ബ്രണ്ണൻ കോളജിൽ പുതുതായി നിർമിച്ച പ്രവേശന കവാടം.
തലശേരി: ബ്രണ്ണൻ കോളജിൽ നെടുമ്പാശരി വിമാനത്താവള നിർമാണ പരിപാലന കമ്പനിയായ സിയാലിന്റെ പൊതുനന്മാ ഫണ്ടിൽ നിന്നുള്ള ഒരു കോടി രൂപ വിനിയോഗിച്ച് നിർമിച്ച പ്രവേശന കവാടം 27ന് നാടിന് സമർപ്പിക്കും. ഉന്നത വിദ്യാഭ്യാസമന്ത്രി റോജി എം. ജോൺ ഉദ്ഘാടനം ചെയ്യും. പ്രതിപക്ഷ നേതാവ് പിണറായി വിജയൻ അധ്യക്ഷത വഹിക്കും.
യൂറോപ്യൻ സർവകലാശാല മാതൃകയിലാണ് പുതിയ ഗേറ്റ് ഒരുക്കിയിട്ടുള്ളത്. റെഡ് സാൻഡ് സ്റ്റോൺ ഉപയോഗിച്ചാണ് പടികൾ പണിതത്. നിലവിലുള്ള പ്രധാന ഗേറ്റ് ഇതിനകം അടച്ചു. ഓഡിറ്റോറിയം ഭാഗത്തെ ചെറിയ പ്രവേശന വഴിയും പുതുക്കിപ്പണിതു. അടച്ച ഗേറ്റിനും ഓഡിറ്റോറിയം ഭാഗത്തുള്ള ചെറിയ ഗേറ്റിനും ഇടയിലുണ്ടായിരുന്ന മതിൽ പൊളിച്ചാണ് റോഡിന് അഭിമുഖമായി പുതിയ ഗേറ്റ് ഒരുക്കിയിട്ടുള്ളത്.
10 വർഷത്തിനിടെ ഗവ. ബ്രണ്ണൻ കോളജിൽ 75.40 കോടി രൂപയുടെ വികസന പദ്ധതികൾ പൂർത്തിയായിട്ടുണ്ട്. വൈകാതെ സ്പോർട്സ് അക്കാദമിയും തുടങ്ങും. കഴിഞ്ഞ സംസ്ഥാന ബജറ്റിൽ ഇതിനായി രണ്ടു കോടി രൂപ വകയിരുത്തി. കോളജിലെ കായിക സൗകര്യങ്ങളെ റസിഡൻഷ്യൽ സ്പോർട്സ് അക്കാഡമിയായി ഉയർത്തുകയാണ് ലക്ഷ്യം. പ്രധാന ഓഡിറ്റോറിയം നവീകരിച്ചിട്ടുണ്ട്. ശതോത്തര ജൂബിലി ഹാൾ, ലൈബ്രറി കെട്ടിടം, പുരുഷ ഹോസ്റ്റൽ നവീകരണം, പൈതൃക ബ്ലോക്ക് നവീകരണം, കെമിസ്ട്രി, സുവോളജി പ്രധാന ലാബുകളുടെ നവീകരണം, സ്മാർട്ട് ക്ലാസ് മുറികൾ, ഗണിത ശാസ്ത്ര ബ്ലോക്ക്, ശൗചാലയം, റോഡുകൾ, പുതിയ കാന്റീൻ കോംപ്ളക്സ് തുടങ്ങിയവയും പൂർത്തിയായി.
Tags : Brennen College NattuVishesham DistricteNews