാറിന്റെ മണ്ഡലത്തിലാണ് യാതൊരു ഭയവുമില്ലാതെ അനധികൃത മണ്ണ്, ചെങ്കല് ഖനനങ്ങള് തുടരുന്നത്. ഒഴിവുദിവസങ്ങളുടെ മറവിലാണ് അനധികൃത കടത്ത്.