ജനവാസമേഖലയ്ക്കു ചുറ്റും സൗരോര്ജവേലി സ്ഥാപിക്കുന്നതിന്റെ ഉദ്ഘാടനം കുളത്തുപ്പുഴ പഞ്ചായത്തംഗം ഷബിനാ അന്വര് ഉദ്ഘാടനം ചെയ്യുന്നു
കുളത്തുപ്പുഴ: മനുഷ്യ-വന്യജീവി സംഘര്ഷം ലഘൂകരിക്കാന് ജനവാസമേഖലയ്ക്കു ചുറ്റും വനാതിര്ത്തിയില് സൗരോര്ജവേലി സ്ഥാപിക്കാനുള്ള പദ്ധതിക്ക് കുളത്തുപ്പുഴയില് തുടക്കമായി.
ആദ്യഘട്ടത്തില് കുളത്തുപ്പുഴ ജംഗ്ഷനിലെ വനാതിര്ത്തിയായ ഇഎസ്എം കോളനി, മരിതി മൂടുമുതല് കുളത്തുപ്പുഴ ഗണപതിയമ്പലംവരെയുള്ള രണ്ടര കിലോമീറ്ററിലാണ് സൗരവേലി നിര്മാണം ആരംഭിച്ചത്.
22 ലക്ഷം രൂപ മുതല്മുടക്കി ആരംഭിച്ച പദ്ധതിയുടെ നിര്മാണച്ചുമതല പത്തനംതിട്ട എന്ജിനിയറിംഗ് ലേബര് സൊസൈറ്റിക്കാണ്. ഇക്കുറി മലയോരമേഖലയിലെ വാര്ഡുതല ജാഗ്രതാസമിതികള് വിളിച്ചുചേര്ത്ത് വേലിയുടെ തുടര്സംരക്ഷണം ഉറപ്പാക്കിയാണ് നിര്മാണം ആരംഭിച്ചത്. കഴിഞ്ഞ ദിവസം വനം മ്യൂസിയത്തിനു സമീപത്തു നടത്തിയ പദ്ധതി ഉദ്ഘാടനം കുളത്തുപ്പുഴ ടൗണ് വാര്ഡ് അംഗം ഷബിനാ അന്വര് നിര്വഹിച്ചു.
കളംകുന്ന് സെക്ഷന് വനപാലകന് ടി.ആര്. ഷിബു അധ്യക്ഷത വഹിച്ചു. പഞ്ചായത്തംഗം ഷണ്മുഖന് പിള്ള, ലേബര് സൊസൈറ്റിയുടെ ചുമതല വഹിക്കുന്ന എസ്. സുജിത്ത്, വനപാലക പി. ശ്രീജ തുടങ്ങിയവര് പ്രസംഗിച്ചു.
Tags : Local News Nattuvishesham Kollam