തലശേരി: കുറ്റകൃത്യങ്ങൾ ഫലപ്രദമായി തടയുന്നതിലും മികച്ച ക്രമസമാധാന പാലനം നടപ്പിലാക്കുന്നതിലും മികവ് പുലർത്തിയ കണ്ണൂർ സിറ്റി പോലീസ് ജില്ലയിലെ തലശേരി സബ് ഡിവിഷൻ പോലീസ് ഓഫീസ്, തലശേരി പോലീസ് സ്റ്റേഷൻ, പിണറായി പോലീസ് സ്റ്റേഷൻ എന്നിവയ്ക്ക് ഐഎസ്ഒ അംഗീകാരം ലഭിച്ചു.
ഹരിത പ്രോട്ടോക്കോൾ പാലിച്ചുകൊണ്ടുള്ള മികച്ച ജനമൈത്രി പോലീസ് സേവനം, ആധുനിക സംവിധാനങ്ങളോടെയുള്ള മികച്ച പ്രവർത്തനം, കൃത്യമായ ഫയൽ സംവിധാനം, പോലീസുകാർക്ക് സമ്മർദമില്ലാതെ ജോലി ചെയ്യാനുള്ള മികച്ച തൊഴിൽ സാഹചര്യം എന്നിവ ഉറപ്പാക്കിയതാണ് ഈ ഓഫീസുകളെ ചരിത്രപരമായ ഈ നേട്ടത്തിന് അർഹമാക്കിയത്. ഐഎസ്ഒ സർട്ടിഫിക്കറ്റ് വിതരണോദ്ഘാടനവും കാസർഗോഡ് ജില്ലാ പോലീസ് മേധാവിയായി സ്ഥലം മാറിപ്പോകുന്ന കണ്ണൂർ സിറ്റി പോലീസ് കമ്മീഷണർ പി. നിധിൻരാജിനുള്ള യാത്രയയപ്പ് ചടങ്ങും തലശേരി സബ് ഡിവിഷണൽ പോലീസ് ഓഫീസിൽ നടന്നു.
ചടങ്ങിൽ സിറ്റി പോലീസ് കമ്മീഷണർ പി. നിധിൻരാജ്, ഐഎസ്ഒ ഡയറക്ടർ എൻ. ശ്രീകുമാർ എന്നിവർ ചേർന്ന് സർട്ടിഫിക്കറ്റ് വിതരണം നിർവഹിച്ചു.
തലശേരി അസിസ്റ്റന്റ് പോലീസ് സൂപ്രണ്ട് ഡോ. എം. നന്ദഗോപൻ, തലശേരി എസ്എച്ച്ഒ എൻ. പ്രജീഷ്, പിണറായി എസ്എച്ച്ഒ എൻ. അജീഷ് കുമാർ എന്നിവർ ചേർന്ന് ഓഫീസുകൾക്കുള്ള സർട്ടിഫിക്കറ്റുകൾ ഏറ്റുവാങ്ങി.
തലശേരി എസിപി ഡോ. എം. നന്ദഗോപൻ അധ്യക്ഷത വഹിച്ചു. പരിപാടിയുടെ ഉദ്ഘാടനവും സിറ്റി പോലീസ് കമ്മീഷണർ നിർവഹിച്ചു. മാഹി പോലീസ് സൂപ്രണ്ട് ഡോ. വിനകുമാർ ഗാഡേഗെ കണ്ണൂർ സിറ്റി അഡീഷണൽ പോലീസ് സൂപ്രണ്ട് എ.പി. ചന്ദ്രൻ, അസിസ്റ്റന്റ് പോലീസ് കമ്മീഷണർ സ്പെഷൽ ബ്രാഞ്ച് എ.വി. ജോൺ എന്നിവർ മുഖ്യാതിഥികളായി പങ്കെടുത്തു. ചൊക്ലി എസ്എച്ച്ഒ വി. ബിജു. പി. ബിജു, കെ.സി. സുകേഷ് എന്നിവർ പ്രസംഗിച്ചു.