കണ്ണൂരിൽ ട്രെയിൻ തടഞ്ഞ് കെഎസ്യു
കണ്ണൂർ: നീറ്റ് പരീക്ഷ ചോദ്യപേപ്പർ ചോർത്തിയത് അധികാരികളുടെ ഒത്താശയോടെയാണെന്നും അതിൽ നീറി പുകയുന്നത് അനേകലക്ഷം വിദ്യാർഥികളുടെ ഭാവിയാണെന്നും കെഎസ്യു ജില്ലാ പ്രസിഡന്റ് എം.സി. അതുൽ. കണ്ണൂർ റെയിൽവേ സ്റ്റേഷനിൽ ട്രെയിൻ തടഞ്ഞുള്ള പ്രതിഷേധം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
അതീവ സുരക്ഷയോടെ നടത്തുന്ന പരീക്ഷാ ചോദ്യ പേപ്പർ പോലും ചോരുന്നത് നിത്യ സംഭവമാവുകയാണെന്നും ഇതിന്റെ പിന്നിൽ വലിയ മാഫിയകൾ പ്രവർത്തിക്കുന്നുണ്ടെന്നും ശക്തമായ അന്വേഷണം നടത്തി കുറ്റക്കാരെ തുറങ്കിലടക്കണമെന്നും കെഎസ്യു ആവശ്യപ്പെട്ടു. ജില്ലാ വൈസ് പ്രസിഡന്റ് മുഹമ്മദ് റാഹിബ്, സി.എച്ച്. മുബാസ് , അർജുൻ ചാലാട്, പ്രകീർത്ത് മുണ്ടേരി, വൈഷ്ണവ് മലപ്പിലായി, അഹമ്മദ് യാസീൻ, എ.പി. നിഹാൽ, ദേവനന്ദ കാടാച്ചിറ, ആദിൽ പാച്ചപ്പൊയ്ക, ആദിത്യൻ എന്നിവർ നേതൃത്വം നൽകി.
ഹെഡ് പോസ്റ്റ് ഒാഫീസിലേക്ക് തള്ളിക്കയറി എസ്എഫ്ഐ
കണ്ണൂർ: നീറ്റ് പരീക്ഷ ക്രമക്കേടിൽ പ്രതിഷേധിച്ച് എസ്എഫ്ഐ ജില്ലാ കമ്മറ്റി കണ്ണൂർ ഹെഡ് പോസ്റ്റ് ഓഫിസിലേക്ക് മാർച്ച് നടത്തി. പോലീസ് സ്ഥാപിച്ച ബാരിക്കേഡ് മറികടന്ന പ്രവർത്തകർ മതിൽക്കെട്ടി നകത്തേയ്ക്ക് പ്രവേശിച്ചു. തുടർന്ന് പോലീസ് ബലപ്രയോഗത്തിലൂടെയാണ് പ്രവർത്തകരെ പിടിച്ചു മാറ്റിയത്.
മാർച്ച് സംസ്ഥാന ജോയിന്റ് സെക്രട്ടറി മുഹമ്മദ് സാദിഖ് ഉദ്ഘാടനം ചെയ്തു. ജില്ല പ്രസിഡന്റ് ടി.പി. ആദർശ് അധ്യക്ഷത വഹിച്ചു. നേതാക്കളായ ജോയൽ തോമസ്, ടി.പി.അഖില, കെ.കെ. ഗിരീഷ്, കെ.പി.അലീഷ, സി.വി. ഹരികൃഷ്ണൻ, കെ.എം. വൈഷ്ണവ്, എം. അശ്വന്ത് എന്നിവർ പ്രസംഗിച്ചു.
എംഎസ്എഫ് ഹെഡ് പോസ്റ്റ് ഓഫീസ് ഉപരോധിച്ചു
കണ്ണൂർ: നീറ്റ് പരീക്ഷ റദ്ദാക്കിയ എൻടിഎ നടപടിക്കെതിരെ എംഎസ്എഫ് കണ്ണൂർ മണ്ഡലം കമ്മറ്റി കണ്ണൂർ ഹെഡ് പോസ്റ്റ് ഓഫീസ് ഉപരോധിച്ചു. ജില്ലാ പ്രസിഡന്റ് യൂനുസ് പടന്നോട്ട് ഉദ്ഘാടനം നിർവഹിച്ചു. ഷാനിബ് കാനച്ചേരി, ഫസ്ലിം എഴര,പി.കെ. സവാദ് ,അർഷിൽ സിറ്റി ,അഫ്ലഹ് മായിൻമുക്ക്, മുഫൈസ് എന്നിവർ നേതൃത്വം നൽകി.
Tags : nattu vishesham NEET question