10

തിരുവനന്തപുരം: ഇഡി ഭീഷണിപ്പെടുത്തുന്ന സംഘമായി മാറിയെന്ന് സിപിഎം ജനറൽ സെക്രട്ടറി എം.എ. ബേബി. ബിജെപിയുടെ ഒരു പോഷക വകുപ്പായിട്ടാണ് ഇഡി പ്രവർത്തിച്ചുകൊണ്ടിരിക്കുന്നതെന്നും അദ്ദേഹം വിമർശിച്ചു.

രാഷ്ട്രീയ രംഗത്തുള്ളവർക്കെതിരെ ഇഡി കേസെടുക്കുകയും ആ കേസുകളിൽപെടുന്നവർ ബിജെപിയിൽ ചേരുന്നതോടെ കേസ് തീരുകയുമാണ് ചെയ്യുന്നത്. എന്നാൽ ഇഡിയെ പേടിച്ച് ബിജെപിയിൽ ചേരുന്ന നേതാക്കന്മാരുടെ പാർട്ടിയല്ല സിപിഎം എന്ന് ഇഡിക്ക് ഇനി കേരളത്തിൽ നിന്ന് മനസിലാകുമെന്നും അദ്ദേഹം പറഞ്ഞു.

പിണറായി വിജയനെതിരെ കേസെടുത്ത് അന്വേഷിക്കണമെന്ന് ആവശ്യപ്പെട്ട് കോൺഗ്രസിന്‍റെ അഭിഭാഷകൻ കൂടിയായ ഒരു നിയമസഭാംഗം മുൻപ് കോടതിയെ സമീപിച്ചിരുന്നു. വിജിലൻസ് കോടതി കേസിന് കഴമ്പില്ലെന്ന് പറഞ്ഞ് തള്ളിയതിനെ തുടർന്ന് പരാതിക്കാരൻ ഹൈക്കോടതിയെയും സുപ്രീംകോടതിയെയും സമീപിച്ചെങ്കിലും ഹർജി തള്ളുകയാണ് ഉണ്ടായത്.

പരാതിയുമായി വന്നയാൾക്ക് രാഷ്ട്രീയമായി എന്തെങ്കിലും ഉദ്ദേശ്യമുണ്ടെങ്കിൽ അത് രാഷ്ട്രീയമായി പോരാടി പരിഹരിക്കണമെന്നും കോടതിയുടെ സമയം ഇതിനായി മിനക്കെടുക്കരുതെന്നുമാണ് സുപ്രീംകോടതി വ്യക്തമാക്കിയതെന്നും ബേബി കൂട്ടിച്ചേർത്തു.

Tags : MABaby ED Threats CPM Deepika DeepikaNewspaper BreakingNews NewsUpdate Headlines