കൊച്ചി: ലോകകപ്പ് ഫുട്ബോൾ ആവേശം വാനോളമുയരുന്നതിനിടെ, ആരാധകർക്കായി പുത്തൻ ഓഫറുമായി സപ്ലൈകോ. 'സപ്ലൈകോ സോക്കർ ഇലവൻ' എന്ന പേരിൽ പ്രഖ്യാപിച്ചിരിക്കുന്ന പുതിയ പദ്ധതിയിലൂടെ, ഫുട്ബോൾ ടീമുകൾ നേടുന്ന ഓരോ ഗോളിനും സപ്ലൈകോ ശബരി ഉത്പന്നങ്ങൾക്ക് വിലക്കിഴിവ് ലഭിക്കും. ജൂൺ 15 മുതൽ ഈ ഓഫർ പ്രാബല്യത്തിൽ വരും.
ലോകകപ്പിലെ പ്രമുഖ 11 ടീമുകളെ സപ്ലൈകോയുടെ 11 വ്യത്യസ്ത ശബരി ഉത്പന്നങ്ങളുമായി ബന്ധിപ്പിച്ചാണ് ഈ പദ്ധതി നടപ്പിലാക്കുന്നത്. ഓരോ മത്സരത്തിലും ഒരു ടീം നേടുന്ന ഗോളുകളുടെ എണ്ണത്തിന് തുല്യമായ ശതമാനം വിലക്കിഴിവ്, ആ ടീമുമായി ബന്ധപ്പെട്ട ശബരി ഉത്പന്നത്തിന് അടുത്ത മത്സരം ആരംഭിക്കുന്നതുവരെ ലഭ്യമാകും. ഉദാഹരണത്തിന്, ബ്രസീൽ മൂന്ന് ഗോൾ നേടിയാൽ ശബരി മഞ്ഞൾപ്പൊടിക്ക് മൂന്ന് ശതമാനം വിലക്കിഴിവ് ലഭിക്കും. എന്നാൽ, പെനാൽറ്റി ഷൂട്ടൗട്ടിലൂടെ നേടുന്ന ഗോളുകളെ ഈ ഓഫറിനായി പരിഗണിക്കുന്നതല്ല.
ടീമുകളും അനുബന്ധ ശബരി ഉത്പന്നങ്ങളും
ബ്രസീൽ: ശബരി മഞ്ഞൾപ്പൊടി
അർജന്റീന: ശബരി പായസം മിക്സ്
ജർമനി: ശബരി അപ്പംപൊടി
നെതർലൻഡ്സ്: ശബരി സാമ്പാർപ്പൊടി
സ്പെയിൻ: ശബരി പുട്ടുപൊടി
ബെൽജിയം: ശബരി സൂപ്പർ ഫൈൻ ഡസ്റ്റ് ടീ
പോർച്ചുഗൽ: ശബരി മുളകുപൊടി
ക്രൊയേഷ്യ: ശബരി വെളിച്ചെണ്ണ
ഇംഗ്ലണ്ട്: ശബരി ഉപ്പ്
മൊറോക്കോ: ശബരി ഹോട്ടൽ ബ്ലെൻഡ് ടീ
ഫ്രാൻസ്: ശബരി ഗോൾഡ് ടീ
ഈ ടീമുകളിൽ ഏതെങ്കിലും ഒന്ന് ലോകകപ്പ് കിരീടം ചൂടിയാൽ, ആ ടീമുമായി ബന്ധപ്പെടുത്തിയിരിക്കുന്ന ശബരി ഉത്പന്നത്തിന് ഉപഭോക്താക്കൾക്കായി അധിക വിലക്കുറവും സപ്ലൈകോ വാഗ്ദാനം ചെയ്യുന്നുണ്ട്. ഫുട്ബോൾ ആരാധകർക്ക് തങ്ങളുടെ പ്രിയപ്പെട്ട ടീമിനെ പിന്തുണയ്ക്കുന്നതോടൊപ്പം സപ്ലൈകോ വഴി ലാഭകരമായി സാധനങ്ങൾ വാങ്ങാനും ഈ പദ്ധതി അവസരമൊരുക്കുന്നു.
Tags : Supplyco Soccer Eleven World Cup Discounts Latest News