District News
കല്പ്പറ്റ: കാരാപ്പുഴ-കാക്കവയല് റോഡ് പ്രവൃത്തി അട്ടിമറിക്കാന് കൃഷി മന്ത്രി ടി. സിദ്ദിഖിന്റെ നേതൃത്വത്തില് നീക്കം നടക്കുന്നതായി സിപിഎംമുട്ടില് സൗത്ത് ലോക്കല് സെക്രട്ടറി എം. ഫിറോസ്ഖാന്, കല്പ്പറ്റ ഏരിയാ കമ്മിറ്റി അംഗം വി. വേണുഗേപാല്, ലോക്കല് കമ്മിറ്റി അംഗങ്ങളായ യു.എസ്. മുഹമ്മദ് ഷജീദ്, പി.ജി. സജീവ്, കെ.എസ്. ശ്രിധരന് എന്നിവര് വാര്ത്താസമ്മേളനത്തില് ആരോപിച്ചു.
എല്ഡിഎഫ് സര്ക്കാരിന്റെ കാലത്ത് നവ കേരള സദസില് നിരവധി പരാതികള് ലഭിച്ചതിനെത്തുടര്ന്ന് കാരാപ്പുഴ-കാക്കവയല് റോഡ് നിര്മാണത്തിന് ഏഴ് കോടി രൂപ അനുവദിച്ചിരുന്നു. വൈകാതെ ടെന്ഡര് നടത്തി. പ്രവൃത്തിക്കാവശ്യമായ സമാഗ്രികളും യന്ത്രങ്ങളും കാരാര് സ്ഥാപനം കാരാപ്പുഴയില് എത്തിച്ചു. പ്രവൃത്തി ആരംഭിക്കുന്നതിന് തീയതിയും തീരുമാനിച്ചു. ഇതിനിടെയാണ് മന്ത്രിയുടെ ഇടപെടല് ഉണ്ടായത്. കാരാപ്പുഴയില് ആരംഭിക്കേണ്ട പ്രവൃത്തി കാക്കവയലില് തുടങ്ങണമെന്ന് അദ്ദേഹം ബന്ധപ്പെട്ട ഉദ്യോഗസ്ഥന് നിര്ദേശം നല്കിയതായാണ് വിവരം. ഇത് റോഡ് പദ്ധതി അട്ടിമറിക്കുന്നതിനാണെന്ന് സംശയിക്കണം. എസ്റ്റിമേറ്റ് പ്രകാരമുള്ള പ്രവൃത്തിയില് മാറ്റം വരുത്തുന്നത് വീണ്ടും ടെന്ഡര് വിളിക്കേണ്ട സാഹചര്യം സൃഷ്ടിക്കും.
ജില്ലയിലെ പ്രധാന ടൂറിസം കേന്ദ്രമാണ് കാരാപ്പുഴ. ദിവസേന നൂറുകണക്കിന് സഞ്ചാരികളാണ് ഇവിടെ എത്തുന്നത്. കാരാപ്പുഴയ്ക്കു സമീപം രൂപപ്പെട്ട വലിയ ഗര്ത്തത്തില് ചാടി വാഹനങ്ങള് അപകടത്തില്പ്പെടുന്നത് പതിവാണ്. മഴവെള്ളം ഗര്ത്തത്തില് കെട്ടിക്കിടക്കുന്നതും അപകടസാധ്യത വര്ധിപ്പിക്കുകയാണ്. ഈ സാഹചര്യത്തിലാണ് കാരാപ്പുഴ അക്വഡക്ട് ഭാഗത്ത് ആരംഭിക്കുന്ന വിധത്തില് പ്രവൃത്തി ക്രമീകരിച്ചത്. നേരത്തേ നിശ്ചയിച്ചതനുസരിച്ച് കാരാപ്പുഴയില്ത്തന്നെ പ്രവൃത്തി തുടങ്ങണം. ഇതിന് തയാറാകാത്തപക്ഷം കാരാപ്പുഴ ജലസേചന പദ്ധതി എക്സിക്യുട്ടീവ് എന്ജിനിയറുടെ കാര്യാലയം ഉപരോധിക്കുന്നതടക്കം സമരത്തിന് പാര്ട്ടി നേതൃത്വം നല്കും.
റോഡില് കാക്കവയല് മുതല് വാഴവറ്റ ടൗണ് വരെ ഭാഗം നേരത്തേ 2.40 കോടി രൂപ ചെലവില് നവീകരിച്ചിരുന്നു. പ്രവൃത്തി നടത്തി ഒമ്പത് മാസങ്ങള്ക്കുള്ളില് റോഡ് പലേടങ്ങളിലും തകര്ന്നു. വാറന്റി കാലാവധി കഴിയുംമുമ്പായതിനാല് അറ്റകുറ്റപ്പണി കരാറുകാനെക്കൊണ്ട് ചെയ്യിക്കേണ്ടതാണ്. എന്നാല് ഉത്തരവാദപ്പെട്ടവര് അതിന് തയാറായില്ലെന്നും സിപിഎം ഭാരവാഹികള് ആരോപിച്ചു.
Kerala
കോട്ടയം: ഡൽഹിയിൽ വിദ്യാർഥികളുടെ അവകാശങ്ങൾക്ക് എന്ന പേരിൽ അരാജകത്വ സമരത്തിനിറങ്ങുന്ന കോൺഗ്രസ് കേരളത്തിൽ യുവാക്കളുടെ സമരത്തെ പൊലിസിനെ ഉപയോഗിച്ച് അടിച്ചമർത്തുകയാണെന്ന് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ.
രാഹുൽ ഗാന്ധി ഡൽഹിയിൽ ചാത്രോം കേ ഗൂഞ്ച് എന്ന മുദ്രാവാക്യം ഉയർത്തുമ്പോൾ കേരളത്തിലെ വിദ്യാർഥികളുടെ ശബ്ദം കേൾക്കാൻ കോൺഗ്രസ് സർക്കാരിനു കഴിയുന്നില്ല. കോൺഗ്രസിന്റെ ഈ ഇരട്ടത്താപ്പിനു പിന്തുണ നൽകുകയാണ് സിപിഎം ചെയ്യുന്നത്.
ഡൽഹിയിൽ വിദ്യാർഥികൾക്കൊപ്പം എന്ന പേരിൽ സമരം ചെയ്യുകയും കേരളത്തിൽ യുവാക്കൾക്കെതിരേ നിലപാടെടുക്കുകയും ചെയ്യുന്ന കോൺഗ്രസിന്റെയും അതിനു കുടപിടിക്കുന്ന സിപിഎമ്മിന്റെയും രാഷ്ട്രീയം ജനങ്ങൾ തിരിച്ചറിയുമെന്നും അദ്ദേഹം കോട്ടയത്ത് മാധ്യമങ്ങളോട് പറഞ്ഞു.
Kerala
തിരുവനന്തപുരം: എല്പിഎസ്ടി ഉദ്യോഗാർഥികളുടെ സമരത്തോട് കാട്ടാളത്തപരമായ നിലപാടാണ് സര്ക്കാര് സ്വീകരിക്കുന്നതെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദൻ. ബലപ്രയോഗത്തിലൂടെ സമരത്തെ ഇല്ലാതാക്കാന് ശ്രമം നടക്കുന്നതായി എം.വി. ഗോവിന്ദൻ ആരോപിച്ചു.
നിരാഹാര സമരം പോലും നടത്താന് അനുവദിക്കുന്നില്ലെന്നും ഇതിന്റെ ഉത്തരവാദി കേരള മുഖ്യമന്ത്രി വി.ഡി. സതീശനാണെന്നും എം.വി. ഗോവിന്ദൻ പറഞ്ഞു. വിഷയത്തില് ശരിയായ നടപടി സ്വീകരിക്കാന് മുഖ്യമന്ത്രിക്കും വിദ്യാഭ്യാസ മന്ത്രിക്കും കഴിയുന്നില്ലെന്നും അദ്ദേഹം പറഞ്ഞു.
നിഷേധാത്മക നിലപാടുകൊണ്ടൊന്നും ഇത് പരിഹരിക്കാന് ആവില്ല. സമരപ്പന്തല് പുനഃസ്ഥാപിച്ചത് സമര ചരിത്രത്തിലെ പുതിയ ഏടാണ്. വിഷയം സര്ക്കാര് പരിഹരിക്കണം. സമരം അവര് തന്നെ നടത്തും. അത് ആരും ഏറ്റെടുക്കേണ്ട കാര്യമില്ലെന്നും എം.വി.ഗോവിന്ദൻ കൂട്ടിച്ചേർത്തു.
Kerala
പത്തനംതിട്ട: അടൂർ പൊലിസ് സ്റ്റേഷൻ അതിക്രമത്തിൽ രൂക്ഷവിമർശനവുമായി സിപിഎം നേതാവ് പി. ജയരാജൻ. അടൂർ പൊലിസ് സ്റ്റേഷൻ നിയമവിരുദ്ധ പ്രവർത്തനങ്ങളുടെ കേന്ദ്രമാണെന്ന് അദ്ദേഹം പറഞ്ഞു. അടൂരിലെ കുറുവാ സംഘം കസ്റ്റഡിയിലുള്ള കുറ്റാരോപിതനെ ആക്രമിച്ചെന്നും ജയരാജൻ ആരോപിച്ചു.
കോൺഗ്രസിന്റെ കുറുവാ സംഘത്തെ അടിച്ചോടിക്കേണ്ട പൊലിസ് നോക്കി നിന്നുവെന്നും ജില്ലാ പഞ്ചായത്ത് അംഗം സ്റ്റേഷനിലെത്തി കുറ്റാരോപിതനെ ചീത്തവിളിച്ചുവെന്നും സിപിഎം നേതാവ് പറഞ്ഞു. പൊലിസ് ഉദ്യോഗസ്ഥനെയും ആക്രമിച്ചെന്നും അദ്ദേഹം ആരോപിച്ചു.
കോൺഗ്രസുകാർക്കെതിരെ തക്കതായ വകുപ്പ് ചുമത്തി കേസെടുത്തില്ല. വനിതാ നേതാവ് കുറ്റാരോപിനെ കൈയേറ്റം ചെയ്യാൻ ശ്രമിച്ചു. അടൂരിലെ ക്രമസമാധാന നില വഷളാകും. അന്ന് പൊലിസ് ആയിരിക്കും ഉത്തരവാദികൾ എന്ന് മനസിലാകുമെന്നും പി. ജയരാജൻ കൂട്ടിച്ചേർത്തു.
Kerala
തിരുവനന്തപുരം: ജിഎന്എ വൈദ്യുതി കരാറില് മുഖ്യമന്ത്രി വി.ഡി. സതീശനെതിരെ രൂക്ഷവിമർശനവുമായി സിപിഎം സംസ്ഥാന സെക്രട്ടറി എം.വി. ഗോവിന്ദൻ. കരാറില് ജുഡിഷ്യല് അന്വേഷണം വേണമെന്ന് സിപിഎം സംസ്ഥാന സെക്രട്ടറി പറഞ്ഞു.
മുഖ്യമന്ത്രിയും മന്ത്രിമാരും അന്വേഷണ പരിധിയില് വരണം. ഇതുമായി ബന്ധപ്പെട്ട രേഖകള് എല്ലാം പുറത്തുവിടാന് സര്ക്കാര് തയാറാകണം. തട്ടിപ്പ് പിടിക്കപ്പെട്ടപ്പോഴാണ് സര്ക്കാര് കരാറില് നിന്ന് പിന്വാങ്ങിയതെന്നും എം.വി. ഗോവിന്ദൻ ആരോപിച്ചു.
ഫയലുകളെല്ലാം ജനങ്ങള്ക്ക് കാണാവുന്ന തരത്തില് പുറത്തുവിടണം. മുഖ്യമന്ത്രിയുടെ പവര് ഗ്രൂപ്പാണ് കാര്യങ്ങളെല്ലാം കൈകാര്യം ചെയ്യുന്നത്. മന്ത്രിയെ മറികടന്നാണ് നീക്കങ്ങള് നടക്കുന്നത്. മുഖ്യമന്ത്രി തന്നെ ഇക്കാര്യം പറഞ്ഞിട്ടുണ്ടെന്നും അദ്ദേഹം വ്യക്തമാക്കി.
കരാറിനെ കുറിച്ച് സണ്ണി ജോസഫിന് അറിവില്ല എന്ന് പരസ്യമായി തന്നെ പറഞ്ഞു. മാധ്യമങ്ങളിലൂടെയാണ് അറിഞ്ഞതെന്നാണ് വൈദ്യുതി മന്ത്രി പറഞ്ഞത്. മന്ത്രിസഭയുടെ കൂട്ടുത്തരവാദിത്തം തകര്ന്നു. അഴിമതി നടത്താനുള്ള മേഖലകള് മുഖ്യമന്ത്രി കണ്ടെത്തുകയാണെന്നും എം.വി. ഗോവിന്ദൻ കൂട്ടിച്ചേർത്തു.
Kerala
തിരുവനന്തപുരം: സംസ്ഥാനത്ത് വൈദ്യുതി മേഖലയില് ഇല്ലാത്ത പ്രതിസന്ധിയുണ്ടെന്ന് വരുത്തി തീർത്ത് അമിതമായ നിരക്കില് വൈദ്യുതി വാങ്ങാനുള്ള ഇടപെടല് സര്ക്കാര് നടത്തുകയാണെന്ന് പ്രതിപക്ഷ നേതാവ് പിണറായി വിജയന്.
എല്ലാ നടപടിക്രമങ്ങളും മാറ്റി വച്ചാണ് ഇത് നടന്നതെന്നും വൈദ്യുതിയുടെ ആവശ്യകത വിലയിരുത്തേണ്ടത് കെഎസ്ഇബിയാണെന്നും അദ്ദേഹം പറഞ്ഞു. അതിനുള്ള വലിയ സംവിധാനം കേരളത്തില് കെഎസ്ഇബിക്കുണ്ടെന്നും പിണറായി അഭിപ്രായപ്പെട്ടു.
എന്നാല് കെഎസ്ഇബിയെ ഇരുട്ടില് നിര്ത്തി വകുപ്പ് കൈകാര്യം ചെയ്യുന്ന മന്ത്രിക്ക് പോലും അതില് പങ്കില്ലെന്ന് വരുത്തിയിരിക്കുകയാണ്. നടപടിക്രമങ്ങള് എങ്ങനെ മാറ്റിമറിക്കുന്നു എന്നതാണ് നമ്മള് ഇതിലൂടെ കാണുന്നതെന്നും പിണറായി ആരോപിച്ചു.
ജിഎന്എ എന്ന് പറയുന്ന പ്ലാറ്റ്ഫോമിനെ ബന്ധപ്പെടുകയാണ്. സര്ക്കാര് അല്ല അവര് ഇങ്ങോട്ട് ബന്ധപ്പെടുകയാണ്. മുഖ്യമന്ത്രിയുമായാണ് ബന്ധപ്പെടുന്നതെന്നും പിണറായി വിജയൻ കൂട്ടിച്ചേർത്തു.
Kerala
കോട്ടയം: കോട്ടയത്ത് നടന്ന സിഐടിയു 16ാം സംസ്ഥാന സമ്മേളനത്തിൽ പുതിയ നേതൃത്വത്തെ തെരഞ്ഞെടുത്തു. സംസ്ഥാന പ്രസിഡന്റായി ടി.പി. രാമകൃഷ്ണൻ തുടരും. കെ.കെ. ജയചന്ദ്രനെ ജനറൽ സെക്രട്ടറിയായും വി. ശിവൻകുട്ടിയെ ട്രഷററായും സംസ്ഥാന സമ്മേളനം തെരഞ്ഞെടുത്തു.
നിലവിലെ ജനറൽ സെക്രട്ടറി എളമരം കരീമിന് പകരമാണ് സിപിഎം സംസ്ഥാന സെക്രട്ടേറിയറ്റ് അംഗവും സിഐടിയു സംസ്ഥാന വൈസ് പ്രസിഡന്റുമായ കെ.കെ. ജയചന്ദ്രൻ ജനറൽ സെക്രട്ടറി സ്ഥാനത്തെത്തുന്നത്. നിലവിലെ ട്രഷറർ പി. നന്ദകുമാറിന് പകരമാണ് മുൻ വിദ്യാഭ്യാസ മന്ത്രി വി. ശിവൻകുട്ടി ചുമതലയേൽക്കുന്നത്.
കെ.എൻ. ഗോപിനാഥ് ആണ് അസിസ്റ്റന്റ് ജനറൽ സെക്രട്ടറി. 47 അംഗ സംസ്ഥാന കമ്മറ്റിയെയും സമ്മേളനം തെരഞ്ഞെടുത്തു.
വൈസ് പ്രസിഡന്റുമാർ
1. എ.കെ. ബാലൻ
2. ജെ. മേഴ്സികുട്ടിയമ്മ
3. എം.വി. ജയരാജൻ
4. കൂട്ടായി ബഷീർ
5. യു.പി. ജോസഫ്
6. വി. ശശികുമാർ
7. സുനിത കുര്യൻ
8. എം.കെ. കണ്ണൻ
9. എസ്. ജയമോഹനൻ
10. നെടുവത്തൂർ സുന്ദരേശൻ
11. പി.ആർ. മുരളീധരൻ
12. എസ്. പുഷ്പലത
13. പി.ബി. ഹർഷകുമാർ
14. സി.വി. ചന്ദ്രബാബു
15. ടി.കെ. രാജൻ
16. ദീപ കെ. രാജൻ
17. കെ.കെ. പ്രസന്നകുമാരി
18. ആർ. രാമു
19. എസ്. ഹരിലാൽ
20. എൻ.കെ. രാമചന്ദ്രൻ
21. കടകംപള്ളി സുരേന്ദ്രൻ
22. വി.വി. ബേബി
സെക്രട്ടറിമാർ
1. കെ.എസ്. സുനിൽകുമാർ
2. സി.കെ. ഹരികൃഷ്ണൻ
3. പി.പി. ചിത്തരഞ്ജൻ
4. അഡ്വ. പി. സജി
5. പി.പി. പ്രേമ
6. ധന്യ ആബീദ്
7. ഒ.സി. ബിന്ദു
8. പി.കെ. മുകുന്ദൻ
9. എം. ഹംസ
10. പി. ഗാനകുമാർ
11. കെ. മനോഹരൻ
12. പി. പത്മജ
13. മീര നിമേഷ്
14. വി.കെ. ഷീജ
15. പി.കെ. സന്തോഷ്
16. എം.ജി. അജി
17. പി. മണിമോഹൻ
18. കെ. അനിൽകുമാർ
19. ആർ. തിലകൻ
20. എസ്.ബി. രാജ
21. റെജി സഖറിയ
ക്ഷണിതാക്കൾ:
1. കെ.കെ. ദിവാകരൻ
2. എസ്. ശർമ്മ
3. കെ.പി. മേരി
Kerala
തിരുവനന്തപുരം: കേന്ദ്ര സർക്കാരിനെതിരെ രൂക്ഷവിമർശനവുമായി സിപിഎം ജനറൽ സെക്രട്ടറി എം.എ.ബേബി. കേന്ദ്രത്തിൽ തെരുവ് ഗുണ്ടയെപ്പോലെ പെരുമാറുന്ന സർക്കാരാണ് മോദിയുടേതെന്ന് സിപിഎം ജനറൽ സെക്രട്ടറി പറഞ്ഞു.
എം.വി. രാഘവൻ അനുസ്മരണ ചടങ്ങിൽ പങ്കെടുത്ത് സംസാരിക്കുകയായിരുന്നു അദ്ദേഹം. തെരഞ്ഞെടുപ്പ് കമ്മിഷനെ നിയമിക്കാൻ സുപ്രീംകോടതി നൽകിയ നിർദേശം വലിച്ചുകീറി കളഞ്ഞ സർക്കാരാണ് നരേന്ദ്ര മോദിയുടേതെന്ന് എം.എ.ബേബി ആരോപിച്ചു.
ഇത്തരം വിഷയങ്ങളിൽ അതിതീക്ഷ്ണമായ സമരം ഉയർന്നുവരണമെന്നും ഭരണം എവിടെയൊക്കെ ഉണ്ട്, ഇല്ല എന്നതൊന്നും ഒരു വിഷയമല്ലെന്നും അദ്ദേഹം വ്യക്തമാക്കി. തെരഞ്ഞെടുപ്പ് തോൽവി സംഭവിക്കുമ്പോൾ ജനങ്ങളെ കുറ്റപ്പെടുത്തുകയല്ല വേണ്ടതെന്നും മറിച്ച് താൻ എന്ത് ചെയ്തു എന്നാണ് ആലോചിക്കേണ്ടതെന്നും എം.എ. ബേബി കൂട്ടിച്ചേർത്തു.
Kerala
കൊച്ചി: സംസ്ഥാനത്ത് ഉന്നത വിദ്യാഭ്യാസ മേഖലയില് കച്ചവട വത്കരണം നടത്താനുള്ള നീക്കമാണ് നടക്കുന്നതെന്ന് മുൻ മന്ത്രി ആർ.ബിന്ദു. കേന്ദ്രനയങ്ങള് കേരളത്തിലെ ഉന്നത വിദ്യാഭ്യാസ മേഖലയിലും നടപ്പിലാക്കുന്നുവെന്നും അതിന്റെ ഭാഗമായാണ് സര്ക്കാര് ഉത്തരവിറക്കിയതെന്നും ബിന്ദു പറഞ്ഞു.
യുജിസിയെ ഉപയോഗിച്ച് കേന്ദ്ര നയങ്ങള് വിശ്വസ്തതയോടെ പിന്തുടരുകയാണ്. ന്യൂ ജെന് കോഴ്സുകള് വേണമെന്ന് തന്നെയാണ് ഇടത് നിലപാട്. കഴിഞ്ഞ സര്ക്കാര് പുതിയ കോഴ്സുകള് കൊണ്ടുവരാന് ശ്രമിച്ചിരുന്നുവെന്നും ആർ.ബിന്ദു അഭിപ്രായപ്പെട്ടു.
ഇപ്പോള് എയ്ഡഡ് മേഖലയില് പരമ്പരാഗത കോഴ്സുകളും സ്വശ്രയ മേഖലയില് പുതിയ കോഴ്സുകളും അനുവദിക്കുകയാണ്. വിഷയത്തിലെ ഇരട്ടത്താപ്പ് അപലപനീയമാണ്. സാധാരണക്കാരായ കുട്ടികള്ക്ക് താങ്ങാനവാത്ത ഫീസ് അടിച്ചേല്പ്പിക്കുന്നതാവും ഇപ്പോഴത്തെ ഉത്തരവെന്നും ബിന്ദു പറഞ്ഞു.
സ്വാശ്രയ ലോബി ഉന്നത വിദ്യാഭ്യാസ മന്ത്രിയെ കണ്ടതായി മനസിലാക്കുന്നു. നയം മാറ്റത്തിന് പിന്നിലെ കാരണം മന്ത്രി വെളിപ്പെടുത്തണമെന്നും ആര്. ബിന്ദു കൂട്ടിച്ചേർത്തു.
Kerala
പാലക്കാട്: മുതലമട സിപിഎം ലോക്കൽ കമ്മിറ്റി ഓഫീസിൽ വച്ച് മദ്യപിച്ചതിൽ നടപടിയെടുത്ത് പാർട്ടി. ലോക്കൽ സെക്രട്ടറി ബ്രിജേഷ് ഉൾപ്പെടെ മൂന്ന് പേരെ പാർട്ടി സസ്പെൻഡ് ചെയ്തു.
ലോക്കൽ സെക്രട്ടറിക്ക് പുറമേ, പാർട്ടി പ്രവർത്തകരായ സൂര്യപ്രകാശ്, റഷീദ് എന്നിവരെയാണ് സസ്പെൻഡ് ചെയ്തത്. ബ്രിജേഷിനെതിരെ നടപടി ആവശ്യപ്പെട്ട് സിപിഎം പ്രവർത്തകർ നേതൃത്വത്തിന് പരാതി നൽകിയിരുന്നു.
പാർട്ടി ഓഫീസിൽ ഇരുന്ന് മദ്യപിക്കുന്ന ദൃശ്യങ്ങളടക്കം പുറത്തുവന്നിരുന്നു. ഇതിന് പിന്നാലെയാണ് സിപിഎം പാലക്കാട് ജില്ലാ സെക്രട്ടറി ചെന്താമരാക്ഷൻ ബ്രിജേഷിനെയും രണ്ട് പാർട്ടി പ്രവർത്തകരെയും സസ്പെൻഡ് ചെയ്തത്.
Kerala
കൊച്ചി: മട്ടാഞ്ചേരി പൊലിസ് സ്റ്റേഷനിൽ മദ്യപിച്ചെത്തി പരാക്രമം നടത്തിയ സംഭവത്തിൽ സിപിഎം പ്രവർത്തകൻ അറസ്റ്റിൽ. മട്ടാഞ്ചേരി സ്വദേശിയായ ഹംസത്താണ് പിടിയിലായത്.
വെള്ളിയാഴ്ച രാത്രി 11.30ഓടെയായിരുന്നു സംഭവം. മദ്യപിച്ച് പൊലിസ് സ്റ്റേഷനിലെത്തിയ ഹംസത്ത് പൊലിസുകാരോട് അസഭ്യം പറയുകയും പൊലിസ് ജീപ്പിന്റെ ചില്ല് അടിച്ചുതകർക്കുകയും ചെയ്തെന്നാണ് പരാതി.
സംഭവത്തിൽ പൊതുമുതൽ നശിപ്പിക്കൽ, കൃത്യനിർവാഹണം തടസ്സപ്പെടുത്തൽ കുറ്റങ്ങൾ ചുമത്തി പൊലിസ് എഫ്ഐആർ രജിസ്റ്റർ ചെയ്തു. സംഭവത്തിൽ തുടർനടപടികൾ സ്വീകരിച്ചുവരികയാണ്.
District News
അടൂർ: പെരിങ്ങനാട് സർവീസ് സഹകരണ ബാങ്ക് തെരഞ്ഞെടുപ്പിന്റെ വരണാധികാരിയായിരുന്ന സഹകരണ ഇൻസ്പെക്ടർ സി.ടി. ബിന്ദുവിനെ അടൂരിൽനിന്ന് കോഴഞ്ചേരിയിലേക്ക് സ്ഥലംമാറ്റിയ നടപടി രാഷ്ട്രീയപ്രേരിതമെന്ന് സിപിഎം. യുഡിഎഫ് അധികാരത്തിൽ വന്നതിനേത്തുടർന്ന് അടൂരിലേക്ക് സ്ഥലംമാറ്റം ലഭിച്ചെത്തിയ ഉദ്യോഗസ്ഥയെയാണ് ഇപ്പോൾ വീണ്ടും മാറ്റിയത്. സഹകരണ തെരഞ്ഞെടുപ്പിൽ കോൺഗ്രസിനുണ്ടായ തെരഞ്ഞെടുപ്പ് പരാജയത്തിന്റെ ഉത്തരവാദിത്വം വരണാധികാരിയുടെ മേൽ കെട്ടിവച്ചാണ് സ്ഥലംമാറ്റം നടത്തിയതെന്ന് സിപിഎം നേതാക്കൾ ആരോപിച്ചു.
തെരഞ്ഞെടുപ്പ് നടപടികളിൽ നിയമപരമായ നിലപാട് സ്വീകരിച്ചതും ക്രമക്കേടുകൾക്കുള്ള നിർദേശങ്ങൾ നിരസിച്ചതുമാണ് ഉദ്യോഗസ്ഥയെ ചിലരുടെ കണ്ണിലെ കരടാക്കിയത്.
ഉദ്യോഗസ്ഥരെക്കൊണ്ട് നിർബന്ധിച്ച് സ്ഥലംമാറ്റ അപേക്ഷ എഴുതിവാങ്ങി, സ്വന്തം താത്പര്യപ്രകാരമാണ് നടപടിയെന്ന് വരുത്തിത്തീർക്കാനുള്ള ശ്രമവും നടന്നതായി ആരോപണമുണ്ട്. സഹകരണ രജിസ്ട്രാർ അടിയന്തരമായി ഇടപെട്ട് സ്ഥലംമാറ്റ ഉത്തരവ് തിരുത്തണമെന്നും അല്ലാത്തപക്ഷം സഹകാരികളെ അണിനിരത്തി ശക്തമായ പ്രക്ഷോഭം സംഘടിപ്പിക്കുമെന്നും സിപിഎം ജില്ലാ സെക്രട്ടേറിയറ്റ് അംഗങ്ങളായ പി.ബി. ഹർഷകുമാർ, ടി.ഡി. ബൈജു, ഏരിയാ സെക്രട്ടറി എസ്. മനോജ്, ബി. നിസാം എന്നിവർ അറിയിച്ചു.
Kerala
തിരുവനന്തപുരം: മുൻ മേയറും സിപിഎം ജില്ലാ കമ്മിറ്റി അംഗവുമായ ആര്യാ രാജേന്ദ്രൻ തലസ്ഥാനം വിടുന്നു. കോഴിക്കോട് ജില്ലയിൽ താമസിച്ച് പ്രവർത്തിക്കാനുള്ള ആര്യയുടെ ആവശ്യം തിരുവനന്തപുരം ജില്ലാ കമ്മിറ്റി അംഗീകരിച്ചു. സംസ്ഥാന നേതൃത്വത്തിന്റെ തുടർ തീരുമാനത്തിന് ശേഷമായിരിക്കും പ്രഖ്യാപനം.
വെള്ളിയാഴ്ച ചേർന്ന സിപിഎം തിരുവനന്തപുരം ജില്ലാ കമ്മിറ്റി യോഗത്തിലാണ് ആര്യയുടെ ജില്ല മാറ്റത്തിനുള്ള ആവശ്യം ചർച്ചയായത്. കോഴിക്കോട് ജില്ലയിൽ പ്രവർത്തിക്കാൻ അനുമതി തേടി ജില്ലാ നേതൃത്വത്തെയാണ് ആര്യ സമീപിച്ചത്. ഭർത്താവും ബാലുശേരി മുൻ എംഎൽഎയുമായ സച്ചിൻ ദേവും കുടുംബവും കോഴിക്കോട്ടാണ് താമസിക്കുന്നത്. ഇതാണ് ജില്ല മാറ്റത്തിനു കാരണമെന്നാണ് റിപ്പോർട്ടുകൾ.
സിപിഎം ജില്ലാ കമ്മിറ്റി അംഗത്തിന് പുറമെ ഡിവൈഎഫ്ഐ സംസ്ഥാന സെക്രട്ടേറിയറ്റ് അംഗം കൂടിയാണ് ആര്യ. ഡിവൈഎഫ്ഐയുടെ സംസ്ഥാന നേതാവെന്ന നിലയിൽ കോഴിക്കോട് ഉൾപ്പെടെയുള്ള ജില്ലകളിൽ സംഘടനാ പരിപാടികളിൽ നേരത്തെ തന്നെ സജീവമാണ്. അതേസമയം കോഴിക്കോട് ടൗണിൽ സച്ചിൻ ദേവ് വീട് എടുത്തിരുന്നു.
National
ന്യൂഡൽഹി: യുഎസ് തെരഞ്ഞെടുപ്പ് ഫലം ഡോണൾഡ് ട്രംപിന്റെയും തീവ്ര വലതുപക്ഷത്തിന്റെയും നിലപാടുകൾക്കേറ്റ വലിയ തിരിച്ചടിയാണെന്ന് സിപിഎം ജനറൽ സെക്രട്ടറി എം.എ. ബേബി. ഇടതുപക്ഷ ശക്തികളുടെ കാലം കഴിഞ്ഞുവെന്ന വ്യാഖ്യാനം ഇതിലൂടെ തെറ്റാണെന്ന് തെളിഞ്ഞതായും അദ്ദേഹം മാധ്യമങ്ങളോട് പറഞ്ഞു.
ട്രംപിനെ ജയിപ്പിക്കാൻ അവിടെ ഒരു ഗ്യാനേഷ് കുമാർ ഇല്ല. അതുകൊണ്ടാണ് അവിടെ ട്രംപ് തോറ്റത്. ഇന്ത്യയിലും മാറ്റങ്ങൾ ഉണ്ടാകും.
ബിജെപി തറയിൽ ഇറങ്ങി നടക്കാൻ തുടങ്ങി. ഇത് പ്രതിപക്ഷത്തിന്റെ വിജയമാണ്. രാജ്യത്ത് ഇന്ത്യ സഖ്യത്തിന്റെ അടുത്തഘട്ട പ്രതിഷേധങ്ങളും പാർലമെന്റ് സെഷനിലെ സമരങ്ങളും ആലോചിക്കുന്നുണ്ട്.
ഇതിനൊപ്പം പാർട്ടി തലത്തിൽ കൂടുതൽ പഠന ക്ലാസുകൾ നടത്തുമെന്നും പ്രതിഷേധവും സിപിഎം പഠനവും ഒരുമിച്ച് മുന്നോട്ടുകൊണ്ടുപോകുമെന്നും ബേബി വ്യക്തമാക്കി.
Kerala
കോട്ടയം: സിഐടിയു 16-ാം സംസ്ഥാന സമ്മേളനം ഇന്നു മുതല് ഒന്പതു വരെ കോട്ടയത്ത് നടക്കും. വിവിധ സ്ഥലങ്ങളില് നിന്നുള്ള പതാക-കൊടിമര-കാപ്പി-കയര് ജാഥകള് വൈകുന്നേരം നാലിന് കളക്ടറേറ്റിനു സമീപം സംഗമിച്ച് തിരുനക്കര മൈതാനത്ത് എത്തിചേരും. തുടര്ന്ന് സ്വാഗതസംഘം ചെയര്മാന് ടി.ആര്. രഘുനാഥന് പതാക ഉയര്ത്തും.
നാളെ രാവിലെ ഏഴിനു നീണ്ടൂര് രക്തസാക്ഷി മണ്ഡപത്തില്നിന്നാരംഭിക്കുന്ന ദീപശിഖ 9.15ന് സമ്മേളന നഗറില് എത്തിച്ചേരും. തുടര്ന്ന് ന് സിഐടിയു സംസ്ഥാന പ്രസിഡന്റ് ടി.പി. രാമകൃഷ്ണന് പതാക ഉയര്ത്തും.
10നു കോട്ടയം മാമ്മന് മാപ്പിള ഹാളില് നടക്കുന്ന പ്രതിനിധി സമ്മേളനം സിഐടിയു അഖിലേന്ത്യാ വൈസ് പ്രസിഡന്റ് തപന്സെന് ഉദ്ഘാടനം ചെയ്യും. ഉച്ചകഴിഞ്ഞു മൂന്നിനു ഓപ്പണ് ഫോറം നടക്കും.
വൈകുന്നേരം അഞ്ചിനു കഥകളി, എട്ടിനു രാവിലെ പ്രതിനിധി സമ്മേളനം തുടരും. വൈകുന്നേരം നാലിനു സമാപന സമ്മേളനം പ്രതിപക്ഷ നേതാവ് പിണറായി വിജയന് ഉദ്ഘാടനം ചെയ്യും.
National
ന്യൂഡൽഹി: കാലടി സർവകലാശാലയിലെ വിദ്യാർഥികളുടെ സസ്പെൻഷൻ നടപടിയുമായി ബന്ധപ്പെട്ട് മുഖ്യമന്ത്രി വി.ഡി. സതീശനെതിരെ രൂക്ഷവിമർശനവുമായി സിപിഎം നേതാവും മുൻ മന്ത്രിയുമായ പി. രാജീവ് രംഗത്ത്.
വി.ഡി. സതീശൻ മുൻ ഗവർണർ രാജേന്ദ്ര ആർലേക്കറുടെ അടിമയാണെന്നും സംഘി മുഖ്യമന്ത്രിയെപ്പോലെയാണ് അദ്ദേഹം പ്രവർത്തിക്കുന്നതെന്നും രാജീവ് പറഞ്ഞു. നുണകൾ ഉത്പാദിപ്പിക്കുന്ന ഫാക്ടറിയായി മുഖ്യമന്ത്രി മാറിയെന്നും അദ്ദേഹം പറഞ്ഞു.
സർവകലാശാലയിൽ വഴിതടഞ്ഞതിന്റെ പേരിലാണ് വിദ്യാർഥികൾക്കെതിരെ ആദ്യം കേസെടുത്തത്. അത് പിന്നീട് എങ്ങനെയാണ് വിസിയെ കൈയേറ്റം ചെയ്ത കേസായതെന്ന് ചോദിച്ച പി. രാജീവ് അത് ഗവർണർ ഇടപെട്ട് ചെയ്തതാണെന്ന് ആരോപിച്ചു.
ഗവർണർ നേരിട്ട് ഡിജിപിയെ വിളിച്ചു. ചരിത്രത്തിൽ അപൂർവമായ നടപടിയായിരുന്നു അത്. മുഖ്യമന്ത്രി ഇതിൽ കുറ്റകരവും ഭരണഘടനാവിരുദ്ധവുമായ നിശബ്ദത പാലിച്ചു. തുടർന്ന് ഗവർണറുടെ നിർദേശപ്രകാരമാണ് പൊലിസ് എഫ്ഐആർ മാറ്റിയതെന്നും പി. രാജീവ് കൂട്ടിച്ചേർത്തു.
Kerala
തിരുവനന്തപുരം: സർക്കാരിനെതിരേയുള്ള സമരപരിപാടികൾ ആലോചിക്കുന്നതിനായി ഇടതുമുന്നണി യോഗം ഇന്നു ചേരും. ഇടതുമുന്നണിയെന്ന നിലയിൽ യോജിച്ചുള്ള സമരങ്ങൾ ഇപ്പോൾ നടക്കുന്നില്ലെന്ന പരാതി ഉണ്ട്.
ഈ സാഹചര്യത്തിലാണ് ഇന്നു മുന്നണി യോഗം ചേരുന്നത്. പ്രതിപക്ഷ ഉപനേതാവ് സ്ഥാനം ലഭിക്കാത്തതില് പ്രതിഷേധിച്ച് നിയമസഭ പാർലമെന്ററി പാർട്ടി യോഗത്തിലും സിപിഐ പങ്കെടുക്കുന്നില്ല.
Kerala
തിരുവനന്തപുരം: എം.ജി. രാജമാണിക്യത്തെ കെഎസ്ഇബി ചെയര്മാന് സ്ഥാനത്തുനിന്ന് മാറ്റിയതിൽ രൂക്ഷവിമർശനവുമായി പ്രതിപക്ഷ നേതാവ് പിണറായി വിജയന്. വൈദ്യുതി പ്രതിസന്ധിയുടെ മറവിൽ വൻ അഴിമതി നടത്താനുള്ള സർക്കാരിന്റെ നീക്കം സംബന്ധിച്ച വാർത്തകൾ അതീവ ഗുരുതരമാണെന്നും അദ്ദേഹം ആരോപിച്ചു.
കൃത്യമായ ഇടപെടലുകളിലൂടെയും കാര്യക്ഷമമായ മാനേജ്മെന്റിലൂടെയും പ്രതിസന്ധി പരിഹരിക്കുന്നതിന് പകരം, യാതൊരു നീതീകരണവുമില്ലാത്ത കരാറുകളില് ഏര്പ്പെട്ട് സംസ്ഥാന ഖജനാവ് കൊള്ളയടിക്കാനുള്ള ശ്രമമാണ് നടക്കുന്നതെന്നും പിണറായി പറഞ്ഞു.
ഫേസ്ബുക്ക് പോസ്റ്റിലൂടെയാണ് പ്രതിപക്ഷ നേതാവ് വിമർശനവുമായി രംഗത്തെത്തിയത്. കുറഞ്ഞ ചെലവില് വൈദ്യുതി ലഭ്യമാകാന് സാധ്യത നിലനില്ക്കെ റെഗുലേറ്ററി കമ്മീഷന്റെ അനുമതിയില്ലാതെ സ്വകാര്യ കമ്പനിയില് നിന്ന് യൂണിറ്റിന് 8.63 രൂപ നിരക്കില് 500 മെഗാവാട്ട് വൈദ്യുതി വാങ്ങാനാണ് നീക്കമെന്നും അദ്ദേഹം കുറിച്ചു.
പോസ്റ്റിന്റെ പൂർണരൂപം;
വൈദ്യുതി പ്രതിസന്ധിയുടെ മറവിൽ വൻ അഴിമതി നടത്താനുള്ള സർക്കാരിന്റെ നീക്കം സംബന്ധിച്ച വാർത്തകൾ അതീവ ഗുരുതരമാണ്. കൃത്യമായ ഇടപെടലുകളിലൂടെയും കാര്യക്ഷമമായ മാനേജ്മെന്റിലൂടെയും പ്രതിസന്ധി പരിഹരിക്കുന്നതിനു പകരം, യാതൊരു നീതീകരണവുമില്ലാത്ത കരാറുകളിൽ ഏർപ്പെട്ട് സംസ്ഥാന ഖജനാവ് കൊള്ളയടിക്കാനുള്ള ശ്രമമാണ് നടക്കുന്നത്.
ഹിമാചൽ പ്രദേശിലെ പൊതുമേഖലാ സ്ഥാപനം വൈദ്യുതി നൽകാമെന്ന് സമ്മതിച്ചിട്ടും നിശ്ചിത സമയത്ത് മറുപടി നൽകാതെ ഒളിച്ചുകളിച്ച് സ്വകാര്യമേഖലയിലുള്ള കച്ചവടത്തിന് വഴിയൊരുക്കുകയായിരുന്നു എന്ന വിവരവും പുറത്തുവന്നിട്ടുണ്ട്. കെ.എസ്.ഇ.ബിയിലെ വഴിവിട്ട നീക്കങ്ങളും ഉന്നത ഉദ്യോഗസ്ഥരുടെ മാറ്റവും വൻ സാമ്പത്തിക അഴിമതിക്ക് വഴിയൊരുക്കാനാണെന്ന ആക്ഷേപം ശക്തമാണ്. അഴിമതിക്ക് കൂട്ടുനിൽക്കാത്ത ഉദ്യോഗസ്ഥരെ പുകച്ചുചാടിച്ചാണ് സർക്കാർ ഇത്തരം വിവാദ തീരുമാനങ്ങളുമായി മുന്നോട്ടുപോകുന്നത്.
കുറഞ്ഞ ചെലവിൽ വൈദ്യുതി ലഭ്യമാകാൻ സാധ്യത നിലനിൽക്കെ, റെഗുലേറ്ററി കമ്മീഷന്റെ അനുമതിയില്ലാതെ സ്വകാര്യ കമ്പനിയിൽ നിന്ന് യൂണിറ്റിന് 8.63 രൂപ നിരക്കിൽ 500 മെഗാവാട്ട് വൈദ്യുതി വാങ്ങാനാണ് നീക്കം. ആവശ്യമില്ലാത്ത പകൽസമയത്ത് വൈദ്യുതി വാങ്ങിക്കൂട്ടുന്ന ഈ നടപടി സംസ്ഥാനത്തിന് 727 കോടി രൂപയുടെ അധിക ബാധ്യത വരുത്തിവെക്കുമെന്നാണ് കണക്കാക്കപ്പെടുന്നത്.
ബോർഡും വകുപ്പ് മന്ത്രിയും വിയോജിപ്പ് അറിയിച്ചിട്ടും, മുഖ്യമന്ത്രിയുടെ ഓഫീസിന്റെ ഇടപെടലിലൂടെ ഉദ്യോഗസ്ഥരെ സമ്മർദ്ദത്തിലാക്കി കരാറുമായി മുന്നോട്ടുപോകുകയാണെന്ന് പ്രമുഖ മാധ്യമങ്ങൾ റിപ്പോർട്ട് ചെയ്തിട്ടുണ്ട്. ഇതിനെ ശക്തമായി എതിർത്തതിനാണ് ഉദ്യോഗസ്ഥരെ സ്ഥാനത്തുനിന്ന് മാറ്റിയതെന്നും വാർത്തകൾ വ്യക്തമാക്കുന്നു.
ഈ പ്രതിസന്ധി പെട്ടെന്നുണ്ടായ ഒന്നല്ല. നേരത്തെ തന്നെ ഇതുസംബന്ധിച്ച് വൈദ്യുതി മന്ത്രി പ്രതികരിച്ചിരുന്നതാണ്. പൊതുമേഖലാ കമ്പനികളിൽ നിന്ന് വൈദ്യുതി വാങ്ങുമെന്നായിരുന്നു അന്നത്തെ ഉറപ്പ്. എന്നാൽ, ആ ഉറപ്പ് കാറ്റിൽപ്പറത്തിയാണ് ഇപ്പോൾ സംസ്ഥാനത്തിന് വൻ നഷ്ടമുണ്ടാക്കുന്ന രീതിയിൽ സ്വകാര്യ കമ്പനികളുമായി വഴിവിട്ട ഇടപാടുകൾ ആസൂത്രണം ചെയ്യുന്നത്.
പൊതുപണം കൊള്ളയടിക്കാനുള്ള ഈ നീക്കങ്ങളുമായി ബന്ധപ്പെട്ട മുഴുവൻ ഫയലുകളും കെ.എസ്.ഇ.ബിയുടെ വിയോജനക്കുറിപ്പുകളും സർക്കാർ അടിയന്തരമായി പുറത്തുവിടണം.
Kerala
തിരുവനന്തപുരം: എക്സൈസ് മന്ത്രി എം. ലിജുവിനെ അതൃപ്തി വകുപ്പ് മന്ത്രി എന്ന് വിശേഷിപ്പിച്ച് സിപിഎം നേതാവ് എം.ബി. രാജേഷ്. എം.ലിജു സ്വയം വിഡ്ഢിയാവുകയാണ്.
വകുപ്പിൽ നടക്കുന്ന കാര്യങ്ങളൊന്നും മന്ത്രി അറിയുന്നില്ല. ഞാനൊന്നും അറിഞ്ഞില്ലെന്ന് പറയാൻ ഒരു മന്ത്രി വേണോ എന്നും എം.ബി. രാജേഷ് ചോദിച്ചു.
മദ്യനയം വന്നിട്ടു മതി ബാർ ലൈസൻസ് എങ്കിൽ, ചട്ടം ഭേദഗതി വരുത്തി ഉത്തരവിറക്കുകയാണ് വേണ്ടത്. ഒരുതവണ അബദ്ധം പറ്റിയാൽ മനസ്സിലാക്കാം. ഉത്തരവ് ഇറക്കിയില്ലെങ്കിൽ, ഈ കാര്യത്തിൽ ഒരു കുറിപ്പ് എങ്കിലും എഴുതി ഇറക്കിയതായി മന്ത്രിക്ക് കാണിക്കാൻ പറ്റുമോ എന്നും എം.ബി. രാജേഷ് ആരാഞ്ഞു.
Kerala
തിരുവനന്തപുരം: വ്യാജപോസ്റ്റുകള് സൃഷ്ടിച്ച് പ്രചരിപ്പിച്ചവര്ക്കെതിരെ നിയമ നടപടി സ്വീകരിക്കണമെന്ന് ആവശ്യപ്പെട്ട് ഡിജിപിക്ക് പരാതി നൽകി സിപിഎം സംസ്ഥാന സെക്രട്ടറി എം.വി.ഗോവിന്ദൻ. മഹാരാജാസ് കോളജില് നടന്ന പ്രതിഷേധത്തിന് നേതൃത്വം നൽകിയ നഫീസത്തുല് മിസ്രിയയ്ക്കെതിരെ സംസാരിച്ചു എന്ന പേരിലായിരുന്നു വ്യാജപ്രചരണം.
നഫീസത്തുല് മിസ്രിയ എസ്ഡിപിഐ പശ്ചാത്തലമുള്ളയാളാണെന്നും മുന് കാമ്പസ് ഫ്രണ്ട് പ്രവര്ത്തകയാണെന്നും തീവ്രനിലപാടുള്ള ആളാണെന്നും പറഞ്ഞെന്നായിരുന്നു പ്രചരണം. സിപിഎം സംസ്ഥാന സെക്രട്ടറിയുടെ പേരിൽ വ്യാജ കാർഡുകൾ പുറത്തിറക്കി പ്രചരിപ്പിച്ചെന്നാണ് പരാതി.
എസ്എഫ്ഐയെയും സിപിഎമ്മിനെയും ദുര്ബലപ്പെടുത്താന് നടത്തിയ എല്ലാ ശ്രമങ്ങളും പരാജയപ്പെട്ടതോടെയാണ് വ്യാജപ്രചരണങ്ങളെ എതിരാളികള് ആശ്രയിക്കുന്നതെന്നും എം.വി.ഗോവിന്ദൻ ഫേസ്ബുക്ക് കുറിപ്പിലൂടെ വ്യക്തമാക്കി.
പോസ്റ്റിന്റെ പൂർണരൂപം;
വ്യാജപോസ്റ്റുകള് സൃഷ്ടിച്ച് പ്രചരിപ്പിച്ചവര്ക്കെതിരെ നിയമ നടപടി സ്വീകരിക്കണമെന്ന് ആവശ്യപ്പെട്ട് സംസ്ഥാന പോലീസ് മേധാവിക്ക് പരാതി നല്കി. മഹാരാജാസ് കോളേജില് നടന്ന പ്രതിഷേധത്തിന് നേതൃത്വം നല്കിയ നഫീസത്തുല് മിസ്രിയയ്ക്കെതിരെ സി.പി.ഐ (എം) സംസ്ഥാന സെക്രട്ടറി സംസാരിച്ചു എന്ന പേരിലായിരുന്നു വ്യാജപ്രചരണം നടത്തിയത്. നഫീസത്തുല് മിസ്രിയ എസ്.ഡി.പി.ഐ പശ്ചാത്തലത്തില് ഉള്ളയാളാണെന്നും മുന് ക്യാമ്പസ് ഫ്രണ്ട് പ്രവര്ത്തകയാണെന്നും തീവ്രനിലപാടുള്ള ആളാണെന്നും പറഞ്ഞെന്നായിരുന്നു വ്യാജപ്രചരണം. കാലടി സര്വകലാശാലയിലെ വിദ്യാര്ഥികളുടെ വിഷയം ഉന്നയിച്ച് ഉജ്വലമായ സമരത്തിന് നേതൃത്വം നല്കിയവരാണ് മഹാരാജാസിലെ വിദ്യാര്ത്ഥികള്. ഈ വിദ്യാര്ത്ഥികളെ അപമാനിക്കാനാണ് സി.പി.ഐ (എം) സംസ്ഥാന സെക്രട്ടറിയുടെ പേരില് വ്യാജ കാര്ഡുകള് പുറത്തിറക്കി പ്രചരിപ്പിച്ചത്.
ശ്രീജ അജി, അഫ്സല് ചെമ്മാട്, വാഹിദ് താഴകത്ത്, മജീദ് തെയ്യാല, എം കെ മുരളീധരന് മുരളീധരന്, മുരളീധരന് കൊടനാട്, ഹാരിസ് ബാബു പി എം എന്നീ ഫേസ്ബുക്ക് ഐഡികള്ക്ക് എതിരെയാണ് പരാതി നല്കിയിരിക്കുന്നത്. വ്യാജ പോസ്റ്റര് നിര്മ്മിച്ച് പ്രചരിപ്പിച്ച് സമൂഹത്തില് സ്പര്ദ്ധയും കലാപ ആഹ്വാനവും വെറുപ്പും സൃഷ്ടിക്കാന് ശ്രമിച്ച ഇവര്ക്കെതിരെ ഭാരതീയ ന്യായസംഹിത 196 വകുപ്പ് പ്രകാരവും കെ.പി ആക്ട് 120 (0) പ്രകാരവും കേസെടുത്ത് നടപടികള് സ്വീകരിക്കണം എന്നാണ് ആവശ്യപ്പെട്ടത്. പരാതിക്കൊപ്പം പോസ്റ്റുകളുടെ സ്ക്രീന്ഷോട്ടുകളും ലിങ്കുകളും പൊലീസിന് കൈമാറിയിട്ടുണ്ട്.
എസ്.എഫ്.ഐയെയും സി.പി.ഐ.എമ്മിനെയും ദുര്ബലപ്പെടുത്താന് നടത്തിയ എല്ലാ ശ്രമങ്ങളും പരാജയപ്പെട്ടതോടെയാണ് വ്യാജപ്രചരണങ്ങളെ എതിരാളികള് ആശ്രയിക്കുന്നത്. കോണ്ഗ്രസും, ലീഗും, ബി.ജെ.പിയും മത്സരിച്ചാണ് ഇത്തരം വ്യാജപ്രചാരണങ്ങള്ക്ക് നേതൃത്വം നല്കുന്നത്. ഇത്തരത്തിലുള്ള വ്യാജപ്രചരണങ്ങളുടെ മുന്നില് ഇടതുപക്ഷം മുട്ടുമടക്കില്ല. പാര്ട്ടിയെ അപകീര്ത്തിപ്പെടുത്താനുള്ള എല്ലാ ശ്രമങ്ങളെയും രാഷ്ട്രീയമായും നിയമപരമായും ശക്തിയായി നേരിടും
Kerala
തിരുവനന്തപുരം: പൊലിസിനെ വിമർശിച്ചുകൊണ്ടുള്ള ഫേസ്ബുക്ക് ലൈക്ക് ചെയ്ത പൊലിസ് ഉദ്യോഗസ്ഥന് സസ്പെൻഷൻ. തിരുവല്ലം സ്റ്റേഷനിലെ ഗ്രേഡ് എസ്ഐ ആർ.പി. അരവിന്ദിനെ ആണ് സസ്പെൻഡ് ചെയ്തത്.
സിപിഎം നേതാവ് ഐപി ബിനുവിന്റെ പോസ്റ്റിനാണ് അരവിന്ദ് ലൈക്ക് ചെയ്തത്. പൊലിസിനെ വിമർശിക്കുന്ന പോസ്റ്റിൽ ലൈക്ക് ചെയ്തത് അച്ചടക്കലംഘനമാണെന്ന വിലയിരുത്തലിലാണ് നടപടി. 'അരവിന്ദ് അഭയം' എന്ന പ്രൊഫൈലിൽനിന്നാണ് ബിനുവിന്റെ പോസ്റ്റിന് ലൈക്ക് ചെയ്തത്.
Kerala
തിരുവനന്തപുരം: മാസപ്പടി കേസിൽ പ്രതിപക്ഷ നേതാവ് പിണറായി വിജയനെതിരെയുള്ള കേസുകളിലെ മുഴുവൻ അന്വേഷണങ്ങളും നിർത്തിവയ്ക്കണമെന്ന ഹൈക്കോടതി വിധിയിൽ പ്രതികരണവുമായി കോൺഗ്രസ് എംഎൽഎ മാത്യു കുഴൽനാടൻ.
അഭിപ്രായങ്ങൾ എപ്പോഴും മാറ്റാനുള്ളതല്ലെന്നും പറയേണ്ടത് പറയേണ്ട സമയത്ത് പറഞ്ഞിട്ടുണ്ടെന്നും അദ്ദേഹം പ്രതികരിച്ചു. തന്റെ അഭിപ്രായം നേതൃത്വം ക്ഷമാപൂർവം കേട്ടു. അവർക്ക് പറയാനുള്ളതും പറഞ്ഞിട്ടുണ്ടെന്നും മാത്യു കുഴൽനാടൻ പറഞ്ഞു.
സർക്കാർ നിലപാടുകളിലെ ശരി തെറ്റുകളെ കുറിച്ച് ഈ സമയത്ത് അഭിപ്രായം പറയുന്നില്ലെന്നും അഭിപ്രായം പറയേണ്ട സാഹചര്യമല്ലെന്നും സത്യം ആത്യന്തികമായി വിജയിക്കുമെന്നും എംഎൽഎ വ്യക്തമാക്കി. പാർട്ടിയും പൊതുജനവും ആഗ്രഹിക്കുന്നത് പാർട്ടി വേദിയിൽ പറഞ്ഞു. പരസ്യപ്രസ്താവന പാടില്ലെന്ന നിർദേശം പാലിക്കുന്നുവെന്നും മാത്യു കുഴല്നാടൻ കൂട്ടിച്ചേർത്തു.
Kerala
കൊച്ചി: പി. ജയരാജന്റെ വിമർശനം അന്ധൻ ആനയെ കണ്ടത് പോലെയാണെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശശൻ. ജയരാജന്റെ വിമർശനം വ്യക്തിപരമെന്നും സിപിഎമ്മിന്റേതല്ലെന്നും അദ്ദേഹം പറഞ്ഞു.
പിണറായിക്ക് പി. ജയരാന്റെ അഭിപ്രായം ഇല്ലല്ലോയെന്നും വെള്ളാപ്പള്ളി നടേശൻ ചൂണ്ടിക്കാണിച്ചു. വിമർശിച്ചു വിമർശിച്ച് ജയരാജന്റെ തട്ടകത്തിൽ പാർട്ടി എവിടെ കിടക്കുന്നുവെന്നും വെള്ളാപ്പള്ളി പരിഹസിച്ചു.
എന്നും പാർട്ടിക്കകത്ത് നിന്ന് പാർട്ടിയെ വിമർശിച്ചല്ലേ ജയരാജൻ മുന്നോട്ടുപോകുന്നത്. പി. ജയരാജൻ എന്നും പാർട്ടിക്ക് അകത്തുനിന്ന് പാർട്ടിക്കെതിരെ പ്രവർത്തിക്കുന്നയാൾ. തോറ്റതിന് ന്യായങ്ങൾ കാണാതെ കൈയിലിരിപ്പ് ആദ്യം നന്നാക്കണമെന്നും വെള്ളാപ്പള്ളി അഭിപ്രായപ്പെട്ടു.
താൻ ഹിന്ദുവാണെന്നും എന്നാൽ ഹിന്ദുത്വത്തിന്റെ കാലാൾപ്പടയായി പിന്നോക്കക്കാരെ കൊണ്ട് കെട്ടാൻ ശ്രമിച്ചിട്ടില്ലെന്നും വെള്ളാപ്പള്ളി വിശദീകരിച്ചു. അത് പി. ജയരാജന്റെ തെറ്റായ ധാരണയാണെന്നും വെള്ളാപ്പള്ളി കൂട്ടിച്ചേർത്തു.
Kerala
കൊച്ചി: മാസപ്പടി കേസിൽ പ്രതിപക്ഷ നേതാവ് പിണറായി വിജയൻ ഉൾപ്പെടെയുള്ളവർക്ക് ഇന്ന് നിർണായകം. മാസപ്പടി കേസിൽ എഫ്ഐആർ രജിസ്റ്റർ ചെയ്യണമെന്ന സിംഗിൾ ബഞ്ച് ഉത്തരവിനെതിരെ പിണറായി വിജയൻ ഉൾപ്പെടെയുള്ളവർ നൽകിയ അപ്പീൽ ഇന്ന് ഹൈക്കോടതി പരിഗണിക്കും.
ജസ്റ്റിസ് കെ.നടരാജൻ അധ്യക്ഷനായ ബഞ്ചാണ് കേസ് പരിഗണിക്കുക. കോടതി നടപടികൾ നിരീക്ഷിച്ച ശേഷം തുടർനീക്കം നടത്താനാണ് ഇഡിയുടെ തീരുമാനം. വിജിലൻസ് അന്വേഷണത്തിന് സുപ്രീംകോടതിയുടെ താത്കാലിക സ്റ്റേ ലഭിച്ച കാര്യം പിണറായി ഹൈക്കോടതിയെ അറിയിക്കും.
കഴിഞ്ഞ വെള്ളിയാഴ്ച കേസിൽ നേരിട്ട് ഹാജരാകാൻ കോടതി അറിയിച്ചിരുന്നു. എന്നാൽ നിയമസഭാ സമ്മേളനവും സുപ്രീംകോടതിയിലെ കേസും ചൂണ്ടിക്കാട്ടി ഹാജരാകാൻ കഴിയില്ലെന്ന് പിണറായി വിജയൻ വ്യക്തമാക്കിയിരുന്നു.
അപ്പീൽ നൽകാനുള്ള അവകാശം വ്യക്തമാക്കിയ സുപ്രീംകോടതി ഉത്തരവിലെ പരാമർശങ്ങൽ അനുകൂലമെന്നാണ് പിണറായിയുടെ വിലയിരുത്തൽ. ഹൈക്കോടതി അപ്പീൽ പരിഗണിക്കുമ്പോൾ കേസിലെ ഇഡി അന്വേഷണം ഉൾപ്പടെ എല്ലാ തുടർനടപടികളും നിർത്തിവയ്ക്കണമെന്ന് ആവശ്യപ്പെട്ടേക്കും.
Kerala
കോഴിക്കോട്: സിപിഎം സംസ്ഥാന കമ്മിറ്റി അംഗവും ഡിവൈഎഫ്ഐ അഖിലേന്ത്യാ വൈസ് പ്രസിഡന്റുമായ വി. വസീഫിന്റെ മാതാവ് വഹീദ ( 61) അന്തരിച്ചു. സംസ്കാരം നാളെ രാവിലെ 11ഓടെ സൗത്ത് കൊടിയത്തൂർ ജുമാമസ്ജിദ് ഖബർസ്ഥാനിൽ നടക്കും. വിദ്യാഭ്യാസ വകുപ്പിൽ നിന്ന് വിരമിച്ച അക്കൗണ്ട്സ് ഓഫിസർ വി. വീരാൻകുട്ടിയാണ് ഭർത്താവ്.
Kerala
തിരുവനന്തപുരം: സംസ്ഥാന രാഷ്ട്രീയത്തിൽ ഏറെ വിവാദത്തിനു വഴിതെളിച്ച കേസായിരുന്നു കേരള സർവകലാശാല അസിസ്റ്റന്റ് നിയമന തട്ടിപ്പ്.
പരീക്ഷ അട്ടിമറിച്ചു സിപിഎം നേതാക്കളുടെയും സർവകലാശാലയിലെ തന്നെ ഇടതുസഹയാത്രികരായ മുൻ ഉന്നത ഉദ്യോഗസ്ഥരുടെ ബന്ധുക്കളെയും അനധികൃതമായി നിയമിക്കാൻ ഗൂഢാലോചന നടന്നുവെന്ന് ക്രൈംബ്രാഞ്ച് കണ്ടെത്തിയിരുന്നു. കഴിഞ്ഞ 18 വർഷത്തെ അന്വേഷണത്തിനൊടുവിലാണു ക്രൈംബ്രാഞ്ച് കുറ്റപത്രം തയാറാക്കിയത്.
2005-ലാണു കേരളർവകലാശാല അസിസ്റ്റന്റ് നിയമന തട്ടിപ്പിന്റെ തുടക്കം. സർവകലാശാലയിലെ അസിസ്റ്റന്റ് ഗ്രേഡ് 2 തസ്തികയിലേക്കുള്ള പരീക്ഷയാണു നടന്നത്. 100 മാർക്കിന്റെ പരീക്ഷയ്ക്കുശേഷം എഴുത്തുപരീക്ഷ മാർക്ക് 75 ആക്കി ചുരുക്കുകയും നിയമം ലംഘിച്ച് അഭിമുഖത്തിന് 25 മാർക്ക് ഏർപ്പെടുത്തുകയും ചെയ്തു. അഭിമുഖത്തിൽ തോന്നിയതുപോലെ ഇഷ്ടക്കാർക്കു മാർക്ക് നൽകി.
മൂന്നു വർഷം കഴിഞ്ഞപ്പോൾ റാങ്ക് ലിസ്റ്റ് വന്നു. 1401 പേരാണു പട്ടികയിൽ ഉണ്ടായിരുന്നത്. ഇതിൽ 181 പേർക്കു നിയമനം നൽകി. ഇതിൽ ക്രമക്കേടു ചൂണ്ടിക്കാട്ടി ചിലർ ലോകായുക്തയെ സമീപിച്ചു. കേസ് പരിഗണിച്ച ലോകായുക്ത പരാതി ശരിയാണെന്നു കണ്ടെത്തുകയും പ്രതികളെ പ്രോസിക്യൂട്ട് ചെയ്യാനും നിയമവിധേയമല്ലാതെ നിയമനം നേടിയവരെ പിരിച്ചുവിടാനും ഉത്തരവിട്ടു.
എന്നാൽ, ലോകായുക്ത വിധിക്കെതിരേ പ്രതികൾ ഹൈക്കോടതിയെ സമീപിച്ചു. കോടതി കമ്മീഷനെ അന്വേഷണത്തിനായി നിയോഗിച്ചു. ഈ കമ്മീഷനും നിയമനത്തിൽ വൻ ക്രമക്കേട് നടന്നതായി റിപ്പോർട്ട് നൽകി. തുടർന്നാണു കേസ് ക്രൈംബ്രാഞ്ചിനു നൽകിയത്. ക്രൈംബ്രാഞ്ചും അഴിമതി സ്ഥിരീകരിക്കുകയാണു ചെയ്തത്.
തുടർന്നു ക്രൈംബ്രാഞ്ച് കോടതിയിൽ കുറ്റപത്രം സമർപ്പിച്ചു. പിന്നീടു ഹൈക്കോടതി, നിയമനം ലഭിച്ചവരെക്കൂടി കേസിൽ കക്ഷിചേർത്തു പുനരന്വേഷണ റിപ്പോർട്ട് നൽകാൻ വിജിലൻസ് കോടതിക്ക് നിർദേശം നൽകി. 2020-ൽ കേസ് എഴുതിത്തള്ളാൻ ഇടതു സർക്കാർ അധികാരത്തിൽ ഇരുന്നപ്പോൾ നീക്കം നടത്തി.
പ്രധാന തൊണ്ടിമുതലായ ഒഎംആർ ഉത്തരക്കടലാസുകൾ കണ്ടെത്താൻ കഴിഞ്ഞില്ലെന്നു കാണിച്ചു കേസ് അവസാനിപ്പിക്കാൻ ക്രൈംബ്രാഞ്ചു തന്നെ ശിപാർശ നൽകി. എന്നാൽ കേസ് എഴുതിത്തള്ളാനുള്ള ക്രൈംബ്രാഞ്ച് നടപടി വിജലൻസ് കേകടതി അംഗീകരിച്ചില്ലെന്നു മാത്രമല്ല പുനരന്വേഷണത്തിന് ഉത്തരവിടുകയും ചെയ്തു.
ചോദ്യപേപ്പർ അച്ചടിച്ച ഹൈദരാബാദിലെ പ്രസിൽ നിന്നു ലഭിച്ച മൂല്യനിർണയ ഫലത്തിന്റെ സിഡിയിൽ തിരിമറി നടത്തിയതായി ക്രൈംബ്രാഞ്ച് കണ്ടെത്തുകയും ചെയ്തു. ഇതേത്തുടർന്നാണ് ഇപ്പോൾ പ്രതികളെ പ്രോസിക്യൂട്ട് ചെയ്യാനുള്ള തീരുമാനമെടുത്തത്.
Kerala
തിരുവനന്തപുരം: എസ്എംഎ മരുന്നു വിവാദത്തിൽ മുൻ മന്ത്രിമാരായ പി.കെ.ശ്രീമതി, കെ.കെ. ഷൈലജ, വീണാ ജോർജ് എന്നിവർ പത്രസമ്മേളനത്തിൽ നടത്തിയ പരാമർശങ്ങൾ ഗുണത്തേക്കാൾ ഏറെ രാഷ്ട്രീയമായി തിരിച്ചടിയായെന്ന വിലയിരുത്തലിൽ സിപിഎം.
ജനറിക് മരുന്നുകളെ സംബന്ധിച്ച പാർട്ടി നിലപാടു മറന്നുകൊണ്ടുള്ള പ്രതികരണമാണു മുൻ മന്ത്രിമാർ നടത്തിയത്. മരുന്നിന്റെ ഉപയോഗവുമായി ബന്ധപ്പെട്ടു രക്ഷിതാക്കളുടെ ആശങ്ക ഉയർത്തിക്കാട്ടുന്നതിനു പകരം പരീക്ഷണ വാദം ഉയർത്തിയതിൽ വലിയ ആശയക്കുഴപ്പം ഉണ്ടാക്കിയെന്നും ആവശ്യമായ തയാറെടുപ്പുകളോടെയല്ല മൂവരും പത്രസമ്മേളനം നടത്തിയതെന്നുമാണു നേതാക്കളുടെ വിമർശനം.
കെ. മുരളീധരൻ ആരോഗ്യമന്ത്രിയായി ചുമതലയേറ്റെടുത്തശേഷമാണു പ്രശ്നങ്ങൾ തുടങ്ങിയതെന്നായിരുന്നു കഴിഞ്ഞ ദിവസം മുൻ മന്ത്രിമാർ പത്രസമ്മേളനം നടത്തി പറഞ്ഞത്. ഇതിനെതിരെ മന്ത്രി കെ. മുരളീധരൻ കടുത്ത ഭാഷയിലാണു പ്രതികരിച്ചത്. മരുന്ന് ഗുണനിലവാരം ഉള്ളതാണെന്നു ഡോക്ടർമാരുടെ സംഘം ഉറപ്പുവരുത്തിയെന്നും അതുകൊണ്ടു തന്നെ തീരുമാനം മാറ്റില്ലെന്നുമായിരുന്നു മന്ത്രി പറഞ്ഞത്.
Kerala
കണ്ണൂർ: പാർട്ടി നടപടി പുനഃപരിശോധിക്കണമെന്നാവശ്യപ്പെട്ട് പി.പി.ദിവ്യ സിപിഎം കേന്ദ്രനേതൃത്വത്തിന് കത്തയച്ചു. ജനാധിപത്യ മഹിളാ അസോസിയേഷൻ ഭാരവാഹിത്വത്തിൽനിന്ന് നീക്കിയെന്നും ജില്ലാ സെന്ററിൽ പോലും പ്രവർത്തിക്കാൻ അനുവദിക്കുന്നില്ലെന്നും കത്തിൽ പറയുന്നു. ജില്ലാ സെന്ററിലെ പ്രവർത്തനങ്ങളിൽനിന്ന് ഒഴിവാക്കിയത് ജില്ലാ സെക്രട്ടറി പി.കെ.ശ്യാമളയാണെന്നും കത്തിൽ ആരോപിക്കുന്നുണ്ട്.
ഈ നടപടികളെല്ലാം പുനഃപരിശോധിക്കണമെന്നാണ് ദിവ്യയുടെ ആവശ്യം. കത്ത് ലഭിച്ചിട്ടുണ്ടെന്നും വിഷയം ചർച്ച ചെയ്യാമെന്നും സിപിഎം ജനറൽ സെക്രട്ടറി എം.എ. ബേബി അറിയിച്ചു. പി.പി. ദിവ്യയുമായി ഫോണിൽ സംസാരിച്ചതായും അദ്ദേഹം വ്യക്തമാക്കി. സിപിഎമ്മിന്റെ വിപുലീകൃത ജില്ലാ കമ്മിറ്റി യോഗത്തിന് തൊട്ടുമുമ്പാണ് ദിവ്യ കേന്ദ്രനേതൃത്വത്തിന് കത്തയച്ചത്.
നവീൻ ബാബുവിന്റെ മരണത്തെത്തുടർന്നാണ് പി.പി. ദിവ്യയെ കണ്ണൂർ ജില്ലാ കമ്മിറ്റിയിൽനിന്ന് ഇരിണാവ് ബ്രാഞ്ചിലേക്ക് തരംതാഴ്ത്തിയത്. തുടർന്ന് ദിവ്യയെ സിപിഎം പരിപാടികളിൽ സഹകരിപ്പിച്ചിരുന്നില്ല.
Kerala
തിരുവനന്തപുരം: കേരളത്തിൽ നടത്തിയ തീവ്ര വോട്ടർപട്ടിക പരിഷ്കരണത്തിൽ (എസ്ഐആർ) ഒഴിവാക്കിയ 24 ലക്ഷം പേരെ ഇപ്പോൾ നടത്തുന്ന വോട്ടർപട്ടിക പ്രത്യേക സംക്ഷിപ്ത പുതുക്കലിൽ (എസ്എസ്ആർ) തിരികെ ഉൾപ്പെടുത്തണമെന്ന ആവശ്യം സംസ്ഥാന മുഖ്യ തെരഞ്ഞെടുപ്പ് ഓഫിസർ അംഗീകരിക്കാത്തതിൽ പ്രതിഷേധിച്ച് ഇടതുപക്ഷം ഇറങ്ങിപ്പോയി.
എസ്എസ്ആറുമായി ബന്ധപ്പെട്ട് കേരളത്തിലെ മുഖ്യ തെരഞ്ഞെടുപ്പ് ഓഫിസർ വിളിച്ചുചേർത്ത രാഷ്ട്രീയ പാർട്ടികളുടെ യോഗത്തിൽനിന്ന് സിപിഎം, സിപിഐ പ്രതിനിധികളാണ് ഇറങ്ങിപ്പോയത്.
കേരളത്തിൽ എസ്ഐആറിന്റെ കരട് പട്ടിക പ്രസിദ്ധീകരിച്ചപ്പോൾ 24 ലക്ഷത്തോളം പേർ പുറത്തു പോയിരുന്നു. പിന്നീട് അന്തിമപട്ടിക പ്രസിദ്ധീകരിച്ചപ്പോൾ ഇത് എട്ടു ലക്ഷത്തോളമായി. ഇവരെ വോട്ടർപട്ടികയിൽ തെരഞ്ഞെടുപ്പ് കമ്മിഷൻ ഉൾപ്പെടുത്തണമെന്നായിരുന്നു സിപിഎമ്മിലെ എം.വി. ജയരാജന്റെയും സിപിഐയിലെ സത്യൻ മൊകേരിയുടെയും ആവശ്യം.
എന്നാൽ, ഫോം 6 പൂരിപ്പിച്ചു നൽകി നടപടിക്രമം പാലിച്ച് ഇവർക്ക് വോട്ടർപട്ടികയിൽ പേരു ചേർക്കാമെന്നായിരുന്നു സിഇഒയുടെ മറുപടി. വോട്ടർപട്ടികയിൽനിന്നു നീക്കിയവരെ സ്വമേധയാ ചേർക്കണമെന്ന് ഇടതുപക്ഷ നേതാക്കൾ ആവശ്യപ്പെട്ടു. ഇത് അംഗീകരിക്കാൻ കഴിയില്ലെന്ന് ബിജെപി പ്രതിനിധി യോഗത്തിൽ പറഞ്ഞു. ഇക്കാര്യം കേന്ദ്ര തെരഞ്ഞെടുപ്പു കമ്മിഷന്റെ ശ്രദ്ധയിൽ പെടുത്താമെന്നായിരുന്നു സിഇഒയുടെ മറുപടി. ഇതോടെ ഇടതുപക്ഷ പ്രതിനിധികൾ യോഗം ബഹിഷ്കരിക്കുകയായിരുന്നു.
സംസ്ഥാനത്ത് എസ്ഐആർ നടക്കവേ എല്ലാ ശനിയാഴ്ചയും തെരഞ്ഞെടുപ്പു കമ്മിഷൻ രാഷ്ട്രീയ പാർട്ടി പ്രതിനിധികളുടെ യോഗം വിളിച്ചിരുന്നു. അന്ന് രാഷ്ട്രീയ പാർട്ടികൾ യോഗം ബഹിഷ്കരിച്ചിരുന്നില്ല.
എസ്ഐആറിൽ ഒഴിവാക്കിയവരെ വോട്ടർപട്ടികയിൽ ഉൾപ്പെടുത്താനുള്ള നടപടികളല്ല എസ്എസ്ആറിന്റെ ഭാഗമായി നടക്കുന്നതെന്ന് കേന്ദ്ര തെരഞ്ഞെടുപ്പു കമ്മിഷന്റെ ഒരു നിർദേശത്തിലും പറയുന്നില്ല. വോട്ടർ പട്ടികയിൽ പുതുതായി പേരു ചേർക്കാനുള്ള നടപടികളാണ് നടന്നു വരുന്നതെന്ന് പിന്നീട് മാധ്യമങ്ങളോടു സംസാരിക്കവേ സജിത്ബാബു പറഞ്ഞു.
Kerala
കണ്ണൂർ: സിപിഎം നേതാവും സിഐടിയു സംസ്ഥാന സെക്രട്ടറിയുമായ കെ.പി.സഹദേവൻ (84) അന്തരിച്ചു. വാര്ധക്യ സഹജമായ അസുഖത്തെ തുടര്ന്ന് കണ്ണൂര് എകെജി ആശുപത്രിയില് ചികിത്സയിലിരിക്കെയാണ് അന്ത്യം. മൃതദേഹം ശനിയാഴ്ച രാവിലെ ഒമ്പതുമുതൽ സിപിഎം ജില്ലാ കമ്മിറ്റി ഓഫീസായ അഴീക്കോടൻ മന്ദിരത്തിലും വൈകുന്നേരം മൂന്നു മുതൽ സിഐടിയുജില്ലാ കമ്മിറ്റി ഓഫീസിലും പൊതുദർശനത്തിനു വയ്ക്കും.
തുടർന്ന് വൈകുന്നേരം നാലിന് പയ്യാമ്പലത്ത് സംസ്കാരിക്കും. പ്രാഥമിക വിദ്യാഭ്യാസത്തിനുശേഷം ബീഡിതെറുപ്പുകാരനായി ജീവിതമാരംഭിച്ച സഹദേവന് ടുബാക്കോ വര്ക്കേഴ്സ് യൂണിയന് കണ്ണോത്തുംചാല് ഡിവിഷന് സെക്രട്ടറിയായാണ് പൊതുപ്രവര്ത്തനം തുടങ്ങുന്നത്. സിഐടിയു അഖിലേന്ത്യാ വര്ക്കിംഗ് കമ്മിറ്റിയംഗം, ബീഡി ആൻഡ് സിഗാര് വര്ക്കേഴ്സ് ഫെഡറേഷന് സംസ്ഥാന സെക്രട്ടറി, അഖിലേന്ത്യാ വൈസ് പ്രസിഡന്റ് എന്നീ നിലകളിലും പ്രവര്ത്തിച്ചു.
1964ല് സിപിഎം രൂപം കൊണ്ടതുമുതല് 78 വരെ കണ്ണൂര് മുനിസിപ്പല് ലോക്കല് സെക്രട്ടറി. 2005ല് സംസ്ഥാന കമ്മിറ്റി അംഗമായി. 2022ല് സംസ്ഥാന കമ്മിറ്റിയില് നിന്ന് ഒഴിഞ്ഞു. 2006ല് കണ്ണൂര് നിയമസഭ മണ്ഡലത്തില് എല്ഡിഎഫ് സ്ഥാനാര്ഥിയായിരുന്നു.
Kerala
കണ്ണൂർ: സിപിഎമ്മിനെതിരെ ഒളിയമ്പുമായി മുൻ ജില്ലാ പഞ്ചായത്ത് പ്രസിഡന്റ് പി.പി.ദിവ്യ. ഫേയ്സ്ബുക്ക് കുറിപ്പുമായിട്ടാണ് ദിവ്യ രംഗത്തെത്തിയിരിക്കുന്നത്. ഒരിക്കൽ ശരിയെന്ന് തോന്നിയതെല്ലാം എക്കാലവും ശരിയാകണമെന്നില്ല എന്ന കുറിപ്പിലൂടെ രാഷ്ട്രീയ ജീവിതത്തിലെ നിലപാടുമാറ്റങ്ങളെക്കുറിച്ചുള്ള സൂചനകളാണ് ദിവ്യ നൽകുന്നത്.
ഒരു കരയിൽനിന്ന് മറുകരയിലെത്താൻ സഹായിച്ചതിനെ ജീവിതകാലം മുഴുവൻ ചുമന്നുനടക്കേണ്ടതില്ല. അതിനെ ഉപേക്ഷിക്കുന്നത് നന്ദികേടല്ല. ജീവിതം പഠിപ്പിച്ച പാഠമാണെന്നും ബുദ്ധന്റെ കഥ പരാമർശിച്ചുകൊണ്ട് ദിവ്യ കുറിച്ചു. നീതി വൈകിയേക്കാം എന്നാൽ സത്യത്തിന്റെ ശബ്ദം ഒരിക്കലും മങ്ങില്ലെന്നും പോസ്റ്റിലുണ്ട്.
കണ്ണൂർ എഡിഎം ആയിരുന്ന കെ. നവീൻ ബാബുവു മരിച്ചതുമായി ബന്ധപ്പെട്ട വിവാദങ്ങൾക്കു പിന്നാലെയാണ് ജില്ലാ പഞ്ചായത്ത് പ്രസിഡന്റ് സ്ഥാനത്തുനിന്ന് പി.പി.ദിവ്യ രാജിവച്ചത്. തുടർന്ന് സിപിഎം ദിവ്യയെ പാർട്ടിയിൽ തരംതാഴ്ത്തിയിരുന്നു. അടുത്തിടെ നടന്ന സിപിഎം കണ്ണൂർ വിശാല ജില്ലാ കമ്മിറ്റി യോഗത്തിലും ദിവ്യയ്ക്ക് കാര്യമായ പരിഗണന ലഭിച്ചിരുന്നില്ല.
ഇതോടെയാണ് പാർട്ടിയിൽ നിന്ന് അകലുകയാണെന്ന് സൂചനയുള്ള പോസ്റ്റ് ഫേയ്സ്ബുക്കിൽ പങ്കുവച്ചത്. അതേസമയം സിപിഎം നേതാക്കൾ ഇതെക്കുറിച്ച് പ്രതികരിച്ചിട്ടില്ല.
Kerala
തിരുവനന്തപുരം: കണ്ണൂർ റെയിൽവേ സ്റ്റേഷനിൽ മുൻ ആരോഗ്യമന്ത്രിയെ ആക്രമിച്ചെന്ന കേസിൽ തെളിവുകളില്ലാതെ വിദ്യാർഥി നേതാക്കളെ 16 ദിവസത്തോളം ജയിലിലടച്ചത് രാഷ്ട്രീയ പ്രതികാരമായിരുന്നുവെന്ന് എംഎൽഎ അബിൻ വർക്കി.
വീണാ ജോർജിന്റെ വിശ്വസ്തനായ ഗൺമാൻ തന്നെയാണ് മൊഴി മാറ്റിയത്. സംഭവിക്കാത്ത കാര്യങ്ങളാണ് അന്ന് മൊഴിയായി നൽകിയത്. എന്നാൽ, വീണാ ജോർജിന്റെ ഗൺമാനോട് മൊഴി മാറ്റാൻ പ്രതിപക്ഷത്തിന് സ്വാധീനിക്കാൻ കഴിയില്ലല്ലോ എന്നും അദ്ദേഹം ചോദിച്ചു.
ഈ വിഷയത്തിൽ വീണാ ജോർജും സിപിഎമ്മും പൊതുജനങ്ങളോട് മാപ്പ് പറയണമെന്ന് അബിൻ വർക്കി ആവശ്യപ്പെട്ടു. ഒരാൾ പറഞ്ഞ നുണയുടെ പേരിൽ സംസ്ഥാനത്ത് കലാപമുണ്ടാവുകയും വീടുകൾ ആക്രമിക്കപ്പെടുകയും ചെയ്തു. യാതൊരു തെളിവോ കാരണമോ ഇല്ലാതെയണ് കെഎസ്യു പ്രവർത്തകരെ ജയിലിൽ അടച്ചതെന്നും അബിൻ വർക്കി കൂട്ടിച്ചേർത്തു.
Kerala
കോട്ടയം: മാസപ്പടി കേസുമായി ബന്ധപ്പെട്ടുള്ള പ്രതിപക്ഷ നേതാവ് പിണറായി വിജയനെതിരായ വിജിലൻസ് കേസ് ഒരാഴ്ചത്തേയ്ക്ക് സുപ്രീംകോടതി സ്റ്റേ ചെയ്ത വിധിയിൽ പ്രതികരിച്ച് ബിജെപി നേതാവ് ഷോൺ ജോർജ്.
ഒരാഴ്ച കാലത്തെ അന്വേഷണത്തിന് മാത്രമാണ് സുപ്രീംകോടതി സ്റ്റേ അനുവദിച്ചത്. പിണറായിക്കെതിരെ ഇപ്പോൾ ഇഡി രജിസ്റ്റർ ചെയ്തിട്ടുള്ള ഇസിഐആറിനോ വിജിലൻസിന്റെ എഫ്ഐആറിനോ തടസമില്ലെന്നും പരാതിക്കാരൻ കൂടിയായ ഷോൺ ജോർജ് പറഞ്ഞു.
പിണറായിയുടെ ഭാഗം കേൾക്കണം എന്ന വിധി മാത്രമാണ് വന്നിട്ടുള്ളത്. പിണറായിയുടെ സ്തുതിപാടകർ ആഘോഷിക്കുന്നത് പോലെ ഒന്നും ഇന്നത്തെ വിധിയിൽ ഇല്ല. സംസ്ഥാന സർക്കാർ പിണറായിയെ സഹായിച്ചു. കേസ് അട്ടിമറിക്കാൻ രാഹുൽ ഗാന്ധിയുടെ നേതൃത്വത്തിൽ ശ്രമം നടന്നുവെന്നും ഷോൺ വ്യക്തമാക്കി.
രാഹുൽ ഗാന്ധിയുടെ നിർദേശപ്രകാരമാണ് സംസ്ഥാന സർക്കാർ പ്രവർത്തിച്ചത്. അതിന്റെ പ്രത്യുപകാരമാണ് രാഹുൽ ഗാന്ധിയുടെ ഇപ്പോഴത്തെ വിദേശയാത്രയെ വിമർശിക്കരുതെന്ന് സിപിഎം ജനറൽ സെക്രട്ടറി എം.എ. ബേബി പറഞ്ഞത്. ഇഡിക്ക് ഹവാല ഇടപാടുകൾ അടക്കം അന്വേഷിക്കാൻ തടസമില്ലെന്നും ഷോൺ ജോർജ് കൂട്ടിച്ചേർത്തു.
Kerala
പത്തനംതിട്ട: പരിസ്ഥിതിലോല പ്രദേശ വിജ്ഞാപനവുമായി ബന്ധപ്പെട്ട് ഒക്ടോബർ 24-ന് പത്തനംതിട്ടയിൽ എൽഡിഎഫ് പ്രഖ്യാപിച്ച ഹർത്താലിൽ മാറ്റമില്ലെന്ന് സിപിഎം. പത്തനംതിട്ട ജില്ലാ സെക്രട്ടറി രാജു എബ്രഹാം ആണ് ഇക്കാര്യം വ്യക്തമാക്കിയത്.
ജില്ലയിലെ ഏഴ് വില്ലേജുകൾ വിജ്ഞാപനത്തിൽ ഉൾപ്പെട്ടതിൽ ഒന്ന് പോലും ഒഴിവാക്കിയിട്ടില്ലെന്നും, ഇതിൽ പ്രതിഷേധിച്ചാണ് ഹർത്താൽ നടത്തുന്നതെന്നും അദ്ദേഹം പറഞ്ഞു.
ജനങ്ങൾ വെറുംകൈയോടെ ഇറങ്ങിപ്പോകണമെന്നാണോ റാന്നി എംഎൽഎ പറയുന്നത് എന്ന് രാജു എബ്രഹാം ചോദിച്ചു. റാന്നി എംഎൽഎ എന്തുകൊണ്ടാണ് ഹർത്താലിനെ എതിർക്കുന്നത് എന്ന് അറിയില്ലെന്നും രാജു എബ്രഹാം കൂട്ടിച്ചേർത്തു.
Kerala
തിരുവനന്തപുരം: സുപ്രീംകോടതി ഉത്തരവ് സംസ്ഥാന സർക്കാരിന് ഏറ്റ കനത്ത തിരിച്ചടിയാണെന്ന് സിപിഎം സംസ്ഥാന സെക്രട്ടറി എം.വി.ഗോവിന്ദൻ. മാസപ്പടി കേസിൽ പ്രതിപക്ഷ നേതാവ് പിണറായി വിജയനെതിരായ വിജിലന്സ് അന്വേഷണം ഒരാഴ്ചത്തേക്ക് സ്റ്റേ ചെയ്ത സുപ്രീംകോടതി വിധിയിൽ പ്രതികരിക്കുകയായിരുന്നു അദ്ദേഹം.
രാഷ്ട്രീയ ലാക്കോടെ കെട്ടിച്ചമയ്ക്കാൻ ശ്രമിച്ച കേസാണിതെന്ന് പാർട്ടി നേരത്തെ തന്നെ ചൂണ്ടിക്കാണിച്ചതാണ്. നീതിന്യായ വ്യവസ്ഥയെയും നിയമവാഴ്ചയെയും ഉയർത്തിപ്പിടിക്കുന്ന അത്യന്തം ആവേശകരമായ വിധിയാണ് പരമോന്നത നീതിപീഠത്തിൽ നിന്ന് ഉണ്ടായിരിക്കുന്നതെന്ന് അദ്ദേഹം പറഞ്ഞു.
കേസിൽ സർക്കാർ അപ്പീൽ പോകേണ്ടതായിരുന്നു. സിപിഎം ഉന്നയിച്ച ഓരോ വാദങ്ങളും അംഗീകരിക്കുന്നതാണ് സുപ്രീം കോടതി വിധി. ഇനി ഇഡിക്ക് മുന്നിൽ പിണറായി ഹാജരാകേണ്ട യാതൊരു ആവശ്യവുമില്ലെന്നും എം.വി.ഗോവിന്ദൻ കൂട്ടിച്ചേർത്തു.
Kerala
തിരുവനന്തപുരം: പാലക്കാട് ജില്ലാ സെക്രട്ടറി സ്ഥാനത്ത് നിന്ന് നീക്കിയ സിപിഎം സംസ്ഥാന കമ്മിറ്റി അംഗം ഇ.എൻ. സുരേഷ് ബാബുവിനെതിരെ നടപടി ആവശ്യപ്പെടാനൊരുങ്ങി വനിതാ നേതാക്കൾ. ഇന്ന് മുതല് ചേരുന്ന സംസ്ഥാന നേതൃയോഗത്തിൽ വിഷയം അവതരിപ്പിക്കുമെന്നാണ് വിവരം.
കെ.കെ. ശൈലജ, പി.കെ. ശ്രീമതി, സി.എസ്. സുജാത തുടങ്ങിയ നേതാക്കളാണ് നടപടി ആവശ്യപ്പെടുകയെന്നാണ് ലഭിക്കുന്ന വിവരം. പരാതിയില് നിജസ്ഥിതിയുണ്ടെങ്കില് കടുത്ത നടപടി സ്വീകരിക്കണമെന്നാണ് വനിതാ നേതാക്കള് ഉന്നയിക്കുന്ന ആവശ്യം.
ഇന്ന് മുതലാണ് മൂന്ന് ദിവസം നീണ്ടുനില്ക്കുന്ന സിപിഎം സംസ്ഥാന സെക്രട്ടറിയേറ്റ് ചേരുന്നത്. പി.കെ. ശ്രീമതി ഉൾപ്പെടെയുള്ള നേതാക്കള് പല തവണ പരോക്ഷമായി തന്നെ കടുത്ത നടപടി വേണമെന്ന ആവശ്യം ഉന്നയിച്ചിരുന്നു.
സംസ്ഥാന സെക്രട്ടറിയേറ്റില് വിഷയം ചര്ച്ചയാകുമ്പോള് കൃത്യമായി നിലപാട് പറയും എന്നായിരുന്നു കെ.കെ. ശൈലജ നേരത്തെ വിഷയത്തിൽ പ്രതികരിച്ചിരുന്നത്. അതേസമയം സുരേഷ് ബാബുവിനെതിരെ പരാതി ലഭിച്ചതായി എം.വി. ഗോവിന്ദന് അടക്കമുള്ള നേതാക്കള് ഇതുവരെയും വെളിപ്പെടുത്തിയിട്ടില്ല.
Kerala
തിരുവനന്തപുരം: മാസപ്പടി കേസിൽ വിജിലൻസ് കേസെടുക്കാനുള്ള ഹൈക്കോടതി ഉത്തരവിനെതിരായ പ്രതിപക്ഷ നേതാവ് പിണറായി വിജയന് ഉൾപ്പെടെയുള്ളവരുടെ ഹർജിയിൽ സുപ്രീംകോടതിയിൽ ഇന്ന് വാദം തുടങ്ങും.
ഹർജികൾ പരിഗണിക്കാൻ സുപ്രീം കോടതി പ്രത്യേക ബഞ്ച് രൂപീകരിച്ചിരുന്നു. മാസപ്പടി കേസിൽ മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയനും കുടുംബത്തിനും ഏറെ നിർണായകമായ നടപടികൾക്കാണ് ഇന്ന് സുപ്രീം കോടതിയിൽ തുടക്കമാകുന്നത്.
ഹൈക്കോടതി സിംഗിൾ ബഞ്ച് ഉത്തരവ് ചോദ്യം ചെയ്താണ് പിണറായി വിജയൻ, ടി. വീണ, പി.എ. മുഹമ്മദ് റിയാസ് ഉൾപ്പെടെയുള്ളവർ സുപ്രീം കോടതിയെ സമീപിച്ചത്. ആരോപണ വിധേയരെ കേൾക്കാതെയുള്ള ഹൈക്കോടതി സിംഗിൾ ബഞ്ച് ഉത്തരവിൽ ഇടപെടാൻ നേരത്തെ ഡിവിഷൻ ബഞ്ച് വിസമ്മതിച്ചിരുന്നു.
ഇതേ തുടർന്നാണ് അപ്പീലുമായി പിണറായിയും കുടുംബവും സുപ്രീം കോടതിയിലെത്തിയത്. കേസിൽ മുതിർന്ന രാഷ്ട്രീയ നേതാവായ പിണറായി വിജയന്റെ അറസ്റ്റിന് സാധ്യതയുണ്ടെന്നതിനാൽ ഹർജി വേഗം പരിഗണിക്കണമെന്ന് പിണറായി വിജയന്റെ അഭിഭാഷകൻ ആവശ്യപ്പെട്ടിരുന്നു. പിണറായി ഉൾപ്പെടെ എല്ലാ കക്ഷികളും നൽകിയ ഹർജികളും കോടതി ഇന്ന് പരിഗണിക്കും.
Kerala
പാലക്കാട്: സിപിഎം പാലക്കാട് മുൻ ജില്ലാ സെക്രട്ടറി ഇ.എൻ. സുരേഷ് ബാബുവിനെതിരെ ഗുരുതരമായ സാമ്പത്തിക ക്രമക്കേടുകളും അനധികൃത സ്വത്ത് സമ്പാദനവും ആരോപിച്ച് വിജിലൻസിൽ പരാതി. സിഎംപിയുടെ സംസ്ഥാന യുവ നേതാവ് വി. മുസ്തഫയാണ് വിജിലൻസ് ആൻഡ് ആന്റി കറപ്ഷൻ ബ്യൂറോ ഡയറക്ടർക്ക് പരാതി നൽകിയിരിക്കുന്നത്.
അനധികൃത സ്വത്ത് സമ്പാദനം, സാമ്പത്തിക ഇടപാടുകൾ, കള്ളപ്പണം വെളുപ്പിക്കൽ, ബിനാമി നിക്ഷേപങ്ങൾ എന്നിവ സമഗ്രമായി അന്വേഷിക്കണമെന്നാണ് പരാതിയിലെ ആവശ്യം.
പാലക്കാട്ടെ മൂന്ന് സഹകരണ സ്ഥാപനങ്ങൾ കേന്ദ്രീകരിച്ച് വലിയ തോതിൽ സാമ്പത്തിക ക്രമക്കേടുകൾ നടന്നിട്ടുണ്ടെന്ന് പരാതിയിൽ ആരോപിക്കുന്നു. ചിറ്റൂർ താലൂക്ക് ടൂറിസം കോ-ഓപ്പറേറ്റീവ് സൊസൈറ്റി ആൻഡ് റിസർച്ച് സെന്റർ, പാലക്കാട് ജില്ലാ എൻജിനീയറിംഗ് സഹകരണ സംഘം, ചിറ്റൂർ താലൂക്ക് പ്രവാസി ക്ഷേമ സഹകരണ സംഘം എന്നിവയുടെ ഇടപാടുകളാണ് അന്വേഷണ പരിധിയിൽ ഉൾപ്പെടുത്താൻ ആവശ്യപ്പെട്ടിട്ടുള്ളത്.
ഈ സഹകരണ സ്ഥാപനങ്ങൾ വഴി ബിനാമി നിക്ഷേപങ്ങളും കണക്കിൽപ്പെടാത്ത പണത്തിന്റെ ഇടപാടുകളും നടന്നിട്ടുണ്ടോയെന്ന് പരിശോധിക്കണം. കൂടാതെ വായ്പാ വിതരണത്തിലെ ക്രമക്കേടുകൾ, സ്വത്ത് മൂല്യനിർണയത്തിലെ കൃത്രിമം, സ്ഥാപനങ്ങളുടെ ഫണ്ട് വഴിതിരിച്ചുവിടൽ എന്നിവയും അന്വേഷിക്കണമെന്ന് ആവശ്യപ്പെട്ടിട്ടുണ്ട്.
Kerala
തിരുവനന്തപുരം: കോൺഗ്രസ് നേതാക്കൾ പരസ്യപ്രസ്താവന നടത്തി പാർട്ടിക്ക് പ്രതിസന്ധി ഉണ്ടാക്കരുതെന്ന് കെപിസിസി അധ്യക്ഷൻ സണ്ണി ജോസഫ്. വിവാദ പ്രസ്താവനകളിൽ നിന്ന് എല്ലാവരും ഒഴിഞ്ഞുനിൽക്കണമെന്നും അഭിപ്രായങ്ങൾ തുറന്നുപറയാൻ പാർട്ടി വേദികളുണ്ടെന്നും അദ്ദേഹം വാർത്താസമ്മേളനത്തിൽ വ്യക്തമാക്കി.
സംഘടനയുടെ വിലക്ക് എല്ലാവർക്കും ഒരുപോലെ ബാധകമാണെന്നും പരിധി വിട്ടതുകൊണ്ടാണ് പരസ്യമായി പ്രതികരിക്കേണ്ടി വന്നതെന്നും അദ്ദേഹം പറഞ്ഞു. സർക്കാരിന്റെ നിലപാടുകളെക്കുറിച്ചും അദ്ദേഹം സംസാരിച്ചു.
സർക്കാർ കൈക്കൊണ്ടിട്ടുള്ളത് പ്രായോഗിക തീരുമാനങ്ങളാണെന്നും മാസപ്പടി കേസ് ഇല്ലാതാക്കാനല്ല സർക്കാർ ശ്രമിച്ചതെന്നും സണ്ണി ജോസഫ് പറഞ്ഞു. ആലോചിച്ചെടുത്ത പക്വതയാർന്ന തീരുമാനമാണിതെന്നും ഈ സർക്കാർ നിലപാടിൽ സിപിഎം ആണ് പെട്ടുപോയതെന്നും സണ്ണി ജോസഫ് കൂട്ടിച്ചേർത്തു.
National
ന്യൂഡൽഹി: മാസപ്പടി കേസിൽ പ്രതിപക്ഷ നേതാവ് പിണറായി വിജയനെതിരായ ഇഡി നടപടിയില് വിമര്ശനവുമായി സിപിഎം ജനറല് സെക്രട്ടറി എം.എ. ബേബി. പഴയ വീഞ്ഞ് പുതിയ കുപ്പിയിൽ എന്ന പോലെയാണ് ഇഡി നടപടിയെന്നായിരുന്നു വിമർശനം.
ഒരുപാട് കെട്ടിച്ചമച്ച ആരോപണങ്ങളെ അഭിമുഖീകരിച്ച നേതാവാണ് പിണറായി. ഇത് നേരിടാനും മറികടക്കാനും അദ്ദേഹത്തിനും സിപിഎമ്മിനും കഴിയും. നിയമപരമായും രാഷ്ട്രീയപരമായും ഇഡി നടപടിയെ അഭിമുഖീകരിക്കുമെന്നും സിപിഎം ജനറല് സെക്രട്ടറി വ്യക്തമാക്കി.
പ്രതിപക്ഷ പാർട്ടി നേതാക്കളെ വേട്ടയാടാൻ കേന്ദ്ര ഏജൻസികളെ ഉപയോഗിക്കുന്നുവെന്നും ഇഡി എന്നാൽ ബിജെപി സർക്കാരിന്റെ ഒരു വിപുലീകൃത വിഭാഗമാണെന്നും എം.എ.ബേബി കൂട്ടിച്ചേർത്തു.
Kerala
തിരുവനന്തപുരം: സുപ്രീംകോടതി ഒരു സുപ്രീം ഫെയിലിയർ ആണെന്ന് സിപിഎം ജനറൽ സെക്രട്ടറി എം.എ. ബേബി. ഇത് പരിഭാഷപ്പെടുത്തി അവർക്ക് അയച്ചുകൊടുക്കണമെന്നും സിപിഎം ജനറൽ സെക്രട്ടറി പറഞ്ഞു.
ഈ വിമർശനം നടത്തിയതിന്റെ പേരിൽ കോടതിയലക്ഷ്യമായി പരിഗണിച്ച് ശിക്ഷിക്കാൻ ഇപ്പോഴത്തെ സുപ്രീംകോടതി തയാറായാൽ തന്റെ രാഷ്ട്രീയ ജീവിതത്തിലെ വലിയ അവാർഡ് ആയി അത് സ്വീകരിക്കുമെന്നും എം.എ.ബേബി വ്യക്തമാക്കി.
എക്സിക്യൂട്ടീവിന്റെ തെറ്റായ ഇടപെടലുകൾക്കുമേൽ ഇപ്പോൾ സുപ്രീംകോടതി ഭരണഘടനാപരമായ ഉത്തരവാദിത്വം നിറവേറ്റാതിരിക്കുന്നതാണ് കാണുന്നത്. കോടതി ഇടപെട്ട് ഭരണഘടന മൂല്യങ്ങൾ സംരക്ഷിക്കാതെ വന്നാൽ ജനങ്ങൾ ഇടപെട്ട് ഭരണഘടന മൂല്യങ്ങൾ സംരക്ഷിക്കേണ്ടിവരുമെന്നും അദ്ദേഹം കൂട്ടിച്ചേർത്തു.
Kerala
കാസർഗോഡ്: വിപുലീകൃത ജില്ലാ കമ്മിറ്റി യോഗത്തിന് പിന്നാലെ പാർട്ടിയിൽ നിന്ന് രാജിവച്ച് സിപിഎം നേതാവ് എം. രാഘവൻ. പാർട്ടി പ്രവർത്തനം അവസാനിപ്പിക്കുന്നതായി അറിയിച്ച് രാഘവൻ ജില്ലാ കമ്മിറ്റിക്ക് കത്ത് നൽകി.
ജില്ലാ കമ്മിറ്റിയിൽ ഉൾപ്പെടുത്താത്തതിലുള്ള അതൃപ്തിയാണ് രാജിക്ക് കാരണമെന്നാണ് സൂചന. നേതൃത്വത്തിന്റെ അവഗണനയെക്കുറിച്ച് കത്തിൽ പരാമർശിക്കുന്നതായാണ് വിവരം. ഒക്ടോബർ 15, 16 തീയതികളിൽ നടന്ന കാസർഗോഡ് വിപുലീകൃത ജില്ലാ കമ്മിറ്റി യോഗത്തിന് പിന്നാലെയാണ് രാജിക്കത്ത് കൈമാറിയത്.
കോടിയേരി ബാലകൃഷ്ണൻ ആഭ്യന്തര മന്ത്രിയായിരുന്നപ്പോൾ അഡീഷണൽ പ്രൈവറ്റ് സെക്രട്ടറിയായി എം. രാഘവൻ പ്രവർത്തിച്ചിട്ടുണ്ട്. കഴിഞ്ഞ ജില്ലാ സമ്മേളനത്തിന് മുന്നോടിയായി തന്നെ എം. രാഘവന്റെ പേര് ജില്ലാ കമ്മിറ്റിയിലേക്ക് പരിഗണിക്കപ്പെടുന്നവരുടെ പട്ടികയിൽ ഉണ്ടായിരുന്നുവെന്ന് റിപ്പോർട്ടുകളുണ്ടായിരുന്നു.
എന്നാൽ തുടർന്ന് ജില്ലാ കമ്മിറ്റി രൂപീകരിച്ചപ്പോൾ രാഘവനെ പരിഗണിച്ചില്ല. ഇതാണ് നേതൃത്വത്തോടുള്ള അതൃപ്തിക്ക് പ്രധാന കാരണമായതെന്നാണ് സൂചന.
Kerala
കാസർഗോഡ്: സിപിഎം നേതാവ് എം. രാഘവൻ പാർട്ടിയിൽനിന്ന് രാജിവച്ചു. പാർട്ടി പ്രവർത്തനം അവസാനിപ്പിച്ചതായി കാസർഗോഡ് ജില്ലാ കമ്മിറ്റിക്ക് കത്ത് നൽകി.
ജില്ലാ കമ്മിറ്റിയിൽ ഉൾപ്പെടുത്താത്തതിൽ രാഘവന് അതൃപ്തിയുണ്ടായിരുന്നെന്നാണ് വിവരം. കാസർഗോഡ് ജില്ലാ കമ്മിറ്റിയിൽ ആറുപേരെ സ്ഥിരം ക്ഷണിതാക്കളാക്കാൻ വിപുലീകൃത ജില്ലാ കമ്മിറ്റി തീരുമാനിച്ചിരുന്നു.
താരതമ്യേന ജൂനിയറായവരെ പരിഗണിച്ചപ്പോൾ മുതിർന്ന നേതാവായ രാഘവനെ തഴഞ്ഞുവെന്നാണ് പരാതി. വിപുലീകൃത ജില്ലാ കമ്മിറ്റി സമാപിച്ചതിന് പിന്നാലെയാണ് രാജി.
നേതൃത്വം അവഗണിച്ചെന്ന് രാജിക്കത്തിൽ കത്തിൽ പറയുന്നുണ്ട്. കോടിയേരി ബാലകൃഷ്ണൻ ആഭ്യന്തരമന്ത്രി ആയിരുന്നപ്പോൾ അഡീഷണൽ പ്രൈവറ്റ് സെക്രട്ടറിയായിരുന്നു രാഘവൻ.
Kerala
കൊല്ലം: സിപിഎം വിപുലീകൃത കൊല്ലം ജില്ലാ കമ്മിറ്റി യോഗത്തിൽ പ്രതിപക്ഷ നേതാവ് പിണറായി വിജയനും കുടുംബത്തിനും സംസ്ഥാന നേതൃത്വത്തിനുമെതിരെ രൂക്ഷ വിമർശനം. ഇ.എം.എസും എ.കെ.ജി.യും മക്കൾക്കുവേണ്ടി പാർട്ടിയെ ഉപയോഗിച്ചിട്ടില്ലെന്നും എന്നാൽ മകൾക്കുവേണ്ടി പിണറായി ഉണ്ടാക്കിയ അവമതിപ്പ് ചെറുതല്ലെന്നും കുണ്ടറയിൽനിന്നുള്ള പ്രതിനിധി യോഗത്തിൽ തുറന്നടിച്ചു.
പിണറായിയുടെ മകൾക്ക് എന്തിനാണ് ഇത്രയും പണം എന്ന് പാർട്ടി തിരക്കിയില്ലെന്നും കണ്ണൂരിലെ തോൽവിക്ക് പിണറായിയും ഗോവിന്ദനുമാണ് പ്രധാന കാരണക്കാരെന്നും വിമർശനമുണ്ടായി.
യോഗത്തിന്റെ ഉദ്ഘാടനപ്രസംഗത്തിൽ പിണറായി വിജയനെയും റിയാസിനെയും ന്യായീകരിച്ച സംസ്ഥാന സെക്രട്ടറിയെ പ്രതിനിധികൾ കടുത്ത ഭാഷയിൽ പരിഹസിച്ചു. 'ഞാനും അപ്പനും അപ്പന്റെ സഹോദരി സുഭദ്രയും' എന്ന മട്ടിലാണ് പാർട്ടി സെക്രട്ടറി സംസാരിച്ചതെന്നും ജില്ലാ കമ്മിറ്റിയിൽ പിണറായിയെ ആരും വിമർശിക്കരുതെന്ന സന്ദേശമാണ് സെക്രട്ടറി നൽകിയതെന്നും അംഗങ്ങൾ കുറ്റപ്പെടുത്തി.
ചർച്ചചെയ്യേണ്ട വിഷയങ്ങൾ മിണ്ടരുതെന്ന് പറയാൻ ആർക്കും അവകാശമില്ലെന്നും ഇത് പാർട്ടി രീതികൾക്ക് വിരുദ്ധമാണെന്നും പ്രതിനിധികൾ വ്യക്തമാക്കി. പാർട്ടിക്കുള്ളിലെ തിരുത്തൽ സംസ്ഥാന സെക്രട്ടറിയിൽനിന്ന് തുടങ്ങണമെന്ന് യോഗത്തിൽ ആവശ്യമുയർന്നു.
വിപുലീകൃത സംസ്ഥാന കമ്മിറ്റിയിൽ തന്നെ ശാസിച്ച വിവരം ജില്ലാ കമ്മിറ്റികളിൽ വന്ന് റിപ്പോർട്ട് ചെയ്യേണ്ടിവരുന്നത് സംസ്ഥാന സെക്രട്ടറിയുടെ ഗതികേടാണെന്ന് അഞ്ചലിൽനിന്നുള്ള പ്രതിനിധി വിമർശിച്ചു.
Kerala
കാസർഗോഡ്: മുസ്ലിം ലീഗിനെതിരെ രൂക്ഷവിമർശനവുമായി സിപിഎം സംസ്ഥാന സെക്രട്ടറിയേറ്റ് അംഗം പി. ജയരാജൻ. മതവികാരം ഇളക്കിവിടുന്ന സംവിധാനമാണ് മുസ്ലിം ലീഗെന്ന് പി. ജയരാജൻ ആരോപിച്ചു.
ന്യൂനപക്ഷ സംരക്ഷകർ എന്ന് വെറുതെ പറയുക മാത്രമാണെന്നും അദ്ദേഹം അഭിപ്രായപ്പെട്ടു. മുസ്ലിം വിഭാഗത്തിനിടയിൽ പരസ്യമായി ലീഗ് വർഗീയത പറയുകയാണ്. തൃക്കരിപ്പൂരിൽ വീടുകൾ കയറി നടത്തിയ തെരഞ്ഞെടുപ്പ് പ്രചാരണം അതിന് തെളിവാണെന്നും പി. ജയരാജൻ പറഞ്ഞു.
മുസ്ലിം ലീഗിന്റെ വർഗീയത തടയുമെന്നും ലീഗിനെ വരച്ച വരയിൽ നിർത്താനുള്ള നിലപാട് എടുക്കുമെന്നും ജയരാജൻ കൂട്ടിച്ചേർത്തു. നേരത്തെയും സമാനമായ ആരോപണങ്ങളുമായി ജയരാജൻ രംഗത്തെത്തിയിരുന്നു.