മാഞ്ഞൂര്: പാണ്ടന്കരി-രാമന്കരി പാടശേഖരത്തില് മടവീഴ്ച. കർഷകര് പ്രതിസന്ധിയില്. മാഞ്ഞൂര് പഞ്ചായത്തിലെ ഏറ്റവും വലിയ പാടശേഖരങ്ങളിലൊന്നാണ് പാണ്ടന്കരി-രാമന്കരി പാടശേഖരം. കളമ്പുകാട്-നീണ്ടൂര് തോട്ടില് ചെറുകോട്ടില് കടവിനു സമീപമാണ് ഇന്നലെ രാവിലെ പത്തോടെ മടവീണത്.
പുഞ്ചകൃഷിക്കായി പാടശേഖരം ഒരുക്കിയിട്ടിരിക്കുകയായിരുന്നു. നവംബര് ഒന്നിനാണ് വിതയ്ക്കാന് തീരുമാനിച്ചിരുന്നത്. മടവീഴ്യുണ്ടായതോടെ വിത ആരംഭിക്കുന്നത് പ്രതിസന്ധിയിലായി.
സമയത്ത് വിത ആരംഭിക്കാന് കഴിഞ്ഞില്ലെങ്കില് കൊയ്ത്തിന്റെ സമയത്തും മറ്റു പ്രതിസന്ധികളുണ്ടാകും. മടവീഴ്ച പരിഹരിക്കുന്നതിന് അടിയന്തരമായി കൃഷിവകുപ്പ് സഹായം നല്കണമെന്ന് പാണ്ടന്കരി-രാമന്കരി പാടശേഖരസമിതി സെക്രട്ടറി അബ്രാഹം സെബാസ്റ്റ്യന് ആവശ്യപ്പെട്ടു.