ADVERTISEMENT

ADVERTISEMENT

സെന്‍റ് ഷന്താൾ സ്കൂളിൽ പ്രവേശനോത്സവം

തിരുവനന്തപുരം: മലമുകൾ സെന്‍റ് ഷന്താൾ സ്കൂൾ പ്രവേശനോത്സവം നെട്ടയം കൗൺസിലറും പൂർവ വിദ്യാർഥിയുമായ നന്ദ ഭാർഗവ് ഉദ്ഘാടനം ചെയ്തു.

സ്കൂൾ മാനേജർ സിസ്റ്റർ ഡോ. ലിസ തെരേസ്, പ്രിൻസിപ്പൽ സിസ്റ്റർ അനുമോൾ സ്കറിയ, വൈസ് പ്രിൻസിപ്പൽ സിസ്റ്റർ ആഗ്നസ്, ഹെഡ്മിസ്ട്രസ് സിസ്റ്റർ ലീന മൈലക്കൽ എന്നിവർ പ്രസംഗിച്ചു.

പുതുതായി ചേർന്ന എല്ലാ വിദ്യാർഥികളേയും പ്രിൻസിപ്പൽ ഉപഹാരം നൽകി സ്വീകരിച്ചു.

ADVERTISEMENT

പൂവാർ കടൽത്തീരം ശുചീകരിച്ച് ക്രൈസ്റ്റ് നഗർ കോളജ് വിദ്യാർഥികൾ

മാറനല്ലൂർ: ലോക പരിസ്ഥിതി ദിനത്തോടനുബന്ധിച്ച് മാറനല്ലൂർ ക്രൈസ്റ്റ് നഗർ കോളേജിലെ പരിസ്ഥിതി ക്ലബും എൻ എസ്എസ് യൂണിറ്റും ഓഷ്യൻ സ്റ്റുഡൻസ് കമ്മ്യൂണിറ്റിയുമായി സഹകരിച്ചുകൊണ്ട് പൂവാർ കടൽത്തീരം ശുചീകരിച്ചു. കൊച്ചി കടലിൽ മുങ്ങിയ കപ്പലിൽനിന്നു തീരത്തടിയുന്ന മൈക്രോ പ്ലാസ്റ്റിക് ഉൾപ്പെടെയുള്ള മാലിന്യങ്ങൾ ശേഖരിച്ചുകൊണ്ടു പൂവാർ കോസ്റ്റൽ പോലീസ് പരിസരത്തെ തീരമാണ് വിദ്യാർഥികളുടെ നേതൃത്വത്തിൽ ശുചീകരിച്ചത്. സർക്കിൾ ഇൻസ്പെക്ടർ സി. കണ്ണൻ ശുചീകരണ പ്രവർത്തനങ്ങൾ ഉദ്ഘാടനം ചെയ്തു. പരിസ്ഥിതി ദിനത്തോടനുബന്ധിച്ച് കോളജിൽ പേപ്പർ ബാഗ് നിർമാണം പ്ലാസ്റ്റിക്ക് വിരുദ്ധ സന്ദേശം പ്രചരിപ്പിച്ചുകൊണ്ടുള്ള ഫ്ലാഷ് മോബ് എന്നിവ സംഘടിപ്പിച്ചു. കോളജ് മാനേജർ ഫാ. സിറിയക് മഠത്തിൽ സിഎംഐ, പ്രിൻസിപ്പൽ ഡോ. ജോളി ജേക്കബ് എന്നിവർ പ്രസംഗിച്ചു. അധ്യാപകരായ ഡോ. കെ.പി. ഷാനന്ദ്, ആർ. രാജേഷ് കുമാർ, എസ്. തസ്നി, ഡി.വി. ആതിര എന്നിവർ നേതൃത്വം നൽകി.

പൈപ്പ് പൊട്ടിയ കുഴിയില്‍ വീണ് സ്ത്രീക്ക് പരിക്ക്

പേരൂര്‍ക്കട: നന്ദാവനത്ത് പൈപ്പു പൊട്ടിയ കുഴിയില്‍ വീണ് സ്ത്രീക്ക് പരിക്കേറ്റു. തിരുവനന്തപുരം കവടിയാര്‍ സ്വദേശിനി സുജാതകുമാരി (48) ക്കാണ് പരിക്കേറ്റത്. കഴിഞ്ഞദിവസം രാവിലെയായിരുന്നു സംഭവം. മ്യൂസിയം ഭാഗത്തുനിന്നു നന്ദാവനം വഴി തമ്പാനൂരിലേക്ക് പോകുകയായിരുന്നു ഇവര്‍. സുജാതകുമാരി സഞ്ചരിച്ചിരുന്ന സ്‌കൂട്ടര്‍ പൈപ്പ് പൊട്ടിയ കുഴിയില്‍ വീഴുകയായിരുന്നു. കുഴിയില്‍ വെള്ളം നിറഞ്ഞിരുന്നതുകൊണ്ട് ഇവര്‍ കുഴി കാര്യമായി ശ്രദ്ധിച്ചിരുന്നില്ല. സ്‌കൂട്ടര്‍ മറിഞ്ഞുവീണുവെങ്കിലും ചെറിയ പരിക്കുകളോടെ യുവതി രക്ഷപ്പെട്ടു. സ്‌കൂട്ടര്‍ മറിഞ്ഞ് ശരീരത്തിലൂടെ വീണതുമൂലം കാലിനും റോഡില്‍ വീണപ്പോള്‍ കൈമുട്ടിനുമാണ് ഇവര്‍ക്ക് പരിക്കേറ്റത്. നാട്ടുകാര്‍ ചേര്‍ന്ന് വാഹനം ഉയര്‍ത്തി മാറ്റി. ഇവര്‍ തിരുവനന്തപുരം മെഡിക്കല്‍കോളജ് ആശുപത്രിയില്‍ പ്രാഥമിക ചികിത്സ തേടി. നന്ദാവനത്തെ പൈപ്പ് പൊട്ടിയ കുഴിയില്‍ ഇടയ്ക്കിടെ വാഹനയാത്രികര്‍ വീണു പരിക്കേല്‍ക്കുകയാണെന്ന് നാട്ടുകാര്‍ പറയുന്നു.

വൃദ്ധനെ കാണാനില്ലെന്നു പരാതി നൽകി

നെടുമങ്ങാട്: ഉഴമലയ്ക്കൽ പുതുക്കുളങ്ങര കൊറ്റാമല ജ്യോതി നിവാസിൽ ചന്ദ്രശേഖരൻ നായരെ (74) കാണാനില്ലെന്നു കാണിച്ച് ബന്ധുക്കൾ ആര്യനാട് പോലീസിൽ പരാതി നൽകി. കഴിഞ്ഞദിവസം വൈകുന്നേരം മൂന്നോടെ നെടുമങ്ങാട് മാർക്കറ്റിൽ പോവുകയും തിരികെ 5.30 തോടെ കൊറ്റാമല ജംഗ്ഷനിലെത്തുകയും ചെയ്തിരുന്നു. ഇതിനുശേഷം ഇദ്ദേഹം ഇതുവരെ വീട്ടിൽ തിരികെ എത്തിയിട്ടില്ലെന്നു ബന്ധുക്കൾ നൽകിയ പരാതിയിൽ പറയുന്നു. ഏകദേശം 165 സെന്‍റീമീറ്റർ ഉയരവും ഇടത്തരം ശരീര പ്രകൃതവുമാണ്. കാണാതാകുമ്പോൾ ക്രീം കളർ ഷർട്ടും വെള്ളമുണ്ടുമായിരുന്നു വേഷം. ഇയാളെപ്പറ്റി കൂടുതൽ വിവരം ലഭിക്കുന്നവർ ആര്യനാട് പൊലീസ് സ്റ്റേഷനിൽ 0472-2852033 എന്ന നമ്പറിൽ ബന്ധപ്പെടണമെന്ന് ആര്യനാട് എസ്എച്ച്ഒ അറിയിച്ചു.

ഗ്യാസ് സ്റ്റൗവിൽനിന്നു തീപടർന്നു

മലയിൻകീഴ്: വീട്ടിലെ ഗ്യാസ് അടുപ്പ്‌ കത്തിച്ചപ്പോൾ സ്റ്റൗവിൽ തീപടർന്നു. മലയിൻകീഴ് കോവിലുവിള കാറക്കോണം സൂനിലയത്തിൽ പുഷ്പലീലയുടെ വീട്ടിലെ അടുപ്പിനാണ് തീപടർന്നത്. അടുപ്പിനുപുറമേ അടുക്കളയിലെ ടൈലുകൾ പൊട്ടിനശിച്ചു. കിള്ളിയിൽനിന്ന്‌ അഗ്നിരക്ഷാസേനയെത്തി ഗ്യാസ് അണച്ച് തീകെടുത്തിയതിനാൽ വലിയ അപകടം ഒഴിവായി. അടുപ്പിന്‍റെ തകരാറാണ് തീപ്പിടിത്തത്തിനു കാരണമെന്നു കരുതുന്നു.

ലക്ഷംവീട് കോളനിയിൽ ലഹരിസംഘങ്ങൾ ഏറ്റുമുട്ടി

നേമം: കരുമം കണ്ണങ്കോട് ലക്ഷം വീട് കോളനിയിൽ ലഹരി സംഘങ്ങൾ ഏറ്റുമുട്ടി. വിവരമറിഞ്ഞെത്തിയ നേമം പോലീസിനു നേരെയും സംഘം കല്ലേറ് നടത്തി. ചൊവ്വാഴ്ച രാത്രി പത്തു മണിയോടെയായിരുന്നു സംഭവം. കല്ലേറില്‍ നേമം സ്റ്റേഷനിലെ രണ്ടു പോലീസുകാര്‍ക്ക് പരിക്കേറ്റു. ആക്രമണം നടത്തിയ കിരണ്‍ (31), മിഥുന്‍ (25), വിഷ്ണു (35) എന്നിവരെ പോലീസ് പിടികൂടി. ബാക്കിയുള്ളവര്‍ ഓടി രക്ഷപ്പെട്ടു. ഫോര്‍ട്ട് എസിയുടെ നേതൃത്വത്തില്‍ കൂടുതല്‍ പോലീസെത്തിയാണ് സംഘത്തെ പിടികൂടിയത്. ലഹരി ഉപയോഗിച്ചവര്‍ പരസ്പരം നടത്തിയ അക്രമത്തില്‍ കിരണിനു പരിക്കുണ്ട്. പത്തു പേരടങ്ങുന്ന സംഘം ലഹരി ഉപയോഗിച്ച ശേഷമാണു രണ്ടു മണിക്കൂറോളം സംഘര്‍ഷാവസ്ഥ സൃഷ്ടിച്ചത്. കിരണും മിഥുനും നേമം പോലീസ് സ്റ്റേഷനിലെ ഗുണ്ടാ ലിസ്റ്റില്‍പ്പെട്ടവരാണെന്ന് പോലീസ് പറഞ്ഞു. പ്രതികളുടെ ആക്രമണത്തില്‍ സിവിൽ പോലീസ് ഉദ്യോഗസ്ഥരായ ബീനിഷ്, വിനീത് എന്നിവര്‍ക്കാണ് പരിക്കേറ്റത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

നന്ദാവനത്ത് വാട്ടര്‍ അഥോറിറ്റിയുടെ കുടിവെള്ള പൈപ്പ് പൊട്ടി

പേരൂര്‍ക്കട: നന്ദാവനം-ബേക്കറി ജംഗ്ഷന്‍ റോഡില്‍ വാട്ടര്‍ അഥോറിറ്റിയുടെ കുടിവെള്ള പൈപ്പ് പൊട്ടി ശുദ്ധജലം പാഴാകുന്നു. പ്രധാന റോഡിലാണ് വന്‍ തോതില്‍ കുടിവെള്ളം പാഴാകുന്നത്. വാട്ടര്‍ അഥോറിറ്റി പാളയം സെക്ഷന്‍ പരിധിയിലുള്ള പ്രദേശമാണ് ഇവിടം. പൈപ്പ് പൊട്ടിയിട്ട് ഒരുമാസമായി എന്നാണ് നാട്ടുകാരും വ്യാപാരികളും പറയുന്നത്. അതേസമയം പൈപ്പ് പൊട്ടിയൊഴുകാന്‍ തുടങ്ങിയിട്ട് മൂന്നുദിവസം മാത്രമേ ആയിട്ടുള്ളൂവെന്നാണ് വാട്ടര്‍ അഥോറിറ്റി പറയുന്നത്. ടാര്‍ ഇളകി കുഴി രൂപപ്പെട്ട് അവിടെനിന്ന് ജലം ഒഴുകിപ്പരന്ന് ഓടയിലൂടെയാണ് പാഴാകുന്നത്. ദിനംപ്രതി ലക്ഷക്കണക്കിന് ലിറ്റര്‍ ശുദ്ധജലം പാഴാകുന്നുണ്ടെന്നാണ് കണക്ക്. ഇതിനു 50 മീറ്റര്‍ അകലെയായി മറ്റൊരു പൊട്ടല്‍കൂടിയുണ്ടെങ്കിലും അത് റോഡിനടിയിലൂടെയുള്ള ചോര്‍ച്ചയാണെന്നും പ്രദേശവാസികള്‍ പറയുന്നു. 315 എം.എം വിസ്താരം വരുന്ന ഹൈ ഡെന്‍സിറ്റി പൈപ്പാണ് ഇവിടെ പൊട്ടിയിരിക്കുന്നത്. ഇത് അറ്റകുറ്റപ്പണി ചെയ്യുന്നത് ക്ലേശകരമാണെന്നും ചെന്നൈയില്‍നിന്ന് പൈപ്പും അനുബന്ധ ഉപകരണങ്ങളും എത്തിയാല്‍ മാത്രമേ പണി ആരംഭിക്കാന്‍ സാധിക്കുകയുള്ളൂവെന്നും ഇതിനുള്ള കാലതാമസമാണ് പ്രശ്‌നത്തിനു കാരണമെന്നുമാണ് വാട്ടര്‍ അഥോറിറ്റി പാളയം എഇ പറയുന്നത്. ഇന്നുതന്നെ പുതിയ പൈപ്പ് എത്തുമെന്നും പണി ആരംഭിക്കുമെന്നും എഇ സൂചിപ്പിച്ചു. അതേസമയം ഏറെ വാഹനത്തിരക്കുള്ള റോഡാണ് ഇതെന്നും സെക്രട്ടേറിയറ്റിലേക്കും പരിസര പ്രദേശങ്ങളിലേക്കും ജലമെത്തിക്കുന്ന പൈപ്പായതുകൊണ്ടാണ് വാല്‍വ് അടയ്ക്കാന്‍ സാധിക്കാത്തതെന്നും വാട്ടര്‍ അഥോറിറ്റി സൂചിപ്പിച്ചു. ജെസിബി ഉപയോഗിച്ച് കുഴിച്ചാല്‍ മാത്രമേ ആഴത്തില്‍ കടന്നുപോയിട്ടുള്ള പൈപ്പ് കണ്ടെത്താനും അറ്റകുറ്റപ്പണി നടത്താനും സാധിക്കുകയുള്ളൂ. വരുന്ന അവധി ദിനങ്ങള്‍ ഇതിനായി തെരഞ്ഞെടുക്കുമെന്നും അറ്റകുറ്റപ്പണി ഉടന്‍ പൂര്‍ത്തീകരിക്കുമെന്നും വാട്ടര്‍ അഥോറിറ്റി സൂപ്രണ്ടിംഗ് എന്‍ജിനീയര്‍ വ്യക്തമാക്കി.

മണ്ണിന്‍റെ മനമറിഞ്ഞു പരിസ്ഥിതി ദിനാഘോഷം

മാറനല്ലൂർ: ക്രൈസ്റ്റ് നഗർ പബ്ലിക് സീനിയർ സെക്കൻഡറി സ്കൂളിലെ പരിസ്ഥിതി ദിനാഘോഷം എസ്‌സിടിഐഎംഎസ്ടി പോളിമെറിക് മെഡിക്കൽ ഡിവൈസ് ഡി വിഭാഗം ശാസ്ത്രജ്ഞൻ ഡോ. ജിജോ രാജ് ഉദ്ഘാടനം ചെയ്തു. പ്രിൻസിപ്പൽ ഫാ. ചാക്കോ പുതുകുളം സിഎംഐ അധ്യക്ഷനായി. ഹരിത കേരളം പദ്ധതിയുടെ ഭാഗമായ "പച്ചതുരുത്തിന് " തുടക്കം കുറിച്ചുള്ള സ്കൂൾ പൂന്തോട്ടം "എഡ്യുഫ്ലോറൻസിയയുടെ ഉദ്ഘാടനം വിശിഷ്ടാതിഥിത നിർവഹിച്ചു. ഫിനാൻസ് അഡ്മിനിസ്ട്രേറ്ററും വൈസ് പ്രിൻസിപ്പൽ ഫാ. മാത്യു പുത്തൻപുരയ്ക്കൽ സിഎംഐ വിശിഷ്ടാതിഥിക്കു സ്‌നേഹോപഹരം നൽകി. കുട്ടികളുടെ ബുള്ളറ്റിൻ ബോർഡിൽ പോസ്റ്റർ പ്രദർശിപ്പിച്ചു. പ്രത്യേക ഫാം റേഡിയോ പരിപാടികളും നടത്തി. കലാപരിപാടികളും അരങ്ങേറി. നെയ്യാറ്റിന്‍കര: നെയ്യാറ്റിന്‍കരയില്‍ വിദ്യാലയങ്ങളുടെയും വിവിധ സംഘടനകളുടെയും നേതൃത്വത്തില്‍ പരിസ്ഥിതിദിനം ആഘോഷിച്ചു. നെയ്യാറ്റിൻകര നഗരസഭയുടെയും കൃഷിഭവന്‍റെയും ഉരൂട്ടുകാല ഗവ. എംടിഎച്ച്എസിന്‍റെയും സംയുക്താഭിമുഖത്തിൽ സംഘടിപ്പിച്ച പരിസ്ഥിതി ദിനാഘോഷം കെ. ആന്‍സലന്‍ എംഎല്‍എ വൃക്ഷത്തൈ നട്ട് ഉദ്ഘാടനം ചെയ്തു. സ്കൂൾ അങ്കണത്തിൽ ചേര്‍ന്ന ചടങ്ങില്‍ നഗരസഭ ചെയർമാൻ പി.കെ. രാജമോഹനന്‍ അധ്യക്ഷനായി. സ്റ്റാന്‍ഡിംഗ് കമ്മിറ്റി ചെയര്‍മാന്മാരായ കെ.കെ. ഷിബു, ഡോ. എം.എ. സാദത്ത്, കൗണ്‍സിലര്‍മാരായ അഡ്വ. സജിന്‍ലാല്‍, കൂട്ടപ്പന മഹേഷ്, പ്രധാനാധ്യാപകൻ സോണി ലാൽ സി. ഗ്യാരി, കൃഷി ഓഫീസർ ടി. സജി, അധ്യാപകരായ ഗിരിജ, റാണി, സുലജ, സിമിലാൽ, അനശ്വര രാജശേഖരൻ, പിടിഎ പ്രസിഡന്‍റ് ഷാജു, കൃഷി അസിസ്റ്റന്‍റ് മുരുകൻ എന്നിവർ പങ്കെടുത്തു. പരിസ്ഥിതി ദിനത്തോടനുബന്ധിച്ച് പ്രകൃതിക്കൊരു പൊന്ന് പേരേപ്പാടൻസിലൂടെ എന്ന പദ്ധതിയുടെ ഭാഗമായുള്ള വൃക്ഷത്തൈ വിതരണോദ്ഘാടനം നെയ്യാറ്റിന്‍കര നഗരസഭ ചെയര്‍മാന്‍ പി.കെ. രാജമോഹനന്‍ നിര്‍വഹിച്ചു. നഗരസഭ സ്റ്റാന്‍ഡിംഗ് കമ്മിറ്റി ചെയര്‍മാന്മാരായ ഡോ. എം.എ. സാദത്ത്, ആര്‍. അജിത, മാനേജർ വൈ. ക്രിസ്തുദാസ്, മാർക്കറ്റിംഗ് മാനേജർ ജയ്സൺ ജോർജ്, മുൻ കൗൺസിലർ ജെ. ജോജിൻ എന്നിവർ സംബന്ധിച്ചു. നെയ്യാറ്റിന്‍കര ഊരൂട്ടുകാല ഗവ. ഐടിഐയിലെ പരിസ്ഥിതി ദിനാഘോഷങ്ങളുടെ ഉദ്ഘാടനവും ഫലവൃക്ഷ തൈനടീലും ബാലാവകാശകമ്മീഷൻ അംഗം ഡോ. എഫ്. വിൽസൻ നിർവഹിച്ചു. പ്രിൻസിപ്പൽ ഡി.എസ്. ഷീലുകുമാർ, പിടിഎ പ്രസിഡന്‍റ് രതീഷ് കുമാർ, അധ്യാപക വിദ്യാർഥി പ്രതിനിധി പ്രിയദർശിനി, ജെ. പ്രകാശ് ജെ എന്നിവർ പങ്കെടുത്തു. മഞ്ചവിളാകം ഗവ. യുപി സ്കൂളിലെ പരിസ്ഥിതി ദിനാഘോഷങ്ങളുടെ ഭാഗമായി പോസ്റ്റര്‍ രചന മത്സരം സംഘടിപ്പിച്ചു. ഒന്പതിന് പരിസ്ഥിതിദിന ക്വിസ് നടക്കും. ഫ്രാനിന്‍റെ ആഭിമുഖ്യത്തില്‍ വ്ളാങ്ങാമുറി എല്‍എംഎസ് എല്‍പി സ്കൂളില്‍ സംഘടിപ്പിച്ച പരിസ്ഥിതി ദിനാഘോഷം നെയ്യാറ്റിൻകര സി.എസ്ഐ ചർച്ച് വികാരി റവ. സത്യ സന്തോഷ് കുമാർ ഉദ്ഘാടനം ചെയ്തു. കൗണ്‍സിലര്‍ കൂട്ടപ്പന മഹേഷ്, ഫ്രാന്‍ ഭാരവാഹികളായ എസ്.കെ. ജയകുമാര്‍, എം. രവീന്ദ്രന്‍ എന്നിവര്‍ പങ്കെടുത്തു. കാരക്കോണം ഡോ. സോമര്‍ മെമ്മോറിയല്‍ സിഎസ്‌ഐ മെഡിക്കല്‍ കോളജ് കാമ്പസില്‍ സംഘടിപ്പിച്ച പരിസ്ഥിതി ദിനാഘോഷം സി എസ്ഐ ദക്ഷിണ കേരള മഹായിടവക ബിഷപ്പ് തിമോത്തി രവീന്ദര്‍, ബോഗൈന്‍ വില്ല തൈ നട്ട് ഉദ്ഘാടനം ചെയ്തു. ഡയറക്ടര്‍ ഡോ. എബ്രഹാം, മഹാത്മിനി സ്റ്റേറ്റ് സെക്രട്ടറി ടി.ടി. പ്രവീണ്‍, മെഡിക്കല്‍ സൂപ്രണ്ട് ഡോ. ബാബുരാജ് തുടങ്ങിയവര്‍ പങ്കെടുത്തു. നെടുമങ്ങാട്: ലോക പരിസ്ഥിതി ദിനാചരണത്തിന്‍റെ ഭാഗമായി മൂഴി ടിപ്പുകൾച്ചറൽ സൊസൈറ്റിയുടെയും തിരുവനന്തപുരം ജൻ ശിക്ഷൻ സൻ സ്ഥാനുമായി ചേർന്ന് പൊതുസ്ഥലങ്ങളിൽ 1500 ഫലവൃക്ഷ തൈകൾ നടുന്നതിന്‍റെ ബ്ലോക്കുതല ഉദ്ഘാടനം കേരള യൂത്ത് പ്രമോഷൻ കൗൺസിൽ സംസ്ഥാന ചെയർമാൻ സുമൻ ജിത്ത് മിഷ നിർവഹിച്ചു. സൊസൈറ്റി ചെയർമാൻ മൂഴിയിൽ മുഹമ്മദ് ഷിബു അധ്യക്ഷത വഹിച്ചു. 25 കുട്ടികൾക്ക് ഫലവൃക്ഷത്തൈകൾ സൗജന്യമായി വിതരണം ചെയ്തു. നെടുമങ്ങാട്: എസ്എഫ്ഐ നെടുമങ്ങാട് ഏരിയാ കമ്മിറ്റിയുടെ നേതൃത്വത്തിൽ സംഘടിപ്പിച്ച പരിസ്ഥിതി ദിനാഘോഷം ഏരിയാതല ഉദ്ഘാടനം പൂവത്തൂർ ഇ.കെ. നയനാർ ഗ്രന്ഥശാല അങ്കണത്തിൽ മാവിൻ തൈ നട്ടുകൊണ്ട് മുൻ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എസ്.എസ്. ബിജു നിർവഹിച്ചു. ഏരിയയിലെ വെമ്പായം, മൂഴി, തേക്കട എന്നിവിടങ്ങളിൽ വൃക്ഷത്തെകൾ നടുകയും പ്ലാസ്റ്റിക് മലിനീകരണത്തിനെതിരേ ബോധവത്കരണം നടത്തുകയും ചെയ്തു. തിരുവല്ലം: ജൈവവൈവിധ്യ ക്ലബ്, നാഷണൽ സർവീസ് സ് കീം, എൻസിസി എന്നിവയുടെ ആഭിമുഖ്യത്തിൽ വെള്ളായണി കാർഷിക കോളജിൽ സംഘടിപ്പിച്ച പരിസ്ഥിതി ദിനാഘോഷം പ്രാദേശിക കാർഷിക ഗവേഷണം കേന്ദ്രം മേധാവി ഡോ. ശാലിനിപിള്ള ഉദ്ഘാടനം ചെയ്തു. ജൈവവൈവിധ്യ ക്ലബിന്‍റെ കോ -ഓർഡിനേറ്റർ ഡോ. അശ്വതി വിജയൻ, നാഷണൽ സർവീസ് സ് കീം പ്രോഗ്രാം ഓഫീസർ ഡോ. സംഗീത കെ.ജി. എന്നിവർ പ്രസംഗിച്ചു. എൻഎസ്എസ് വോളണ്ടിയേഴ്സ് ലഘുനാടകം അവതരിപ്പിച്ചു. പ്ലാസ്റ്റിക് മലിനീകരണത്തിനെതിരേ ലഘുലേഖകൾ തയാറാക്കുകയും ചെയ്തു. നെടുമങ്ങാട്: കർഷകകോൺഗ്രസ് ആനാട് മണ്ഡലം കമ്മിറ്റിയുടെ പരിസ്ഥിതി ദിനാഘോഷം ആനാട് ഗവ. ആയുർവേദ ആശുപത്രിയിൽ അഗസ്ത്യ മുരിങ്ങതൈ നട്ടുകൊണ്ട് കെപിസിസി നിർവാഹസമിതി അംഗം ആനാട് ജയൻ ഉദ്ഘാടനം ചെയ്തു. ആനാട് മണ്ഡലംപ്രസിഡന്‍റ് ആനാട് ജോയ് അധ്യക്ഷനായി. പഞ്ചായത്ത് മുൻ പ്രസിഡന്‍റുമാരായ ആനാട് ജി. ചന്ദ്രൻ, ആനാട് സുരേഷ്, കോൺഗ്രസ് മണ്ഡലം പ്രസിഡന്‍റ് ഹുമയൂൺ കബീർ, ആർ. അജയകുമാർ, എം.എൻ. ഗിരി, മെഡിക്കൽ ഓഫീസർ ഡോ. രോഹിത് ജോൺ, ദാമോദരൻ നായർ, വേലപ്പൻനായർ, ഡോ. പൂർണിമ എന്നിവർ സംസാരിച്ചു. വെഞ്ഞാറമൂട്: കീഴായിക്കോണം കലാലയ ഗ്രന്ഥശാലയുടെ ആഭിമുഖ്യത്തിൽ സംഘടിപ്പിച്ച പരിസ്ഥിതി ദിനാഘോഷം കീഴായിക്കോണം ഹോമിയോ ആശുപത്രി വളപ്പിൻ ഡോ: ദിവ്യ തൈ നട്ട് പദ്ധതി ഉദ്ഘാടനം ചെയ്തു. കലാലയ പ്രസിഡന്‍റ് ആർ. അജയകുമാർ, സെക്രട്ടറി എം.ബി. ബിജു, അംഗങ്ങളായ ബി. പ്രഭ, എസ്. രാജൻ, ജി. ബിജു എന്നിവർ പങ്കെടുത്തു. പാലോട് : ഞാറനീലി വന സംരക്ഷണ സമിതിയുടെ നേതൃത്വത്തിൽ സ്കൂളിൽ വൃക്ഷ തൈകൾ നടുകയും വിദ്യാർഥികൾക്ക് ബോധവത്കരണ ക്ലാസുകളും സംഘടിപ്പിച്ചു. ഞാറനീലി വി.കെ. കാണി സ്കൂളിൽ പാലോട് റേഞ്ച് ഫോറസ്റ്റ് ഓഫീസർ വിപിൻ ചന്ദ്രൻ വൃക്ഷ തൈകൾ നടുകയും വിദ്യാർഥികൾക്ക് പരിസ്ഥി ദിന സന്ദേശവും ബോധവൽക്കരണ ക്ലാസും എടുക്കുകയും ചെയ്തു. ഞാറനീലി വിഎസ്എസ് അംഗങ്ങളും പെരിങ്ങമ്മല സെക്ഷൻ സ്റ്റാഫുകളും പരിപാടിയിൽ പങ്കെടുത്തു. നെയ്യാറ്റിന്‍കര: പരിസ്ഥിതി ദിനത്തില്‍ വിദ്യാര്‍ഥികള്‍ക്കെല്ലാം പ്ലാവില തൊപ്പികള്‍. അതിയന്നൂർ പഞ്ചായത്തിലെ പോങ്ങിൽ എൽപി സ്കൂളിലെ വിദ്യാര്‍ഥികളാണ് പ്ലാവില തൊപ്പികളണിഞ്ഞു പരിസ്ഥിതി സംരക്ഷണ പ്രവര്‍ത്തനങ്ങളോടുള്ള ഐക്യദാര്‍ഢ്യം അറിയിച്ചത്. സ്കൂളിലെ പരിസ്ഥിതി ദിനാഘോഷം ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയർമാൻ കൊടങ്ങാവിള വിജയകുമാർ ഉദ്ഘാടനം ചെയ്തു. ബിന്ദു എസ്.ജെ. ജോർജ് അധ്യക്ഷയായി. പിടിഎ പ്രസിഡന്‍റ് ബിജു, രഞ്ജിനി, റാണി, ലിജി, ദാനം എന്നിവര്‍ സംബന്ധിച്ചു. ചാണി എല്‍എംഎസ് എല്‍പി സ്കൂളിലെ പരിസ്ഥിതി ദിനാഘോഷം കവയിത്രി ജാനു കാഞ്ഞിരംകുളം വൃക്ഷത്തൈ നട്ട് ഉദ്ഘാടനം ചെയ്തു. പരണിയം ഗവ. വൊക്കേഷണല്‍ ഹയര്‍സെക്കന്‍ഡറി സ്കൂളില്‍ പരിസ്ഥിതി ദിനാഘോഷങ്ങളുടെ ഭാഗമായി വിവിധ പരിപാടികള്‍ സംഘടിപ്പിച്ചു. വൃക്ഷത്തൈ നടീല്‍, പോസ്റ്റര്‍ നിര്‍മാണം, ചിത്രരചന, പരിസ്ഥിതിദിന ക്വിസ് എന്നിവ സംഘടിപ്പിച്ചു. മരുതത്തൂർ മഹാത്മ വായനശാലയിൽ പരിസ്ഥിതി ദിനാഘോഷം ഫല വൃക്ഷ തൈകൾ നട്ട് കവയിത്രി ആശ കിഷോർ ഉദ്ഘാടനം ചെയ്തു. പേരൂര്‍ക്കട: ആയുർവേദ മെഡിക്കല്‍ അസോസിയേഷന്‍ കരമന ഏരിയയും ആയുഷ് ഹെല്‍ത്ത് ആൻഡ് വെല്‍നെസ് സെന്‍ററും സംയുക്തമായി പരിസ്ഥിതി ദിനാഘോഷം സംഘടിപ്പിച്ചു. കരമന ഏരിയ സെക്രട്ടറി ഡോ. അനില സ്വാഗതം പറഞ്ഞു. ആയുർവേദ മെഡിക്കല്‍ അസോസിയേഷന്‍ സംസ്ഥാന കമ്മിറ്റി അംഗവും കല്ലറ ഗവ. ആയുർവേദ ഡിസ്‌പെന്‍സറി മെഡിക്കല്‍ ഓഫീസറുമായ ഡോ. സുഭാഷ് ചടങ്ങില്‍ ആശംസകള്‍ നേര്‍ന്നു. ആയുര്‍ കര്‍മ മെഡിക്കല്‍ ഓഫീസര്‍ ഡോ. രമ്യശ്രീ രവീന്ദ്രന്‍ പരിസ്ഥിതി സംരക്ഷണത്തെക്കുറിച്ച് ക്ലാസെടുത്തു. എം.ജി. അശ്വതി പരിസ്ഥിതി പ്രതിജ്ഞ ചൊല്ലിക്കൊടുത്തു. യോഗ ഇന്‍സ്ട്രക്ടര്‍ ഡോ. ആരതി നന്ദി പറഞ്ഞു. വെമ്പായം: പിരപ്പൻകോട് സെന്‍റ് ജോൺസ് പബ്ലിക് സ്കൂളിൽ നടന്ന പരിസ്ഥിതി ദിനാചരണം ഡയറക്ടർ ഫാ. ജോസ് കിഴക്കേടത്ത് ഫലവൃക്ഷ തൈ നട്ടു കൊണ്ട് ഉദ്ഘാടനം ചെയ്തു. തുടർന്ന് കുട്ടികൾക്കു പരിസ്ഥിതി ബോ ധവത്കരണ സന്ദേശം നൽകി. വെള്ളറട: കുന്നത്തുകാല്‍ ശ്രീ ചിത്തിര തിരുനാള്‍ റെസിഡന്‍ഷ്യല്‍ സെന്‍ട്രല്‍ സ്‌കൂളില്‍ ലോക പരിസ്ഥിതി ദിനാഘോഷം സം ഘടിപ്പിച്ചു. സ്‌കൂള്‍ പ്രിന്‍സിപ്പല്‍ എസ്. പുഷ്പവല്ലി പരിസ്ഥിതിദിന സന്ദേശം നല്‍കി. കുട്ടികളുടെ ചിത്ര പ്രദര്‍ശനവും, കലാപരിപാടികളും ഉണ്ടായിരുന്നു.

കാരോട് റോട്ടറി ക്ലബ് പരിസ്ഥിതിദിനം ആചരിച്ചു

കാരോട്: റോട്ടറി ക്ലബ് ഓഫ് കാരോടിന്‍റെ നേതൃത്വത്തിൽ പരിസ്ഥിതി ദിനം ആഘോഷിച്ചു. കുളത്തൂർ മണികെട്ടിമാവിള ജിഎംയുപി സ്കൂളിൽ സംഘടിപ്പിച്ച ദിനാചരണത്തിൽ സ്കൂളിലെ എല്ലാ അധ്യാപക വിദ്യാർഥികൾക്കും ഫലവൃക്ഷ തൈകൾ വിതരണം ചെയ്തു. റോട്ടറി ഇന്‍റർനാഷണൽ 3211 സോൺ ഒന്ന് എജി ഡോ. രവീന്ദ്രൻ ഉദ്ഘാടനം ചെയ്തു. കാരോട് റോട്ടറി ക്ലബ് പ്രസിഡന്‍റ് സിന്ധു കുമാർ പരിസ്ഥിതി സന്ദേശം നല്കി. സെക്രട്ടറി എസ്.എച്ച്. സജീവ്, വാർഡ് മെംബർ രാജഗോപാൽ, കുളത്തൂർ സന്തോഷ് രാജ്, ക്ലബ് ട്രഷറർ എൽ. വിൻസ്, പ്രോജക്ട് ചെയർമാൻ സതീഷ് കുമാർ, ആർ.എസ്. നായർ, സുരേഷ് കുമാർ, ലിജിൻ എന്നിവർ ഫലവൃക്ഷത്തൈകൾ നൽകി. സ്കൂൾ പ്രഥമ അധ്യാപിക സിന്ധുകുമാരി നന്ദി പറഞ്ഞു.

ഹാർബർ സ്കൂളിൽ "എന്‍റെ കറിവേപ്പ്' പദ്ധതിക്കു തുടക്കമായി

വിഴിഞ്ഞം : ഗവൺമെന്‍റ് ഹാർബർ ഏരിയ സ്കൂളിൽ "എന്‍റെ കറിവേപ്പ്‌' പദ്ധതിക്കു തുടക്കമായി. ലോക പരിസ്ഥിതി ദിനത്തോടനുബന്ധിച്ചു സ്കൂളിൽ നടന്ന ചടങ്ങിൽ സ്കൂളിലെ എല്ലാ കുട്ടികൾക്കും കറിവേപ്പു ചെടി വിതരണം ചെയ്തു. വിഷ രഹിത പച്ചക്കറി പ്രോത്സാഹിപ്പിക്കുന്നതിന്‍റെ ആദ്യപടിയാണ് എന്‍റെ കറിവേപ്പില പദ്ധതിയെന്നു ഹെഡ്മാസ്റ്റർ എച്ച്.ഡി. ബൈജു പറഞ്ഞു. പരിപാടി വാർഡ് കൗൺസിലർ നിസാമുദ്ദീൻ ഉദ്ഘാടനം ചെയ്തു. പിടിഎ പ്രസിഡന്‍റ് അൻവർ ഷാൻ, എസ്എംസി ചെയർമാൻ താജുദീൻ റഹ്മാനി, വികസന സമിതി ചെയർമാൻ അഷറഫ് എന്നിവർ പങ്കെടുത്തു. യുപി സ്കൂളായി അപ്ഗ്രേഡ് ചെയ്ത വിദ്യാലയത്തിലെ ആദ്യബാച്ച് അഞ്ചാം ക്ലാസ് വിദ്യാർഥികളും കോർപറേഷൻ ജീവനക്കാരും അധ്യാപകരും കൗൺസിലറും ചേർന്നു പാറപ്പള്ളി പരിസരം വൃത്തിയാക്കുകയും പരിസര മലിനീകരണ ലഹരി വിരുദ്ധ പോസ്റ്ററുകൾ സ്ഥാപിക്കുകയും ചെയ്തു.

അമ്മ വിരമിച്ച ദിനത്തിൽ മകൾ അധ്യാപികയായി

കാട്ടാക്കട: അമ്മ വിരമിച്ചു. മകൾ അധ്യാപികയുമായി. നീണ്ട മുപ്പത്തിനാലു വർഷത്തെ അധ്യാപനജീവിതത്തിൽനിന്ന് അമ്മ വിരമിക്കുമ്പോൾ മകൾ രുഗ്മ സ്‌കൂൾവരാന്തയിൽ കാത്തുനിന്നു, അക്ഷരച്ചൂടുള്ളൊരു സമ്മാനവുമായി. അമ്മയെ കണ്ടപാടെ കൈയിലൊതുക്കിപ്പിടിച്ച കടലാസ് നീട്ടി. അതു വായിച്ച് കണ്ണുനിറഞ്ഞു മകളുടെ നെറുകയിൽ ലേഖാകുമാരി ടീച്ചറൊരു മുത്തംനൽകി. എൽപി സ്‌കൂൾ റാങ്ക് പട്ടികയിൽ ലേഖ ടീച്ചറുടെ മകൾ രുഗ്മ രണ്ടാം റാങ്കു നേടി അമ്മയുടെ വഴിയേ ചുവടുറപ്പിക്കാനൊരുങ്ങുകയാണ്. കുരുതംകോട് ഗവ. എൽപി സ്‌കൂളിലെ പ്രഥമാധ്യാപികയായിരുന്ന ലേഖാകുമാരി കഴിഞ്ഞ ദിവസമാണ് സർവീസിൽനിന്നു വിരമിച്ചത്. അതേ ദിവസമാണ് മകൾ രുഗ്മയുടെ എൽപി സ്‌കൂൾ റാങ്ക് പട്ടിക പ്രസിദ്ധീകരിച്ചതും. തന്‍റെ അധ്യാപന പാരമ്പര്യത്തിന്‍റെ ചേർത്തുവെക്കലായി മകളെ തേടിയെത്തിയ നേട്ടത്തിന്‍റെ നിറവിലായിരുന്നു അവരുടെ വിരമിക്കൽദിനം കടന്നുപോയത്. ഒന്നുമുതൽ നാലുവരെ പഠിച്ച സ്‌കൂളിൽനിന്നാണ് പ്രഥമാധ്യാപികയായി വിരമിക്കുന്നതെന്ന പ്രത്യേകതയുമുണ്ട്. സ്‌കൂൾ ടീച്ചറായ അമ്മയുടെ വഴിയേ സഞ്ചരിക്കാനായിരുന്നു മകൾ രുഗ്മയുടെയും തീരുമാനം. രണ്ടുവർഷമായി സ്‌കൂൾ അധ്യാപികയാകാനുള്ള പരിശ്രമത്തിലായിരുന്നു. പരീക്ഷയെഴുതി കാത്തിരുന്ന് ഒടുവിൽ ഫലം വന്നതു അമ്മ വിരമിക്കുന്ന ദിവസത്തിലായതിന്‍റെ ആവേശത്തിലായിരുന്നു രുഗ്മ. അമ്മ വീട്ടിലെത്തുന്നത് കാത്തുനിൽക്കാതെ വിരമിക്കൽദിനത്തിലെ അപ്രതീക്ഷിത സന്തോഷം പങ്കിടാൻ രുഗ്മ സ്‌കൂളിലേക്ക് ഓടിയെത്തിയത്. രുഗ്മയ്ക്ക് നൃത്തവും പ്രിയപ്പെട്ടതാണ്. കുരുതംകോട് രാഗേന്ദുവിൽ റിട്ട. ബിഎസ്എഫ് ജവാനാണ് ലേഖയുടെ ഭർത്താവ് ശശികുമാർ.

കലാസാഹിത്യമേഖല രാഷ്ട്രീയവത്കരണത്തിൽനിന്നും അകന്നു നിൽക്കണം: അഡ്വ. പി.എസ്. ശ്രീധരൻപിള്ള

തിരുവനന്തപുരം: കേരളത്തിലെ സാഹിത്യ അക്കാഡമിയുടെ പ്രവർത്തനങ്ങളിലും പ്രതിനിധി തെരഞ്ഞെടുപ്പിലും രാഷ്ട്രീയ സ്വാധീനം നിലനില്ക്കുന്നുണ്ടെന്നു ഗോവ ഗവർണർ അഡ്വ. പി. എസ്. ശ്രീധരൻപിള്ള. കലാസാഹിത്യ മേഖലയെ എങ്കിലും രാഷ്ട്രീയ ഇടപെടലുകളിൽ നിന്നും ഒഴിവാക്കണം എന്നും പി. എസ്. ശ്രീധരൻ പിള്ള. കവി വിഷ്ണു നാരായണൻ നന്പൂതിരിയുടെ സ്മരണയ് ക്കായുള്ള വൈഷ്ണവം ട്രസ്റ്റിന്‍റെ സാഹിത്യപുരസ്കാരം കവി ശ്രീകുമാരൻതന്പിക്ക് സമ്മാനിച്ച് പ്രസംഗിക്കുകയായിരുന്നു ഗവർണർ. ഭാരത് ഭവനിലായിരുന്നു ചടങ്ങ്. രാഷ്ട്രീയ അതിപ്രസരം എല്ലാ മേഖലകളിലും പ്രകടമാണ്. സാഹിത്യ അക്കാഡമികൾ പ്രവർത്തിക്കേണ്ടത് സ്വതന്ത്രമായും കക്ഷി രാഷ്ട്രീയങ്ങൾക്കതീതമായും വേണം എന്നും പി. എസ്. ശ്രീധരൻപിള്ള ചൂണ്ടിക്കാട്ടി. പോസിറ്റിവിറ്റി കുറഞ്ഞുവരുന്ന കാലഘട്ടമാണിത്. സമൂഹത്തിൽ ക്രിയാത്മകമായ മാറ്റം വരുത്തുവാൻ വിഷ്ണുനാരായണൻ നന്പൂതിരിയെ പോലുള്ള കവികളുടെ കവിതകൾ പര്യാപ്തമാണ്. സമൂഹത്തോടു പ്രതിബദ്ധതയുള്ള കവിയായിരുന്നു വിഷ്ണു നാരായണൻ നന്പൂതിരി എന്നും ഗവർണർ വ്യക്തമാക്കി. ഏറ്റവും വലിയ കച്ചവട ഉത്പന്നമായി സിനിമ മാറുന്ന കാലഘട്ടമാണിത്. ശ്രീകുമാരൻ തന്പിക്ക് അർഹിക്കുന്ന അംഗീകാരം ലഭിച്ചിട്ടുണ്ടോ എന്നതിനുള്ള മറുപടി ഗവർണർ ആയതിനാൽ പറയുന്നില്ല എന്ന് പുഞ്ചിരിയോടെ പി.എസ്. ശ്രീധരൻപിള്ള പറഞ്ഞു. സ്വന്തം നേട്ടങ്ങൾക്കു വേണ്ടി തന്‍റെ ശൈലി മാറ്റുന്ന കവിയല്ല ശ്രീകുമാരൻ തന്പി. നേട്ടങ്ങൾ ലഭിക്കും എന്നതുകൊണ്ട് എഴുതാറുമില്ല, നഷ്ടം സംഭവിക്കുമെന്നതിനാൽ എഴുതാതെ ഇരിക്കുന്നുമില്ല. സ്വാത്വിക വിശുദ്ധിയുടെ പ്രതീകമാണ് വിഷ്ണു നാരായണൻ നന്പൂതിരിയെന്നു ചടങ്ങിൽ അധ്യക്ഷത വഹിച്ച ട്രസ്റ്റ് ചെയർമാൻ കൂടിയായ കവി പ്രഭാവർമ പറഞ്ഞു. പ്രതിസന്ധിഘട്ടത്തിൽ നമ്മെ കൈപിടിച്ചു നടത്തുന്ന കവിതകളാണു വിഷ്ണു നാരായണൻ നന്പൂതിരിയുടേത്. ഒരു അവകാശവാദങ്ങളുമില്ലാതെ സാഹിത്യലോകത്ത് വ്യാപരിച്ച വിഷ് ണു നാരായണൻ നന്പൂതിരിയുടെ ജീവിതം വെണ്‍മയുടെ ജൈത്രയാത്രയായിരുന്നു. മാനുഷികമൂല്യം, ദാർശനികത, ശാസ്ത്രസത്യം എന്നിവ ശ്രീകുമാരൻ തന്പിയുടെ കവിതകളുടെ കരുത്താണ് എന്നും പ്രഭാവർമ അഭിപ്രായപ്പെട്ടു. കുട്ടിക്കാലത്ത് മുത്തച്ഛനിൽ നിന്നും വിഷ്ണു നാരായണൻ നന്പൂതിരി സ്വന്തമാക്കിയ ആധ്യാത്മിക അറിവ് കവിയുടെ ജീവിതത്തിലും കവിതയിലും പ്രകാശം പരത്തി എന്ന് മറുപടി പ്രസംഗത്തിൽ ശ്രീകുമാരൻ തന്പി പറഞ്ഞു. പഴമയെ മാത്രമല്ല പുതുമയെയും ആവാഹിച്ച കവിയുടെ രാഷ്ട്രീയ കവിതകൾ ഏറെ പ്രസക്തമാണ്. പ്രത്യേകിച്ചൊരു രാഷ്ട്രീയ പാർട്ടിയെയും ചേർത്തുപിടിക്കാതെ വിഷ്ണു നാരായണൻ നന്പൂതിരി രചിച്ച രാഷ്ട്രീയ കവിതകൾ പഠനവിഷയമാക്കണം. കേരളത്തിന്‍റെ രാഷ്ട്രീയ അവസ്ഥകളെ തന്‍റെ പല കവിതകളിലും കവി തുറന്നുകാട്ടി. വിഷ്ണു നാരായണൻ നന്പൂതിരിയുടെ തീപിടിച്ച പുര എന്ന കവിത വായിച്ചാണ് ശ്രീകുമാരൻ തന്പി മറുപടി പ്രസംഗം അവസാനിപ്പിച്ചത്. മുൻ ചീഫ് സെക്രട്ടറി ആർ. രാമചന്ദ്രൻ നായർ വിഷ്ണു നാരായണൻ നന്പൂതിരി അനുസ്മരണ പ്രഭാഷണം നടത്തി. മുതർന്ന ബിജെപി നേതാവ് കെ. രാമൻപിള്ള, ചരിത്രകാരൻ ഡോ. ടി.പി. ശങ്കരൻകുട്ടി നായർ എന്നിവർ ആദരം നേർന്ന് പ്രസംഗിച്ചു. ഡോ. ശ്രീവത്സൻ നന്പൂതിരി ആമുഖ പ്രസംഗം നടത്തി. ട്രസ്റ്റ് ജനറൽ സെക്രട്ടറി ഡോ. ആർ. അജയകുമാർ സ്വാഗതവും വിഷ്ണു നാരായണൻ നന്പൂതിരിയുടെ മകൾ ഡോ. എൻ. അദിതി നന്ദിയും പറഞ്ഞു. അപർണ രാജീവ് കവിത ചൊല്ലി.

"പറവകൾക്ക് ഒരു പഴത്തോട്ടം' ഒരുക്കി കണ്ണശയിലെ കുട്ടികൾ

പേയാട്: ചിറക്കോണം കുളത്തിന് അരികിലെ ഭൂമിയിൽ ഫലവൃക്ഷ ഉദ്യാനമൊരുക്കി ലോക പരിസ്ഥിതിദിനം ആഘോഷിച്ചു. നേമം ബ്ലോക്ക് പഞ്ചായത്തും പേയാട് കണ്ണശ മിഷൻ ഹൈസ്കൂളും സംയുക്തമായാണ് വേറിട്ട പരിസ്ഥിതിദിന ആഘോഷം സംഘടിപ്പിച്ചത്. സ്കൂൾ പരിസ്ഥിതി ക്ലബിൽ അംഗങ്ങളായ വിദ്യാർത്ഥികളും ജനപ്രതിനിധികളും അധ്യാപകരും വൃക്ഷത്തൈകളുടെ നടീലിനു നേതൃത്വം നൽകി. മാങ്കോസ്റ്റിൻ, നെല്ലി, ജാമ്പ, മാവ്, പ്ലാവ് തുടങ്ങി ഏതെങ്കിലും ഒരു ഫലവൃക്ഷമെങ്കിലും ഓരോ മാസവും കായ്ക്കുന്ന തരത്തിലുള്ള ഫലവൃക്ഷ തൈകളാണ് കുളത്തിനരികിൽ പഞ്ചായത്തിന്‍റെ ഉടമസ്ഥതയിലുള്ള തരിശുഭൂമിയിൽ അവർ നട്ടുനനച്ചത്. "പറവകൾക്ക് ഒരു പഴത്തോട്ടം' എന്ന പേരിലാണ് ഉദ്യാനം നിർമിക്കുന്നത്. ബ്ലോക്ക് പഞ്ചായത്തിന്‍റെ അഭ്യർഥന പ്രകാരം ഉദ്യാനത്തിന്‍റെ പരിപാലനവും, പ്രദേശത്തെ വറ്റാത്ത ഉറവയായ ചിറക്കോണം കുളത്തിന്‍റെ നവീകരണവും സംരക്ഷണവും ഏറ്റെടുക്കുന്നതിനു കണ്ണശ മിഷൻ ഹൈസ്കൂൾ സന്നദ്ധത അറിയിച്ചിട്ടുണ്ടെന്നു മാനേജർ ആനന്ദ് കണ്ണശ അറിയിച്ചു. സ്കൂൾ ഓഡിറ്റോറിയത്തിൽ നടന്ന പരിസ്ഥിതി ദിനാഘോഷം ബ്ലോക്ക് പ്രസിഡന്‍റ് അഡ്വ. എസ്.കെ. പ്രീജ ഉദ്ഘാടനം ചെയ്തു. ആനന്ദ് കണ്ണശ അധ്യക്ഷനായി. നേമം ബ്ലോക്ക് സ്റ്റാൻഡിംഗ് കമ്മറ്റി ചെയർമാൻമാരായ സജിന കുമാർ, ശാന്താ പ്രഭാകരൻ, മെമ്പർ ആർ.ബി. ബിജു ദാസ്, സെക്രട്ടറി അജയഘോഷ്, പ്രധാനാധ്യാപിക റിൻസി സെബാസ്റ്റ്യൻ, പരിസ്ഥിതി ക്ലബ് ചുമതലയുള്ള അധ്യാപിക ടീന എന്നിവർ സംസാരിച്ചു.

മാല മോഷ്ടിച്ചു രക്ഷപ്പെട്ട യുവതി പിടിയില്‍

പേരൂര്‍ക്കട: ആറ്റുകാല്‍ പൊങ്കാലയ്ക്കിടെ ഭക്തയുടെ മാല കവര്‍ന്ന സംഭവത്തില്‍ യുവതി പിടിയില്‍. തമിഴ്‌നാട് തിരുവള്ളൂര്‍ സ്വദേശിനി രതി (42) ആണ് പിടിയിലായത്. ഈവര്‍ഷം മാര്‍ച്ച് മാസം 13നു ഉച്ചതിരിഞ്ഞ് 1.45ന് ആയുര്‍വേദ കോളജ് ജംഗ്ഷനു സമീപമായിരുന്നു സംഭവം. പൊങ്കാല കഴിഞ്ഞു മടങ്ങുകയായിരുന്ന ചിറയിന്‍കീഴ് സ്വദേശിനി ശോഭകുമാരിയുടെ 10 പവന്‍ മാലയാണ് രതി അപഹരിച്ചത്. കെഎസ്ആര്‍ടിസി ബസ് ആയുര്‍വേദകോളജ് ജംഗ്ഷനില്‍ പാര്‍ക്ക് ചെയ്ത സമയത്ത് രതി ബസിനുള്ളില്‍ കയറുകയും ശോഭകുമാരിയുടെ മാല കവര്‍ന്നു രക്ഷപ്പെടുകയുമായിരുന്നു. സംഭവവുമായി ബന്ധപ്പെട്ട് ഇവരുടെ ഭര്‍ത്താവ് ഇളയരാജ നേരത്തെ അറസ്റ്റിലായിരുന്നു. ദമ്പതികള്‍ ആറ്റുകാല്‍ പൊങ്കാലയ്ക്കു മോഷണം നടത്തുകയെന്ന ലക്ഷ്യത്തോടെ ഒരു കാര്‍ വാടകയ്‌ക്കെടുക്കുകയും ഇത് ഒരു ഹൈപ്പര്‍മാര്‍ക്കറ്റിലെ പാര്‍ക്കിംഗ് ഏരിയയില്‍ പാര്‍ക്ക് ചെയ്തശേഷം ഒരു ഓട്ടോറിക്ഷയില്‍ ആയുർവേദ കോളജ് ജംഗ്ഷനില്‍ ഇറങ്ങുകയുമായിരുന്നു. മാല മോഷണത്തിനുശേഷം ഇരുവരും മറ്റൊരു ഓട്ടോയില്‍ക്കയറി തിരികെ ഹൈപ്പര്‍ മാര്‍ക്കറ്റിലെത്തുകയും കാറെടുത്ത് രക്ഷപ്പെടുകയും ചെയ്തു. ഏറ്റവുമൊടുവില്‍ പാലക്കാടാണ് പ്രതികള്‍ താമസിച്ചുവന്നിരുന്നത്. സിസിടിവി ദൃശ്യങ്ങള്‍ പ്രതികളെ പിടികൂടാന്‍ പോലീസിനെ സഹായിച്ചു. പാലക്കാട് ഭാഗത്തു ദമ്പതികള്‍ താമസിക്കുന്ന സ്ഥലത്തുനിന്നാണ് മോഷണമുതല്‍ പോലീസ് കണ്ടെത്തിയത്. വിവിധ സ്ഥലങ്ങളില്‍ മാറിമാറി താമസിച്ചു മോഷണം നടത്തുന്ന ഇവര്‍ക്കെതിരേ തമിഴ്‌നാട്ടിലും തിരുവനന്തപുരത്തെ വിവിധ സ്റ്റേഷനുകളിലും ക്രിമിനല്‍ക്കേസുകള്‍ നിലവിലുണ്ട്. ശംഖുംമുഖം എസി അനുരൂപിന്‍റെ നിര്‍ദേശപ്രകാരം വഞ്ചിയൂര്‍ സിഐ എച്ച്എസ് ഷാനിഫ്, എസ്ഐ അലക്‌സ്, എസ്സിപിഒ ബിനോയി, വനിത സിപിഒമാരായ രജനി, സിംന എന്നിവരാണ് അന്വേഷണസംഘത്തിലുണ്ടായിരുന്നത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

"സമര നായകൻ' മുരുകൻ ജി വിടവാങ്ങി

കാട്ടാക്കട: കാട്ടാക്കടയിലെ ജനകീയ പ്രശ്‌നങ്ങൾ സ്വന്തം പ്രശ്‌നമായിക്കണ്ടു സമരമുഖത്തിറങ്ങിയ സമര നായകൻ ഒടുവിൽ യാത്രയായി. കഞ്ചിയൂർക്കോണംകുന്നത്ത് വീട്ടിൽ ജി. മുരുകൻ (85)നിര്യാതനായി. കാട്ടാക്കട താലൂക്ക് രൂപീകരിക്കണമെന്ന ആവശ്യവുമായി 1972ൽ സമരം നടത്തി. തുടർന്നും ഇതേ ആവശ്യവുമായി നിരവധി ഒറ്റയാൾ സമരങ്ങൾ നടത്തി. 1986ൽ കാട്ടാക്കട താലൂക്ക് എന്നാവശ്യവുമായി 14 ദിവസം നിരാഹാര സമരം നടത്തി. 1991ൽ 30 അടി ഉയരത്തിൽ കാട്ടാക്കട ടൗണിൽ പന്തൽകെട്ടി അതിനുമുകളിൽ കയറി നിരാഹാര സമരം നടത്തിയിരുന്നു. ഒറ്റയാൻ സമരം നടത്തിയ മുരുകൻജിയെ 2013-ൽ കാട്ടാക്കട പോലീസ് അറസ്റ്റ് ചെയ്ത് ജയിലടച്ചു. ജയിലിലായിരുന്ന സമയത്തായിരുന്നു കാട്ടാക്കട താലൂക്ക് പ്രഖ്യാപനമുണ്ടായതെന്ന പ്രത്യേകതയുമുണ്ട്. കാട്ടാക്കട കെഎസ്ആർടിസി ഡിപ്പോ അനുവദിക്കണമെന്നാവശ്യപ്പെട്ട് 1973ൽ സമരം നടത്തിയിരുന്നു. കാട്ടാക്കട പബ്ലിക്ക് മാർക്കറ്റിലെ അമിത ചുങ്കപിരിവിനെതിരെയും കാട്ടാക്കടയിൽ മൃഗാശുപത്രി എത്തിക്കുന്നതിനുവേണ്ടിയും ഒറ്റയാൾ സമരം നടത്തി. മുരുകൻ ജി രണ്ട് ദശാബ്ദംമുൻപ് കാട്ടാക്കട കേന്ദ്രീകരിച്ച് പൗരസമിതി രൂപികരിച്ചെങ്കിലും പൗരസമിതി മുന്നോട്ടുപോയില്ല. പാരമ്പര്യ വൈദ്യനുമായിരുന്നു. ഭാര്യ: വിശ്വമ്മ.മക്കൾ: അരുൺ,അനു.

പാട്ടേക്കോണത്ത് നാലേക്കർ സ്ഥലത്തെ വാഴക്കൃഷി നശിച്ചു

കള്ളിക്കാട്: കള്ളിക്കാട് പാട്ടേക്കോണത്ത് മഴയിലും കാറ്റിലും നാലേക്കറിലെ വാഴക്കൃഷി നശിച്ചു. പാട്ടേക്കോണം സ്വദേശികളായ കൃഷ്ണൻകുട്ടി, ശാമുവേൽ, ഹരികുമാർ, പൗലോസ് എന്നിവർ ചേർന്നു കൃഷിയിറക്കിയ ഏലായിലാണ് നാശനഷ്ടമുണ്ടായത്. ഓണവിപണി ലക്ഷ്യമിട്ടിറക്കിയ വാഴക്കൃഷിയാണു കുലയ്ക്കാറായപ്പോൾ നശിച്ചത്. ഇടവിളയായി കൃഷിചെയ്തിരുന്ന മരച്ചീനിയുൾപ്പെടെയുള്ളവയും വെള്ളം കയറി നശിച്ചു. ഒരേക്കറോളം ഭൂമി സ്വന്തമായുള്ളതും മൂന്നേക്കർ പാട്ടത്തിനെടുത്തുമാണ് വായ്പയെടുത്ത് ഇവർ കൃഷിയിറക്കിയത്. ഏത്തൻ, കപ്പ, രസകദളി എന്നിങ്ങനെ കുലയ്ക്കാറായ 300-ലേറെ വാഴകളാണു കാറ്റിൽ ഒടിഞ്ഞുവീണത്. കഴിഞ്ഞ തവണയും ഇത്തരത്തിൽ ഇവരുടെ കൃഷി നശിച്ചിരുന്നു. കൃഷിഭവനിൽ ഉൾപ്പെടെ പരാതി നൽകിയിരുന്നെങ്കിലും നഷ്ടപരിഹാരമൊന്നും കിട്ടിയിട്ടില്ലെന്നും കർഷകർ പറഞ്ഞു.

നിഡ്സ് ആരോഗ്യ പരിപാലന മദ്യവർജന കമ്മീഷൻ പരിസ്ഥിതിദിനം ആഘോഷിച്ചു

നെയ്യാറ്റിൻകര: ഇന്‍റഗ്രൽ ഡവലപ്മെന്‍റ് സൊസൈറ്റി ആരോഗ്യ പരിപാലന മദ്യവർജന കമ്മീഷന്‍റെ നേതൃത്വത്തിൽ ലോഗോസ് പാസ്റ്ററൽ സെന്‍ററിൽ പരിസ്ഥിതി ദിനാചരണം സംഘടിപ്പിച്ചു. കമ്മീഷൻ സെക്രട്ടറി ഫാ. ഡെന്നിസ് മണ്ണൂർ അധ്യക്ഷത വഹിച്ച യോഗം നെയ്യാറ്റിൻകര രൂപത വികാരി ജനറാൾ മോൺ. വിൻസന്‍റ് കെ. പീറ്റർ ഉദ്ഘാടനം ചെയ്തു. രൂപത ശുശ്രൂഷ കോ- ഓഡിനേറ്റർ മോൺ. വി.പി. ജോസ്, കമ്മീഷൻ സെക്രട്ടറി ഫാ. ക്ലീറ്റസ്, വത്സല ബാബു, അൽഫോൻസ ആന്‍റിൽസ്, വാർഡ് കൗൺസിലർ അനിത, യൂണിറ്റ് സെക്രട്ടറി രൂപത പ്രതിനിധി ശശിധരൻ, ആനിമേറ്റർ ബീന കുമാരി, ഷീബ, അജിത എന്നിവർ സംസാരിച്ചു. ഫലവൃക്ഷ തൈ നടുകയും വിതരണം ചെയ്യുകയും ചെയ്തു. "പ്ലാസ്റ്റിക് മലിനീകരണം അവസാനിപ്പിക്കുക' എന്ന വിഷയത്തെ ആസ്പദമാക്കി കമ്മീഷൻ സെക്രട്ടറി ഫാ.ഡെന്നിസ് മണ്ണൂർ ക്ലാസ് നയിച്ചു. ഫെറോന യൂണിറ്റ് തലങ്ങളിൽ കമ്മീഷന്‍റെ നേതൃത്വത്തിൽ പരിസ്ഥിതി ദിനാചരണം സംഘടിപ്പിച്ചു.

വിഴിഞ്ഞം-നാവായിക്കുളം ഔട്ടര്‍ റിംഗ് റോഡ്: അടുത്തമാസം ഉത്തരവിറങ്ങും

തിരുവനന്തപുരം: വിഴിഞ്ഞം-നാവായിക്കുളം ഔട്ടര്‍ റിംഗ് റോഡ് നിര്‍മാണത്തിന് അടുത്തമാസം ഉത്തരവിറങ്ങും. ഇതോടെ പാതയ്ക്കു ഭൂമി വിട്ടുകൊടുത്ത് നഷ്ടപരിഹാരത്തിനു കാത്തിരിക്കുന്ന ആയിരക്കണക്കിനു ഭൂവുടമകള്‍ക്ക് ആശ്വാസമാകും. വിഴിഞ്ഞം-തേക്കട (33.9 കിലോമീറ്റര്‍), തേക്കട-നാവായിക്കുളം (28.08 കിലോമീറ്റര്‍) എന്നീ രണ്ടു ഘട്ടങ്ങളിലായാണ് നിര്‍മാണം പൂര്‍ത്തിയാക്കുക. 24 വില്ലേജുകളിലാണ് ഇതിനായി ഭൂമി ഏറ്റെടുക്കുന്നത്. 1000.873 ഹെക്ടര്‍ ഭൂമി ഏറ്റെടുക്കുന്നതിനു വിജ്ഞാപനം ഇറക്കിയിട്ടുണ്ട്. എന്‍എച്ച് 66-ലേക്കു തുറക്കുന്ന രണ്ടു പ്രധാന ജംഗ്ഷനുകള്‍ക്കു സമീപവും ടോള്‍ ഗേറ്റുകള്‍ സ്ഥാപിക്കും. 45 മീറ്റര്‍ വീതിയുള്ള റോഡില്‍ 30 മീറ്ററില്‍ നാലു വരിയായി പ്രധാന പാതയും ഇരുവശത്തുമായി 14 മീറ്റര്‍ സര്‍വീസ് റോഡുമാണ് നിര്‍മക്കുക. അതേസമയം പാതയുടെ നാവായിക്കുളം തേക്കട ഭാഗത്തിനു പരിസ്ഥിതി അനുമതി നല്‍കേണ്ട സംസ്ഥാന പരിസ്ഥിതി ആഘാത നിര്‍ണയ അഥോറിറ്റി കാലാവധി കഴിഞ്ഞശേഷം പുനഃസ്ഥാപിച്ചിട്ടില്ല. ഇതിനു മൂന്നുമാസമെങ്കിലും എടുക്കുമെന്നാണ് വിവരം. ഔട്ടര്‍ റിംഗ് റോഡ് പദ്ധതി നിലവില്‍ കേന്ദ്രസര്‍ക്കാരിനു കീഴിലെ പബ്ലിക് പ്രൈവറ്റ് പാര്‍ട്ണര്‍ഷിപ്പ് അപ്രൈസല്‍ കമ്മറ്റിയുടെ (പിപിപിഎസി) പരിഗണനയിലാണ്. ഇത് അംഗീകരിച്ച് കേന്ദ്ര മന്ത്രിസഭയ്ക്ക് കൈമാറും. കേന്ദ്ര മന്ത്രിസഭയുടെ അനുമതി ലഭിച്ചശേഷമാകും പദ്ധതി അംഗീകരിച്ച് ഉത്തരവ് ഇറങ്ങുക. ജൂലൈ അവസാനത്തോടെ ഈ നടപടികള്‍ പൂര്‍ത്തിയാക്കും എന്നാണ് മുഖ്യമന്ത്രി പിണറായി വിജയനും കേന്ദ്രമന്ത്രി നിധിന്‍ ഖഡ്കരിയും തമ്മില്‍ നടന്ന ചര്‍ച്ചയില്‍ ലഭിച്ച ഉറപ്പ്. ഉത്തരവ് ഇറങ്ങിയ ശേഷമേ ഭൂവുടമകളുടെ നഷ്ടപരിഹാര വിതരണത്തിലേക്കു കടക്കൂ. പിപിപിഎസിയുടെ അംഗീകാരം ലഭിക്കാന്‍ പരിസ്ഥിതി അനുമതി നിര്‍ബന്ധമില്ല. എന്നാല്‍ ടെന്‍ഡര്‍ നടപടികള്‍ പൂര്‍ത്തിയാക്കി കരാര്‍ ഒപ്പുവയ്ക്കുന്നതിന് മുമ്പ് അനുമതി ലഭിക്കണം. സര്‍വീസ് റോഡ് നിര്‍മിക്കാനുള്ള ചെലവ് സംസ്ഥാനം വഹിക്കണമെന്നായിരുന്നു പദ്ധതി ദേശീയപാത അതോറിറ്റി എറ്റെടുക്കുമ്പോള്‍ ഉണ്ടായിരുന്ന ധാരണ.

ശബരി റെയിൽ വിഴിഞ്ഞം വരെ നീട്ടണം: ഹിൽഡെഫ്

തിരുവനന്തപുരം: അങ്കമാലി - ശബരി റെയിൽപാത വിഴിഞ്ഞം തുറമുഖം വരെ നീട്ടണമെന്ന് ഹിൽ ഇന്‍റഗ്രേറ്റഡ് ഡെവലപ്പ്മെന്‍റ് ഫൗണ്ടേഷൻ(ഹിൽഡെഫ്) ജനറൽ സെക്രട്ടറി അശ്വന്ത് ഭാസ്കർ. അങ്കമാലി - ശബരി റെയിൽപാത യാഥാർഥ്യമാക്കാൻ തീരുമാനിച്ച കേന്ദ്ര - സംസ്ഥാന സർക്കാരുകളെ അഭിനന്ദിക്കുന്നതായി അശ്വന്ത് ഭാസ്കർ പത്രസമ്മേളനത്തിൽ പറഞ്ഞു. ടൂറിസം, വാണിജ്യം, തീർഥാടനം തുടങ്ങി എല്ലാ മേഖലകളിലും രാജ്യത്തിന് മുന്നേറാൻ കഴിയുന്നതാണ് ശബരി റെയിൽ. നിലവിൽ എരുമേലിയിൽ അവസാനിക്കുന്ന രീതിയിലാണ് പാതയുടെ ആസൂത്രണം. ഇത് വിഴിഞ്ഞം വരെ നീ‌ട്ടിയാൽ വിഴിഞ്ഞം തുറമുഖത്തിന്‍റെ സാധ്യതകൾ മലയോര മേഖലയ്ക്ക് ഉപയോഗപ്പെടുത്താൻ സാധിക്കുമെന്ന് അശ്വന്ത് ഭാസ്കറും കോഓർഡിനേറ്റർ സക്കറിയ ദത്തോസും കൂട്ടിച്ചേർത്തു.

പ്രവേശനോത്സവം സംഘടിപ്പിച്ചു

ആറ്റിങ്ങൽ: കുന്നുവാരം യുപി സ്കൂളിലെ പ്രീപ്രൈമറി വിഭാഗം പ്രവേശനോത്സവം ആറ്റിങ്ങൽ നഗരസഭ വികസന സ്റ്റാൻഡിംഗ് കമ്മിറ്റി ചെയർപേഴ്സൻ എസ്. ഷീജ ഉദ്ഘാടനം ചെയ്തു. ചടങ്ങിൽ ഗവ. എൽപിഎസ് പ്രഥമാധ്യാപകൻ ജയകുമാർ മുഖ്യപ്രഭാഷണം നടത്തി. സ്കൂൾ മാനേജർ ശശിധരനായർ അധ്യക്ഷനായി. മുൻ പ്രധാനാധ്യാപകൻ മധു, പിടിഎ വൈസ് പ്രസിഡന്‍റ് അപർണയും എന്നിവർ ആശംസയർപ്പിച്ചു. അധ്യാപിക ഷീജു നന്ദി പറഞ്ഞു. പ്രീ പ്രൈമറി കുട്ടികൾക്ക് പഠനോപകരണങ്ങൾ നൽകി കിളിമാനൂർ: വാമനപുരം യുപി സ്കൂൾ പ്രവേശനോത്സവം വാർഡ് മെമ്പർ പി. ബിനിത കുമാരി ഉദ്ഘാടനം ചെയ്തു. പിടിഎ പ്രസിഡന്‍റ് എസ്.ആർ. രജികുമാർ അധ്യക്ഷനായ യോഗത്തിൽ ഹെഡ്മാസ്റ്റർ എ. ഹാഷിം സ്വാഗതം പറഞ്ഞു. രാജീവ്‌ പി. നായർ, വി. എസ്. അശോക്, സാബു ലക്ഷ്മൺ, ശ്രീഹരി തുടങ്ങിയവർ പങ്കെടുത്തു.

ഗ്രാമദീപം ഖാദി ഡിസൈന്‍ മാറ്റ് പ്രൊഡക്ഷന്‍ യൂണിറ്റ് ഉദ്ഘാടനം

വെള്ളറട: തദ്ദേശസ്വയംഭരണ സ്ഥാപനങ്ങളുമായി സഹകരിച്ചു പരമ്പരാഗതവ്യവസായങ്ങള്‍ പുനരുജ്ജീവിപ്പിക്കുന്നതിന്‍റെ ഭാഗമായി പെരുങ്കടവിള ബ്ലോക്ക് പഞ്ചായത്ത് സോഷ്യല്‍ വെല്‍ഫയര്‍ മിഷന്‍, നാഷണല്‍ ഡവലപ്‌മെന്‍റ് ഏജന്‍സിയുമായി സഹകരിച്ച് നടപ്പാക്കുന്ന ഡിസൈന്‍മാറ്റ് നിര്‍മാണ പദ്ധതി വെള്ളറട പഞ്ചായത്തിലെ മുണ്ടനാട് വാര്‍ഡില്‍ ആരംഭിച്ചു. പെരുങ്കടവിള ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയര്‍മാന്‍ ജെ. ഷൈന്‍കുമാര്‍ ഉദ്ഘാടനം ചെയ്തു. വാര്‍ഡ് മെമ്പര്‍ എ. ശ്രീകല അധ്യക്ഷയായിരുന്നു. സോഷ്യല്‍ വെല്‍ഫയര്‍ മിഷന്‍ കോ-ഓര്‍ഡിനേറ്റര്‍ ജെ. തുളസീധരന്‍ പദ്ധതി വിശദീകരണം നടത്തി. കുടുംബശ്രീ ചെയര്‍പേഴ്‌സണ്‍ സുധകുമാരി, ലിജി, ടി. ബീന എന്നിവര്‍ പ്രസംഗിച്ചു.

വികസിത് കൃഷി സങ്കല്‍പ് അഭിയാന്‍ കാന്പയിൻ

വെള്ളറട: വികസിത് കൃഷി സങ്കല്‍പ് അഭിയാന്‍ പദ്ധതിയുമായി ബന്ധപ്പെട്ട് അമ്പൂരി കൃഷി ഭവനില്‍ നടത്തിയ കാന്പയിൻ പുഞ്ചായത്ത് പ്രസിഡന്‍റ് വത്സലാ രാജു ഉദ്ഘാടനം ചെയ്തു. വൈസ് പ്രസിഡന്‍റ് തോമസ് മംഗലശേരി അധ്യക്ഷത വഹിച്ചു. മത്സ്യകൃഷി, മണ്ണ് അറിഞ്ഞുള്ള വളപ്രയോഗം, കാര്‍ഷിക യന്ത്രങ്ങള്‍, മൂല്യ വർധനവിന്‍റെ പ്രാധാന്യം, കേന്ദ്ര സർക്കാർ പദ്ധതികൾ, നൂതന സാങ്കേതിക വിദ്യകള്‍ എന്നിവയെക്കുറിച്ചുള്ള ക്ലാസുകള്‍ നടത്തി. ഐസിഎആര്‍ പ്രിന്‍സിപ്പല്‍ സയന്‍റിസ്റ്റ് കൃഷ്ണ സുകുമാരന്‍, കെഎയു അസിസ്റ്റന്‍റ് പ്രഫസര്‍ ഡോ: കിരണ്‍ കാര്‍ത്തിക് രാജ്, ഐസിഎആര്‍ കെവികെ മിത്രാനികേതന്‍ എന്‍ജിനീയര്‍ ജി. ചിത്ര, ഐസിഎആര്‍ കെവികെ മിത്രാനികേതന്‍ എസ്എംഎസ് ഡോ. ഐ. ദേവിക, പഞ്ചായത്ത് അംഗങ്ങളായ ബിന്ദു ബിനോയ്, ജയന്‍, കൃഷി ഓഫീസര്‍ എസ്. വിജയകുമാരന്‍, കൃഷി അസിസ്റ്റന്‍റുമാരായ പി. ഷാജി കുമാര്‍, എസ്. ബിനുകുമാര്‍ തുടങ്ങിയവര്‍ പ്രസംഗിച്ചു.

ക്രൈസ്റ്റ് നഗർ പബ്ലിക് സീനിയർ സെക്കൻഡറിയിൽ പ്രവേശനോത്സവം

മാറനല്ലൂർ: ക്രൈസ്റ്റ് നഗർ പബ്ലിക് സീനിയർ സെക്കൻഡറി സ്കൂളിൽ പ്രവേശനോത്സവം സംഘടിപ്പിച്ചു. റീജണൽ പാസ്പോർട്ട് ഓഫീസർ ജീവ മറിയ ജോയ് ഉദ്ഘാടനം ചെയ്തു. മാനേജർ ഫാ. സിറിയക് മഠത്തിൽ സിഎംഐ അധ്യക്ഷത വഹിച്ചു. പ്രിൻസിപ്പൽ ഫാ. ചാക്കോ പുതുകുളം സിഎംഐ സ്വാഗതം പറഞ്ഞു. വിശിഷ്ടാതിഥി, സ്കൂൾ മാഗസിൻ പ്രകാശനവും നിർവഹിച്ചു. 2024 അധ്യയന വർഷത്തെ മുഴുവൻ ദിനങ്ങളിലും ഹാജരായ അധ്യാപകർ, വിദ്യാർഥികൾ, അനധ്യാപകർഎന്നിവർക്ക് മാനേജർ പുരസ്കാരങ്ങൾ സമ്മാനിച്ചു. ഫിനാൻസ് അഡ്മിനിസ്ട്രേറ്ററും വൈസ് പ്രിൻസിപ്പലുമായ ഫാ. മാത്യു പുത്തൻ പുരയ്ക്കൽ സിഎംഐ അതിഥികൾക്കു സ്നേഹോപഹരം സമ്മാനിച്ചു. മജീഷ്യൻ മനു പൂജപ്പുരയുടെ മാജിക് ഷോയും, കുട്ടികളുടെ കലാപരിപാടികളും അരങ്ങേറി.

സ്കൂളിന്‍റെ ശോച്യാവസ്ഥയില്‍ യൂത്ത് കോണ്‍ഗ്രസ് പ്രതിഷേധം

വെള്ളറട: പെരുങ്കടവിള പഞ്ചായത്തിനു കീഴില്‍ അയിരൂർ വാര്‍ഡില്‍ വരുന്ന അയിരൂര്‍ എല്‍പിഎസില്‍ കഴിഞ്ഞ ദിവസം നടത്തിയ പ്രവേശനോത്സവത്തിൽ രക്ഷിതാക്കളും അധ്യാപകരും കുട്ടികളും എത്തിയപ്പോള്‍ ക്ലാസ് മുറികൾ വൃത്തിയാകുകയോ പരിസരം ശുചീകരിക്കുകയോ ചെയ്തില്ലെന്ന് ആരോപണം. ഉടൻതന്നെ രക്ഷിതാക്കളും നാട്ടുകാരും ചേര്‍ന്ന് പ്രധാനാധ്യാപകനെ കാര്യം അറിയിച്ചെങ്കിലും തനിക്ക് ഒന്നും ചെയ്യാൻ സാധിക്കില്ലെന്നറിയിച്ച് ഒഴിഞ്ഞു മാറുകയായിരുന്നു. എന്നാല്‍ ഇന്നലെ പുതിയതായി ചാര്‍ജെടുത്ത പ്രധാനാധ്യാപിക എം ബിന്ദുവിനെ യൂത്ത് കോണ്‍ഗ്രസ് പെരുങ്കടവിള മണ്ഡലം കമ്മറ്റിയുടെ ആഭിമുഖ്യത്തില്‍ ഉപരോധിച്ചു. കോണ്‍ഗ്രസ് മാരായമുട്ടം മണ്ഡലം കമ്മിറ്റി പ്രസിഡന്‍റ് ബിനില്‍ മണലുവിളയുടെ നേതൃത്വത്തില്‍ നടത്തിയ ഉപരോധത്തില്‍ യൂത്ത് കോണ്‍ഗ്രസ് ബ്ലോക്ക് സെകട്ടറി പെരുങ്കടവിള കൃഷ്ണശേഖര്‍, യൂത്ത് കോണ്‍ഗ്രസ് പെരുങ്കടവിള മണ്ഡലം വൈസ് പ്രസിഡന്‍റ് അഭിജിത്ത് ചുള്ളിയൂര്‍, തത്തമല നിതിന്‍, അയിരൂര്‍ ലക്ഷ്മി, കാക്കണം രാജേഷ്, അരുണ്‍ അയിരൂര്‍ എന്നിവര്‍ നേതൃത്വം നല്‍കി.

എംഡിഎംഎയും കഞ്ചാവും സഹിതം മൂന്നുപേർ അറസ്റ്റിൽ

നെടുമങ്ങാട്: എക്സൈസ് സംഘം നടത്തിയ പരിശോധനയിൽ എംഡിഎംഎയും കഞ്ചാവും മയക്കുമരുന്നുകൾ തൂക്കി നോക്കുന്നതിനുള്ള ഇലക്ട്രോണിക് ഡിജിറ്റൽ ത്രാസും പായ്ക്കിംഗ് കവറുകളുമായി മൂന്നുപേർ അറസ്റ്റിലായി. തേക്കട കൊഞ്ചിറ പ്ലാങ്കാല ഷമീർ മൻസിലിൽ നാസർ, നെടുമങ്ങാട് നെട്ടിറച്ചിറ ആസിയ മൻസിലിൽ എസ്. മുഹമ്മദ് മുസമ്മിൽ, കൊറ്റാമല ചെട്ടിയാൻകുന്ന് വീട്ടിൽ ബി. മനു എന്നിവരാണ് അറസ്റ്റിലായത്. എൻ ഡിപിഎസ് കേസുകളിൽ പ്രതിയായ നാസറിന്‍റെ പക്കൽ നിന്ന് 155 ഗ്രാം കഞ്ചാവ്, 0.28 ഗ്രാം എംഡിഎംഎ, ഇവ ഉപയോഗിക്കാനുള്ള 32 സിറിഞ്ചുകൾ, ഇലക്ട്രോണിക് ഡിജിറ്റൽ ത്രാസ്, പായ്ക്കിംഗ് കവറുകൾ എന്നിവ പിടികൂടി. മുഹമ്മദ് മുസമ്മിലിൽ നിന്ന് 20 ഗ്രാം കഞ്ചാവും മനുവിൽ നിന്ന് 25 ഗ്രാം കഞ്ചാവും പിടികൂടി. നെടുമങ്ങാട് എക്സൈസ് സർക്കിൾ ഇൻസ്പെക്ടർ എസ്.ജി . അരവിന്ദിന്‍റെ നേതൃത്വത്തിൽ നടന്ന റെയിഡിൽ അസിസ്റ്റന്‍റ് എക്സൈസ് ഇൻസ്പെക്ടർ സതീഷ് കുമാർ, സിഇഓമാരായ മഹേഷ്, നജിമുദ്ദീൻ, മുഹമ്മദ് മിലാദ്, ശ്രീജിത്ത് എന്നിവർ പങ്കെടുത്തു.

ഓട നിര്‍മാണം: ജനജീവിതം ദുസഹമായതായി ആക്ഷേപം

തിരുവല്ലം: പാച്ചല്ലൂര്‍ കുമളിയില്‍നിന്നും തിരുവല്ലം ജാനകി കല്യാണമണ്ഡപം വരെയുള്ള റോഡിലെ ഓടയുടെ നിര്‍മാണം ജനജീവിതം ദുരിതത്തിലാക്കിയെന്ന് ആരോപണം. കുമളി മുതല്‍ പ്ലാങ്ങല്‍ വരെ ഓടയുടെ പണി പാതിവഴിയില്‍ നിലച്ചു. സ്‌കൂളുകള്‍ തുറന്നതോടെ ഓട്ടോറിക്ഷ പോലും പ്രവേശിക്കാനാകാത്ത നിലയിലാണ് റോഡിന്‍റെ അവസ്ഥ. ഓടയുടെ നിര്‍മാണം നടന്ന ഭാഗങ്ങളില്‍ മേല്‍മൂടി പൂര്‍ണമായി സ്ഥാപിക്കാത്തതിനാല്‍ ദിനംപ്രതി നിരവധി പേര്‍ ഓടയില്‍ വീഴുന്നതായും പറയുന്നു. സ്‌കൂളുകളില്‍ പോകുന്ന കുട്ടികളും തൊഴില്‍ തേടിപോകുന്നവരും കാല്‍നട യാത്രികരുമാണ് ഏറ്റവും കൂടുതല്‍ ബുദ്ധിമുട്ട് അനുഭവിക്കുന്നത്. മഴ ശക്തമായതോടെ ധരിച്ചിരിക്കുന്ന വസ്ത്രങ്ങളില്‍ ചെളി പുരളാതെ ലക്ഷ്യസ്ഥാനങ്ങളില്‍ എത്താന്‍ സാധിക്കില്ലെന്നും പ്രദേശവാസികള്‍ പറയുന്നു. ഓടയുടെ പേരില്‍ റോഡ് കുത്തിപ്പൊളിക്കുന്നതുകാരണം മഴയുള്ള സമയങ്ങളില്‍ ഇരുചക്രവാഹന യാത്രികര്‍ അപകടത്തില്‍പെടുന്നതും നിത്യസംഭവവമായി മാറിയിരിക്കുകയാണ്. ജനങ്ങള്‍ അനുഭവിക്കുന്ന ബുദ്ധിമുട്ടുകള്‍ പരിഹരിക്കുന്നതിനു ബന്ധപ്പെട്ട അധികൃതര്‍ അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.

പൊതുനിരത്തുകളിൽ കോഴിമാലിന്യം വലിച്ചെറിഞ്ഞ നിലയിൽ

നെടുമങ്ങാട്: പനവൂർ, പുല്ലമ്പാറ, ആനാട് പഞ്ചായത്തുകൾ അതിർത്തി പങ്കിടുന്ന റോഡുകൾ കശാപ്പുശാലകളേക്കാൾ ദുരവസ്ഥയിൽ. എല്ലായിടത്തും കോഴിമാലിന്യം കവറുകളിൽ നിറച്ചു വലിച്ചെറിഞ്ഞ നിലയിലാണ്. രാവിലെ നിരത്തിലിറങ്ങുന്ന ഇരുചക്രവാഹന യാത്രക്കാർ പ്ലാസ്റ്റിക് കവറുകളിൽ തെന്നിവീ ണു പരിക്കേൽക്കുന്നതു തുടർക്കഥയാകുന്നു. അലഞ്ഞുതിരിയുന്ന തെരുവുനായ്ക്കൾ അവശിഷ്ടങ്ങൾ കടിച്ചുതൂക്കി പൊതുസ്ഥലങ്ങളിലും നീരുറവകളിലും കൊണ്ടിടുന്നതും ദുരിതം ഇരട്ടി പ്പിക്കുന്നു. പ്രമുഖ ഹോട്ടലുകൾ, കാറ്ററിംഗ് ഏജൻസികൾ, കൺവൻഷൻ സെന്‍ററുകൾ തുടങ്ങിയവരുമായി അംഗീകൃത മാലിന്യസംസ്കരണ കേന്ദ്രങ്ങളിൽ കോഴിവേസ്റ്റ് എത്തിച്ചു കൊടുക്കാൻ കരാർ എടുക്കുന്ന ചില സംഘങ്ങളാണ് നാടിനു ശാപമായി തീരുന്നത്. ആനാട് പഞ്ചായത്തിലെ മൂഴി-കൊല്ല റോഡ്, പനവൂർ പഞ്ചായത്തിലെ ചുള്ളാളം-വെള്ളാഞ്ചിറ റോ ഡ്, പുല്ലമ്പാറ പഞ്ചായത്തിലെ അഞ്ചാംകല്ല് - പരിക്കപ്പാറ റോഡ് എന്നിവിടങ്ങളിൽ കോഴി മാലിന്യം കുന്നുകൂടിയിട്ടുണ്ട്. പ്ലാസ്റ്റിക് ചാക്കുകളിൽ നിറച്ച കോഴി അവശിഷ്ടങ്ങളുമായി ഒന്നിലധികം വാഹനങ്ങളിൽ ഒരേസമയമെത്തി റോഡിന്‍റെ ഇരുവശങ്ങളിലും വലിച്ചെറിഞ്ഞ് കടന്നുപോവുകയാണ് പതിവ്. അർധരാത്രിയോടെ തുടങ്ങുന്ന മാലിന്യംതള്ളൽ പുലർച്ചെയോളം തുടരും. പൊലീസ് പട്രോളിംഗ് കാര്യക്ഷമമല്ലെന്നും വ്യാപകപരാതിയുണ്ട്.

പരിസ്ഥിതി പുരസ്കാരം കുമ്മനത്തിന്

തിരുവനന്തപുരം: കവയിത്രിയും പരിസ്ഥിതി പ്രവർത്തകയുമായിരുന്ന സുഗതകുമാരി ടീച്ചറുടെ പേരിൽ ഗാന്ധിഭവൻ ഇന്‍റർനാഷണൽ ട്രസ്റ്റ് ഏർപ്പെടുത്തിയ സുഗതകുമാരി ദേശീയ പരിസ്ഥിതി പുരസ് കാരത്തിന് മിസോറാം മുൻ ഗവർണറും പ്രമുഖ പരിസ്ഥിതി പ്രവർത്തകനും സുഗത വനം പദ്ധതിയുടെ ഉപജ്ഞാതാവുമായ കുമ്മനം രാജശേഖരൻ അർഹനായി. ഡോ. ജോർജ് ഓണക്കൂർ ചെയർമാനും എഴുമറ്റൂർ രാജരാജവർമ്മ, പത്മശ്രീ ഡോ. ഓമനക്കുട്ടി, മണക്കാട് രാമചന്ദ്രൻ എന്നിവർ അംഗങ്ങളുമായ കമ്മിറ്റിയാണ് പുരസ്കാരജേതാവിനെ തെരഞ്ഞെടുത്തത്. 25,000 രൂപയും ഫലകവും അടങ്ങുന്ന അവാർഡ് ഈ മാസം അവസാനം സമ്മാനിക്കും.

തീരദേശവാസികൾക്ക് ആഘോഷിക്കാൻ മലിനമായൊരു പരിസ്ഥിതി ദിനം

എസ്. രാജേന്ദ്രകുമാർ വിഴിഞ്ഞം: ഇന്ന് ലോക പരിസ്ഥിതി ദിനം, ആഗോള പാരിസ്ഥിതിക സന്തുലിതാവസ്ഥയും കാലാവസ്ഥ സുസ്ഥിരതയും ഉറപ്പുവരുത്തുകയെന്ന ലക്ഷ്യത്തോടെയുള്ള പരിസ്ഥിതി ദിനം. എന്നാൽ കടലും കരയും അപകടകരമായ രീതിയിൽ മലിനമായ ഒരു പരിസ്ഥിതി ദിനമാണ് ഇക്കുറി കേരളത്തിന് സമ്മാനിച്ചത്. കടലിൽ താണ കപ്പൽ സമ്മാനിച്ച പൊട്ടിപ്പൊളിഞ്ഞ കണ്ടെയ്നറുകളും കരക്കടിഞ്ഞ ചാക്കുകെട്ടുകളും അവയിൽനിന്നു ചിന്നിച്ചിതരിക്കിടക്കുന്ന കളിപ്പാട്ട നിർമാണത്തിനുപയോഗിക്കുന്ന പ്ലാസ്റ്റിക് തരികളും മറ്റ് ചപ്പുചവറുകളുമെല്ലാം തീരത്തെ മലിനമായപ്പോൾ കാത്സ്യം കാർബണേറ്റ് ഉൾപ്പെടെയുള്ള മാരകമായ രാസവസ്തുക്കൾ നിറച്ച കണ്ടെയ്നറുകളും ഓയിലുമെല്ലാം കടലിനെയും മലിനമാക്കി. കഴിഞ്ഞ മാസം 24ന് ആലപ്പുഴ തോട്ടപ്പള്ളി 15 നോട്ടിക്കൽ മൈൽ ഉൾക്കടലിൽ 50 മീറ്റർ ആഴത്തിൽ താണ എംഎസ്‌സി എ‌ൽസയിൽ നിന്നുള്ള കണ്ടെയ്നറുകളിൽ ചിലത് മൂന്നു ദിവസത്തിനിടെയാണ് ജില്ലയുടെ വിവിധ തീരങ്ങളിൽ അടിഞ്ഞത്. അതോടൊപ്പം പ്ലാസ്റ്റിക് തരികൾ നിറച്ച ചാക്കുകെട്ടുകൾക്കൊപ്പം തീരത്തെ മണൽപ്പരപ്പ് പ്ലാസ്റ്റിക് തരികൾ കൊണ്ടു നിറഞ്ഞു. പാരിസ്ഥിതികമായി ഏറെ അപകടകരമായ പ്ലാസ്റ്റിക് തരികളും മറ്റു മാലിന്യങ്ങളും നീക്കാൻ അന്ന് അധികൃതർ കാണിച്ച ആവേശം ഒറ്റദിവസം കൊണ്ട് അവസാനിച്ചു. ഹരിതകർമസേന, പോലീസ്, മറ്റ് സന്നദ്ധ സംഘടനകൾ എന്നിവരുടെ നേതൃത്വത്തിലായിരുന്നു കാടിളക്കിയുള്ള ഒറ്റ ദിവസശുചികരണം. എന്നാൽ തീരത്തെ വിഴുങ്ങിയ മാലിന്യനീക്കം എങ്ങുമെത്തിയില്ല. കടലിൽ ഒഴുകി നടന്ന നൂറുകണക്കിനു ചാക്കുകെട്ടുകൾ തീരത്തു വിവിധയിടങ്ങളിലായി വാരിക്കൂട്ടി. സംഭവം കഴിഞ്ഞു രണ്ടാഴ്ചയാകു ്പോഴും അവ അനാഥമായി കടൽക്കരയിലുണ്ട്. കാക്കയും തെരുവുനായ്ക്കളും കൊത്തിയും കടിച്ചുകീറിയും കൗതുകത്തോടെ കണ്ട ചാക്കുകളെ ആൾക്കാർ പൊട്ടിച്ചതും തീരത്തെ കൂടുതൽ മലിനമാക്കി. കൊച്ചിയിലെ ഒരു സ്വകാര്യ ഏജൻസിയിലെ തൊഴിലാളികളെത്തി ഉടൻ കൊണ്ടുപോകുമെന്നു കൊട്ടിഘോഷിച്ചവരേയും പിന്നെ കണ്ടില്ല. വർക്കല മുതലുള്ള പൊട്ടിപ്പൊളിഞ്ഞ കണ്ടെയ്നറുകളും അവയിൽ നിന്നു കിട്ടിയ വിലയുള്ള വസ്തുക്കളും വിഴിഞ്ഞത്തെ മാരിടൈം ബോർഡിന്‍റെ തുറമുഖത്ത് ഇന്നലെ മുതൽ എത്തിച്ച് തുടങ്ങി. ഇവിടെ കൂട്ടിയിടുന്നവയെ എത്ര ദിവസത്തിനുള്ളിൽ എങ്ങോട്ട് കൊണ്ടുപോകുമെന്നും അധികൃതർക്കറിയില്ല. കൂടാതെ ചാക്കുകെട്ടുകളുടെ കാര്യത്തിലും ചിതറിക്കിടക്കുന്ന വസ് തുക്കളുടെ കാര്യത്തിലും അവ്യക്തത തുടരുന്നുണ്ട്. തീരത്തടിഞ്ഞ പ്ലാസ്റ്റിക് തരികൾ ഉൾപ്പെടെയുള്ള മാലിന്യങ്ങൾ മത്സ്യങ്ങളുടെ ജീവനു ഭീഷണിയാകുമെന്ന് മത്സ്യത്തൊഴിലാളികൾ പറയുന്നു. ഗുരുതര പ്രത്യാഘാതമുണ്ടാക്കുന്ന തരത്തിലാണ് കടലിന്‍റെയും അവസ്ഥ. വിഴിഞ്ഞത്ത് നിന്ന് കൊച്ചിയിലേക്ക് പുറപ്പെട്ട എൽസയിൽ 643 കണ്ടെയ്നറുകൾ ഉണ്ടായിരുന്നതായി പറയപ്പെടുന്നു . ഇവയിൽ പതിനഞ്ചോളം കണ്ടെയ്നറുകളിൽ രാസവസ്തുക്കളും ഉണ്ടായിരുന്നു. ഇതിൽ പത്തിലൊന്ന് എണ്ണംപോലുംഇതുവരെയുംകരക്കടിഞ്ഞില്ല. രാസവസ്തുക്കൾ നിറച്ചതുൾപ്പെടെയുള്ള ബഹുഭൂരിപക്ഷം കണ്ടെയ്നറുകൾക്കും എന്ത് സംഭവിച്ചു എന്ന കാര്യവും അധികൃതർ പുറത്തുവിട്ടിട്ടില്ല.

റെയിൽവേ സ്റ്റേഷനിലെ വാഹന പാർക്കിംഗ് ഫീസിൽ ഇരട്ടിയിലേറെ വർധന

തിരുവനന്തപുരം: ഈ മാസം ഒന്നുമുതൽ റെയിൽവേ സ്റ്റേഷനിലെ വാഹന പാർക്കിംഗിന് ഈടാക്കുന്ന ഫീസ് കുത്തനെ വർധിപ്പിച്ചതായി പരാതി ഉയരുന്നു. പ്രതിമാസം 200 രൂപ ഇരുചക്ര വാഹനത്തിന് നൽകിയിരുന്ന സീസണ്‍ നിരക്കിൽ നിന്ന് 600 രൂപയിലേക്കാണ് വർധന വരുത്തിയിരിക്കുന്നത്. പകൽ കൊള്ളയാണ് ഇതിലൂടെ ലക്ഷ്യം വെയ്ക്കുന്നതെന്ന് ഫ്രണ്ട്സ് ഓണ്‍ റെയിൽസ് ജനറൽ സെക്രട്ടറി ജെ. ലിയോണ്‍സ് പറഞ്ഞു. പാർക്കിംഗ് ഫീസിൽ മാത്രമാണ് വർധനവ് ഉണ്ടായിരിക്കുന്നത്. സൗകര്യങ്ങളിൽ മാറ്റമൊന്നും ഉണ്ടായിട്ടില്ല. ഇരുചക്ര വാഹനം പാർക്ക് ചെയ്യാൻ മതിയായ റൂഫ് സൗകര്യം പോലും മിക്ക സ്റ്റേഷനിലുമില്ല. വാഹനത്തിന് യാതൊരുവിധ സുരക്ഷയും കരാർ ജീവനക്കാർ ഉറപ്പ് നൽകുന്നില്ല. സ്വന്തം ഉത്തരവാദിത്വത്തിലാണ് പലയിടത്തും വാഹനങ്ങൾ പാർക്ക് ചെയ്യുന്നത്. സിസിടിവി സൗകര്യം പോലുമില്ലാതെ ചെളിക്കുണ്ടിൽ പാർക്ക് ചെയ്യുന്ന സ്ഥലങ്ങളുമുണ്ട്. വാഹനത്തിനു കേടുപാടുകൾ വരുന്നതും പെട്രോൾ മോഷണം മുതൽ വാഹനങ്ങൾ വരെ മോഷണം പോകുന്നതു നിത്യ സംഭവങ്ങളാണ്. വീടുകളിൽനിന്നു സ്റ്റേഷനിലേക്കു പോകാൻ വാഹനം ഉപയോഗിക്കുന്നവരുണ്ട്. എറണാകുളം, തൃപ്പൂണിത്തുറ, തൃശൂർ, തിരുവനന്തപുരം പോലെ മേജർ സ്റ്റേഷനുകളിൽ നിന്ന് ഓഫീസിലേക്കു പോകാൻ കന്പനി വാഹനങ്ങൾ പാർക്ക് ചെയ്യുന്നവരുണ്ട്. ട്രെയിൻ ടിക്കറ്റ് കൂടാതെ അവർക്ക് പ്രതിമാസം 1,200 രൂപ എന്ന ഭീമമായ തുക ഇപ്പോൾ പാർക്കിംഗിനുവേണ്ടി മാത്രം നീക്കിവയ് ക്കേണ്ടി വരുന്നു. വലിയ സാന്പത്തിക ബാധ്യതയാണ് റെയിൽവേ യാത്രക്കാരിൽ അടിച്ചേൽപ്പിച്ചിരിക്കുന്നത്. പാർക്കിംഗ് കരാർ വ്യവസ്ഥകളും സുതാര്യമല്ല. ആവശ്യപ്പെടുന്ന എല്ലാ യാത്രക്കാരനും വാഹന സീസണ്‍ നൽകുന്നില്ല. എട്ടു മണിക്കൂറിൽ താഴെ പാർക്ക് ചെയ്യുന്നവർക്കു മാത്രമേ ചില സ്ഥലങ്ങളിൽ സീസണ്‍ കൊടുക്കുന്നുള്ളു. എട്ടു മണിക്കൂറിൽ മടങ്ങിയെത്തുക സാധാരണ തൊഴിൽ ചെയ്യുന്നവരെ സംബന്ധിച്ചിടത്തോളം അസാധ്യമാണ്. എല്ലാവർക്കും സീസണ്‍ നൽകണമെന്ന് കരാറിലില്ലെന്നാണ് ജീവനക്കാർ പറയുന്നത്.

പരിസ്ഥിതിദിനാചരണം ഇന്ന്; പതിവുപോലെ വൃക്ഷത്തൈ നടും

നെയ്യാറ്റിന്‍കര: പരിസ്ഥിതി ദിനാചരണത്തിന്‍റെ ഭാഗമായി ഇന്നു നാടെങ്ങും വൃക്ഷത്തൈനടീലും പ്രതിജ്ഞയെടുക്കലും അരങ്ങേറും. അതേ സമയം, ഈ ചെടികള്‍ പരിപാലിക്കുന്നതു സംബന്ധിച്ച് തുടര്‍നടപടികള്‍ പലയിടത്തും നടക്കാറില്ലെന്നാണു നാട്ടുവര്‍ത്തമാനം. പരിസ്ഥിതി ദിനാചരണത്തിന്‍റെ ഭാഗമായി നെയ്യാറ്റിന്‍കര ജനറല്‍ ആശുപത്രിയില്‍ വര്‍ഷങ്ങള്‍ക്കുമുന്പു നട്ടുപിടിപ്പിച്ച വൃക്ഷത്തൈകള്‍ സംരക്ഷണക്കുറവു കാരണം നശിച്ചുപോയ കഥ നാട്ടില്‍ പാട്ടാണ്. നെയ്യാറ്റിന്‍കര താലൂക്കിലെ പ്രശസ്തമായൊരു സര്‍ക്കാര്‍ വിദ്യാലയത്തില്‍ കവയിത്രി സുഗതകുമാരി നട്ടു പിടിപ്പിച്ച വൃക്ഷത്തൈ അടുത്ത ദിവസം പകലിനു മുന്പു തന്നെ വേരോടെ പിഴുതെടുത്ത് കളഞ്ഞതിന്‍റെ വിവാദവും ഇവിടത്തുകാര്‍ വിസ്മരിച്ചിട്ടില്ല. പല ശീര്‍ഷകങ്ങളില്‍ ഇന്നും പതിവുപോലെ നാട്ടില്‍ പലയിടത്തും വൃക്ഷത്തൈ നടീലും പരിസ്ഥിതി സംരക്ഷണ പ്രതിജ്ഞ ചൊല്ലലും നടക്കും. നെയ്യാറ്റിന്‍കര നഗരസഭയും കൃഷി ഭവനും സംയുക്തമായി നടത്തുന്ന പരിസ്ഥിതി ദിനാചരണം ഊരൂട്ടുകാല ഗവ. എംടി എച്ച്.എസില്‍ നടക്കും. സെന്‍റ് തെരേസാസ് എല്‍പി സ്കൂളിലും ഗവ. ബോയ്സ് ഹയര്‍സെക്കന്‍ഡറി സ്കൂളിലും പരിസ്ഥിതി ദിനാഘോഷം സംഘടിപ്പിച്ചിട്ടുണ്ട്. നെയ്യാറ്റിന്‍കര ഗവ. ഇന്‍സ്റ്റിറ്റ്യൂട്ട് ഓഫ് ടീച്ചര്‍ എഡ്യൂക്കേഷനില്‍ രാവിലെ പത്തിനു ചേരുന്ന പരിസ്ഥിതി ദിനാഘോഷം ബാലാവകാശ കമ്മിഷന്‍ അംഗം ഡോ. എഫ് വില്‍സണ്‍ ഉദ്ഘാടനം ചെയ്യും.

ക്രൈസ്റ്റ്‌നഗര്‍ സ്‌കൂളില്‍ സൈക്കിള്‍ റാലിയും കൂട്ടയോട്ടവും

തിരുവനന്തപുരം: ക്രൈസ്റ്റ് നഗര്‍ സെന്‍ട്രല്‍ സ്‌കൂളിലെ ഫിസിക്കല്‍ എഡ്യൂക്കേഷന്‍ വിഭാഗത്തിന്‍റെ ആഭിമുഖ്യത്തില്‍ ഗ്ലോബല്‍ റണ്ണിംഗ് ദിനവും ലോക സൈക്കിള്‍ ദിനവും ആചരിച്ചു. പരിപാടിയുടെ ഫ്ലാഗ് ഓഫ് സബ് കളക്ടര്‍ ഒ.വി. ആല്‍ഫ്രഡ് നിര്‍വഹിച്ചു. കുട്ടികളെ വ്യായാമത്തിന്‍റെ പ്രധാന്യം തിരിച്ചറിഞ്ഞ് എല്ലാ കായിക മേഖലകളിലും പങ്കെടുപ്പിക്കുക, കുട്ടികളിലെ ലഹരി ഉപയോഗം ഇല്ലാതാക്കുക എന്നീ ലക്ഷ്യത്തോടെയാണ് പരിപാടി സംഘടിപ്പിച്ചത്. സ്‌കൂളില്‍നിന്നും പുറപ്പെട്ട റാലി കവടിയാര്‍, വെള്ളയമ്പലം, മ്യൂസിയം ചുറ്റി തിരികെ സ്‌കൂളില്‍ സമാപിച്ചു. സ്‌കൂള്‍ പ്രിന്‍സിപ്പല്‍ ഫാ. സേവ്യര്‍ അമ്പാട്ട് സിഎംഐ, ക്രൈസ്റ്റ് നഗര്‍ ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് മാനേജര്‍ ഫാ. പോള്‍ മങ്ങാട് സിഎംഐ, ക്രൈസ്റ്റ് നഗര്‍ ഇംഗ്ലീഷ് ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ഫാ. ജിമ്മി മൂലയില്‍ തുടങ്ങിയവര്‍ പങ്കെടുത്തു.

ഇന്നു ലോക പരിസ്ഥിതി ദിനം : പെൺപരമ്പരയുടെ പൊലിമയിൽ അക്കരവിളാകം കാവ്..!

കോട്ടൂർ സുനിൽ വിളപ്പിൽശാല: ജൈവ വൈവിധ്യങ്ങളുടെ കലവറ എന്നതിലുപരി പെൺപരമ്പര കാക്കുന്നുവെന്ന അപൂർവതയുമുണ്ട് അക്കരവിളാകം കാവിന്. രാജഭരണ കാലത്ത് കരം ഒഴിവാക്കി കൊടുത്ത 28.5 സെന്‍റിലാണ് നിബിഡവനത്തിന്‍റെ പുറം കാഴ്ച സമ്മാനിച്ച് കാവ് നിലനിൽക്കുന്നത്. കാവു തീണ്ടാതെ തലമുറകൾക്കായി കാക്കാൻ സ്ത്രീകളെ കാരണവർ സ്ഥാനത്തേറ്റുന്നതാണ് ഇവിടുത്തെ പൈതൃകം. നൂറ്റാണ്ടുകളുടെ പെൺചരിതം അവകാശപ്പെടുന്ന വെളിയന്നൂർ അക്കരവിളാകം കാവിന്റെ ഇപ്പോഴത്തെ കാരണവർ ഓമനയമ്മ (86) ആണ്. 1984 ൽ കുഞ്ഞിലക്ഷ്മിയമ്മ പാർവതിയമ്മ മരിച്ചതോടെയാണ് അക്കരവിളാകം തറവാട്ടിലെ സ്ത്രീകളിൽ മുതിർന്നവരായ ഓമനയമ്മയ്ക്ക് കാരണവർ സ്ഥാനം കിട്ടിയത്. നൂറുവർഷം മുൻപ് ഓമനയമ്മയുടെ അച്ഛൻ വൈദ്യർ കൃഷ്ണപിള്ള നാഗത്താൻ കാവിൽ ഔഷധ സസ്യങ്ങൾ നട്ടുനനച്ചു. അതോടെ അക്കരവിളാകം കാവ് ഔഷധ സസ്യങ്ങളുടേയും ഉദ്യാനമായി. പെരുമ്പള്ളിമൂഴി, താഴത്തുവീട്, അക്കരവിളാകം എന്നിങ്ങനെ മൂന്നു കുടുംബങ്ങൾക്കു മുന്നൂറു വർഷം മുൻപാണു ഭണ്ഡാര വകയായി 50 ഏക്കർ ഭൂമി വന്നുചേർന്നത്. കൂട്ടുകുടുംബമായാണ് ഇവർ മൂന്നു കുടുംബങ്ങളും അറയും നിരയും തെക്കതുമുള്ള വെളിയന്നൂരിലെ തറവാട്ടിൽ പാർത്തിരുന്നത്. ഒന്നര നൂറ്റാണ്ട് മുൻപ് കുടുംബങ്ങൾ ഭാഗംവച്ച് പിരിഞ്ഞപ്പോൾ അക്കരവിളാകം കുടുംബത്തിന്‍റെ ഓഹരിയിലാണ് കാവും കുളവും വന്നത്. കാവു തീണ്ടരുതെന്ന പൂർവീകരുടെ ഓർപ്പെടുത്തൽ അവർ മറന്നില്ല. ഓഹരിയിൽ ഉണ്ടായിരുന്ന കാവു മാത്രം വീതിച്ചെടുത്തില്ല. കുടുംബത്തിലെ തലമൂത്ത സ്ത്രീ അംഗം കാവിനെ കാക്കണമെന്ന ആചാരം അലിഖിത നിയമമാക്കി. ഇന്നും അതു തെറ്റാതെ പിൻതുടരുകയാണ് അക്കരവിളാകത്തുകാർ. ആരയാൽ, പേരാൽ, പാല, മൊട്ടൽ, പോങ്ങ്, ചൂരൽ, അത്തി, ചെമ്പകം തുടങ്ങി എണ്ണിയാലൊടുങ്ങാത്ത വൃക്ഷലാതികൾ. അശോകം, തഴുതാമ, നന്തിയാർ, കച്ചോലം, സർപ്പഗന്ധി, ആവണക്ക് എന്നിങ്ങനെ ഔഷധ സസ്യങ്ങൾ. നാഗർ പ്രതിഷ്ഠയും മന്ത്രമൂർത്തി സ്ഥാനവും. കാവിനു കണ്ണാടിയെന്നോണം തെളിനീർ ചുരത്തുന്ന കുളം. ആകെക്കൂടി ഗൃഹാതുരത്വത്തിന്‍റെ അടയാളമാണ് അക്കരവിളാകം കാവ്. പാലപ്പൂവിന്‍റേയും ചെമ്പകമൊട്ടിന്‍റേയും സുഗന്ധം പരക്കുന്ന നാട്ടുവഴിയിലൂടെ കാവിനരികിലെത്തിയാൽ ആകാശക്കീഴിലെ ജൈവ വൈവിധ്യം കണ്ണിനും മനസിനും കുളിരേകും. ഉപ്പനും പഞ്ചവർണക്കിളിയും കാട്ടുകുരുവിയും മൂളിപ്പാട്ടു പാടുന്ന കാവ്. ഇരുപതിൽപ്പരം ഇനങ്ങളിലുള്ള പക്ഷികളും അത്രത്തോളം ശലഭ ജീവികളും ഈ കാവിൽ വസിക്കുന്നുണ്ടെന്നു കാരണവർ ഓമനയമ്മ പറയുന്നു. 2013-ൽ വനം വകുപ്പ് കാവ് സംരക്ഷണ പദ്ധതിയിൽ അക്കരവിളാകം കാവിനെ ഉൾപ്പെടുത്തി. വർഷം തോറും വനം വകുപ്പ് 20,000 രൂപ കാവിന്‍റെ സംരക്ഷണത്തിനായി നൽകുന്നുണ്ട്. പ്രായാധിക്യത്താൽ കാഴ്ചയ്ക്ക് അൽപ്പം മങ്ങലുണ്ടെങ്കിലും കാവിലെ കാര്യങ്ങൾ മുടക്കാൻ ഓമനയമ്മ ഒരുക്കമല്ല. തലമുറ കൈമാറിയ കാരണവത്തി സ്ഥാനം ദൈവ നിയോഗമാണ് അക്കരവിളാകത്തെ അമ്മമാർക്ക്.

മുങ്ങിയ എൽസ കപ്പലിനെതിരേ കേസെടുക്കണമെന്നു സ്വതന്ത്ര മത്സ്യത്തൊഴിലാളി ഫെഡറേഷൻ

തിരുവനന്തപുരം: മുങ്ങിയ എംഎസ്‌സി എൽസ-3 കപ്പലിന്‍റെ കന്പനിക്കെതിരേ സംസ്ഥാന സർക്കാർ കേസ് എടുക്കാത്തതിൽ ദുരൂഹതയുണ്ടെന്നു സ്വതന്ത്ര മത്സ്യത്തൊഴിലാളി ഫെഡറേഷൻ സംസ്ഥാന പ്രസിഡന്‍റ് പി.സ്റ്റെല്ലസ്. മുങ്ങിയ കപ്പലും കണ്ടെയ്നറുകളും തീരക്കടലിലും കരയിലും കിടക്കുന്നതു കാരണം മത്സ്യത്തൊഴിലാളികൾക്കു മത്സ്യബന്ധനത്തിനു പോകാൻ തടസമാകുന്ന സാഹചര്യമാണ് നിലവിലുള്ളത്. ഇതിനെതിരെ നടപടിയെടുക്കാനും പരിഹാരം കണ്ടെത്താനും സംസ്ഥാന സർക്കാർ എന്തേ വൈകുന്നത്. മത്സ്യതൊഴിലാളികൾ ഇപ്പോൾ നേരിടുന്ന തൊഴിൽ നഷ്ടവും മറ്റു ഉപകരണങ്ങൾക്കുള്ള നഷ്ടപരിഹാരത്തുകയും കപ്പൽ കന്പനിയിൽ നിന്ന് കേന്ദ്ര- സംസ്ഥാന സർക്കാരുകൾ ഇടപെട്ടു വാങ്ങിക്കൊടുക്കാനുള്ള നടപടി ഉണ്ടാകണമെന്നും സ്റ്റെല്ലസ് ആവശ്യപ്പെട്ടു. photo: തിരുവനന്തപുരം വേളി പൊഴിമുഖത്ത് അടിഞ്ഞ എൽസ കപ്പലിലെ കണ്ടെയ്നറുകളിലെ പ്ലാസ്റ്റിക് തരികൾ ശേഖരിച്ച് മാറ്റാൻ ശ്രമിക്കുന്ന ഗുജറാത്തിലെ സ്വകാര്യ കമ്പിനിയുടെ തൊഴിലാളികൾ. - ടി.സി. ഷിജുമോൻ.

ദളിത് യുവതിക്കു സ്റ്റേഷനിൽ മാനസിക പീഡനം : പേരൂർക്കട സ്റ്റേഷനിലെ മുഴുവൻ പോലീസുകാരുടെയും മൊഴിയെടുക്കും

തിരുവനന്തപുരം: മാലമോഷണക്കുറ്റം ആരോപിച്ചു ബിന്ദു എന്ന ദളിത് യുവതിയെ പേരൂർക്കട പോലീസ് സ്റ്റേഷനിൽ തുടർച്ചയായി 21 മണിക്കൂർ വെള്ളം പോലും നൽകാതെ അപഹസിക്കുകയും മാനസികമായി പീഡിപ്പിക്കുകയും ചെ യ്ത സംഭവത്തിൽ പേരൂർക്കട സ്റ്റേഷനിലെ മുഴുവൻ പോലീസുകാരുടെയും മൊഴി പ്രത്യേക അന്വേഷണ സംഘം രേഖപ്പെടുത്തും. സ്റ്റേഷനിൽ ആ ദിവസമുണ്ടായിരുന്ന മറ്റു പ്രതികളുടെയും മൊഴി പ്രത്യേക അന്വേഷണ സംഘത്തലവൻ പത്തനംതിട്ട ജില്ലാ ക്രൈംബ്രാഞ്ച് ഡിവൈഎസ്പി കെ.എ. വിദ്യാധരന്‍റെ നേതൃത്വത്തിൽ രേഖപ്പെടുത്തും. മാലമോഷണക്കുറ്റം ആരോപിച്ചു ബിന്ദുവിനെ പേരൂർക്കട പോലീസ് സ്റ്റേഷനിൽ കൊണ്ടു വന്നശേഷം സെല്ലിനു മുന്നിൽ കടലാസ് വിരിച്ച് ഇരുത്തിയെന്നാണു മൊഴി. ഒരു കഞ്ചാവ് കേസുമായി ബന്ധപ്പെട്ട പ്രതി ഈ ദിവസം സെല്ലിന് അകത്തുണ്ടായിരുന്നു. സ്റ്റേഷനിലെ സിസിടിവി ദൃശ്യങ്ങൾ ഹാർഡ് ഡിസ്ക് അടക്കം പത്തനംതിട്ട ജില്ലാ ക്രൈംബ്രാഞ്ച് ഡിവൈഎസ്പിയുടെ നേതൃത്വത്തിൽ ആദ്യം തന്നെ ശേഖരിച്ചിരുന്നു. സിസിടിവി ദൃശ്യങ്ങളിൽ ഏതെങ്കിലും തരത്തിൽ തിരിമറി നടത്താതിരിക്കാനാണ് ആദ്യമേ തന്നെ ദൃശ്യങ്ങൾ ശേഖരിച്ചത്. സ്റ്റേഷനിലെ സിസിടിവി ദൃശ്യങ്ങൾ അന്വേഷണ സംഘം പരിശോധിച്ചു വരികയാണ്. കഴിഞ്ഞ ദിവസം ബിന്ദുവിന്‍റെ വിശദമായ മൊഴിയും വീട്ടിലെത്തി രേഖപ്പെടുത്തിയിരുന്നു. ചൊവ്വാഴ്ച രാവിലെ ആരംഭിച്ച മൊഴിയെടുപ്പു വൈകുന്നേരത്തോടെയാണ് അവസാനിച്ചത്. സിസിടിവി ദൃശ്യങ്ങൾക്കൊപ്പം ബിന്ദുവിന്‍റെ മൊഴികളും വിശദമായി പരിശോധിച്ച ശേഷമാകും ആരോപണ വിധേയരായ പോലീസ് ഉദ്യോഗസ്ഥരെ അടക്കം ചോദ്യം ചെയ്യുക. സ്റ്റേഷനിലെ മറ്റു പോലീസ് ഉദ്യോഗസ്ഥരുടെയും മൊഴി രേഖപ്പെടുത്തും. കഴിഞ്ഞ ദിവസം നടന്ന മൊഴിയെടുപ്പിൽ സ്റ്റേഷനിൽ നേരിട്ട ക്രൂര പീഡനങ്ങൾ ബിന്ദു അന്വേഷണ സംഘത്തിനു വിശദ മൊഴിയായി നൽകി. പോലീസുകാർ ഉപയോഗിച്ച മോശമായ ഭാഷ, അപമാനം, വെള്ളം കുടിക്കാൻ നൽകാതിരുന്നത്, മോഷണക്കുറ്റം ആരോപിക്കൽ, ഭർത്താവിനേയും മക്കളേയും മോഷണക്കേസിൽ പ്രതിചേർക്കുമെന്നു ഭീഷണിപ്പെടുത്തൽ അടക്കം പേരൂർക്കട സ്റ്റേഷനിൽ നടന്ന വിവരങ്ങൾ ബിന്ദു വിശദമായി അന്വേഷണ സംഘത്തോടു വിവരിച്ചിരുന്നു. ജൂണ്‍ 25നകം അന്വേഷണം പൂർത്തിയാക്കി റിപ്പോർട്ട് നൽകാനാണ് അന്വേഷണ സംഘത്തലവനായ ഡിവൈഎസ്പിക്കു തിരുവന്തപുരം മേഖലാ ഐജി ശ്യാംസുന്ദർ നൽകിയിട്ടുള്ള നിർദേശം. സംഭവത്തിൽ ഒരു എസ്ഐയേയും ഗ്രേഡ് എഎസ് ഐയേയും സസ്പെൻഡ് ചെയ്തിരുന്നു. സ്റ്റേഷൻ ചുമതലയുണ്ടായിരുന്ന എസ്എച്ച്ഒയെ കഴിഞ്ഞ ആഴ്ച സ്ഥലംമാറ്റി.

അഴീക്കോട് ജന്മശതാബ്ദി

നേമം: ഡോ. സുകുമാർ അഴീ ക്കോട് സ്മാരക ദേശീയ ട്രസ്റ്റിന്‍റെ ആഭിമുഖ്യത്തിൽ ജന്മശതാബ്ദി ആഘോഷവും ലഹരി വിരുദ്ധ ബോധവത്കരണവും നടത്തി. പ്രസിഡന്‍റ് ശാസ്താംതല സഹദേവന്‍റെ അധ്യക്ഷതയിൽ ചേർന്ന സമ്മേളനം ഐഎസ് ആർഒ മുൻ ചെയർമാൻ ഡോ. എസ്. സോമനാഥ് ഉദ്ഘാടനം ചെയ്തു. മുൻ എംഎൽഎ പിരപ്പൻകോട് മുരളി, മുൻ ഡെപ്യൂട്ടി ഡ്രഗ്സ് കൺട്രോളർ ഡോ. പി.കെ. ശ്രീകുമാർ, ജനറൽ സെക്രട്ടറി പനവിള രാജശേഖരൻ, ജി.വി. ദാസ്, എസ്. ദിനേശ് നായർ എന്നിവർ പ്രസംഗിച്ചു. ഉന്നതവിജയം നേടിയ വിദ്യാർഥികൾക്ക് ഡോ. എസ്. സോമനാഥ് ഉപഹാരങ്ങൾ സമ്മാനിച്ചു.

അധ്യയന വർഷത്തിന്‍റെ ഉദ്ഘാടനവും സീനിയർ സെക്കൻഡറി പ്രഖ്യാപനവും

വെള്ളായണി: ലിറ്റിൽ ഫ്ളവർ വിദ്യാവിഹാർ ഐസിഎസ്ഇ സ്കൂളിലെ പുതിയ അധ്യയന വർഷത്തിന്‍റെ ഉദ്ഘാടനവും പുതുതായി അനുവദിച്ച സീനിയർ സെക്കൻഡറി വിഭാഗത്തിന്‍റെ പ്രഖ്യാപനവും സ്കൂൾ ഓഡിറ്റോറിയത്തിൽ നടത്തി. റിട്ട. പ്രിൻസിപ്പൽ ഫാ. തോമസ് തടത്തിൽ ഉദ്ഘാടനം നിർവഹിച്ച ചടങ്ങിൽ അസിസ്റ്റന്‍റ് സുപ്പീരിയർ ജനറൽ സിസ്റ്റർ ട്രീസ എംഎൽഎഫ് സീനിയർ സെക്കൻഡറി വിഭാഗത്തിന്‍റെ അംഗീകാരം പ്രഖ്യാപിച്ചു. മാനേജർ സിസ്റ്റർ റെൻസിലിൻ, പ്രിൻസിപ്പൽ സിസ്റ്റർ ദീപ ജോർജ്, സ്റ്റാഫ് സെക്രട്ടറി മഞ്ജുഷ, പിടിഎ പ്രസിഡന്‍റ് സരിതാ ബാബു എന്നിവർ പങ്കെടുത്തു.

സ്കൂൾ ബസ് മറിഞ്ഞു; വിദ്യാർഥികൾക്കു പരിക്ക്

കിളിമാനൂർ: നഗരൂരിൽ 25 കുട്ടികളുമായി പോയ സ്‌കൂൾ ബസ് വയലിലേക്കു മറിഞ്ഞു, വിദ്യാർഥികൾക്കു പരിക്ക്. വെള്ളല്ലൂർ ഗവൺമെന്‍റ് സ്കൂളിലെ ബസാണ് അപകടത്തിൽപ്പെട്ടത്. ഇന്നലെ രാവിലെ ഒമ്പതരയോടെ കുട്ടികളുമായി പോയ ബസ് നിയന്ത്രണം നഷ്ടപ്പെട്ടു റോഡിൽനിന്നു വയലിലേക്ക് മറിയുകയായിരുന്നു. അപകടത്തിൽ രണ്ടു കുട്ടികൾക്ക് പരിക്കേറ്റു. ഒരു കുട്ടിയുടെ കൈ ബസിനടിയിൽ കുടുങ്ങുകയായിരുന്നു. 23 കുട്ടികൾക്ക് സാരമായ പ്രശ്നങ്ങളില്ല. അപകടം നടന്നതിന് പിന്നാലെ നാട്ടുകാരുൾപ്പെടെയുള്ളവർ ചേർന്നാണ് ബസിലുണ്ടായിരുന്ന കുട്ടികളെ പുറത്തെത്തിച്ചത്. എല്ലാ കുട്ടികളെയും കേശവപുരം സാമൂഹികാരോഗ്യ കേന്ദ്രത്തിലേക്ക് മാറ്റി. റോഡിനു വീതികുറഞ്ഞ ഭാഗമാണെന്നും നനവുണ്ടായിരുന്നുവെന്നും നഗരൂർ പഞ്ചായത്തംഗം എം. രഘു പറഞ്ഞു. മഴ കാരണം റോഡിലെ ചെളിയിൽ വാഹനം തെന്നി നീങ്ങിയതാണ് അപകടകാരണമെന്നും റോഡിലെ പ്രശ്നം പരിഹരിക്കുമെന്നും രഘു വ്യക്തമാക്കി.

കാട്ടുപന്നി ഇടിച്ച് ഇരുചക്രവാഹന യാത്രികനു പരിക്ക്

പാലോട്: കാട്ടുപന്നി ഇടിച്ച് ഇരുചക്ര വാഹന യാത്രക്കാരന് പരിക്കേറ്റു. കരിമൺകോട് ടിബിജി ജംഗ്ഷനിൽ ബ്ലോക്ക് നമ്പർ രണ്ട് ആലയിൽ ഉല്ലാസി( 49)നാണു പരിക്കേറ്റത്. കഴിഞ്ഞദിവസം തെങ്കാശി പാതയിൽ ഇലവുപാലം സ്വാമി നഗറിനു സമീപത്ത് ഉല്ലാസ് സഞ്ചരിച്ചിരുന്ന ടൂവീലറിൽ കാട്ടുപന്നി വന്നിടിക്കുകയായിരുന്നു. വീഴ്ചയിൽ പരിക്കേറ്റ ഉല്ലാസ് ആശുപത്രിയിൽ ചികിത്സ തേടി. ഈ പ്രദേശങ്ങളിൽ കാട്ടാനയുടെയും കാട്ടുപോത്തിന്‍റെയും കാട്ടുപന്നിയുടെയും ആക്രമണം രൂക്ഷമാണ്.

നെടുമങ്ങാട് ബസ് സ്റ്റാൻഡില്‍നിന്നും സര്‍വീസുകള്‍ ഇന്നുമുതൽ പുനരാരംഭിക്കും: മന്ത്രി

നെടുമങ്ങാട്: നവീകരിച്ച നെടുമങ്ങാട് കെഎസ്ആർടിസി ഡിപ്പോയിൽ ഇന്നുമുതല്‍ സര്‍വീസുകള്‍ പുനരാരംഭിക്കുമെന്നു മന്ത്രി ജി.ആർ. അനിൽ അറിയിച്ചു. ഒരു മാസമായി ബസ് സർവീസുകൾ നഗരത്തിന്‍റെ വിവിധ സെക്ടറുകളിലായി ക്രമീകരിച്ചിരിക്കുകയായിരുന്നു. ബസ് യാര്‍ഡ്, മെക്കാനിക്കല്‍ ഏരിയ എന്നിവയുടെ ശോച്യാവസ്ഥയും യാത്രക്കാര്‍ക്കുണ്ടാകുന്ന ബുദ്ധിമുട്ടുകളും പരിഹരിക്കുന്നതിനായി സ്ഥലം എംഎൽഎയും മന്ത്രിയുമായ അഡ്വ. ജി.ആർ. അനിലിന്‍റെ ആസ്തി വികസന ഫണ്ടില്‍നിന്നും 80 ലക്ഷം രൂപ വിനിയോഗിച്ചാണ് ബസ് സ്റ്റാൻഡ് നവീകരിച്ചത്. ബസ് സ്റ്റാൻഡിലെ സർവീസ് ഏരിയ കൃത്യമായി ക്രമപ്പെടുത്തിയതായും പോലീസ് എയിഡ് പോസ്റ്റിനു സ്ഥിരം കൗണ്ടര്‍ സജീകരിച്ചിട്ടുള്ളതായും മന്ത്രി കൂട്ടിച്ചേര്‍ത്തു. ഇതു കൂടാതെ സിസിടിവി നിരീക്ഷണത്തിനായി എംഎല്‍എ ഫണ്ടില്‍ നിന്നും 10 ലക്ഷം രൂപ അനുവദിച്ചിട്ടുണ്ട്. ഡിപ്പോയുടെ പ്രവേശന കവാടം നിർമാണം അന്തിമഘട്ടത്തിലാണ്. നവീകരണ പ്രവര്‍ത്തനങ്ങളെല്ലാം പൂർത്തിയാക്കിയാലുടന്‍ മന്ത്രി കെ.ബി. ഗണേഷ് കുമാർ കെഎസ്ആര്‍ടിസി ബസ് സ്റ്റാൻഡ് നാടിനു സമർപ്പിക്കുമെന്നും മന്ത്രി ജി.ആര്‍. അനില്‍ പറഞ്ഞു.

യുവതിയുടെ ദൃശ്യങ്ങൾ ഫോണിൽ പകർത്തിയ യുവാവ് അറസ്റ്റിൽ

മെഡിക്കൽ കോളജ്: യുവതി കുളിക്കുന്ന ദൃശ്യങ്ങൾ മൊബൈൽ ഫോണിൽ പകർത്തിയ യുവാവിനെ മെഡിക്കൽ കോളജ് പോലീസ് അറസ്റ്റ് ചെയ്തു. പത്തനംതിട്ട മല്ലപ്പള്ളി എഴുമറ്റൂർ ചാലപ്പള്ളി പുത്തൻപുരയ്ക്കൽ വീട്ടിൽ പി.എസ് നിധിൻ കൃഷ്ണ (19) യാണ് അറസ്റ്റിലായത്. കഴിഞ്ഞ ദിവസമാണ് കേസിന് ആസ്പദമായ സംഭവം. മെഡിക്കൽ കോളജ് സ്റ്റേഷൻ പരിധിയിൽ സെന്‍റ് മേരീസ് ലെയിനിലായി രുന്നു സംഭവം. കുളിമുറിക്ക് മുകളിൽ മൊബൈൽ ഫോൺ കണ്ടെത്തിയതോടെ യുവതി ഇത് പിടിച്ചു വാങ്ങി ദൃശ്യങ്ങൾ നീക്കം ചെയ്യുകയായിരുന്നു. യുവതി നൽകിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തിനൊടുവിലാണ് നിധിൻ കൃഷ്ണയെ പോലീസ് കസ്റ്റഡിയിലെടുത്തത്. അറസ്റ്റിലായ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

ഐബി ഉദ്യോഗസ്ഥയുടെ ആത്മഹത്യ: പ്രതി മൂന്നു ദിവസത്തെ കസ്റ്റഡിയിൽ

തിരുവനന്തപുരം: തിരുവനന്തപുരം വിമാനത്താവളത്തിൽ ജോലി ചെയ്തിരുന്ന ഐബി ഉദ്യോഗസ്ഥ ആത്മഹത്യ ചെയ്ത കേസിലെ പ്രതി സുകാന്തിനെ മൂന്നു ദിവസത്തെ പോലീസ് കസ്റ്റഡിയിൽ നൽകി. പ്രതിയെ എറണാകുളം, തിരുവനന്തപുരം എന്നീ സ്ഥലങ്ങളിൽ കൊണ്ടു പോയി തെളിവെടുപ്പു നടത്തണം. പ്രതിയുടെ ലൈംഗികശേഷി പരിശോധന നടത്തണം. ഇതിനു ശേഷം വീണ്ടും കസ്റ്റഡിയിൽ വാങ്ങും. മരണപ്പെട്ട പെണ്‍കുട്ടിയുമായി പ്രതി പോയിരുന്ന മറ്റു സംസ്ഥാനങ്ങളിലെ സ്ഥലങ്ങളിൽ അന്വേഷണം നടത്താനാണിതെന്നു പോലീസ് കോടതിയെ അറിയിച്ചു. ഇപ്പോൾ പ്രതി റിമാൻഡിലാണ്. അഡീഷണൽ ചീഫ് ജുഡീഷൽ മജിസ്ട്രേറ്റ് കോടതിയാണ് കേസ് പരിഗണിക്കുന്നത്.

പെരുങ്കടവിള ബഡ്‌സ് റീഹാബിലിറ്റേഷന്‍ സെന്‍ററിൽ പ്രവേശനോത്സവം

വെള്ളറട: പെരുങ്കടവിള പഞ്ചായത്ത് ബഡ്‌സ് റീഹാബിലിറ്റേഷന്‍ സെന്‍ററിന്‍റെ പ്രവേശനോത്സവം പഞ്ചായത്ത് പ്രസിഡന്‍റ് എസ്. സുരേന്ദ്രന്‍ ഉദ്ഘാടനം ചെയ്തു. സിഡിഎസ് ചെയര്‍പേഴ്‌സണ്‍ സചിത്ര അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ബിന്ദു, ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ മഞ്ജുഷ ജയന്‍, പഞ്ചായത്ത് അംഗങ്ങളായ മധു, സചിത്ര, ധന്യ പി. നായര്‍, അസിസ്റ്റന്‍റ് സെക്രട്ടറി ശിവകുമാര്‍, പിടിഎ പ്രസിഡന്‍റ് എന്‍. രാജു, സ്‌പെഷല്‍ എഡ്യൂക്കേറ്റര്‍ സിമി സോമന്‍ എന്നിവര്‍ സംസാരിച്ചു. പഞ്ചായത്ത് പ്രസിഡന്‍റ് എസ്. സുരേന്ദ്രന്‍ ബഡ്‌സ് ജീവനക്കാരെ ആദരിച്ചു. കുട്ടികള്‍ക്ക് പാല്, മുട്ട, പച്ചക്കറി, സ്‌പോര്‍ട്‌സ് കിറ്റ്, ഐഡന്‍റിറ്റി കാര്‍ഡ്, പഠനോപകരണങ്ങള്‍ തുടങ്ങിയവ വിതരണം ചെയ്യുകയും അഗ്രി തെറാപ്പി, ഹോര്‍ട്ടികള്‍ച്ചര്‍ തെറാപ്പി വര്‍ക്ക് ബുക്ക് ഉദ്ഘാടനം ചെയ്യുകയും ചെയ്തു. കുടുംബശ്രീ സിഡിഎസ് അംഗങ്ങള്‍ രക്ഷകര്‍ത്താക്കള്‍ ജീവനക്കാര്‍ എന്നിവര്‍ പങ്കെടുത്തു.

നിയന്ത്രണംവിട്ട കാർ തലകീഴായി മറിഞ്ഞു

നെടുമങ്ങാട് : നിയന്ത്രണംവിട്ട കാർ തലകീഴായി മറിഞ്ഞു.ഇന്നലെ രാവിലെ 10ന് നെടുമങ്ങാട് വാളിക്കോടിനു സമീപമാണ് റോഡ് വക്കിലെ വീടിന്‍റെ ഗേറ്റും ചുറ്റുമതിലും തകർത്ത കാർ തലകീഴായി മറിഞ്ഞത്. കാർ തിരുവനന്തപുരത്തുനിന്നും നെടുമങ്ങാട് ഭാഗത്തേക്കു വരികയായിരുന്നു. ഡ്രൈവർ ഉറങ്ങിപ്പോയതാണ് അപകട കാരണമെന്നു ദൃക്സാക്ഷികൾ പറയുന്നു. കാറിലുണ്ടായിരുന്ന ഒരു കുട്ടി ഉൾപ്പെടെയുള്ളവർക്കു നിസാര പരിക്കുപറ്റി. വേങ്കവിളയിലെ ഒരു കുടുംബം സഞ്ചരിച്ചിരുന്ന കാറാണ് അപകടത്തിൽപ്പെട്ടത്.

വില്പനക്കായി കഞ്ചാവ് കൈവശംവച്ച കേസിൽ പ്രതിക്കു തടവും പിഴയും

തിരുവനന്തപുരം: കഞ്ചാവ് കൈവശം വച്ച കേസിൽ നെയ്യാറ്റിൻകര ഇഞ്ചി പുല്ലുവിള വീട്ടിൽ തങ്കു മകൻ പ്രമോദി (33) നു മൂന്നു വർഷം കഠിനതടവും 20,000 രൂപ പിഴയും. ചെന്പൂര് റോഡിൽ പൊന്നന്പി ജംഗ്ഷനു സമീപം എക്സൈസ് ഡിപ്പാർട്ടുമെന്‍റിന്‍റെ വാഹന പരിശോധനയ്ക്കിടെയാണു ബൈക്ക് ഓടിച്ചു വന്ന പ്രമോദിൽ നിന്നു കഞ്ചാവ് കണ്ടെത്തിയത്. തിരുവനന്തപുരം അഡീഷണൽ സെഷൻസ് കോടതി അഞ്ച് - ജഡ്ജ് സിജു ഷേക്കാണു ശിക്ഷ വിധിച്ചത്.

പുതുതലമുറയെ ലഹരിയിൽനിന്നും സർക്കാർ രക്ഷിക്കുമെന്ന് കരുതുന്നത് മൗഢ്യം: കെ.മുരളീധരൻ

തിരുവനന്തപുരം: ലഹരിയിൽ നിന്നും പുതിയ തലമുറയെ സർക്കാർ രക്ഷിക്കുമെന്നു കരുതുന്നതു മൗഢ്യമാണെന്നു കെ.മുരളീധരൻ. ലഹരിമാഫിയക്കെതിരേയുള്ള ആഭ്യന്തര വകുപ്പിന്‍റെ നടപടികൾ തീർത്തും പരാജയമാണെന്നും മുരളീധരൻ പറഞ്ഞു. തിരുവനന്തപുരം ജില്ലാ കോണ്‍ഗ്രസ് കമ്മിറ്റി സെൻട്രൽ സ്റ്റേഡിയത്തിൽ സംഘടിപ്പിച്ച വിദ്യാനിധി പുരസ്കാര സമർപ്പണം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജീവിതത്തിൽ ഇന്നേവരെ ലഹരി ഉപയോഗിക്കാത്തതിനാൽ ഗുണമല്ലാതെ ദോഷമുണ്ടായിട്ടില്ലെന്നും മുരളീധരൻ പറഞ്ഞു. യുവതലമുറ ലഹരിയിൽ നിന്നുംവിട്ടു നിൽക്കാൻ മാനസികമായി തീരുമാനിക്കണമെന്നും അദ്ദേഹം കൂട്ടിച്ചേർത്തു. ഡിസിസി പ്രസിഡന്‍റ് പാലോട് രവി അധ്യക്ഷത വഹിച്ച യോഗത്തിൽ ഗോപിനാഥ് മുതുകാട് മുഖ്യസന്ദേശം നൽകി. പ്രവർത്തന മേഖലകളിലെല്ലാം മനുഷ്യത്വം കണ്ടെത്താൻ ശ്രമിക്കണമെന്നു കുട്ടികളോട് മുതുകാട് ആവശ്യപ്പെട്ടു. ലഹരി വിരുദ്ധ പ്രതിജ്ഞ ഗോപിനാഥ് മുതുകാട് ചൊല്ലിക്കൊടുത്തു. കാവാലം ശ്രീകുമാറും പന്തളം ബാലനും ഗാനങ്ങൾ ആലപിച്ചുകൊണ്ട് ആശംസകൾ നേർന്നു. എൻ. ശക്തൻ, ജി.എസ്. ബാബു, കെ. മോഹൻ കുമാർ, വർക്കല കഹാർ, നെയ്യാറ്റിൻകര സനൽ, ആനാട് ജയൻ, ചെന്പഴന്തി അനിൽ, കന്പറ നാരായണൻ തുടങ്ങിയവർ പങ്കെടുത്തു. ജില്ലയിൽനിന്നും എല്ലാ വിഷയങ്ങൾക്കും എ പ്ലസ് ലഭിച്ച 400 വിദ്യാർഥികൾക്ക് ക്യാഷ് അവാർഡും മോമെന്‍റോയും സർട്ടിഫിക്കറ്റും നൽകി. മണ്ഡലം കമ്മിറ്റികൾ തെരഞ്ഞെടുത്ത വിദ്യാർഥികൾക്കാണ് പുരസ്കാരം നൽകിയത്.

പോലീസുകാരുടെ മാനസിക പീഡനം വിവരിച്ചു ബിന്ദു : ഡിവൈഎസ്പിയും സംഘവും ബിന്ദുവിന്‍റെ മൊഴിയെടുത്തു

തിരുവനന്തപുരം: മാലമോഷണക്കുറ്റം ആരോപിച്ചു പേരൂർക്കട സ്റ്റേഷനിലെ പോലീസുകാർ 21 മണിക്കൂർ മാനസികമായി പീഡിപ്പിച്ച സംഭവങ്ങൾ പ്രത്യേക അന്വേഷണ സംഘത്തിനു മൊഴിയായി നൽകി ദളിത് യുവതി ആർ. ബിന്ദു. പ്രത്യേക അന്വേഷണ സംഘത്തലവൻ പത്തനംതിട്ട ജില്ലാ ക്രൈംബ്രാഞ്ച് ഡിവൈഎസ്പി കെ.എ. വിദ്യാധരന്‍റെ നേതൃത്വത്തിലുള്ള അന്വേഷണ സംഘം ഇന്നലെ ബിന്ദുവിന്‍റെ മൊഴി രേഖപ്പെടുത്തി. ഇന്നലെ രാവിലെ 10.30നു തുടങ്ങിയ മൊഴിയെടുപ്പു വൈകുന്നേരം 4.45 വരെ നീണ്ടു. സംഭവം നടന്ന പേരൂർക്കട പോലീസ് സ്റ്റേഷനിലെ സിസിടിവി കാമറയിലെ വിവരങ്ങൾ അടക്കം ശേഖരിച്ചിട്ടുണ്ടെന്നും ഇതു വിശദമായി പരിശോധിച്ചശേഷം വീണ്ടും ബിന്ദുവിന്‍റെ മൊഴിയെടുക്കാനുമാണ് അന്വേഷണ സംഘത്തിന്‍റെ തുടർ നീക്കം. സ്റ്റേഷനിൽ നേരിട്ട ക്രൂരപീഡനങ്ങൾ ബിന്ദു അന്വേഷണ സംഘത്തിനു വിശദമായി മൊഴി നൽകി. പോലീസുകാർ ഉപയോഗിച്ച മോശമായ ഭാഷ, അപമാനം, വെള്ളം കുടിക്കാൻ നൽകാതിരുന്നത്, മോഷണക്കുറ്റം ആരോപിക്കൽ, ഭർത്താവിനേയും മക്കളേയും മോഷണക്കേസിൽ പ്രതിചേർക്കുമെന്നു ഭീഷണിപ്പെടുത്തൽ അടക്കം പേരൂർക്കട സ്റ്റേഷനിൽ നടന്ന വിവരങ്ങൾ ബിന്ദു വിശദമായി അന്വേഷണ സംഘത്തോടു വിവരിച്ചതായാണു സൂചന. മോഷണക്കുറ്റം ആരോപിച്ചു ദളിത് യുവതിയെ പേരൂർക്കട പോലീസ് സ്റ്റേഷനിൽ രാത്രിയും പകലും അടക്കം 21 മണിക്കൂർ ചോദ്യം ചെയ്ത സംഭവം പുറത്തു വന്നതിനു പിന്നാലെ വിവാദമായിരുന്നു. സർക്കാരും പോലീസും സമ്മർദത്തിലായതോടെയാണ് അന്വേഷണം പ്രഖ്യാപിച്ചത്. ജൂണ്‍ 25നകം അന്വേഷണം പൂർത്തിയാക്കി റിപ്പോർട്ട് നൽകാനാണ് പത്തനംതിട്ട ഡിവൈഎസ്പിക്കു തിരുവന്തപുരം മേഖലാ ഐജി ശ്യാംസുന്ദർ നൽകിയിട്ടുള്ള നിർദേശം. ഇതിന്‍റെ അടിസ്ഥാനത്തിലാണ് അന്വേഷണം തുടങ്ങിയത്. പേരൂർക്കട പോലീസ് സ്റ്റേഷൻ സന്ദർശിച്ച അന്വേഷണ സംഘം ആ ദിവസത്തെ സ്റ്റേഷനിലെ സിസിടിവി ദൃശ്യങ്ങൾ ശേഖരിച്ചു. ഇതു പരിശോധിച്ച ശേഷമാണ് ഇരയുടെ മൊഴി രേഖപ്പെടുത്തിയത്. മൊഴിയുടെ അടിസ്ഥാനത്തിൽ അന്നു ഡ്യൂട്ടിയിലുണ്ടായിരുന്ന പോലീസുകാരുടെയും സ്റ്റേഷനിലുണ്ടായിരുന്ന മറ്റുള്ളവരുടെയും മൊഴികൾ രേഖപ്പെടുത്തും. സംഭവത്തിൽ ഒരു എസ്ഐയേയും ഗ്രേഡ് എഎസ്ഐയേയും സസ്പെൻഡ് ചെയ്തിരുന്നു. സ്റ്റേഷൻ ചുമതലയുണ്ടായിരുന്ന എസ്എച്ച്ഒയെ സ്ഥലംമാറ്റിയിരുന്നു.

പാളയം കണ്ണിമേര മാർക്കറ്റ് പൊളിക്കൽ തടഞ്ഞു വ്യാപാരികൾ, സംഘർഷാവസ്ഥ

കോടതി അലക്ഷ്യത്തിന് നിയമ നടപടി സ്വീകരിക്കും തിരുവനന്തപുരം: പാളയം കണ്ണിമേര മാർക്കറ്റ് പൊളിക്കാൻ പോലീസ് സഹായത്തോടെ കോർപറേഷൻ അധികൃതരെത്തിയ നടപടിയെ വ്യാപാരികൾ സംഘം ചേർന്നു തടഞ്ഞതോടെ സംഘർഷാവസ്ഥ. പോലീസിനെ ഉപയോഗിച്ചു വ്യാപാരികളെ ബലംപ്രയോഗിച്ചു മാറ്റിയശേഷം കടകളുടെ പൂട്ടുകൾ തല്ലിത്തകർത്ത് അകത്തു കടന്ന അധികൃതർ കടകളിൽ നിന്നുള്ള ലക്ഷക്കണക്കിനു രൂപയുടെ സാധനങ്ങൾ പുറത്തെറിഞ്ഞു. തുടർന്നു കടകൾ പൊളിക്കാൻ നടപടി തുടങ്ങി. ഇന്നലെ രാവിലെ പന്ത്രണ്ടോടെയാണു സംഘർഷാവസ്ഥയുണ്ടായത്. അതേസമയം, കോർപറേഷൻ അധികൃതരുടെ നടപടി ഹൈക്കോടതി വിധിയുടെ ലംഘനമാണെന്നും കോടതി അലക്ഷ്യ നടപടിക്കു കേസ് കൊടുക്കുമെന്നും വ്യാപാരി പ്രതിനിധികൾ പറഞ്ഞു. പോലീസിനെ ഉപയോഗിച്ചു കടകൾ ഇടിച്ചു നിരത്തിയാലും മാനദണ്ഡങ്ങൾ പാലിക്കാത്ത പുതിയ കെട്ടിടത്തിലേക്കില്ലെന്നും അവർ പറഞ്ഞു. പ്രവർത്തിച്ചുകൊണ്ടിരിക്കുന്ന കടകൾ ഇടിക്കാൻ പോലീസ് സന്നാഹത്തോടെ ഉദ്യോഗസ്ഥരെ അയച്ച കോർപറേഷൻ നടപടി കാടത്തമാണെന്നു കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്‍റും ദേശീയ സെക്രട്ടറിയുമായ എസ്.എസ്. മനോജ് പറഞ്ഞു. മനുഷ്യത്വം തൊട്ടു തീണ്ടാത്തവർക്കും നിയമവ്യവസ്ഥകളെ മാനിക്കാത്തവർക്കും മാത്രം കഴിയുന്ന നടപടിയാണ് കോർപറേഷന്‍റെ ഭാഗത്തു നിന്നുണ്ടായത്. കള്ള സത്യവാങ്മൂലം കോടതികളിൽ നിരത്തി വ്യാപാരികളുടെയും ഉപയോക്താക്കളുടെയും സുരക്ഷിതത്വം പോലും അവഗണിച്ചുകൊണ്ട് കെട്ടിയുയർത്തിയ കെട്ടിടത്തിലേക്ക് ബലം പ്രയോഗിച്ചു വ്യാപാരികളെ തള്ളി വിടാനുള്ള അവസാനത്തെ നീക്കമാണ് ഈ നടപടി. പോലീസിനെ ഉപയോഗിച്ചു കെട്ടിടം ഇടിച്ചു നിരത്തിയാലും പിടിച്ചു നിരത്തിലിറക്കിയാലും കോടതി പറഞ്ഞത് അനുസരിച്ചിട്ടുള്ള ക്രമീകരണം നടക്കാതെ കെട്ടിടത്തിലേക്കില്ലെന്നും അദ്ദേഹം പറഞ്ഞു. ചീഫ് സെക്രട്ടറി, തദ്ദേശ പ്രിൻസിപ്പൽ സെക്രട്ടറി, കോർപറേഷൻ സെക്രട്ടറി തുടങ്ങിയവർ എതിർകക്ഷികളാണ്. വ്യാപാരികളുടെ താത്കാലിക പുനരധിവാസത്തിന് എയർ കണ്ടീഷൻ ചെയ്ത കെട്ടിടമാണ് നൽകിയതെന്നു ഹൈക്കോടതിയിലും, ഹൈക്കോടതിയിലെ കേ സ് തള്ളിയെന്നു മനുഷ്യാവകാശ കമ്മീഷനിലും തെറ്റായ വിവരം നൽകിയ സെക്രട്ടറിക്കെതിരെ നിയമനടപടിയുമായി മുന്നോട്ടു പോകുമെന്നും അദ്ദേഹം പറഞ്ഞു. അടച്ചിട്ട കെട്ടിടങ്ങളുടെ പൂട്ടുകൾ തല്ലിപ്പൊളിച്ചു വിലപിടിപ്പുള്ള സാധനങ്ങൾ വാരി തെരുവിലേക്ക് എറിയുന്ന നടപടിയാണ് ഉദ്യോഗസ്ഥർ സ്വീകരിച്ചത്. മുതിർന്ന പൗരന്മാരെ പോലും പിടിച്ചു തള്ളി. ഇതാണ് സംഘർഷാവസ്ഥയ്ക്ക് ആക്കം കൂട്ടിയതെന്നും അവർ ആരോപിച്ചു.

ബൈക്കുകൾ കൂട്ടിയിടിച്ച് യുവാവ് മരിച്ചു

വെഞ്ഞാറമൂട്: ഇരുചക്രവാഹനങ്ങൾ കൂട്ടിയിടിച്ച് ടെക്നോപാർക്ക് സുരക്ഷാ ജീവനക്കാരൻ മരിച്ചു. നെല്ലനാട് വലിയ കട്ടയ്ക്കാൽ ഊട്ടുകുഴി വീട്ടിൽ വിനേഷ്(37 ) ആണ് മരിച്ചത്. കഴിഞ്ഞദിവസം രാത്രി 10.30ന് ശാന്തിഗിരി പെട്രോൾ പമ്പിന് സമീപത്ത് വച്ചായിരുന്നു അപകടം. പോത്തൻകോട് നിന്ന് കോലിയക്കോട് ഭാഗത്തേക്ക് വരികയായിരുന്ന വിനേഷ് സഞ്ചരിച്ച ബൈക്കും എതിർ ദിശയിൽ വന്ന ബൈക്കുമായി കൂട്ടിയിടിക്കുകയായിരുന്നു. എതിർ ദിശയിൽ നിനന്െത്തിയ ബൈക്ക് യാത്രികൻ പോത്തൻകോട് കരൂർ സ്വദേശി രാഹുൽ ഗുരുതരമായി പരിക്കേറ്റ് തിരുവനന്തപുരം മെഡിക്കൽ കോളജിൽ ചികിത്സയിലാണ് . സംഭവത്തിൽ പോലീസ് കേസെടുത്തു. കാർവേണിയാണ് മരിച്ച വിനേഷിന്‍റെ ഭാര്യ. മക്കൾ: കാശിനാഥ്‌, ശിവാനി. പിതാവ്: വിജയൻ, മാതാവ്: ഉഷ. സഹോദരൻ: രാജേഷ്.

ലോറി ബൈക്കിലിടിച്ച് യുവാവ് മരിച്ചു

വിഴിഞ്ഞം: ബൈപാസിൽ ലോറി ബൈക്കിലിടിച്ച് യുവാവിന് ദാരുണാന്ത്യം. വാഴിച്ചൽ ആലച്ചൻകോണം മരംകുഴിവീട്ടിൽ രാജേഷിന്‍റെ മകൻ രാഹുൽ (23) ആണ് മരിച്ചത്. കോവളം കാരോട് ബൈപാസിൽ കാഞ്ഞിരംകുളം വേങ്ങപ്പൊറ്റയ്ക്ക് സമീപമായിരുന്നു അപകടം. ഇടിയുടെ ആഘാതത്തിൽ റോഡിൽ തെറിച്ച് വീണ് തലക്ക് ഗുരുതരമായി പരിക്കേറ്റ വെള്ളറട കിളിയൂർ പള്ളിവിള വീട്ടിൽ സോണി സുനിലി (21)നെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു. ഇന്നലെ വെളുപ്പിനായിരുന്നു അപകടം. കോവളത്ത് നിന്ന് കാരോട് ഭാഗത്തേക്ക് വന്ന കണ്ടെയ്‌നർ ലോറിയാണ് മുന്നിലൂടെ സഞ്ചരിച്ച ബൈക്കിൽ ഇടിച്ചത്.അമിത വേഗത്തിലായിരുന്ന ലോറി അപകടമുണ്ടായിട്ടും നിർത്താതെ ഓടിച്ച് പോയി. സന്ധ്യയാണ് രാഹുലിന്‍റെ അമ്മ. സഹോദരി: രേഷ്മ.കാഞ്ഞിരംകുളം പോലീസ്കേസെടുത്തു. മൃതദേ ഹംപോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടു നൽകി. അപകടം വരുത്തിയശേഷം നിർത്താതെ പോയ വാഹനത്തെ സിസിടിവിയുടെ സഹായ ത്തോടെ കണ്ടെത്താനുള്ള ശ്രമം ആരംഭിച്ചതായും പോലീസ് അറിയിച്ചു.

വര്‍ണാഭമായി പ്രവേശനോത്സവം

തിരുവനന്തപുരം: പുതിയ അധ്യയന വര്‍ഷത്തിനു തുടക്കം. അറിവിന്‍റെ അക്ഷര മധുരം നുകരാന്‍ കുരുന്നുകള്‍ വീണ്ടും സ്‌കൂളുകളിലേക്ക്. രണ്ട് മാസത്തെ വേനലവധിക്കുശേഷം പുത്തന്‍ കുടയും ബാഗുമായി സ്‌കൂളുകളിലേക്ക് തിരികെയെത്തിയിരിക്കുകയാണ് കുരുന്നുകള്‍. മഴ പ്രതീക്ഷിച്ചിരുന്നെങ്കിലും ആദ്യ ദിവസം തന്നെ മഴ നനയാനുള്ള ഭാഗ്യം ഇക്കുറി കുട്ടികള്‍ക്കുണ്ടായില്ല. നിറകണ്ണുകളുമായെത്തിയ കുരുന്നുകളെ സ്വീകരിക്കാനായി മിക്കവിദ്യാലയ മുറ്റങ്ങളും വര്‍ണ ബലൂണുകളും പൂക്കളും കൊണ്ട് അലങ്കൃതമായിരുന്നു. മിഠായികളും താളവാദ്യങ്ങളുമായാണ് സ്‌കൂള്‍ മുറ്റത്തെത്തിയ വിദ്യാര്‍ഥികളെ അധ്യാപകര്‍ സ്വീകരിച്ചത്. അച്ഛനും അമ്മയും തനിച്ചാക്കി പോകുമോയെന്ന പേടിയില്‍ കരയുന്ന കുഞ്ഞുങ്ങളും അവരെ സമാധാനിപ്പിക്കുന്ന കൂട്ടുകാരും പതിവുകാഴ്ചയായപ്പോള്‍ രണ്ടുമാസത്തെ ഇടവേളയ്ക്ക് ശേഷം കൂട്ടുകാരെ കണ്ടതിന്‍റെ സന്തോഷം അല്‍പം മുതിര്‍ന്ന കുട്ടികള്‍ പങ്കുവച്ചു. മണക്കാട് ഗവ. എല്‍പി സ്‌കൂളിലെത്തിയ വിദ്യാര്‍ഥികളെ പരസ്പരം പരിചയപ്പെടുത്തിയതു തികച്ചും വ്യത്യസ്തമായാണ്. ഒന്നാം ക്ലാസിലേക്കും എല്‍കെജിയിലേക്കും എത്തിയ കുട്ടികളെ താലപ്പൊലിയുമായാണ് ഇവിടെ സ്വീകരിച്ചത്. എല്‍കെജി കുരുന്നുകള്‍ക്ക് ഡിവിഷന്‍ അനുസരിച്ച് ഓരോ കിളികളുടെ പേരുള്ള തൊപ്പിയും ഒന്നാം ക്ലാസുകാര്‍ക്ക് തുമ്പികളുടെ നിറമനുസരിച്ചുള്ള തൊപ്പിയും അണിയിച്ചിരുന്നു.

തൈക്കാട് മോഡല്‍ എല്‍പിഎസില്‍ നാരാങ്ങാമിഠായിയും ജീരകമിഠായിയും ഉപ്പിലിട്ടതുമുള്ള കടയും അക്ഷരങ്ങള്‍ നിറച്ച തോണിയും വിദ്യാര്‍ഥികള്‍ക്കായി ഒരുക്കിയിരുന്നു. പുതുമോടിയാക്കിയ കോട്ടണ്‍ഹില്‍ ഗവ. എല്‍പിഎസില്‍ പുതുതായെത്തിയ കുട്ടികളെ മധുരം നല്‍കി സ്വീകരിച്ചത് ഉദ്ഘാടകന്‍ കൂടിയായ മജീഷ്യന്‍ ഗോപിനാഥ് മുതുകാടായിരുന്നു. അമ്മയെ നോക്കി കരയുന്ന കുഞ്ഞുങ്ങളെ അദ്ദേഹം മാജിക്കിലൂടെ പാട്ടിലാക്കി. അക്ഷരങ്ങള്‍ കോര്‍ത്ത പട്ടവും ബലൂണും സര്‍ഗശേഷി പ്രകടിപ്പിക്കുന്ന ചുവരും കുട്ടികളെ ആകര്‍ഷിച്ചു. സ്‌കൂളിലെ ക്രാഫ്ട് ടീച്ചര്‍ ഒരുക്കിയ മുയല്‍ത്തൊപ്പി അണിയിച്ചാണ് നവാഗതരെ ക്ലാസുകളില്‍ പ്രവേശിപ്പിച്ചത്. സെന്‍റ് ജോൺസ് സ്കൂൾ തിരുവനന്തപുരം : നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിലെ പ്രവേശനോത്സവം ബാലസാഹിത്യ ഇൻസ്റ്റിറ്റ്യൂട്ട് ഡയറക്‌ടർ പുളിയറ ശ്രീധരൻ ഉദ്ഘാടനം ചെയ്തു. സ്കൂൾ പ്രിൻസിപ്പൽ ഫാ.ജോസ് ചരുവിൽ അധ്യക്ഷതവഹിച്ചു. യോഗത്തിൽ പ്രഫ. ഡോ. ഗ്ലാഡ്സ്റ്റൺ രാജ് മുഖ്യപ്രഭാഷണം നടത്തി. വൈസ് പ്രിൻസിപ്പൽ അജീഷ് കുമാർ,കൗൺസിലർ ജോൺസൺ ജോസഫ് എന്നിവർ പ്രസംഗിച്ചു. ക്രൈസ്റ്റ് നഗര്‍ സ്‌കൂൾ തിരുവനന്തപുരം: ലഹരിവിരുദ്ധ പ്രവര്‍ത്തനങ്ങള്‍ക്ക് കൈ കോര്‍ത്തുകൊണ്ട് ക്രൈസ്റ്റ് നഗര്‍ സെന്‍ട്രല്‍ സ്‌കൂളില്‍ പ്രവേശനോത്സവം. ക്രൈസ്റ്റ് നഗര്‍ സെന്‍ട്രല്‍ സ്‌കൂളിലെ ഈ വര്‍ഷത്തെ പ്രവേശനോത്സവം ചങ്ങനാശേരി അതിരൂപത വികാരി ജനറാളും ലൂര്‍ദ് ഫൊറോന വികാരിയുമായ റവ.ഡോ. ജോണ്‍ തെക്കേക്കര ഉദ്ഘാടനം ചെയ്തു. ലഹരി ഉപേക്ഷിച്ച് മൂല്യാധിഷ്ഠിത വിദ്യാഭ്യാസം സാധ്യമാക്കുന്നതിനു പുതുതലമുറയ്ക്ക് സാധിക്കണമെന്ന് അദ്ദേഹം പറഞ്ഞു. ക്രൈസ്റ്റ് നഗര്‍ ഗ്രൂപ്പ് ഓഫ് ഇന്‍സ്റ്റിറ്റിയൂഷന്‍സ് മാനേജര്‍ ഫാ.പോള്‍ മങ്ങാട് സിഎംഐയുടെ അധ്യക്ഷതയില്‍ ചേര്‍ന്ന ചടങ്ങില്‍ പ്രിന്‍സിപ്പല്‍ ഫാ. സേവ്യര്‍ അമ്പാട്ട് സിഎംഐ പതാക ഉയര്‍ത്തി. പ്രോഗ്രാം കണ്‍വീണര്‍മാരായ കെ.വൈ. ബിന്ദു, ദീപ്തി ദിലീപ് എന്നിവര്‍ നേതൃത്വം നല്‍കി. ഐശ്വര്യ നായര്‍ നന്ദി പറഞ്ഞു. ലയോള സ്‌കൂൾ തിരുവനന്തപുരം: ശ്രീകാര്യം ലയോള സ്‌കൂളിലെ പ്രവേശനോത്സവം തിരുവനന്തപുരം ജില്ലാ കളക്ടര്‍ അനുകുമാരി ഉദ്ഘാടനം ചെയ്തു. സോഷ്യല്‍ മീഡിയയുടെ അതിപ്രസരം ഒഴിവാക്കി സാമൂഹിക പ്രതിബദ്ധതയും പ്രകൃതി സംരക്ഷണ മനോഭാവമുളളവരുമായി യുവ തലമുറ വളര്‍ന്നു വരണമെന്ന് കളക്ടര്‍ പറഞ്ഞു. സ്‌കൂള്‍ മാനേജറും റക്ടറുമായ ഫാ.സണ്ണി കുന്നപ്പള്ളില്‍ എസ്ജെ, സ്‌കൂള്‍ ഡയറക്ടറും പ്രിന്‍സിപ്പലുമായ റവ.ഡോ. സാല്‍വിന്‍ അഗസ്റ്റിന്‍ എസ്ജെ, സിബിഎസ്ഇ പ്രിന്‍സിപ്പല്‍ ഫാ. റംലറ്റ് തോമസ് എസ്ജെ, ഹയര്‍ സെക്കന്‍ഡറി (സ്റ്റേറ്റ്) പ്രിന്‍സിപ്പല്‍ സിസ്റ്റര്‍ ജിജി തോമസ്, പിടിഎ പ്രസിഡന്‍റ് ഡോ. അഞ്ജു ദീപക് എന്നിവര്‍ പങ്കെടുത്തു. വിദ്യാര്‍ഥി പ്രതിനിധി ഷോണ്‍ നിക്കോളാസ് സ്വാഗതവും ഹൃദ്യ ഷാജി നന്ദിയും പറഞ്ഞു. പുതുതായി സ്‌കൂളിലെത്തിയ വിദ്യാര്‍ഥികള്‍ക്ക് പ്രത്യേക സ്വീകരണവും ഒരുക്കിയിരുന്നു. പ്രവേശനോത്സവത്തിന്‍റെ ഭാഗമായി വിവിധ കലാപരിപാടികളും അരങ്ങേറി. നെയ്യാറ്റിന്‍കരയിലെ വിദ്യാലയങ്ങൾ നെയ്യാറ്റിന്‍കര : എംഎല്‍എ അങ്കിളിനോടൊപ്പം വിളക്ക് തെളിച്ചപ്പോള്‍ ഒന്നാം ക്ലാസുകാരി അഭിശ്രീക്ക് ഇരട്ടി സന്തോഷം. സദസിലെ കൂട്ടുകാരെല്ലാം നിറഞ്ഞ മനസോടെ കരങ്ങള്‍ ചേര്‍ത്ത് പ്രോത്സാഹനത്തിന്‍റെ സംഗീതാന്തരീക്ഷം തീര്‍ത്തു. നെയ്യാറ്റിന്‍കര ഗവ. ജെബിഎസ്സിലെ നഗരസഭാതല സ്കൂള്‍ പ്രവേശനോത്സവ ചടങ്ങിലാണ് ഈ സ്നേഹക്കാഴ്ച തെളിഞ്ഞത്. കെ. ആന്‍സലന്‍ എംഎല്‍എ ഉദ്ഘാടനം നിര്‍വഹിച്ചു. നഗരസഭ ചെയര്‍മാന്‍ പി.കെ രാജമോഹനന്‍, വൈസ് ചെയര്‍പേഴ്സണ്‍ പ്രിയാ സുരേഷ്, സ്റ്റാന്‍ഡിംഗ് കമ്മിറ്റി ചെയര്‍മാന്‍മാരായ ഡോ. എം.എ സാദത്ത്, എന്‍.കെ അനിതകുമാരി, കൗണ്‍സിലര്‍ കൂട്ടപ്പന മഹേഷ്, സെക്രട്ടറി സാനന്ദസിംഗ്, ഹെഡ്മിസ്ട്രസ് പ്രഭ, പിടിഎ ഭാരവാഹികള്‍ എന്നിവര്‍ സംബന്ധിച്ചു. മാരായമുട്ടം ഗവ. ഹയര്‍സെക്കന്‍ഡറി സ്കൂളിലെ പ്രവേശനോത്സവം സി.കെ ഹരീന്ദ്രന്‍ എംഎല്‍എ ഉദ്ഘാടനം ചെയ്തു. പെരുങ്കടവിള ഗ്രാമപഞ്ചായത്ത് പ്രസിഡന്‍റ് എസ്. സുരേന്ദ്രന്‍, ബ്ലോക്ക് - ഗ്രാമപഞ്ചായത്ത് പ്രതിനിധികള്‍, എസ്.എം.സി - പിടിഎ ഭാരവാഹികള്‍, സ്കൂള്‍ അധികൃതര്‍ എന്നിവര്‍ ‍ സംബന്ധിച്ചു. ഓലത്താന്നി വിക്ടറി വൊക്കേഷണല്‍ ഹയര്‍സെക്കന്‍ഡറി സ്കൂളിലെ പ്രവേശനോത്സവം നഗരസഭ ചെയര്‍മാന്‍ പി.കെ രാജമോഹനന്‍ ഉദ്ഘാടനം ചെയ്തു. എ.ഇ.ഒ ഷിബു പ്രേംലാല്‍, സ്കൂള്‍ മാനേജര്‍, ഹെഡ്മിസ്ട്രസ് എന്നിവര്‍ സംബന്ധിച്ചു. അരുമാനൂര്‍ എം.വി ഹയര്‍സെക്കന്‍ഡറി സ്കൂളില്‍ നടന്ന നെയ്യാറ്റിന്‍കര ബി.ആര്‍.സി തല പ്രവേശനോത്സവം അഡ്വ. എം. വിന്‍സെന്‍റ് എംഎല്‍എ ഉദ്ഘാടനം ചെയ്തു. പൂവാര്‍ പഞ്ചായത്ത് പ്രസിഡന്‍റ് ജെ. ലോറന്‍സ് അധ്യക്ഷനായി. ബ്ലോക്ക് പഞ്ചായത്ത് അംഗം ആര്യദേവന്‍, പഞ്ചായത്ത് അംഗങ്ങളായ ഷിനു, ശ്രീകുമാരി, പിടിഎ പ്രസിഡന്‍റ് സുരേഷ് കുമാര്‍ എന്നിവര്‍ സംബന്ധിച്ചു. നെയ്യാറ്റിൻകര ഗവ. ഗേൾസ് ഹയര്‍സെക്കന്‍ഡറി സ്കൂളിലെ പ്രവേശനോത്സവം കെ. ആന്‍സലന്‍ എംഎല്‍എ ഉദ്ഘാടനം ചെയ്തു. നഗരസഭ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ ഡോ. എം.എ സാദത്ത്, സ്കൂള്‍ അധികൃതര്‍, പിടിഎ ഭാരവാഹികള്‍ എന്നിവര്‍ പങ്കെടുത്തു. മരിയാപുരം സെന്‍റ് മേരീസ് എല്‍പി സ്കൂളിലെ പ്രവേശനോത്സവത്തിന്‍റെയും സ്കൂളില്‍ പുതുതായി നിര്‍മിച്ച മള്‍ട്ടി പര്‍പ്പസ് ഹാളിന്‍റെയും ഉദ്ഘാടനം കെ. ആന്‍സലന്‍ എംഎല്‍എ നിര്‍വഹിച്ചു. എംഎല്‍എ യുടെ ആസ്തി വികസന ഫണ്ടില്‍ നിന്നും 20 ലക്ഷം രൂപ വിനിയോഗിച്ചാണ് -മള്‍ട്ടി പര്‍പ്പസ് ഹാള്‍ യാഥാര്‍ഥ്യമാക്കിയത്. ഉദ്ഘാടന ചടങ്ങില്‍ സ്കൂള്‍ മാനേജര്‍ സിസ്റ്റര്‍ ലാലി റ്റി.ജെ അധ്യക്ഷയായിരുന്നു. ഊരൂട്ടുകാല ഗവ. ഐ.ടി.ഇ യിലെ പ്രവേശനോത്സവം നഗരസഭ കൗണ്‍സിലര്‍ അഡ്വ. സജിന്‍ലാല്‍ ഉദ്ഘാടനം ചെയ്തു. പിടിഎ പ്രസിഡന്‍റ് എസ്. രതീഷ് കുമാര്‍ അധ്യക്ഷനായി. പ്രിന്‍സിപ്പല്‍ ഡി.എസ് ഷീലുകുമാര്‍, മുന്‍ പ്രിന്‍സിപ്പല്‍ വത്സലകുമാരി, ഡോ. ജയകുമാര്‍, ശ്രീലത എന്നിവര്‍ പ്രസംഗിച്ചു. കോട്ടുകാല്‍ ഗവ. വി.എച്ച്.എസ്.എസ്സിലെ പ്രവേശനോത്സവം അതിയന്നൂര്‍ ബ്ലോക്ക് പഞ്ചായത്ത് അംഗം എം.വി മന്‍മോഹന്‍ ഉദ്ഘാടനം ചെയ്തു. പിടിഎ പ്രസിഡന്‍റ് എസ്. സജി അധ്യക്ഷനായി.സി. അനിത കെ.എ.എസ് മുഖ്യാതിഥി ആയിരുന്നു. വ്ളാത്താങ്കര വൃന്ദാവന്‍ ഹൈസ്കൂളിലെ പ്രവേശനോത്സവം ശ്രദ്ധേയമായി. യു.എസ്.എസ് സ്കോളര്‍ഷിപ്പ് നേടിയ വിദ്യാര്‍ഥികള്‍ അക്ഷരത്തിരി തെളിച്ചായിരുന്നു ഉദ്ഘാടനം. ജനപ്രതിനിധികളും സ്കൂള്‍ അധികൃതരും പിടിഎ ഭാരവാഹികളും സംബന്ധിച്ചു. പേരൂര്‍ക്കടയിൽ കളർഫുള്ളായി പേരൂര്‍ക്കട: പ്രവേശനോത്സവം പേരൂര്‍ക്കട ഗവ. ഗേള്‍സ് ഹയര്‍സെക്കന്‍ഡറി സ്‌കൂളില്‍ കളര്‍ഫുള്ളായി. തിരുവനന്തപുരം അസി. കളക്ടര്‍ ഡോ. ശിവശക്തിവേല്‍ ഉദ്ഘാടനം ചെയ്തു. പിടിഎ പ്രസിഡന്‍റ് അഭയപ്രകാശ് അധ്യക്ഷത വഹിച്ചു. പ്രിന്‍സിപ്പല്‍ ബിന്ദു ശിവദാസ്, പ്രഥമാധ്യാപിക പഞ്ചമി, മുന്‍ പ്രഥമാധ്യാപിക എസ്. ഉഷ, പിടിഎ പ്രസിഡനന്‍റ് ശുഭ ഉദയന്‍, സീനിയര്‍ അസിസ്റ്റന്റ് ദീപ എല്‍സ എഡ്വിന്‍ എന്നിവര്‍ പ്രസംഗിച്ചു. എസ്എസ്എല്‍സി പരീക്ഷയില്‍ എല്ലാ വിഷയത്തിനും എപ്ലസ് നേടിയ 22 വിദ്യാര്‍ഥിനികളെയും യുഎസ്എസ് പരീക്ഷയില്‍ സ്‌കോളര്‍ഷിപ്പ് നേടിയ 15 വിദ്യാര്‍ഥിനികളെയും പ്ലസ് ടു സയന്‍സില്‍ എല്ലാ വിഷയത്തിനും എ പ്ലസ് നേടിയ വിദ്യാര്‍ഥിനികളെയും ചടങ്ങില്‍ അനുമോദിച്ചു. കിരീടം ധരിച്ച് മധുരം നുണഞ്ഞ് നവാഗതർ ക്ലാസിൽ നേമം: അധ്യാപകർ നൽകിയ കിരീടവും ധരിച്ച് മധുരം നുകർന്ന് തീവണ്ടി പോലെ മനോഹരമാക്കിയ ഒന്നാം ക്ലാസിലേക്ക് രക്ഷിതാക്കളുടെ കൈപ്പിടിച്ച് അവർ നടന്നുകയറി. സ്കൂളിൽ നിന്ന് വർണ ബലൂണു പിടിച്ച് സെൽഫിയെടുത്ത് അഭിമാനത്തോടെ പ്രവേശനോത്സവ ഗാനം പാടി ഒന്നാം ക്ലാസിലെ ഒന്നാം ദിനം കൂട്ടുകാർ കളറാക്കി.കല്ലിയൂർ ഗ്രാമപഞ്ചായത്ത് പ്രവേശനോത്സവം നേമം ഗവ.യു.പി.എസിലാണ് നടന്നത്.

2024 വർഷത്തെ എൽ എസ് എസ് സ്കോളർഷിപ്പ് നേടിയ ശിഖ, നിവേദിത ,ആനന്ദ്, സൂര്യദേവ് ,അനാമിക എസ്. ഇന്ദ്രൻ , ഗായത്രി അരുൺ എന്നിവർ ചേർന്ന് അക്ഷരദീപം തെളിച്ചു.പ്രസിഡന്റ് എം.സോമശേഖരൻ നായർ,വൈസ് പ്രസിഡൻ്റ് എൽ ശാന്തിമതി,വിദ്യാഭ്യാസ സ്ഥിരംസമിതി അധ്യക്ഷ എസ്. പ്രീതാറാണി, ഗ്രാമപഞ്ചായത്തംഗങ്ങളായ കെ.കെ. ചന്തു കൃഷ്ണ, ഇ.ബി. വിനോദ്കുമാർ എന്നിവർ പ്രസംഗിച്ചു. പ്രവേശനോത്സവ ഗാനത്തിന്റെ ദൃശ്യാവിഷ്ക്കാരം കുട്ടികൾ അവതരിപ്പിച്ചു. ഉത്സവപ്രതീതിയിൽ നടന്ന പരിപാടിയിൽ അതിഥികൾ നവാഗതരെ വരവേറ്റ് സമ്മാനങ്ങൾ കൈമാറി. , വെള്ളായണി എം.എന്‍.എല്‍.പി. സ്‌കൂള്‍, കല്ലിയൂർ പുന്നമൂട് ഹയര്‍സെക്കണ്ടറി സ്‌കൂള്‍, കരുമം യുപി സ്‌കൂള്‍, പാപ്പനംകോട് എല്‍.പി.എസ്, പൂഴിക്കുന്ന് ഡബ്ല്യുഎല്‍പിഎസ്, പാപ്പനംകോട് അനന്തപുരി മോഡല്‍ സ്‌കൂള്‍, ശാന്തിവിള ന്യൂ യു.പി.എസ് എന്നീ സ്കൂളുകളിലും പ്രവേശനോത്സവം നടന്നു. ശിശുക്ഷേമ സമിതിയിലെ 57 പേര്‍ വിദ്യാലയ മുറ്റത്ത് തിരുവനന്തപുരം: സംസ്ഥാനമൊട്ടാകെ സ്‌കൂളുകളില്‍ പ്രവേശനോത്സവം നടക്കുമ്പോള്‍ സംസ്ഥാന ശിശുക്ഷേമ സമിതിയില്‍ നിന്നും ഇക്കുറി സ്‌കൂളുകളില്‍ എത്തിയത് 57 കുട്ടികള്‍. ഇതാദ്യമായാണ് ഇത്രയും കുട്ടികള്‍ സ്‌കൂളില്‍ പ്രവേശനം നേടുന്നത്. ഇവര്‍ക്ക് എ.എ. റഹിം എംപി ഉപഹാരങ്ങളും മധുരവും നല്‍കി സ്‌കൂളിലേക്ക് യാത്രയാക്കി. ശിശുക്ഷേമ സമിതി ആസ്ഥാനത്ത് നടന്ന ചടങ്ങില്‍ ജനറല്‍ സെക്രട്ടറി അരുണ്‍ഗോപി അധ്യക്ഷത വഹിച്ചു. എല്‍കെജി, യുകെജി വിഭാഗങ്ങളിലേക്ക് 15 പേരും ഒന്നാം ക്‌ളാസിലേക്ക ഏഴു പേരും തങ്ങളുടെ സ്‌കൂളുകളില്‍ എത്തിയത് ജനറല്‍ സെക്രട്ടറി അരുണ്‍ഗോപിയുടെ കൈ പിടിച്ചാണ്. രണ്ടു മുതല്‍ പ്ലസ് ടു വരെ ക്‌ളാസുകളിലായി പഠിക്കുന്ന മറ്റ് 34 കുട്ടികളും ഇവര്‍ക്കൊപ്പം സ്‌കൂളിലെത്തി. കുട്ടികളില്‍ 15 പേര്‍ പട്ടം ഗേള്‍സിലും 42 പേര്‍ മോഡല്‍ എല്‍പിഎസിലും വിദ്യാര്‍ഥികളാണ്. കൊല്ലം ശിശുക്ഷേമ സമിതിയില്‍ നിന്ന് 17 കുട്ടികളും ആലപ്പുഴയില്‍ അഞ്ചും പത്തനംതിട്ടയിലും മലപ്പുറത്തും ഒന്‍പതു വീതവും എറണാകുളത്ത് ഒന്നും പാലക്കാട് ഏഴും കോഴിക്കോടും കാസര്‍കോടും നാലു കുട്ടികള്‍ വീതവും സ്‌കൂളുകളില്‍ എത്തി. വികെ കാണി സ്കൂളിൽ വിതുര: വികെ കാണി സ്കൂളിൽ നടന്ന ചടങ്ങിൽ പിടിഎ പ്രസിഡൻ്റ് ശ്രീജിത്ത് അധ്യക്ഷനായി. മുൻ പ്രഥമധ്യാപിക അനിത ടീച്ചർ പ്രവേശനോത്സവം ഉദ്ഘാടനം ചെയ്തു. എഴുത്തുകാരി ഡോ.ബീന മുഖ്യ അഥിതിയായി.സീനിയർ അധ്യാപകൻ അഭിലാഷ് ,ജില്ലാ പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർപേഴ്സൺ സുനിത, ബ്ലോക്ക് മെമ്പർ കണ്ണൻ എസ് ലാൽ , എസ്എംസി ചെയർമാൻ സാജു, പഞ്ചായത്ത് മെമ്പർ സന്ധ്യ എസ്.നായർ, പിടിഎ വൈസ് പ്രസിഡന്‍റ് സഫീന തുടങ്ങിയവർ പ്രസംഗിച്ചു. ബെത്‌ലഹേം ഇംഗ്ലീഷ് മീഡിയം സ്കൂൾ തിരുവനന്തപുരം : ബെത്‌ലഹേം ഇംഗ്ലീഷ് മീഡിയം സ്കൂളിലെപ്രവേശനോത്സവം ലയോള കോളജ് അസി.പ്രഫ. ഫാ.രഞ്ജി ജോർജ് ഭദ്രദീപം കൊളുത്തി ഉദ്ഘാടനം ചെയ്തു. ഹെഡ്മിസ്ട്രസ് സിസ്റ്റർ ഫിൽസി മാടമാത്ര, റവ.സി.സിസി കുഴിപ്പള്ളി ലോക്കൽ മാനേജർ, സിസ്റ്റർ റോസ്‌മി, പിടിഎ പ്രസിഡന്‍റ് പ്രവീൺകുമാർ, സ്റ്റാഫ് സെക്രട്ടറി ആനി എൽ. രാജ്. എന്നിവർ ചടങ്ങിൽ പങ്കെടുത്തു. നെടുമങ്ങാട് മേഖലയിലെ സ്കൂളുകൾ നെടുമങ്ങാട് : അമൃത കൈരളി വിദ്യാഭവനിലെ പ്രവേശനോത്സവം സ്കൂൾ മാനേജർ ജി.എസ്.സജികുമാർ ഉദ്‌ഘാടനം ചെയ്തു.പ്രിൻസിപ്പൽ എസ്.സിന്ധു സ്കൂൾ കോർഡിനേറ്റർമാരായ വൃന്ദ നായർ, പി.കവിത, വിദ്യാർഥി പ്രതിനിധികൾ തുടങ്ങിയവർ പങ്കെടുത്തു. ചുള്ളിമാനൂർ എസ്എച്ച്്‌ യുപി സ്കൂൾ പ്രവേശനോത്സവം വാർഡ് മെമ്പർ ഷീബ ബീവി ഉദ്ഘാടനം ചെയ്തു.മാനേജർ ഫാ. ടി.ബിനു സന്ദേശം നൽകി. പിടിഎ പ്രസിഡന്‍റ് ജെ.ഷിബു അധ്യക്ഷതവഹിച്ചു. യോഗത്തിൽ ഹെഡ്മാസ്റ്റർ എൽ.ലോറൻസ്,ബ്ലോക്ക് മെമ്പർ ശ്രീകുമാർ, സ്റ്റാഫ്‌ സെക്രട്ടറി കൊച്ചുവിള അൻസാരിഎന്നിവർ പ്രസംഗിച്ചു. വിദ്യാധിരാജ എൽപി സ്കൂളിലെ പ്രവേശനോത്സവം നെടുമങ്ങാട് സബ് ഇൻസ്‌പെക്‌ടർ ഓഫ് പോലീസ് സന്തോഷ്‌ കുമാർ ഉദ്ഘാടനം ചെയ്തു.പിടിഎ പ്രസിഡന്‍റ് അഭിലാഷ് അധ്യക്ഷതവഹിച്ചു. ഹെഡ്മാസ്റ്റർ അനീഷ്, പിടിഎ വൈസ് പ്രസിഡന്‍റ് സതീശൻ , എസ്ആർജി കൺവീനർമാരായ അൽത്താഫ്, സാബിറ, ബി.ജി.സിനി എന്നിവർ പ്രസംഗിച്ചു. കരകുളം ജിവിഎച്ച്എസ്എസിലെ പ്രവേശനോത്സവം കരകുളം പഞ്ചായത്ത് വൈസ് പ്രസിഡന്‍റ് ടി .സുനിൽകുമാർ ഉദ്ഘാടനം ചെയ്തു. സിനിമാതാരം ജോബി മുഖ്യാതിഥി ആയിരുന്നു. പിടിഎ പ്രസിഡന്‍റ് കെ.രവികുമാർ അധ്യക്ഷത വഹിച്ചു. ഉഴമലയ്ക്കൽ പഞ്ചായത്തുതല സ്കൂൾ പ്രവേശനോത്സവം കുളപ്പട ഗവ.എൽപി സ്കൂളിൽ ജി.സ്റ്റീഫൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ജെ.ലളിത അധ്യക്ഷയായി. ജനപ്രതിനിധികളായ എസ്.ശേഖരൻ, ഒ.എസ്.ലത, സജീന കാസിം, അരുവിയോട് സുരേന്ദ്രൻ, പ്രഥമാധ്യാപിക എം.ടി.രാജലക്ഷ്മി, പിടിഎ പ്രസിഡന്‍റ് രാഗിണി തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]