എടവനക്കാട് എസ്ഡിപി വൈ കെ പി എം ഹൈസ്കൂളിൽ പൂവിട്ട മൗറീഷ്യസ് ഹെംപ് വിദ്യാർഥികൾ കൗതുകത്തോടെ നോക്കിക്കാണുന്നു.
ചെറായി: ജീവിത ചക്രത്തിനിടയിൽ ഒരേയൊരു തവണ മാത്രം പുഷ്പിക്കുക, പൂക്കാലം തീരുന്നതോടെ ചെടി തന്നെ ഇല്ലാതാവുക , മൗറീഷ്യസ് ഹെംപ് എന്ന ഈ ചെടിയുടെ ജീവിതചരിത്രം ഒരു ദുരന്ത കഥയാണ്. സസ്യലോകത്തെ ഈ അപൂർവ ചെടി ഇപ്പോൾ എടവനക്കാട് എസ്ഡിപിവൈ കെപിഎംഎച്ച് സ്കൂൾ മുറ്റത്ത് പൂവിട്ടിരിക്കുകയാണ്.
വർഷങ്ങൾക്ക് മുൻപ് ഇവിടത്തെ ബയോളജി അധ്യാപകനായ ജോർജ് അലോഷ്യസ് മാസ്റ്റർ നട്ട താണിത്. ഇതാണ് വിദ്യാർഥികൾക്ക് ഇപ്പോൾ കൗതുകമായത്. ഫർക്രോയ ഫൊയറ്റിഡ എന്ന് ശാസ്ത്രനാമവും ഫാൾസ് അഗാവേ എന്ന് വിളിപ്പേരുമുള്ള ഈ സസ്യത്തിന്റെ മധ്യഭാഗത്തുനിന്നാണ് കൂറ്റൻ പൂങ്കുലകൾ വളർന്നു വരുന്നത്.
ആറ് മുതൽ പന്ത്രണ്ട് മീറ്റർ വരെ ഉയരത്തിൽ വളരുമെന്നതാണ് മറ്റൊരു പ്രത്യേകത. ജീവിതചക്രത്തിൽ ഒരേയൊരു തവണ മാത്രം പൂവിടുന്ന മോണോകാർപിക് വിഭാഗത്തിൽപ്പെട്ട സസ്യമാണിത്. ജീവശാസ്ത്ര ക്ലാസുകളിൽ മാത്രം വായിച്ചറിഞ്ഞ ഈ അപൂർവ കാഴ്ച നേരിൽ കാണാൻ സാധിച്ചതിന്റെ ആവേശത്തിലാണ് സ്കൂളിലെ വിദ്യാർഥികൾ.
Tags : Local News Nattuvishesham Ernakulam