ADVERTISEMENT

ADVERTISEMENT

ബി.പി മൊയ്‌തീൻ സ്‌മാരക സ്പോർട്‌സ് കോംപ്ലക്‌സിന്‍റെ നിർമാണോദ്ഘാടനം

മുക്കം: മുക്കം സെക്കന്‍ഡറി സ്‌കൂളിൽ 12 കോടി ചെലവിൽ നിർമ്മിക്കുന്ന ബി.പി മൊയ്‌തീൻ സ്‌മാരക സ്പോർട്‌സ് കോംപ്ലക്‌സിന്‍റെ നിർമ്മാണോദ്ഘാടനം നാളെ രാവിലെ പത്തിന് നടക്കും.

ലിന്‍റോ ജോസഫ് എംഎല്‍എ നിർവ്വഹിക്കും. മുക്കം നഗരസഭചെയർമാൻ പി.ടി ബാബു അധ്യക്ഷത വഹിക്കുമെന്നും ചടങ്ങിൽ ജില്ലാ സ്പോർട്‌സ് കൗൺസിൽ പ്രസിഡന്‍റ് ഒ. രാജഗോപാൽ മുഖ്യാതിഥിയാവുമെന്നും സ്കൂൾ അധികൃതർ വാർത്ത സമ്മേളനത്തിൽ അറിയിച്ചു.

സ്കൂൾ മാനേജർ വത്സൻ മഠത്തിൽ , പ്രിൻസിപ്പൽ സി.പി.ജംഷീന, ഹെഡ് മാസ്റ്റർ സി.എം. മനോജ്, അഡ്മിനിസ്ട്രേറ്റർ കെ.വി. വിജയൻ, മുക്കം എഡ്യൂക്കേഷൻ സൊസൈറ്റി ഡയറക്ടര്‍അജയ് മഠത്തിൽ തുടങ്ങിയവർ സംബന്ധിച്ചു

ADVERTISEMENT

ലഹരിക്കെതിരെ നിലവിളി സമരം

മുക്കം: വ്യാപകമായ ലഹരി ഉപയോഗത്തിനെതിരെ,വിദ്യാർഥികളെയും യുവാക്കളെയും ബഹുജനങ്ങളെയും ലഹരിയിൽ നിന്നും മോചിപ്പിക്കണം എന്നാവശ്യപ്പെട്ട് മുക്കത്ത് ലഹരിക്കെതിരെ നിലവിളി സമരം നടത്തി. മദ്യ നിരോധന സമിതി സംസ്ഥാന കമ്മിറ്റിയുടെ നേതൃത്വത്തിലാണ് പരിപാടി നടന്നത്. തുടർന്ന് നടന്ന ബഹുജന റാലി മുക്കം മിനി പാർക്കിൽ നിന്ന് ആരംഭിച്ച് എസ്കെ പാർക്കിൽ സമാപിച്ചു.മദ്യ നിരോധന സമിതി സംസ്ഥാന പ്രസിഡന്‍റ് കെ.പി. ദുര്യോധനൻ നിലവിളി സമരം ഉദ്ഘാടനം ചെയ്തു. കോഴിക്കോട് ജില്ലാ പ്രസിഡന്‍റ് നടുക്കണ്ടി അബൂബക്കർ അധ്യക്ഷത വഹിച്ചു.

തൊഴിലുറപ്പ് തൊഴിലാളികൾക്ക് സഹായ ഉപകരണങ്ങൾ വിതരണം ചെയ്തു

മുക്കം: കൊടിയത്തൂർ പഞ്ചായത്ത് ഭരണസമിതിയുടെ ആഭിമുഖ്യത്തിൽ തൊഴിലുറപ്പ് തൊഴിലാളികൾക്ക് സഹായ ഉപകരണങ്ങൾ വിതരണം ചെയ്തു. ചെളിയിലും പറമ്പിലുമൊക്കെ ജോലി ചെയ്യുന്ന തൊഴിലാളികൾക്ക് പകർച്ചവ്യാധികളിൽ നിന്ന് ഉൾപ്പെടെ സംരക്ഷണം നൽകുക എന്നതാണ് പദ്ധതി കൊണ്ട് ലക്ഷ്യമിടുന്നത്. 2024- 2025 വാർഷിക പദ്ധതിയിൽ ഉൾപ്പെടുത്തി ബൂട്ട്, ഗ്ലൗസ് എന്നിവയാണ് നൽകിയത്. പന്നിക്കോട് നടന്ന ചടങ്ങിൽ ഒൻപതാം വാർഡിലെ തൊഴിലുറപ്പ് തൊഴിലാളികൾക്ക് നൽകി പഞ്ചായത്ത് പ്രസിഡന്‍റ് ദിവ്യ ഷിബു വിതരണോദ്ഘാടനം നിർവഹിച്ചു. ഫസൽ കൊടിയത്തൂർ അധ്യക്ഷത വഹിച്ചു. ബാബു പൊലുകുന്ന് ,അസി. എൻജിനീയർ ദീപേഷ് എന്നിവർ പങ്കെടുത്തു

ശങ്കരവയൽ - അമ്പലനട റോഡ് ഉദ്ഘാടനം ചെയ്തു

കൂരാച്ചുണ്ട്:കൂരാച്ചുണ്ട് പഞ്ചായത്ത്‌ ഒന്നാം വാർഡ് ശങ്കരവയൽ - അമ്പലനട റോഡ് ബ്ലോക്ക് പഞ്ചായത്ത്‌ പ്രസിഡന്‍റ് വി.കെ. അനിത ഉദ്ഘാടനം ചെയ്തു. പഞ്ചായത്ത്‌ പ്രസിഡന്‍റ് ഒ.കെ അമ്മദ് ആധ്യക്ഷത വഹിച്ചു. ബ്ലോക്ക് പഞ്ചായത്ത് ഡിവിഷൻ മെമ്പർ വി.കെ. ഹസീന, പഞ്ചായത്തംഗങ്ങളായ വിൽ‌സൺ പാത്തിച്ചാലിൽ, അൻസമ്മ ജോസഫ്, അസിസ്റ്റന്‍റ് എൻജിനീയർ ഹിരൺ, ബേബി പൂവത്തിങ്കൽ, പ്രദീപൻ ശങ്കരവയൽ, ജോർജ് പൊട്ടുകുളം എന്നിവർ പങ്കെടുത്തു.

പെൺകുട്ടിയെ പീഡിപ്പിക്കാൻ ശ്രമം; ഇതര സംസ്ഥാന തൊഴിലാളികൾ പിടിയിൽ

കോഴിക്കോട്: നഗരമധ്യത്തിൽ പ്രായപൂര്‍ത്തിയാകാത്ത പെണ്‍കുട്ടിക്ക് നേരെ അതിക്രമം കാട്ടിയ രണ്ട് ഇതര സംസ്ഥാന തൊഴിലാളികള്‍ പിടിയില്‍. കോഴിക്കോട് കസബ പോലീസാണ് ഇരുവരെയും പിടികൂടിയത്. ഫൈജൽ, ഹിമാൻ അലി എന്നിവരാണ് പിടിയിലായത്. ചൊവാഴ്ച രാത്രിയായിരുന്നു കേസിന് ആസ്പദമായ സംഭവം. ചാലപ്പുറത്ത് വച്ചാണ് പതിനാല് വയസുള്ള പെണ്‍കുട്ടിക്ക് നേരെ അതിക്രമം നടന്നത്. ട്യൂഷൻ കഴിഞ്ഞ് മടങ്ങുകയായിരുന്ന വിദ്യാർഥിനിയെ ഇടവഴിയിലേക്ക് ബലമായി പിടിച്ചു വലിച്ച് പീഡിപ്പിക്കാൻ ശ്രമിക്കുകയായിരുന്നു. പെൺകുട്ടി ഓടി രക്ഷപ്പെട്ടു. പോക്‌സോ, തട്ടിക്കൊണ്ടുപോകാനുള്ള ശ്രമം തുടങ്ങിയ വകുപ്പുകള്‍ പ്രകാരമാണ് ഇരുവര്‍ക്കുമെതിരേ കേസെടുത്തത്. പ്രതികളെ ഇന്ന് കോടതിയില്‍ ഹാജരാക്കും.

പ്രചാരണ പരിപാടിക്ക് തുടക്കമായി

മുക്കം: ആറ് ഏഴ് തീയതികളിൽ തെച്ചിയാട് അൽ ഇർഷാദ് ക്യാമ്പസിൽ നടക്കുന്ന അൽ ഇർഷാദ് സനദ് ദാന സമ്മേളനത്തിന്‍റെ പ്രചരണ പരിപാടികൾക്ക് തുടക്കമായി. ജീവിതമാണ് ലഹരി എന്ന സന്ദേശത്തിൽ വിവിധ സ്ഥലങ്ങളിൽ ക്യാമ്പയിൻ നടത്തി. മതവിജ്ഞാനീയം, സാമൂഹികകാഗരണം എന്നിവ ഉൾപ്പെടുന്ന വിവിധ പരിപാടികൾ സമ്മേളനത്തിന്‍റെ ഭാഗമായി നടക്കും. സമ്മേളനത്തിന്‍റെ ആദ്യ ദിനമായ ആറിന് രാവിലെ ഒന്പതിന് മുസാബഖത്തുൽ ഇർശാദ് ആരംഭിക്കും. വ്യത്യസ്ത കാറ്റകറികളിലായി 200 ലേറെ വിദ്യാർത്ഥികൾ മാറ്റുരുക്കും . ഖുർആൻ ശ്രവണവും ബുർദ മത്സരവും വൈകുന്നേരം ഏഴിന് നടക്കും. സ്ക്രീനിംഗിലൂടെ തെരെഞ്ഞെടുത്ത എട്ട് ടീമുകൾ തമ്മിലാണ് മത്സരം നടക്കുന്നത്.

വന്യജീവി ശല്യത്തിനെതിരേ ഫെൻസിംഗ് സ്ഥാപിക്കാൻ തീരുമാനം

കൂരാച്ചുണ്ട് : കക്കയം ഫോറസ്റ്റ് സ്റ്റേഷന്‍റെ പരിധിയിലുള്ള കൂരാച്ചുണ്ട് പഞ്ചായത്തിലെ വിവിധ പ്രദേശങ്ങളിൽ വന്യജീവി ശല്യം വർധിച്ചതിനെ തുടർന്ന് പഞ്ചായത്തിന്‍റെയും വനം വകുപ്പിന്‍റെയും നേതൃത്വത്തിൽ ജന ജാഗ്രതാ സമിതി യോഗം പഞ്ചായത്ത് പ്രസിഡന്‍റ് ഒ.കെ. അമ്മദിന്‍റെ അധ്യക്ഷതയിൽ പഞ്ചായത്ത് ഹാളിൽ ചേർന്നു. യോഗത്തിൽ കക്കയം വനമേഖലയിൽ രണ്ട് കിലോമീറ്റർ ദൂരത്തിൽ വനാതിർത്തിയിൽ മുൻപ് അനുവദിച്ചിട്ടുള്ള സോളാർ ഫെൻസിംഗ് പദ്ധതി അടിയന്തരമായി നടപ്പാക്കാൻ ആവശ്യമായ നടപടി സ്വീകരിക്കാൻ തീരുമാനമായി. ജനജാഗ്രതാ സമിതിയെ രണ്ട് യൂണിറ്റുകളാക്കിക്കൊണ്ട് വാർഡ് 4,5,6 ഒരു യൂണിറ്റും വാർഡ് 2,3,7 രണ്ടാമത്തെ യൂണിറ്റായും ആർആർടി രൂപീകരിക്കുന്നതിനും തീരുമാനമായി.യോഗത്തിൽ വൈസ് പ്രസിഡന്‍റ് വിൻസി തോമസ്, ബ്ലോക്ക് പഞ്ചായത്ത് അംഗം വി.കെ. ഹസീന, കക്കയം ഫോറസ്റ്റ് സ്റ്റേഷൻ ഡെപ്യൂട്ടി റെയിഞ്ച് ഓഫീസർ സി. വിജിത്ത്, പഞ്ചായത്ത് അംഗങ്ങളായ സണ്ണി പുതിയകുന്നേൽ, വിൽസൺ പാത്തിച്ചാലിൽ, സിമിലി ബിജു, അരുൺ ജോസ്, ആൻസമ്മ ജോസഫ്, വിവിധ രാഷ്ട്രീയ പാർട്ടി പ്രതിനിധികളായ ജോസ് വെളിയത്ത്, എൻ.കെ. കുഞ്ഞമ്മദ്, എ.സി. രാമകൃഷ്ണൻ, പി.കെ പ്രവീൺകുമാർ, പഞ്ചായത്ത് സെക്രട്ടറി ഇ. ഷാനവാസ് തുടങ്ങിയവർ പങ്കെടുത്തു.

കൂരാച്ചുണ്ടിൽ അനധികൃതമായി സൂക്ഷിച്ച ഗ്യാസ് സിലിണ്ടറുകൾ പിടിച്ചെടുത്തു

കൂരാച്ചുണ്ട്: വാടകവീട്ടിൽ അനധികൃതമായി സൂക്ഷിച്ച ഗ്യാസ് സിലിണ്ടറുകളും മറ്റ് ഉപകരണങ്ങളും പിടിച്ചെടുത്തു. കൂരാച്ചുണ്ട് പോലീസ് സ്റ്റേഷന് സമീപം കൂരാച്ചുണ്ട് സ്വദേശിയായ ജയൻ കെ. ജോസ് വാടകയ്ക്കെടുത്ത വീട്ടിൽ അനധികൃതമായി സൂക്ഷിച്ച 52 പാചകവാതക സിലണ്ടറുകളാണ് രഹസ്യ വിവരം ലഭിച്ചതിനെ തുടർന്ന് കൊയിലാണ്ടി സിവിൽ സപ്ലൈ വകുപ്പ് ഉദ്യോഗസ്ഥർ നടത്തിയ പരിശോധനയിൽ കണ്ടെത്തിയത്. ഇതിൽ പാചക വാതകം നിറച്ച 20 സിലിണ്ടറുകളും നിറക്കാത്ത 32 ഗ്യാസ് സിലിണ്ടറുകളുമാണുള്ളത്. കൂടാതെ ഗ്യാസ് റീഫില്ലിംഗ് മോട്ടോർ, സിലിണ്ടർ ക്യാപ്പ് എന്നിവയും ഇവിടെ നിന്നും കണ്ടെടുത്തിട്ടുണ്ട്. കൊയിലാണ്ടി താലൂക്ക് സിവിൽ സപ്ലൈ ഓഫീസർ ചന്ദ്രൻ കുഞ്ഞിപ്പറമ്പത്തിന്‍റെ നേതൃത്വത്തിലുള്ള റേഷനിംഗ് ഇൻസ്പെക്ടർമാരായ ശ്രീനിവാസൻ പുളിയുള്ളതിൽ, കെ.കെ ബിജു, ഒ.കെ. നാരായണൻ, എം. ശ്രീജു, കെ. ബീന, എസ്. സുനിൽ കുമാർ എന്നിവരടങ്ങിയ സംഘമാണ് പരിശോധന നടത്തിയത്. സംഭവം സംബന്ധിച്ചുള്ള റിപ്പോർട്ട് ഉടൻ കളക്ടർക്ക് സമർപ്പിക്കുമെന്ന് ഉദ്യോഗസ്ഥർ അറിയിച്ചു. പിടിച്ചെടുത്ത ഗ്യാസ് സിലിണ്ടറുകളും മറ്റു ഉപകരണങ്ങളും കൂരാച്ചുണ്ടിലെ സാരഥി ഗ്യാസ് ഏജൻസിക്ക് ഉദ്യോഗസ്ഥർ കൈമാറി.

കടത്തനാടൻ അങ്കം പവലനിയും അങ്കത്തട്ടും ഉയർന്നു

ഒഞ്ചിയം: :ചോമ്പാൽ മിനി സ്റ്റേഡിയത്തിൽ നടക്കുന്നകടത്തനാടൻ അങ്ക കളരിയുടെയും , പവലിയനുകളുടയും നിർമാണം അവസാന ഘട്ടത്തിൽ. മെയ് മുന്ന് മുതലാണ് പരിപാടി. വടകര ബ്ലോക്ക് പഞ്ചായത്ത് സാംസ്കാരിക വകുപ്പിന്‍റെയുംമഹാത്മ പബ്ലിക് ലൈബ്രറി ചോമ്പാലയുടെയും ,കേരള ഫോക്‌ലോർ അക്കാഡമിയുടെയും, കുടുംബ ശ്രീ മിഷൻ എന്നിവയുടെ സംയുക്ത സഹകരണത്തോടെ സംഘടിപ്പിക്കുന്ന കടത്തനാടൻ അങ്കം നടത്തുന്നത്. മേളയിൽ വിവിധ ശൈലികളിലുള്ള കേരളത്തിൻറെ കളരി മുറകളെയും കളരി ചികിത്സയും ആയോധനകലക്കായി ഉപയോഗിക്കുന്ന ആയുധങ്ങളുടെയും പ്രദർശനവും സെമിനാറുകളും ഉണ്ടായിരിക്കും ഒപ്പം ദിവസവും പാട്ടും താളവും നൃത്തവും സമന്വയിക്കുന്ന കേരളത്തിലെയും ഇന്ത്യയിലെയും പ്രഗൽഭ ഗ്രൂപ്പുകളുടെ കലാ പരിപാടികളോടൊപ്പം പ്രാദേശിക സംഘത്തിൻറെ വിവിധ പരിപാടികളും നാടൻ കലകളും അരങ്ങേറും.

അതിര് തർക്കം: മലയോര ഹൈവേ നിർമാണം നിലച്ചിട്ട് ഒരാഴ്ച പിന്നിട്ടു

ചക്കിട്ടപാറ: അശാസ്ത്രീയ അതിര് അളവ് നിർണയത്തിനെതിരേ നാട്ടുകാർ പ്രതിഷേധം അറിയിച്ചതോടെ നിലച്ച ചക്കിട്ടപാറ ടൗണിലെ മലയോര ഹൈവേ പ്രവർത്തി പ്രശ്‌നം പരിഹരിക്കാൻ നാഥനില്ലാത്ത സ്ഥിതി. റോഡ് കൈയ്യേറ്റക്കാരെ സംരംക്ഷിക്കാൻ ചില അധികാര കേന്ദ്രങ്ങൾ ശ്രമം നടത്തിയപ്പോഴാണ് റോഡിന്‍റെ വീതി നിർണയിക്കലിൽ കൃത്രിമത്വം ഉണ്ടായതെന്നു നാട്ടുകാർ പരാതി ഉന്നയിച്ചത്. ടൗണിന്‍റെ ഭാഗമായ പഞ്ചായത്ത് ഓഫീസ് മുതൽ മുസ്ലീം പള്ളിക്ക് സമീപം വരെ താലൂക്ക് സർവെയർ വന്ന് റോഡ് ഇരുവശവും അളന്ന് വീതി മാർക്ക് ചെയ്യണമെന്ന ആവശ്യമാണ് ഉയരുന്നത്. റോഡ് വികസനത്തിനായി വർഷങ്ങൾക്കു മുമ്പ് പെരുവണ്ണാമൂഴി മുതൽ ചെമ്പ്ര വരെ അക്വയർ ചെയ്ത് ഭൂമി സർക്കാർ എടുത്തിട്ടുള്ളതാണ്. പിൽക്കാലത്ത് ഇതിൽ പല ഭാഗത്തും കൈയ്യേറ്റമുണ്ടായി. പല കെട്ടിടങ്ങളും റോഡിന്‍റെ സ്ഥലത്താണുള്ളത്. ഇത് സംരക്ഷിക്കാൻ പിൻ വാതിൽ സഹായമെത്തിയതോടെയാണ് നാട്ടുകാർ രംഗത്തു വന്നത്. കൈയ്യേറ്റക്കാരെയും അവരെ സംരംക്ഷിക്കുന്നവർക്കെതിരേയും ശക്തമായ നിലപാടുമായി കോൺഗ്രസ്‌ ചക്കിട്ടപാറ മണ്ഡലം കമ്മിറ്റി രംഗത്തു വന്നു കഴിഞ്ഞു. പാർട്ടി നേതാക്കൾ കഴിഞ്ഞ ദിവസം ചക്കിട്ടപാറ ടൗണിൽ റോഡിന്‍റെ വീതി അളവ് നടത്തി. വലിയ വ്യത്യാസമാണ് പല ഭാഗത്തും കണ്ടതെന്ന് ബോധ്യപ്പെട്ടു. മണ്ഡലം പ്രസിഡന്‍റ് റെജി കോച്ചേരി, ബാബു കൂനന്തടം, ജെയിംസ് മാത്യു, ഷാജു മാളിയേക്കൽ, പി.കെ. ദിനേശൻ, ജെയിൻ ജോൺ, ഷാജി അമ്പാട്ട് എന്നിവർ നേതൃത്വം നൽകി. വരും ദിവസങ്ങളിലും പ്രതികരണം ശക്തമാക്കാനാണ് കോൺഗ്രസിന്‍റെ തീരുമാനം.

വിജയത്തിളക്കത്തിൽ ചേവരമ്പലം സെന്‍റ് മേരീസ് ഇംഗ്ലീഷ് മീഡിയം സ്‌കൂൾ

കോഴിക്കോട്: പത്താംക്ലാസിൽ (ഐസിഎസ്ഇ) പരീക്ഷ എഴുതിയ 49 പേരും പന്ത്രണ്ടാം ക്ലാസിൽ (ഐഎസ്‌സി) പരീക്ഷ എഴുതിയ 31 പേരും ഉന്നത വിജയം കരസ്ഥമാക്കി. ഇതിൽ പത്താം ക്ലാസിൽ 13 പേരും പന്ത്രണ്ടാം ക്ലാസിൽ 7 പേരും 90 ശതമാനത്തിലധികം മാർക്ക് നേടി. പത്താംക്ലാസിൽ അഹാൻ പി. മോഹൻ 96%, ഹരികൃഷ്‌ണ എസ് 95.8%, നീഹാരിക ശ്രീയൂഷ് 94.4% എന്നിവർ ഒന്നും രണ്ടും മൂന്നും സ്ഥാനങ്ങൾ കരസ്ഥമാക്കി. പന്ത്രണ്ടാം ക്ലാസിലെ സയൻസ് വിഭാഗത്തിൽ ആർഷ്യകൗഷിത്ത് രാജ് 97%, സൃഷ്ടി വിനീത് 96.25% എന്നിവർ യഥാക്രമം ഒന്നും രണ്ടും സ്ഥാനങ്ങൾ കരസ്ഥമാക്കിയപ്പോൾ കൊമേഴ്‌സ് വിഭാഗത്തിൽ പി. ശ്രീലക്ഷ്മി 95.5%, തുഷാര അനീഷ് 94.5% എന്നിവർ ഒന്നും രണ്ടും സ്ഥാനങ്ങൾക്ക് അർഹരായി.

പനായി - നന്മണ്ടയിലേക്കുള്ള മൺറോഡ് നവീകരിക്കണം: മനുഷ്യാവകാശ കമ്മീഷൻ

കോഴിക്കോട്: പ്രധാനമന്ത്രി ഗ്രാമസഡക് യോജന പ്രകാരം നവീകരിക്കപ്പെട്ട പനായി - നന്മണ്ട റോഡിലേക്ക് എത്തുന്ന മൺപാത ടാർ ചെയ്യാൻ ജില്ലാ പഞ്ചായത്തിന് പരിമിതിയുള്ള സാഹചര്യത്തിൽ ബാലുശേരി പഞ്ചായത്ത് പരാതി പരിഹരിക്കാൻ നടപടിയെടുക്കണമെന്ന് മനുഷ്യാവകാശ കമ്മീഷൻ ജൂഡീഷ്യൽ അംഗം കെ ബൈജൂനാഥ്. മൺപാത ഗതാഗത യോഗ്യമല്ലെന്നും വയോധികരായ തങ്ങൾ ബുദ്ധിമുട്ട് അനുഭവിക്കുകയാണെന്നും ആരോപിച്ച് സമർപ്പിച്ച പരാതിയിലാണ് നടപടി. പ്രദേശത്തെ ചെറിയ റോഡുകളെല്ലാം അതേപടി നിലനിർത്തിയാണ് കേന്ദ്ര സ്കീമിൽ റോഡ് നിർമ്മിച്ചതെന്നും പരാതിയുള്ള മൺ റോഡ് വഴിയാണ് കാലാകാലങ്ങളായി വെള്ളം ഒഴുകുന്നതെന്നും ജില്ലാ പഞ്ചായത്ത് എക്സിക്യൂട്ടീവ് എന്‍ജിനീയര്‍ കമ്മീഷനെ അറിയിച്ചു. എന്നാൽ ജില്ലാ പഞ്ചായത്തിന് പരാതി പരിഹരിക്കാൻ പരിമിതിയുണ്ടെന്നും റിപ്പോർട്ടിൽ പറയുന്നു. ബാലുശേരി സ്വദശിനി എ.കെ. ലക്ഷ്മി സമർപ്പിച്ച പരാതിയിലാണ് നടപടി.

കാലിക്കട്ട് എഫ്സി ചാമ്പ്യൻമാർ

കോഴിക്കോട്: കൊയിലാണ്ടി സ്പോർട്സ് കൗൺസിൽ സ്റ്റേഡിയത്തിൽ നടന്നുവരുന്ന കാലിക്കട്ട് എഫ്സി ജില്ലാ ഇ ഡിവിഷൻ ലീഗ് ഫുട്ബോൾ ചാമ്പ്യൻഷിപ്പിൽ 13 പോയന്‍റുനേടി കാലിക്കട്ട് എഫ്സി ചാമ്പ്യൻമാരായി. ഇന്നലെ നടന്ന ആദ്യ മത്സരത്തിൽ കാലിക്കട്ട് എഫ്സി അഭിജിത്ത് നേടിയ ഒരുഗോളിന് മലബാർ ക്രിസ്ത്യൻ കോളജിനെ പരാജയപ്പെടുത്തി. 11 പോയന്‍റ് നേടിയ കൂരിയാൽ ബ്രദേഴ്‌സ് രണ്ടാം സ്ഥാനം കരസ്ഥമാക്കി.

ദേശീയ ഫൂട്ട് വോളിചാന്പ്യൻഷിപ്പ് 18 മുതൽ

കോഴിക്കോട് : മെയ് 18 മുതൽ 20 വരെ കോഴിക്കോട് ബീച്ചിൽ നടക്കുന്ന 11 -മത് ദേശീയ ഫൂട്ട് വോളിചാന്പ്യൻഷിപ്പിന്‍റെ ലോഗോ കോഴിക്കോട് റീജനൽ ട്രാൻസ്പോർട്ട് ഓഫീസർ പി.എ. നസീർ ഓർഗനൈസിംഗ് കമ്മിറ്റി ചെയർമാൻ അബ്ദുൽ മജീദിനും വൈസ് ചെയർമാൻ വി.പി. അബ്ദുൾ കരീമിനും നൽകി. പ്രകാശനം ചെയ്തു. ഫൂട്ട് വോളി അസോസിയേഷൻ ദേശീയ സെക്രട്ടറി എ കെ മുഹമ്മദ് അഷ്റഫ് അധ്യക്ഷത വഹിച്ചു. ആർ.ജയന്ത് കുമാർ, കെ.വി. റാഷിദ് , മുഹമ്മദലി വള്ളിക്കാട് എന്നിവർ സംസാരിച്ചു.

തുമ്പക്കോട്ട് മലയിൽ ക്വാറി അനുവദിക്കില്ല: യൂത്ത് കോൺഗ്രസ്

തിരുവമ്പാടി: തിരുവമ്പാടി പഞ്ചായത്തിൽ അനധികൃതമായി ക്വാറി തുടങ്ങുന്നതിനുള്ള ശ്രമവുമായി വന്നാൽ യൂത്ത് കോൺഗ്രസിന്‍റെ നേതൃത്വത്തിൽ പ്രത്യക്ഷ സമരപരിപാടിയുമായി എത്തുമെന്ന് യൂത്ത് കോൺഗ്രസ് തിരുവമ്പാടി മണ്ഡലം കമ്മിറ്റി മുന്നറിയിപ്പു നൽകി. നിയോജക മണ്ഡലം പ്രസിഡന്‍റ് അഡ്വ: മുഹമ്മദ് ദിശാൽ ഉദ്ഘാടനം ചെയ്തു. നിയോജക മണ്ഡലം ജനറൽ സെക്രട്ടറി ജിതിൻ പല്ലാട്ട് അധ്യക്ഷത വഹിച്ചു. വൈസ് പ്രസിഡന്‍റ് നിഷാദ് വീച്ചി, ജനറൽ സെക്രട്ടറി ജംഷിദ് ഒളകര, സെക്രട്ടറിമാരായ ലിബിൻ അമ്പാട്ട്, യു.സി അജ്മൽ, തിരുവമ്പാടി മണ്ഡലം പ്രസിഡന്‍റ് അമൽ ടി. ജെയിംസ്, ലിബിൻ ബെൻ തുറുവേലിൽ പ്രസംഗിച്ചു.

പാര്‍ക്കിംഗ് പ്ലാസ നിര്‍മാണം നീളുന്നു

കോഴിക്കോട്: മിഠായിത്തെരുവിലെ കിഡ്‌സണ്‍ കോര്‍ണറിലെ പാര്‍ക്കിംഗ് പ്ലാസ നിര്‍മാണം അനന്തമായി നീളുന്നു . പഴയ സത്രം ബിൽഡിങ് പൊളിച്ചു ബഹുനില പ്ലാസ നിർമിക്കുന്ന പദ്ധതി നടപ്പാക്കാൻ 2020 ഒക്ടോബറിലാണു കോർപറേഷൻ കൗൺസിൽ യോഗം തീരുമാനിച്ചത്.കാറും, 200 ഇരുചക്രവാഹനങ്ങളും പാർക്ക് ചെയ്യാനുള്ള സൗകര്യമാണു സത്രം ബിൽഡിഗ് പൊളിച്ച 22.7 സെന്‍റ് സ്ഥലത്തു നിർമിക്കാൻ ഉദ്ദേശിച്ചത്. നിർമാണ ചുമതല ഒരു കമ്പനിയെ ഏൽപിക്കുകയും ചെയ്തു. കരാർ ഏറ്റെടുത്ത കമ്പനിക്കെതിരെ പിന്നീട് ആരോപണങ്ങൾ ഉയർന്നു.അതിനിടയിൽ പദ്ധതി അനുമതി തേടി സർക്കാരിലേക്ക് അയച്ചു. പിന്നീട് 2023 ൽ കെട്ടിടം പൊളിക്കാൻ തീരുമാനിച്ചു. കെട്ടിടം പൊളിച്ചു നീക്കുന്ന പ്രവൃത്തി പൂർത്തിയാക്കുമ്പേക്കും പദ്ധതിക്കു സർക്കാരിൽ നിന്ന് അംഗീകാരം ലഭിക്കുമെന്നും കരുതി.കെട്ടിടത്തിലെ വ്യാപാരികളെ ഒഴിവാക്കി കെട്ടിടം പൊളിച്ചു. പക്ഷേ സർക്കാർ അനുമതി ഇനിയും എത്തിയിട്ടില്ല.

ജനകീയ പദ്ധതികള്‍; സ്മാര്‍ട്ടായി പൊതുവിതരണ വകുപ്പ്

കോഴിക്കോട്: ജനകീയ പദ്ധതികളിലൂടെ പൊതുവിതരണ രംഗത്ത് നിരവധി മാറ്റങ്ങള്‍ക്കാണ് കഴിഞ്ഞ ഒമ്പത് വര്‍ഷത്തിനിടെ ജില്ല സാക്ഷ്യം വഹിച്ചത്. ഭക്ഷ്യവസ്തുക്കളുടെ ലഭ്യത ഉറപ്പുവരുത്തുന്നതിനൊപ്പംതന്നെ വകുപ്പില്‍നിന്ന് ജനങ്ങള്‍ക്ക് ലഭ്യമാകുന്ന സേവനങ്ങളെല്ലാം ആധുനികവത്കരിച്ചു. സേവനങ്ങള്‍ വീടുകളില്‍ എത്തിച്ചുനല്‍കുന്നതിനടക്കം പദ്ധതികള്‍ ആവിഷ്‌കരിച്ചു. ഭക്ഷ്യധാന്യങ്ങള്‍ നഗറുകളിലെ വീടുകളില്‍ എത്തിച്ചുനല്‍കുന്ന "സഞ്ചരിക്കുന്ന റേഷന്‍ കട' പദ്ധതി ജില്ലയില്‍ വിജയകരമായി മുന്നോട്ടുപോകുകയാണ്. ദുര്‍ബല വിഭാഗങ്ങള്‍ക്കും വനമേഖലകളില്‍ കഴിയുന്നവര്‍ക്കും നേരിട്ട് റേഷന്‍ സാധനങ്ങള്‍ എത്തിക്കുന്ന പദ്ധതി ജില്ലയില്‍ ആദ്യമായി താമരശേരി താലൂക്കിലാണ് നടപ്പാക്കിയത്. കൂടരഞ്ഞി പഞ്ചായത്തിലെ മഞ്ഞക്കടവ്, തിരുവമ്പാടി പഞ്ചായത്തിലെ മുത്തപ്പന്‍പുഴ, മേലെ പൊന്നാങ്കയം, പുതുപ്പാടി പഞ്ചായത്തിലെ കുറുമരുകണ്ടി പ്രദേശങ്ങളിലാണ് നിലവില്‍ സേവനം ഒരുക്കുന്നത്. റേഷന്‍ കടകളിലെത്താന്‍ പ്രയാസമനുഭവിക്കുന്ന ഈ പ്രദേശങ്ങളിലെ നൂറിലധികം ആദിവാസി കുടുംബങ്ങള്‍ക്ക് പദ്ധതി പ്രയോജനപ്പെടുന്നുണ്ട്. വിശപ്പുരഹിത കേരളം ലക്ഷ്യമിട്ട് ആരംഭിച്ച സുഭിക്ഷ ഹോട്ടലുകള്‍ ജില്ലയില്‍ നാലിടത്ത് വിജയകരമായി പ്രവര്‍ത്തിച്ചു വരുന്നു. കുന്നമംഗലം, കൊയിലാണ്ടി, പേരാമ്പ്ര, നാദാപുരം നിയോജക മണ്ഡലങ്ങളില്‍ പ്രവര്‍ത്തിക്കുന്ന ഹോട്ടലുകള്‍ക്ക് പ്രതിമാസം ശരാശരി 1,51,000 രൂപ വകുപ്പ് സബ്‌സിഡിയായി നല്‍കുന്നുണ്ട്. റേഷന്‍ കടകള്‍ വഴി കൂടുതല്‍ ഉല്‍പന്നങ്ങളും സേവനങ്ങളും ലഭ്യമാക്കുന്ന കെ സ്റ്റോര്‍ പദ്ധതിയും ജില്ലയില്‍ യാഥാര്‍ഥ്യമായി. റേഷന്‍ കടകളുടെ മുഖച്ഛായ മാറ്റുന്ന പദ്ധതിയായിരുന്നു ഇത്. നിലവില്‍ ജില്ലയില്‍ 73 കെ സ്റ്റോറുകള്‍ പ്രവര്‍ത്തിക്കുന്നുണ്ട്. ഓണ്‍ലൈന്‍ സേവനങ്ങള്‍, 10000 രൂപ വരെയുള്ള ബാങ്കിംഗ് സേവനങ്ങള്‍, സപ്ലൈകോ ശബരി ഉല്‍പന്നങ്ങള്‍, മില്‍മ ഉല്‍പന്നങ്ങള്‍, ചോട്ടു ഗ്യാസ്, ചെറുകിട വ്യവസായ സംരംഭങ്ങളിലെ ഉല്‍പന്നങ്ങള്‍ എന്നിവയും കെ സ്റ്റോറില്‍ ലഭ്യമാണ്. 2021 മുതല്‍ പുതുതായി 11 റേഷന്‍ കടകളാണ് ജില്ലയില്‍ അനുവദിച്ചത്. കോഴിക്കോട് താലൂക്കില്‍ മൂന്നും വടകര താലൂക്കില്‍ ആറും താമരശേരി, കൊയിലാണ്ടി താലൂക്കുകളില്‍ ഒന്ന് വീതവും റേഷന്‍ കടകളാണ് അനുവദിച്ചത്. റേഷന്‍ കാര്‍ഡുകള്‍ സ്മാര്‍ട്ട് കാര്‍ഡുകളായതാണ് ഭക്ഷ്യ വിതരണ രംഗത്തെ പ്രധാന മാറ്റങ്ങളിലൊന്ന്. 2016ല്‍ ജില്ലയില്‍ 7,20,649 റേഷന്‍കാര്‍ഡുകളാണ് ഉണ്ടായിരുന്നതെങ്കില്‍ നിലവില്‍ 8,29,317 കാര്‍ഡുകളുണ്ട്. കഴിഞ്ഞ ഒമ്പത് വര്‍ഷത്തിനിടെ 1,08,668 പുതിയ റേഷന്‍കാര്‍ഡുകള്‍ അനുവദിച്ചു. റേഷന്‍ കാര്‍ഡിലെ തെറ്റുകള്‍ തിരുത്തുന്നതിന് നടപ്പാക്കിയ തെളിമ പദ്ധതിയുടെ പ്രയോജനം ജില്ലയില്‍ 266 കാര്‍ഡുടമകള്‍ക്കാണ് ലഭിച്ചത്. റേഷന്‍കാര്‍ഡ് സംബന്ധമായി ഓണ്‍ലൈനായി അടക്കേണ്ട ഫീസുകള്‍ ഒഴിവാക്കല്‍, സപ്ലൈ ഓഫീസുകളിലെ ഫയലുകള്‍ തീര്‍പ്പാക്കുന്നതിന് ഫയല്‍ അദാലത്ത്, വകുപ്പിന് കീഴിലെ മുഴുവന്‍ ഓഫീസുകളും ഇ ഓഫീസ് സംവിധാനം എന്നിങ്ങനെ ജനകീയമായ പല മാറ്റങ്ങളും ജില്ലയില്‍ നടപ്പായി. 2013ലെ ദേശീയ ഭക്ഷ്യഭദ്രതാ നിയമപ്രകാരം റേഷന്‍ മുന്‍ഗണനാ പട്ടിക മാറിവരുന്ന സാമ്പത്തിക, സാമൂഹിക സാഹചര്യങ്ങള്‍ക്കനുസരിച്ച് പുതുക്കുന്ന പ്രക്രിയ ഘട്ടംഘട്ടമായി നടന്നു വരുന്നുണ്ടെന്നും ജില്ലാ സപ്ലൈ ഓഫീസര്‍ കെ.കെ. മനോജ് കുമാര്‍ അറിയിച്ചു.

ദേശീയ പാത സര്‍വീസ് റോഡില്‍ യാത്രാ ദുരിതം : വഴിമുടക്കിയായി ട്രാൻസ്ഫോർമറും വൈദ്യുതത്തൂണുകളും

കോഴിക്കോട്: ദേശീയപാത സർവീസ് റോഡിലെ നടപ്പാതയിൽ വഴിമുടക്കിയായി ട്രാൻസ്ഫോർമറും വൈദ്യുതത്തൂണുകളും. സേവാമന്ദിരം സ്കൂൾ മുതൽ പാറമ്മൽ വരെയുള്ള പാതയുടെ കിഴക്കു ഭാഗത്തെ നടപ്പാതയിലാണ് വഴിയാത്രക്കാർക്ക് തടസ്സമായി വൈദ്യുത തുണുകളുള്ളത്. പലയിടങ്ങളിലായി 25 വൈദ്യുതത്തൂണുകൾ നടപ്പാതയുടെ നടുവിലായുണ്ട്. പൊറ്റപ്പടിയിൽ ട്രാൻസ്ഫോമറും നടപ്പാതയിലാണ് നിലകൊള്ളുന്നത്. ആറുവരി ദേശീയപാത നിർമാണ പ്രവൃത്തി തുടങ്ങിയപ്പോഴാണ് റോഡിലെ വൈദ്യുതക്കാലുകൾ അരികിലേക്ക് മാറ്റിയത്. ഏതാനും ദിവസം മുൻപ് നടപ്പാതയുടെ വശങ്ങളിൽ കോൺക്രീറ്റു ചെയ്ത് ഭിത്തി ഒരുക്കിയപ്പോഴാണു നിർമാണത്തിലെ അപാകത വ്യക്തമായത്. ദേശീയപാത അധികൃതർ ലക്ഷക്കണക്കിന് രൂപ ചെലവഴിച്ചാണ് വൈദ്യുതി തൂണുകൾ മാറ്റിസ്ഥാപിച്ചത്. ഇനി ഇവ വീണ്ടും മാറ്റേണ്ട നിലയാണ്. തൂണുകൾ മാറ്റുന്ന വേളയിൽ നടപ്പാതയുടെ അരികിലേക്ക് സ്ഥാപിച്ചിരുന്നെങ്കിൽ പ്രശ്നം പരിഹരിക്കാമായിരുന്നു. ദേശീയപാത അതോറിറ്റിയും വൈദ്യുതി ബോർഡും തമ്മിൽ ഏകോപനം ഇല്ലാതെ പ്രവൃത്തി നടത്തിയതാണ് ഇങ്ങനെ ഒരവസ്ഥ സൃഷ്ടിച്ചത്. അതേസമയം നടപ്പാതയിലെ തൂണുകൾ മാറ്റുന്നതിന് ഇനിയും ഭൂമി ഏറ്റെടുക്കേണ്ടി വരുമെന്നാണ് കരാർ കമ്പനി അധികൃതർ നൽകുന്ന സൂചന.

ഓങ്കോ ജനറ്റിക്‌സ് കേന്ദ്രം പ്രവര്‍ത്തനമാരംഭിച്ചു

കോഴിക്കോട് : കാന്‍സര്‍ രോഗം മുന്‍കൂട്ടി കണ്ടു പിടിക്കുന്നതിനും രോഗികള്‍ക്ക് കൃത്യമായ ചികില്‍സ നല്‍കാനും ലക്ഷ്യമിട്ട് കൊച്ചി അമൃതാ ആശുപത്രിയുടെ അനുബന്ധ സ്ഥാപനമായ കോഴിക്കോട് വെള്ളിമാടുകുന്ന് അമൃത കൃപാ സ്‌പെഷ്യാലിറ്റി ക്ലിനിക്കില്‍ അമൃത സെന്‍റര്‍ ഫോര്‍ ഓങ്കോ ജനറ്റിക്‌സ് കേന്ദ്രം പ്രവര്‍ത്തനമാരംഭിച്ചു. മാതാ അമൃതാനന്ദമയീ മഠം ജനറല്‍ സെക്രട്ടറി സ്വാമി പൂര്‍ണ്ണാമൃതാനന്ദപുരി ഉദ്ഘാടനം ചെയ്തു. മാതാ അമൃതാനന്ദമയീ മഠം കോഴിക്കോട് മഠാധിപതി സ്വാമി വിവേകാമൃതാനന്ദപുരി, കൊച്ചി ആശുപത്രിയിലെ ഡോ. സി . ശ്രീകുമാര്‍, ഡോ. ആരതി, ഡോ. ഹരിഷ് , ഡോ. പ്രഷീത, ഷൈജന്‍, ദീപേഷ് തുടങ്ങിയവര്‍ പ്രസംഗിച്ചു.

സാഹോദര്യ സംഗമം ഒന്നിന്

കോഴിക്കോട്: വിവിധ മതവിഭാഗങ്ങള്‍ക്കിടയില്‍ സൗഹാര്‍ദ്ദം ഊട്ടിയുറപ്പിക്കുന്നതിനും മതനിരപേക്ഷ ജനാധിപത്യ വ്യവസ്ഥ പരിരക്ഷിക്കുന്നതിനുമായി രൂപീകരിക്കപ്പെട്ട ഫോറം ഫോര്‍ ഡെമോക്രസി ആന്‍റ് കമ്മ്യൂണല്‍ അമിറ്റിയുടെ ആഭിമുഖ്യത്തില്‍ "ഒന്നാണ് നമ്മള്‍'എന്ന തലക്കെട്ടില്‍ മെയ് ഒന്നിന് സാഹോദര്യ സംഗമം സംഘടിപ്പിക്കുന്നു. വൈകിട്ട് 4.30 ന് കോഴിക്കോട് കെ പി കേശവമേനോന്‍ ഹാളില്‍ നടക്കുന്ന പരിപാടിയില്‍ പ്രഗത്ഭ മനുഷ്യാവകാശ പ്രവര്‍ത്തകനും ഗ്രന്ഥകാരനുമായ ഹര്‍ഷ് മന്ദര്‍ മുഖ്യാതിഥിയാകും. കവി സച്ചിദാനന്ദന്‍, ഡോ.എം.വി നാരായണന്‍, ഡോ.കെ.എസ് മാധവന്‍ തുടങ്ങിയവര്‍ സംബന്ധിക്കുമെന്ന് സംഘാടകര്‍ അറിയിച്ചു.ടി.കെ ഹുസൈന്‍ ,അംബിക മറുവാക്ക് ,അഡ്വ. പി.എ പൗരന്‍ എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

തുരങ്കപാതക്ക് അനുമതി നിഷേധിച്ചെന്ന വാർത്ത അടിസ്ഥാന രഹിതമെന്ന്

തിരുവമ്പാടി: ആനക്കാംപൊയിൽ - മേപ്പാടി തുരങ്കപാതക്ക് കേന്ദ്ര സർക്കാർ അനുമതി നിഷേധിച്ചുവെന്ന വാർത്ത തികച്ചും അടിസ്ഥാന രഹിതമാണെന്ന് ലിന്‍റോ ജോസഫ് എംഎൽഎ. ഏപ്രിൽ നാലിന് ചേർന്ന കേന്ദ്ര പരിസ്ഥിതി കമ്മിറ്റിയുടെ മിനുട്‌സ് പ്രകാരമാണ് അനുമതി നിഷേധിച്ചുവെന്ന രീതിയിൽ വാർത്ത നൽകിയിട്ടുള്ളത്. മിനുട്സ് പ്രകാരം കൂടുതൽ വിവര ശേഖരണത്തിന് മാറ്റി വെക്കുകയാണ് ഉണ്ടായിട്ടുള്ളത്. ഇത് സ്വാഭാവിക നടപടിക്രമമാണ്. വാർത്തയിൽ തന്നെ ഇത് സൂചിപ്പിക്കുന്നുമുണ്ട്. സ്റ്റേറ്റ് പരിസ്ഥിതി കമ്മിറ്റിയും നേരത്തെ ഇത്തരത്തിൽ ഉള്ള നടപടികൾക്ക് ശേഷമാണ് അന്തിമ അനുമതി നൽകിയത്. അധിക വിവരങ്ങൾ ലഭ്യമാവുന്ന മുറയ്ക്ക് കേന്ദ്ര പരിസ്ഥിതി കമ്മിറ്റിയുടെയും അനുമതി ലഭ്യമാവുമെന്നും അദ്ദേഹം പറഞ്ഞു.

തപാൽ ജീവനക്കാർ പ്രതിഷേധ മാർച്ച് നടത്തി

കോഴിക്കോട്: തപാൽ വകുപ്പിലെ ഗ്രാമീൺ ഡാക് സേവകരെ എട്ടാം ശമ്പള കമ്മീഷന്‍റെ പരിധിയിൽ ഉൾപ്പെടുത്തുക, ജിഡിഎസുകാർക്ക് പ്രതിമാസ പെൻഷൻ അനുവദിക്കുക, എല്ലാ ജിഡിഎസ് ജീവനക്കാർക്കും എട്ട് മണിക്കൂർ ഡ്യൂട്ടി അനുവദിക്കുക തുടങ്ങിയ ആവശ്യങ്ങൾ ഉന്നയിച്ച് അഖിലേന്ത്യാ വ്യാപകമായി ഡിവിഷൻ കേന്ദ്രങ്ങളിൽ ഓൾ ഇന്ത്യ ഗ്രാമീൺ ഡാക് സേവക് യൂണിയന്‍റെ (എഐജിഡിഎസ്‌യു) നേതൃത്വത്തിൽ പ്രതിഷേധ മാർച്ചും ധർണയും നടത്തി. കോഴിക്കോട് ഡിവിഷൻ ആസ്ഥാനത്ത് നടന്ന ധർണ എഐജിഡിഎസ്‌യു സംസ്ഥാന സെക്രട്ടറി എം.ടി. സുരേഷ് ഉദ്ഘാടനം ചെയ്തു. ഡിവിഷണൽ സെക്രട്ടറി ഡോളി ജോസഫ്, കെ.സി. ബിന്ദു, ഷിബു ജോസഫ്, വി. ഗീതാ തുടങ്ങിയവർ പ്രസംഗിച്ചു. ദിനേശ് മുത്തങ്ങ, ജോയ് മൈലംപാടി, കെ.സി. തങ്കച്ചൻ, വി. ഉണ്ണികൃഷ്ണൻ തുടങ്ങിയവർ നേതൃത്വം നൽകി.

സ്പാർട്ടൻസ് കയാലം ജേതാക്കൾ

ചക്കിട്ടപാറ: കൈവിടൂ ലഹരിയെ, ചേരാം നമുക്ക് കളിക്കളത്തിൽ എന്ന സന്ദേശവുമായി ഫൈറ്റേഴ്സ് ചക്കിട്ടപാറ സംഘടിപ്പിച്ച പ്രീമിയർ ലീഗ് സീസൺ 3 ക്രിക്കറ്റ് ടൂർണമെന്‍റിൽ കോഴിക്കോട്‌ സ്പാർട്ടൻസ് കയാലം ടീം ജേതാക്കളായി. പേരാമ്പ്ര വാരിയസ് ടീം റണ്ണേഴ്‌സ് ട്രോഫിയും കരസ്ഥമാക്കി. ഒളിംപ്യൻ ജിൻസൺ ജോൺസൺ സമ്മാന വിതരണം നടത്തി. നീരജ് തോമസ്, സ്വാതിഷ് പാറയിൽ, സന്തോഷ് മാത്യു, അക്ഷയ് മനു തുടങ്ങിയവർ നേതൃത്വം നൽകി.

കോടതിയില്‍ ഹാജരാകാതെ മുങ്ങി നടന്ന പ്രതി പിടിയില്‍

കോഴിക്കോട്: ജാമ്യത്തിലറങ്ങി കോടതിയില്‍ ഹാജരാകാതെ മുങ്ങിനടന്ന പിടിച്ചുപറി കേസിലെ പ്രതി പിടിയില്‍. ഒളവണ്ണ തൊണ്ടിലകടവ് സ്വദേശി പയ്യുന്നി വീട്ടില്‍ അജ്‌നാസ് (26) നെയാണ് ടൗണ്‍ പോലീസ് പിടികൂടിയത്. 2020 ഓഗസ്റ്റ് മാസം കോഴിക്കോട് പാളയം റോഡില്‍ ജംഗ്ഷന് സമീപം നില്‍ക്കുകയായിരുന്ന ആളുടെ പോക്കറ്റില്‍ നിന്നു മൊബൈല്‍ ഫോണ്‍ പിടിച്ചു പറിച്ചു കൊണ്ടു പോയതിനാണ്് പ്രതി അറസ്റ്റിലായിരുന്നത്. തുടര്‍ന്ന് ജാമ്യത്തിലിറങ്ങിയ ശേഷം കോടതിയില്‍ ഹാജരാവാതെ മുങ്ങിനടക്കുകയായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍റ് ചെയ്തു.

ലഹരിക്കെതിരായ പ്രചാരണം ശക്തമാക്കണം: മദ്യനിരോധന സമിതി

മുക്കം: മദ്യവും മയക്കുമരുന്നും അടക്കമുള്ള ലഹരിയുടെ വ്യാപനം മനുഷ്യ സമൂഹത്തെ ആകെ നാശത്തിലേക്ക് നയിക്കുമെന്നതിനാൽ ഈ മഹാവിപത്തിനെതിരേ ശക്തമായ ബോധവത്കരണ പ്രതിരോധ നടപടികൾ അനിവാര്യമാണെന്ന് മുക്കത്ത് നടന്ന കേരള മദ്യനിരോധന സമിതിയുടെ സംസ്ഥാന ക്യാമ്പ് ആവശ്യപ്പെട്ടു. വിദ്യാർഥികൾക്ക് ശരിയായ അവബോധം നൽകാൻ പാഠ്യപദ്ധതിയിൽ ഉൾപ്പെടുത്തി പഠിപ്പിക്കാൻ തയാറാവണം. വരും തലമുറയെ ലഹരിക്കെതിരാക്കാൻ ഏറ്റവും ഫലപ്രദമായ വഴിയും ഇതുതന്നെയാണ്. ബി.പി. മൊയ്തീൻ സേവാ മന്ദിർ ഓഡിറ്റോറിയത്തിൽ നടന്ന ക്യാമ്പ് സമിതി ദേശീയ ഓർഗനൈസർ ബിഷപ് ഡോ. കെ. തുളസീധരൻ ഉദ്ഘാടനം ചെയ്തു. മലപ്പുറം ജില്ലാ പ്രസിഡന്‍റ് ജബ്ബാർ മൈത്ര അധ്യക്ഷനായി. കാഞ്ചനമാല, സമിതി സംസ്ഥാന അധ്യക്ഷൻ കെ.പി. ദുര്യോധനൻ, അഷ്റഫ് മനരിക്കൽ, കെ.എസ്. ശിവരാജൻ എന്നിവർ പ്രസംഗിച്ചു. എ.പി. മുരളീധരൻ ക്ലാസ് എടുത്തു.

വന്യമൃഗാക്രമണത്തിൽ നിന്നു മലയോര ജനതയെ രക്ഷിക്കണം: എം.സി. സെബാസ്റ്റ്യൻ

പേരാമ്പ്ര: വന്യമൃഗാക്രമണത്തിൽ നിന്നു മലയോര കർഷക ജനതയെ രക്ഷിക്കാൻ സർക്കാർ സത്വര നടപടി സ്വീകരിക്കണമെന്ന് കേരളാ കോൺഗ്രസ് (ജേക്കബ്) സംസ്ഥാന വർക്കിംഗ് ചെയർമാൻ എം. സി. സെബാസ്റ്റ്യൻ ആവശ്യപ്പെട്ടു. പേരാമ്പ്രയിൽ ലൂണാർ ടൂറിസ്റ്റ് ഹോം ഹാളിൽ ചേർന്ന പാർട്ടി കോഴിക്കോട്‌ ജില്ലാ നേതൃയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ജില്ലാ പ്രസിഡന്‍റ് കെ.പി. രാധാകൃഷ്ണൻ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി സി. വീരാൻകുട്ടി, രാജൻ വർക്കി, ചക്രപാണി കുറ്റ്യാടി, മനോജ് ആവള, പ്രദീപ് ചോമ്പാല, ഷെഫീഖ് തറോപ്പൊയിൽ, പി.പി. നൗഷാദ്, രാജേഷ് കൊയിലാണ്ടി, മേരി സെബാസ്റ്റ്യൻ എന്നിവർ പങ്കെടുത്തു.

അങ്കണവാടി പ്രവർത്തകർക്ക് യാത്രയയപ്പ് നൽകി

മുക്കം: കുന്നമംഗലം അഡീഷണൽ പ്രോജക്ടിൽ നിന്നും വിരമിക്കുന്ന അങ്കണവാടി പ്രവർത്തകർക്ക് യാത്രയയപ്പും ഐസിഡിഎസ് സംഗമവും സംഘടിപ്പിച്ചു. അങ്കണവാടി പ്രവർത്തകരായ പി.കെ പ്രസന്നകുമാരി, ആലീസ്, ലക്ഷ്മി, വത്സല, പ്രസന്ന, വത്സല, സൈനബ, ലീല എന്നിവർക്കാണ് യാത്രയയപ്പ് നൽകിയത്. ഐസിഡിഎസിൽ നിന്നും വിരമിച്ച മുതിർന്ന സിഡിപി ഒ. നാരായണൻ, സൂപ്പർവൈസർ തിലോത്തമ, വർക്കർ ചന്ദ്രിക, ഹെൽപ്പർ ആയിഷ എന്നിവരെ ആദരിക്കുകയും ചെയ്തു. മുക്കം സഹകരണ ബാങ്ക് ഓഡിറ്റോറിയത്തിൽ നടന്ന പരിപാടി കുന്നമംഗലം ബ്ലോക്ക് പഞ്ചായത്ത് പ്രസിഡന്‍റ് അരിയിൽ അലവി ഉദ്ഘാടനം ചെയ്തു. കൊടിയത്തൂർ പഞ്ചായത്ത് പ്രസിഡന്‍റ് ദിവ്യാ ഷിബു അധ്യക്ഷത വഹിച്ചു. ബ്ലോക്ക് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ എം.കെ. നദീറ, മുക്കം നഗര സഭ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ വി. കുഞ്ഞൻ, കൊടിയത്തൂർ വികസന ചെയർപേഴ്സൺ ആയിഷ ചേലപ്പുറം, കോഴിക്കോട് ശിശു വികസന ജില്ലാ ഓഫീസർ സബീന ബീഗം, പ്രോഗ്രാം ഓഫീസർ അനിതകുമാരി, മുക്കം ഐസിഡിഎസ് ഓഫീസർ പ്രസന്നകുമാരി തുടങ്ങിയവർ സംബന്ധിച്ചു. പരിപാടിക്ക് പഞ്ചായത്ത് ലീഡർമാരായ സ്മിതാ മാവൂർ, റസിയ മുക്കം, ബീന കാരശേരി, ഷിനി മുക്കം എന്നിവർ നേതൃത്വം നൽകി.

ബേപ്പൂരിലെ പട്ടയ പ്രശ്‌നങ്ങള്‍ക്ക് അടിയന്തര പരിഹാരം കാണും: മന്ത്രി മുഹമ്മദ് റിയാസ്

കോഴിക്കോട്: ബേപ്പൂര്‍ നിയോജക മണ്ഡലത്തില്‍ ഉള്‍പ്പെട്ട ഫറോക്ക്, ബേപ്പൂര്‍, രാമനാട്ടുകര, കടലുണ്ടി, ചെറുവണ്ണൂര്‍, കരുവന്തിരുത്തി വില്ലേജുകളിലെ പട്ടയ പ്രശ്‌നങ്ങള്‍ക്ക് അടിയന്തര പരിഹാരം കാണുമെന്ന് മന്ത്രി പി.എ. മുഹമ്മദ് റിയാസ്. ഇതുസംബന്ധിച്ച് മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കി. ബേപ്പൂര്‍ നിയോജക മണ്ഡലം പട്ടയം അസംബ്ലി ഉദ്ഘാടനം ചെയ്യുകയായിരുന്നു അദ്ദേഹം. പട്ടയ സംബന്ധമായ 240 അപേക്ഷകളാണ് മണ്ഡലത്തില്‍ പരിഗണനയിലുള്ളത്. അതില്‍ 188 എണ്ണം കടലുണ്ടി ഭാഗത്തെ തീരദേശത്തെ പട്ടയങ്ങളും എട്ടെണ്ണം ചെറുവണ്ണൂര്‍ ഭാഗത്തെ മിച്ചഭൂമിയില്‍ പെടുന്നവയുമാണ്. എല്‍എ ഇനത്തിലുള്ള എട്ട് പട്ടയങ്ങളിലും സര്‍പ്ലസ് ലാന്‍ഡില്‍ പെടുന്ന 38 പട്ടയങ്ങളിലും സര്‍വേ നടപടികള്‍ പൂര്‍ത്തിയാകുന്നതായും രണ്ടാഴ്ചക്കകം വിതരണത്തിന് സജ്ജമാകുമെന്നും മന്ത്രി അറിയിച്ചു. സംസ്ഥാനത്തെ എല്ലാ നിയോജക മണ്ഡലങ്ങളിലും നോഡല്‍ ഓഫീസര്‍മാരെ നിശ്ചയിച്ച് അതത് നിയമസഭാംഗങ്ങളുടെ നേതൃത്വത്തില്‍ ജനപ്രതിനിധികളുടെയും ഉദ്യോഗസ്ഥരുടെയും കൂട്ടായ്മയില്‍ പരമാവധി അര്‍ഹരെ കണ്ടെത്തി എല്ലാവര്‍ക്കും സ്വന്തമായി ഭൂമി ഉറപ്പാക്കുകയാണ് പട്ടയ അസംബ്ലിയിലൂടെ ലക്ഷ്യമിടുന്നത്. കോര്‍പറേഷന്‍ മേയര്‍ ബീന ഫിലിപ്പ് അധ്യക്ഷത വഹിച്ചു.

തീരദേശ മേഖലയുടെ വികസനത്തിന് ചെലവിട്ടത് 780 കോടി

കോഴിക്കോട്: ജില്ലയിലെ തീരദേശ മേഖലയില്‍ നിരവധി വികസന പ്രവര്‍ത്തനങ്ങളാണ് സംസ്ഥാന സര്‍ക്കാറിന്‍റെ നേതൃത്വത്തില്‍ നടപ്പാക്കിയത്. ഒമ്പത് വര്‍ഷത്തിനിടെ ഹാര്‍ബര്‍ എൻജിനീയറിംഗ് വകുപ്പ് മുഖേന 780 കോടിയിലധികം രൂപയുടെ പ്രവൃത്തികള്‍ യാഥാര്‍ഥ്യമായി. മത്സ്യബന്ധന തുറമുഖം, ഹാര്‍ബര്‍ നവീകരണം, ഡ്രെഡ്ജിംഗ്, പുലിമുട്ട്, ദുരന്തനിവാരണ ഷെല്‍ട്ടര്‍, ബെര്‍ത്തിംഗ് ജട്ടി നിര്‍മാണങ്ങള്‍, തീരദേശ സൗന്ദര്യവത്കരണം, ഹാച്ചറി യൂണിറ്റ്, ഫിഷ് ലാന്‍ഡിംഗ് സെന്‍റര്‍, തീരദേശ റോഡുകള്‍ തുടങ്ങിയവയുള്‍പ്പടെ വിവിധ വികസന പദ്ധതികള്‍ക്കാണ് തുക വിനിയോഗിച്ചത്. സംസ്ഥാന സര്‍ക്കാറിന് പുറമെ കേന്ദ്രസര്‍ക്കാറിന്‍റെയും നബാര്‍ഡ് ഉള്‍പ്പടെയുള്ള ഏജന്‍സികളുടെയും ഫണ്ടും വിവിധ വികസന പ്രവര്‍ത്തനങ്ങള്‍ക്ക് ലഭ്യമാക്കി. വടകര ചോമ്പാല്‍ ഹാര്‍ബര്‍ മുതല്‍ ബേപ്പൂര്‍ ഹാര്‍ബര്‍ വരെയുള്ള തീരദേശ മേഖലയിലാണ് വികസന പ്രവര്‍ത്തനങ്ങള്‍ നടപ്പാക്കിയത്. കൊയിലാണ്ടി മത്സ്യബന്ധന തുറമുഖം, കൊയിലാണ്ടി ഫിഷിംഗ് ഹാര്‍ബര്‍ നവീകരണം, പുതിയാപ്പ ഫിഷിംഗ് ഹാര്‍ബര്‍ നവീകരണം, വെള്ളയില്‍ മത്സ്യബന്ധന തുറമുഖം, കല്ലാനോട് ഹാച്ചറി രണ്ടാംഘട്ട വികസനം, ചോമ്പാല്‍ മത്സ്യബന്ധന തുറമുഖം, മുഖദാര്‍ ഫിഷ് ലാന്‍ഡിംഗ് സെന്‍റര്‍, ബേപ്പൂര്‍, കൊയിലാണ്ടി ഡ്രെഡ്ജിംഗ്, 697 തീരദേശ റോഡുകള്‍, സൗത്ത് ബീച്ച് നവീകരണം തുടങ്ങിയവക്കെല്ലാം ഫണ്ട് ചെലവിട്ടു. ഹാര്‍ബര്‍ എൻജിനീയറിംഗ് വകുപ്പിന് പുറമെ ഫിഷറീസ് വകുപ്പും തീരദേശ മേഖലയില്‍ കോടികളുടെ വികസന പ്രവര്‍ത്തനങ്ങള്‍ നടപ്പാക്കിയിട്ടുണ്ട്.

ഉന്നത വിദ്യാഭ്യാസ മേഖലയിലെ ഹബായി കേരളം മാറുന്നു: മന്ത്രി മുഹമ്മദ് റിയാസ്

കോഴിക്കോട്: ഉന്നത വിദ്യാഭ്യാസ മേഖലയിലെ പ്രധാന ഹബായി കേരളത്തെ മാറ്റുന്നതിനുള്ള വലിയ ശ്രമമാണ് സര്‍ക്കാര്‍ നടത്തിക്കൊണ്ടിരിക്കുന്നതെന്ന് മന്ത്രി പി.എ മുഹമ്മദ് റിയാസ്. വിജ്ഞാന കേരളം ജനകീയ ക്യാമ്പയിന്‍റെ ഭാഗമായി ജില്ലാ വിജ്ഞാന കൗണ്‍സില്‍ രൂപീകരണ യോഗം കളക്ടറേറ്റ് കോണ്‍ഫറന്‍സ് ഹാളില്‍ ഉദ്ഘാടനം ചെയ്യുകയായിരുന്നു അദ്ദേഹം. ഉന്നത വിദ്യാഭ്യാസത്തിന് പുറത്തുപോയിരുന്ന സ്ഥിതിമാറി കേരളത്തില്‍ തന്നെ അവസരമൊരുങ്ങുകയാണ്. ലോകത്തിന്‍റെെ വിവിധ ഭാഗങ്ങളിലുള്ള നൂതന കോഴ്‌സുകള്‍ക്കും വിദ്യാഭ്യാസ രീതികള്‍ക്കും സമാനമായവ ഇവിടെ ഒരുക്കുന്നു. അതിന്‍റെ ആത്യന്തിക ഫലം പുതിയ തലമുറക്ക് അനുഭവിക്കാന്‍ അവസരം ലഭിക്കുന്നുവെന്നും ഇതിനെ പ്രധാന ഉത്തരവാദിത്തമായി സര്‍ക്കാര്‍ കാണുന്നുവെന്നും മന്ത്രി പറഞ്ഞു. കേരളത്തിന്‍റെ ഭാവിയെ അടയാളപ്പെടുത്തുന്ന സുപ്രധാന ചുവടുവെപ്പാണ് വിജ്ഞാന കേരളം. പഠനത്തോടൊപ്പം തൊഴിലുമായി ബന്ധപ്പെട്ട കാര്യങ്ങള്‍ പഠിക്കാന്‍ അവസരമൊരുക്കുന്ന ട്രെന്‍റ് രൂപപ്പെടുകയാണ്. തൊഴില്‍ മേഖലയുമായി ബന്ധപ്പെട്ട മികച്ച പരിശീലനം പ്രധാന അജണ്ടയായി കാണുന്നു. തൊഴില്‍ സേനയല്ല നമ്മുടെ പ്രധാന ലക്ഷ്യം, പരിശീലനം ലഭിച്ച തൊഴില്‍ സേനയാണ്. പുതുതലമുറയുടെ മാത്രമല്ല, കേരളത്തിന്‍റെ ഭാവിയാണ് ഈ ക്യാമ്പയിനിലൂടെ നിര്‍ണയിക്കുന്നത്. എല്ലാ തൊഴില്‍ സംവിധാനങ്ങളെയും ഒറ്റ കുടക്കീഴില്‍ കൊണ്ടുവരാനുള്ള ശ്രമവും ഇതിന്‍റെ ഭാഗമായി നടക്കും. തൊഴില്‍ ആഗ്രഹിക്കുന്നവരെ അവര്‍ക്ക് താല്‍പര്യമുള്ള തൊഴില്‍ നേടാന്‍ പ്രാപ്തരാക്കുകയെന്നതും ഇതിലൂടെ ലക്ഷ്യമിടുന്നെന്നും അതിന് ജനകീയ പങ്കാളിത്തവും തദ്ദേശ സ്വയംഭരണ സ്ഥാപനങ്ങളുടെ ഏകോപനവും അനിവാര്യമാണെന്നും മന്ത്രി കൂട്ടിച്ചേര്‍ത്തു. വിജ്ഞാനകേരളം അഡ്‌വൈസറും മുന്‍ ധനമന്ത്രിയുമായ ഡോ. തോമസ് ഐസക് പദ്ധതി വിശദീകരിച്ചു. അഭ്യസ്തവിദ്യരായ തൊഴിലന്വേഷകരെ കണ്ടെത്തി അനുയോജ്യമായ തൊഴിലിലേക്ക് എത്തിക്കുക, പ്രാദേശികമായ തൊഴിലുകള്‍ കണ്ടെത്തി വനിതകള്‍ക്ക് കൂടുതല്‍ അവസരമൊരുക്കുക, വിദേശ തൊഴിലുകളുമായി ബന്ധിപ്പിക്കുക, പഠനം കഴിഞ്ഞിറങ്ങുന്നവര്‍ക്ക് പ്ലേസ്‌മെന്‍റിന് അവസരമൊരുക്കുക തുടങ്ങിയവയാണ് പദ്ധതിയിലൂടെ ലക്ഷ്യമിടുന്നതെന്ന് അദ്ദേഹം പറഞ്ഞു. ഇതിനായി തദ്ദേശ സ്ഥാപനങ്ങളുടെ നേതൃത്വത്തില്‍ ജനകീയ ക്യാമ്പയിന്‍ സംഘടിപ്പിക്കുമെന്നും തോമസ് ഐസക് പറഞ്ഞു. യോഗത്തില്‍ മേയര്‍ ബീന ഫിലിപ്പ് അധ്യക്ഷത വഹിച്ചു. പി.ടി.എ റഹീം എംഎല്‍എ, ജില്ലാ കളക്ടര്‍ സ്‌നേഹില്‍ കുമാര്‍ സിംഗ്, ജില്ലാ പഞ്ചായത്ത് വൈസ് പ്രസിഡന്‍റ് പി. ഗവാസ്, കോര്‍പറേഷന്‍ ഡെപ്യൂട്ടി മേയര്‍ സി.പി മുസാഫര്‍ അഹമ്മദ് തുടങ്ങിയവര്‍ പ്രസംഗിച്ചു.

എഫ് ഡിവിഷന്‍ ഫുട്‌ബോള്‍ ചാമ്പ്യന്‍ഷിപ്

കൊയിലാണ്ടി: സ്‌പോര്‍ട്‌സ് കൗണ്‍സില്‍ സ്റ്റേഡിയത്തില്‍ നടന്നുവരുന്ന കാലിക്കട്ട് എഫ്‌സി ജില്ലാ എഫ് ഡിവിഷന്‍ ലീഗ് ഫുട്‌ബോള്‍ ചാമ്പ്യന്‍ഷിപ്പില്‍ ഇന്നലെ നടന്ന ആദ്യ മത്സരത്തില്‍ തായ് ഫുട്‌ബോള്‍ അക്കാദമി ഒന്നിനെതിരേ രണ്ടു ഗോളുകള്‍ക്ക് സോക്കര്‍ സ്‌കൂള്‍ കേരളയെ പരാജയപ്പെടുത്തി. സോക്കര്‍ സ്‌കൂളിന് സെല്‍ഫ് ഗോളിലൂടെ ആശ്വാസഗോള്‍ നേടാനായി. രണ്ടാമത്തെ മത്സരത്തില്‍ നടുവണ്ണൂര്‍ ഹയര്‍ സെക്കന്‍ഡറി സ്‌കൂള്‍ ഒന്നിനെതിരെ നാലു ഗോളുകള്‍ക്ക് കോംട്രസ്റ്റിനെ പരാജയപ്പെടുത്തി.

വിലക്കയറ്റം : കാറ്ററിംഗ് മേഖല പ്രതിസന്ധിയില്‍

കോഴിക്കോട്: ഭക്ഷ്യ സാധനങ്ങളുടെ വിലക്കയറ്റത്തെതുടര്‍ന്ന് സംസ്ഥാനത്തെ കാറ്ററിംഗ് മേഖല പ്രതിസന്ധിയില്‍.അരിക്കും അനുബന്ധ സാധനങ്ങള്‍ക്കുമെല്ലാം വന്‍തോതിലുള്ള വിലക്കയറ്റമാണ് ഉണ്ടായിട്ടുള്ളത്. അഞ്ചു വര്‍ഷം മുമ്പത്തെ വിലയുമായി താരതമ്യപ്പെടുത്തുമ്പോള്‍ ഞെട്ടിക്കുന്ന വിധത്തിലുള്ള വര്‍ധവനവാണ് ഉണ്ടായിട്ടുള്ളതെന്ന് ആള്‍ കേരള കാറ്ററേഴ്‌സ് അസോസിയേഷന്‍ ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. കൈമ, മട്ട അരിക്ക് 70 രൂപവരെയാണ് കൂടിയത്. മത്സ്യം, മാംസം, പച്ചക്കറികള്‍, പലചരക്കു സാധനങ്ങള്‍ എന്നിവയ്‌ക്കെല്ലാം വില കുതിച്ചുകയറി. ദം ബിരിയാണിക്ക് ഉപയോഗിക്കുന്ന ചിരട്ടയ്ക്ക് മാത്രം നാലിരട്ടിയാണ് വില കൂടിയത്. വിലക്കയറ്റത്തിന്‍റെ കെടുതിയില്‍പെട്ട് കാറ്റിംഗുകാര്‍ ഉഴലുകയാണെന്ന് അവര്‍ പറഞ്ഞു. പലരും കടക്കെണിയിലാണ്. തകര്‍ച്ചയുടെ വക്കിലാണ് കാറ്ററിംഗ് വ്യവസായം. വിലക്കയറ്റം തടഞ്ഞുനിര്‍ത്താന്‍ സര്‍ക്കാറിന്‍റെ ഭാഗത്തുനിന്ന് യാതൊരു നടപടിയും ഉണ്ടാകുന്നില്ല. അനധികൃത കാറ്ററിംഗ് സ്ഥാപനങ്ങള്‍െക്കതിരേ നടപടിയെടുക്കണമെന്ന് അവര്‍ ആവശ്യപ്പെട്ടു. സംസ്ഥാന വര്‍ക്കിംഗ് പ്രസിഡന്‍റ് ടി.കെ. രധാകൃഷ്ണന്‍, സെക്രട്ടറി പി. ഷാഹുല്‍ ഹമീദ്, ജില്ലാ പ്രസിഡന്‍റ് പ്രേംചന്ദ് വള്ളില്‍, സെക്രട്ടറി പി.വി.എ. ഹിഫ്‌സു, സംസ്ഥാന സമതിതി അംഗം കെ. ബേബി എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

അന്താരാഷ്ട്ര ലഹരി വില്‍പനക്കാരനായ നൈജീരിയക്കാരന്‍ അറസ്റ്റില്‍

പിടിയിലായത് നോയിഡയില്‍ നിന്ന് കോഴിക്കോട് : ഇന്ത്യയിലെ വിവിധ സംസ്ഥാനങ്ങളിലേക്ക് ലഹരി മരുന്ന് എത്തിക്കുന്ന മൊത്ത വില്‍പനക്കാരനായ നൈജീരിയന്‍ സ്വദേശി അറസ്റ്റില്‍. ഡല്‍ഹി നോയിഡയില്‍ നിന്നാണ് നൈജീരിയക്കാരനായ ഫ്രാങ്ക് ചിക്കന്‍സി കച്ചുകാ (32) യെ കുന്ദമംഗലം പോലീസ് പിടികൂടിയത്. ഗാല്‍ ഗോട്ടിയാസ് യൂണിവേഴ്‌സിറ്റിയില്‍ എംസിഎ വിദ്യാര്‍ഥിയായ ഇയാള്‍ ഫാര്‍മസിസ്റ്റ് കുടിയാണ്. നിരവധി സിം കാര്‍ഡുകളും എടിഎം കാര്‍ഡുകളും ഇയാളില്‍ നിന്ന് പിടിച്ചെടുത്തിട്ടുണ്ട്. കഴിഞ്ഞ ജനുവരി 21ന് കുന്ദമംഗലം പോലീസ് രജിസ്റ്റര്‍ ചെയ്ത കേസില്‍ അറസ്റ്റിലാവുന്ന പത്താമത്തെ പ്രതിയാണ് ഇയാള്‍. നേരത്തെ അറസ്റ്റിലായ പ്രതികളെ തെളിവെടുപ്പിനായി ബംഗളൂരുവില്‍ കൊണ്ടുപോയിരുന്നു. തെളിവെടുപ്പിനിടെ പ്രതികള്‍ താമസിച്ച ലോഡ്ജില്‍ പരിശോധന നടത്തിയതില്‍ അന്നേ ദിവസം ഇവരുടെ കൂടെയുണ്ടായിരുന്ന കൂട്ടുപ്രതികളെ കുറിച്ച് പോലീസ് മനസിലാക്കുകയും അവരുടെ വിവരങ്ങള്‍ ശേഖരിക്കുകയും ചെയ്തത്. തുടര്‍ന്ന് കുന്ദമംഗലം പോലീസ് ശാസ്ത്രീയമായി നടത്തിയ അന്വേഷണത്തില്‍ ഇവരുടെ മുന്‍കാല പ്രവര്‍ത്തനങ്ങളും മറ്റും വിശദമായി പരിശോധിച്ചതില്‍ നിന്നും വലിയ തുക ടാന്‍സാനിയന്‍ സ്വദേശികളുടെ അക്കൗണ്ട് വഴി നോയിഡയില്‍ വച്ചാണ് പിന്‍വലിച്ചതെന്ന് കണ്ടെത്താന്‍ സാധിച്ചു. തുടര്‍ന്ന് നടത്തിയ അന്വേഷണത്തില്‍ ടാന്‍സാനിയക്കാര്‍ പിടിയിലായിരുന്നു. അവരിപ്പോള്‍ ജുഡീഷ്യല്‍ കസ്റ്റഡിയിലാണുള്ളത്. ഇതിനിടെ, എംഡിഎംഎ വാങ്ങിക്കുന്നതിനാവശ്യമായ പണം അയച്ച് നല്‍കിയ മറ്റൊരു അക്കൗണ്ട് കൂടി കണ്ടെത്തി. ഇതോടെയാണ് നൈജീരിയന്‍ സ്വദേശിയിലേക്ക് എത്തിചേര്‍ന്നത്. പഠിക്കുന്ന കോളജില്‍ നിന്നാണ് പോലീസ് ഇയാളെ കസ്റ്റഡിയിലെടുത്തത്. കോടതിയില്‍ ഹാജരാക്കിയ പ്രതിയെ റിമാന്‍റ് ചെയ്തു. ഇയാളുടെ പക്കല്‍ നിന്ന് അക്കൗണ്ടുകള്‍ കൈകാര്യം ചെയ്യാനും പണം പിന്‍വലിക്കാനും ഉപയോഗിക്കുന്ന മൊബൈല്‍ ഫോണ്‍ ഉള്‍പ്പെടെ മൊത്തം നാല് മൊബൈല്‍ ഫോണുകളും 7 സിം കാര്‍ഡുകളും പിടിച്ചെടുത്തു.നിയമവിരുദ്ധമായി പണം കൈകാര്യം ചെയ്യാനുപയോഗിക്കുന്നതായി സംശയിക്കുന്ന ബാങ്കുകളുടെ രണ്ട് എടിഎം കാര്‍ഡുകളും കണ്ടെടുത്തിട്ടുണ്ട്. നോയിഡയിലുള്ള വിവിധ എടിഎമ്മുകള്‍ വഴി പണം പിന്‍വലിച്ചതായും ഈ അക്കൗണ്ടുകളിലേക്ക് ലക്ഷക്കണക്കിന് രൂപ വന്നതായും കണ്ടെത്തിയിട്ടുണ്ട്. അതാത് ദിവസങ്ങളില്‍ തന്നെ എടിഎം വഴി പിന്‍വലിച്ചതിന്‍റെ തെളിവുകള്‍ പോലീസിനു ലഭിച്ചിട്ടുണ്ട്. മെഡിക്കല്‍ കോളേജ് അസി.കമ്മീഷണര്‍ എ. ഉമേഷിന്‍റെ നേതൃത്വത്തിലള്ള സംഘമാണ് അറസ്റ്റ് ചെയ്തത്.

റേഷന്‍ മണ്ണെണ്ണ വിതരണം വീണ്ടും തുടങ്ങുന്നു : പ്രതിസന്ധികളേറെയെന്ന് റേഷന്‍ വ്യാപാരികള്‍

കോഴിക്കോട്: നീണ്ട ഇടവേളയ്ക്കുശേഷം റേഷന്‍ കടകളിലൂടെ മണ്ണെണ്ണ വിതരണം ആരംഭിക്കുമ്പോള്‍ പ്രതിസന്ധികളേറെയുണ്ടെന്ന് റിട്ടെയില്‍ റേഷന്‍ ഡീലേഴ്‌സ് അസോസിയേഷന്‍. എല്ലാ വര്‍ഷവും മണ്ണെണ്ണയുടെ അലോട്ട്‌മെന്‍റ് കേന്ദ്ര സര്‍ക്കാര്‍ കുറച്ചുവരുന്നതുകൊണ്ട് വൈദ്യുതീകരിച്ച വീട്ടിലെ എല്ലാകാര്‍ഡുകാര്‍ക്കും പ്രതിമാസം ഒരു ലിറ്റര്‍ വീതം നല്‍കിയിരുന്നത് നിര്‍ത്തലാക്കി. പകരം മഞ്ഞ, പിങ്ക് കാര്‍ഡുകാര്‍ക്ക് മൂന്ന് മാസത്തില്‍ അരലിറ്റര്‍ വീതമാണ് നല്‍കുക. മണ്ണെണ്ണ വിതരണം നടത്തുന്നതിന്ന് നാല് മുതല്‍ അഞ്ച് വരെ മൊത്ത വിതരണക്കാര്‍ ഓരോ താലൂക്കുകളിലും പ്രവര്‍ത്തിച്ചിരുന്നെങ്കിലും ഇപ്പോള്‍ ഒരു ജില്ലയില്‍ ഒന്നോ രണ്ടോ ഡിപ്പോകളായി ചുരുങ്ങിയിട്ടുണ്ട്. അതിനാല്‍ ഒരു ബാരല്‍ മണ്ണെണ്ണ അതായത് 200 ലിറ്റര്‍ മണ്ണെണ്ണയെടുക്കാന്‍ 50, 60 കിലോമീറ്റര്‍ സഞ്ചരിക്കേണ്ട സാഹര്യമാണെന്ന് റേഷന്‍ വ്യാപാരികള്‍ പറയുന്നു. ഇതിന് 600 രൂപയെങ്കിലും ചെലവ് വരും. ഒരു വര്‍ഷത്തിലധികമായി മണ്ണെണ്ണ വിതരണം ഇല്ലാത്തതുകൊണ്ട് ഇന്ധനം നിറയ്ക്കുന്ന ബാരല്‍ തുരുമ്പു പിടിച്ചു ഉപയോഗ്യമല്ലാതായത് കാരണം പുതിയത് വാങ്ങേണ്ടണ്ടതുണ്ടെന്ന് വ്യാപാരികള്‍ പറയുന്നു. മൂന്ന് മാസത്തിലധികം മണ്ണെണ്ണ സ്റ്റോക്ക് വയ്ക്കുമ്പോള്‍ മറ്റു ഇന്ധനങ്ങള്‍ പോലെ ബാഷ്പ്പീകരണം ഉണ്ടാവുന്നു. മൊത്തവ്യാപാരികള്‍ക്ക് അനുവദിക്കുന്നത് പോലെ റേഷന്‍ വ്യാപാരികള്‍ക്കും ലീക്കേജ് അനുവദിക്കണമെന്നും മണ്ണെണ്ണ സ്റ്റോക്കെടുക്കുന്നതിന്ന് ഭീമമായ തുക മുതല്‍മുടക്കുന്നത് കൊണ്ട് വ്യാപാരി പ്രതിനിധികളുമായി ഭക്ഷ്യമന്ത്രി നടത്തിയ ചര്‍ച്ചയില്‍ ധാരണയായ ഏഴ് രൂപ കമ്മീഷന്‍ നല്‍കി എല്ലാ കാര്‍ഡുകാര്‍ക്കും അര ലിറ്റര്‍ വീതം മണ്ണെണ്ണ വിതരണം ചെയ്യണമെന്നും ആള്‍ കേരളാ റിട്ടേയില്‍ റേഷന്‍ ഡീലേഴ്‌സ് അസോസിയേഷന്‍ സംസ്ഥാന പ്രസിഡന്‍റ് അഡ്വ. ജോണീ നെല്ലൂര്‍, ജനറല്‍ സെക്രട്ടറി ടി. മുഹമ്മദാലി എന്നിവര്‍ ആവശ്യപ്പെട്ടു.

വാഹനാപകടത്തിൽ യുവാവ് മരിച്ചു

തോട്ടുമുക്കം: തോട്ടുമുക്കം മരഞ്ചാട്ടി റോഡിൽ കാറും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. പള്ളിത്താഴെ സ്വദേശി താഹിർ -സൗജത് ദമ്പതികളുടെ മകൻ റിസ്‌വാൻ (21) ആണ് മരിച്ചത്. ഇന്നലെ ഉച്ചയ്ക്ക് രണ്ടോടെയാണ് അപകടം. തോട്ടുമുക്കം ഭാഗത്തു നിന്നും മരഞ്ചാട്ടി ഭാഗത്തേക്ക് പോകുകയായിരുന്ന ബൈക്കും മരഞ്ചാട്ടി ഭാഗത്തുനിന്ന് വരികയായിരുന്ന കാറും കൂട്ടിയിടിക്കുകയായിരുന്നു. യുവാവിനെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ദേശീയപാത നിര്‍മാണം ഡിസംബറില്‍ പൂര്‍ത്തിയാകും: മന്ത്രി മുഹമ്മദ് റിയാസ്

ബാലുശേരി: സംസ്ഥാനത്തിന്‍റെ സ്വപ്ന പദ്ധതിയായ ദേശീയപാത 66 നിര്‍മാണം ഡിസംബറില്‍ പൂര്‍ത്തിയാകുമെന്ന് മന്ത്രി പി.എ.മുഹമ്മദ് റിയാസ്. ബാലുശേരി നിയോജകമണ്ഡലത്തിലെ നവീകരിച്ച മുണ്ടോത്ത്-തെരുവത്ത്കടവ് റോഡിന്‍റെ ഉദ്ഘാടനം നിര്‍വഹിക്കുകയായിരുന്നു മന്ത്രി. സര്‍ക്കാരിന്‍റെ ശക്തമായ ഇടപെടലിനെ തുടര്‍ന്നാണ് മുടങ്ങിപ്പോയിടത്തുനിന്ന് 45 മീറ്റര്‍ ആറുവരിപ്പാത പൂര്‍ത്തീകരണത്തോടടുക്കുന്നതെന്നും മന്ത്രി പറഞ്ഞു. ഇന്ത്യയിലാദ്യമായി സംസ്ഥാനത്തിന്‍റെ ഒരറ്റം മുതല്‍ മറ്റൊരറ്റം വരെയുള്ള മലയോരത്തെ റോഡ് മാര്‍ഗം ബന്ധിപ്പിക്കുന്ന ആദ്യ സംസ്ഥാനമായി കേരളം മാറുകയാണ്. കോഴിക്കോട് ജില്ലയില്‍ മലയോര ഹൈവേയുടെ ആദ്യ റീച്ചായ കോടഞ്ചേരി-കക്കാടംപൊയില്‍ 35 കിലോമീറ്റര്‍ റോഡ് മുഖ്യമന്ത്രി നാടിന് സമര്‍പ്പിച്ചുകഴിഞ്ഞു. ജില്ലയിലെ മറ്റു ആറ് റീച്ചുകളിലെ പ്രവൃത്തികള്‍ പുരോഗമിക്കുകയാണ്. ബാലുശേരി നിയോജകമണ്ഡലത്തിലെ തെച്ചി, പൂനൂര്‍ പാലങ്ങള്‍, പത്തോളം റോഡുകള്‍ എന്നിവ 245 കോടി രൂപയോളം ചെലവഴിച്ചാണ് നവീകരിച്ചതെന്നും മന്ത്രി പറഞ്ഞു. മുണ്ടോത്ത് മുതല്‍ മൈക്കാട്ടിരിപ്പൊയില്‍ വരെയുള്ള 1.5 കിലോമീറ്റര്‍ ഭാഗത്തിന്‍റെ ഉദ്ഘാടനമാണ് മന്ത്രി നിര്‍വഹിച്ചത്. 3.24 കോടി രൂപ ചെലവിലാണ് റോഡ് നിര്‍മാണം പൂര്‍ത്തിയാക്കിയത്.

ബാലസാഹിത്യം ദുര്‍ബലമായ സാഹിത്യ ശാഖ: കല്‍പ്പറ്റ നാരായണന്‍

കൊയിലാണ്ടി: മലയാളത്തില്‍ ഏറെ ദുര്‍ബലമായ സാഹിത്യ ശാഖ ബാലസാഹിത്യമാണെന്നും മികച്ച കൃതി എഴുതിയ പല എഴുത്തുകാര്‍ക്കും നല്ലൊരു ബാല സഹിത്യകൃതി രചിക്കാനായിട്ടില്ലെന്നും എഴുത്തുകാരന്‍ കല്‍പ്പറ്റ നാരായണന്‍ അഭിപ്രായപ്പെട്ടു. പേരക്ക ബുക്‌സ് കൊയിലാണ്ടി പന്തലായനി ഗവണ്‍മെന്‍റ് ഹയര്‍ സെക്കന്‍ഡറി സ്‌കൂളില്‍ സംഘടിപ്പിച്ച സംസ്ഥാനതല ബാലസാഹിത്യ ക്യാമ്പ് ഉദ്ഘാടനം ചെയ്യുകയായിരുന്നു അദ്ദേഹം. സംഘാടക സമിതി ചെയര്‍മാന്‍ പി എം ബിജു അധ്യക്ഷത വഹിച്ചു. ചടങ്ങില്‍ പേരക്ക എഴുത്തുപുര പുരസ്‌കാരം കവി സത്യചന്ദ്രന്‍ പൊയില്‍ക്കാവിലിനും നോവല്‍ പുരസ്‌കാരം സുനിത കാത്തുവിനും കഥാ പുരസ്‌കാരം മനോജ് കുമാര്‍ കാപ്പാടിനും വൈജ്ഞാനിക പുരസ്‌കാരം മുനീര്‍ എ. റഹ്‌മാനും കവിത പുരസ്‌കാരം ഹര്‍ഷ എം. ദാസിനും കല്‍പ്പറ്റ നാരായണന്‍ സമ്മാനിച്ചു. കെ.വി.സജയ്, സത്യന്‍ മാടാക്കര, അബു ഇരിങ്ങാട്ടിരി, റഹ്‌മാന്‍ കിടങ്ങയം, രാധാകൃഷ്ണന്‍ എടച്ചേരി, അബ്ദുള്ള പേരാമ്പ്ര, ഹക്കീം ചോലയില്‍ തുടങ്ങിയവര്‍ സംസാരിച്ചു.

സമരം: ജില്ലയില്‍ അഞ്ചിടത്ത് റേഷന്‍ വിതരണം മുടങ്ങി

കോഴിക്കോട്: ബേപ്പൂര്‍ എന്‍എഫ്എസ്എ ഗോഡൗണിലെ തൊഴിലാളി പ്രശ്‌നം ഉടന്‍ പരിഹരിക്കണമെന്ന് ഓള്‍ കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ ആവശ്യപ്പെട്ടു. ഗോഡൗണിലെ തൊഴില്‍ സമരം മൂലം റേഷന്‍ വിതരണം മുടങ്ങിയിരിക്കുകയാണ്. കോഴിക്കോട് സിആര്‍ ഒ സൗത്ത് മേഖലയില്‍ എല്ലാ പദ്ധതിയില്‍പ്പെട്ട കാര്‍ഡുകാര്‍ക്കുമുള്ള റേഷന്‍ വിതരണം ചെയ്യാനുള്ള സാധനങ്ങള്‍ പല കടകളിലും സ്റ്റോക്കില്ല. സമരം മൂലം ബേപ്പൂര്‍, മാറാട്, ചക്കുംകടവ്, മുഖദാര്‍, സൗത്ത് ബീച്ച് പ്രദേശത്തെ മേഖലയിലെ റേഷന്‍ വിതരണം പൂര്‍ണമായി നിലച്ചിരിക്കുകയാണ്. ഈ മാസത്തെ റേഷന്‍ വിതരണത്തിന് ഏതാനും ദിവസങ്ങളെ ബാക്കിയുള്ളൂ. പ്രശ്‌നം പരിഹരിക്കാന്‍ കഴിഞ്ഞില്ലെങ്കില്‍ വെള്ളയില്‍ ഗോഡൗണില്‍ നിന്നും സിആര്‍ഒ സൗത്ത് മേഖലയിലേക്കുള്ള റേഷന്‍ വിതരണം നടത്തണമെന്നും വ്യാപാരികള്‍ ആവശ്യപ്പെട്ടു. അതേസമയം, സിറ്റി സൗത്ത് റേഷനിംഗ് ഓഫിസറുടെ പരിധിയിലെ 37 റേഷന്‍ കടകളിലാണു പൂര്‍ണമായും റേഷന്‍ ഭക്ഷ്യസാധനങ്ങള്‍ എത്താതിരിക്കുന്നത്. 84 കടകളാണുള്ളത്. ഇതില്‍ 47 കടകളില്‍ ഭാഗികമായി സാധനങ്ങള്‍ എത്തിച്ചെന്നാണു സിവില്‍ സപ്ലൈസ് അധികൃതര്‍ പറയുന്നത്. തൊഴില്‍ത്തര്‍ക്കം സംബന്ധിച്ച് ജില്ലാ ലേബര്‍ ഓഫിസര്‍ ഇറക്കിയ ഉത്തരവുണ്ട്. ഇതു പ്രകാരം റേഷന്‍ വിതരണത്തിനു ഭക്ഷ്യസാധനങ്ങള്‍ കൊണ്ടു പോകാന്‍ നടപടിയില്ല. ഉത്തരവ് നടപ്പാക്കാന്‍ സംരക്ഷണം നല്‍കാന്‍ പോലീസ് സഹായം ആവശ്യപ്പെട്ട് സിവില്‍ സപ്ലൈസ് ഉദ്യോഗസ്ഥര്‍ എത്തിയെങ്കിലും സംരക്ഷണം ലഭിച്ചില്ലെന്നും പരാതിയുണ്ട്.

മാനാഞ്ചിറ-വെള്ളിമാടുകുന്ന് നാലുവരിപാതയ്ക്ക് എം.ജി.എസ് റോഡെന്ന് പേരിടണമെന്ന് ആവശ്യം

കോഴിക്കോട്: മാനാഞ്ചിറ-വെള്ളിമാടുകുന്ന് നാലുവരിപാതയ്ക്ക്‌വേണ്ടി ജീവിതാവസാനം വരെ പ്രയത്‌നിച്ച പ്രശസ്ത ചരിത്രകാരന്‍ ഡോ.എം.ജി.എസ് നാരായണനുള്ള ആദരമായി ഈ റോഡിന് എം.ജി.എസിന്‍റെ പേരിടണമെന്ന് ആവശ്യമുയരുന്നു. 2008- ലെ സംസ്ഥാന ബജറ്റില്‍ പ്രഖ്യാപിച്ച മാനാഞ്ചിറ-വെള്ളിമാടുകുന്ന് റോഡ് വികസനം 2012 ല്‍ പദ്ധതി തന്നെ നിലച്ചുപോകുമെന്ന സാഹചര്യത്തില്‍ എം.ജി.എസിന്റെ നേതൃത്വത്തിലുള്ള ആക്ഷന്‍ കമ്മിറ്റി ഒരു വ്യാഴവട്ടക്കാലം നടത്തിയ നിരന്തര ബഹുജന സമരങ്ങളുടെ ഫലമായാണ് ഭൂമി ഏറ്റെടുക്കല്‍ പൂര്‍ത്തിയാക്കി റോഡ് നിര്‍മാണത്തിനുള്ള ടെണ്ടര്‍ നടപടികളിലെത്തിയത്.ഫണ്ട് അനുവദിക്കുന്നതിനുള്ള സമരത്തിന് നേതൃത്വം നല്‍കി അദ്ദേഹം അറസ്റ്റ്‌വരിക്കുകയും ചെയ്തിരുന്നു. എം.ജി.എസ് മരണപ്പെടുന്നതിനുമുമ്പ് അവസാനമായി എഴുതിയ കത്തും ഈ പ്രധാന ആവശ്യമുന്നയിച്ച് കേന്ദ്ര ഉപരിതലഗതാഗത മന്ത്രി നിതിന്‍ ഗഡ്കരിക്കാണെന്നത് പ്രത്യേക പരിഗണന അര്‍ഹിക്കുന്നതാണ്. എം.ജി.എസ്സിന്റെ ഈ ആഗ്രഹം പ്രാവര്‍ത്തികമാക്കുന്നതിന് ജനപ്രതിനിധികള്‍ രാഷ്ട്രീയ-സാമൂഹിക-സാംസ്‌ക്കാരിക നേതാക്കള്‍ എന്നിവരെ ബന്ധപ്പെടാന്‍ ആക്ഷന്‍ കമ്മിറ്റി യോഗം തീരുമാനിച്ചു. വര്‍ക്കിംഗ് പ്രസിഡന്‍റ് മാത്യു കട്ടിക്കാന അധ്യക്ഷത വഹിച്ചു. ജനറല്‍ സെക്രട്ടറി എം.പി വാസുദേവന്‍, അഡ്വ.എ.വിശ്വനാഥന്‍, അഡ്വ.എം.കെ അയ്യപ്പന്‍, പ്രദീപ് മാമ്പറ്റ, പി.എച്ച്. താഹ, കെ.പി.സലിം ബാബു തുടങ്ങിയവര്‍ സംസാരിച്ചു.

ആദരാഞ്ജലി അര്‍പ്പിച്ചു

കൂടരഞ്ഞി: പഹല്‍ഗാമില്‍ നടന്ന ഭീകരാക്രമണത്തില്‍ മരണമടഞ്ഞവര്‍ക്ക് ശ്രേയസ് കൂടരഞ്ഞി യൂണിറ്റിലെ ഒരുമ സ്വയം സഹായ സംഘം ആദരാഞ്ജലി അര്‍പ്പിച്ചു. മതേതര ഇന്ത്യയുടെ ഹ്യദയത്തിലേറ്റ മുറിവാണിത്. യോഗത്തില്‍ പ്രസിഡന്‍റ് ജോസ് മടപ്പിള്ളില്‍ അധ്യക്ഷത വഹിച്ചു. സജി ആനന്ദശ്ശേരിയില്‍, റെജി വടക്കേതടത്തില്‍, ജോസ് എംസി, സെബാസ്റ്റ്യന്‍ മലപ്രവനാല്‍, ജോയ് പന്തപ്പളളില്‍, ബാബു പാലക്കിയാല്‍, സജി ആനിക്കാട്ട്, ജിജി മരുതക്കുന്നേല്‍, ബേസില്‍ വരിക്കയാനി, ജോര്‍ജ് പ്ലാപ്പള്ളില്‍, ശ്രേയസ് യൂണിറ്റ് കോ ഓഡിനേറ്റര്‍ ജോസ് കുറുര്‍ എന്നിവര്‍ സംസാരിച്ചു.

സമാധാനശ്രമത്തിന് എത്തിയ അയല്‍വാസിയെ വെട്ടിപരിക്കേല്‍പ്പിച്ചു

നാദാപുരം: കല്ലാച്ചിയില്‍ യുവാവിനെ വെട്ടിപരിക്കേല്‍പ്പിച്ച സംഭവത്തില്‍ 17കാരനായ വിദ്യാര്‍ഥിക്കെതിരേ നാദാപുരം പോലീസ് വധശ്രമത്തിന് കേസ് രജിസ്റ്റര്‍ ചെയ്തു. കല്ലാച്ചി സ്വദേശി കണിയാങ്കണ്ടിയില്‍ മുത്തു എന്ന രജീഷി (40) നാണ് വെട്ടേറ്റത്. ഞായറാഴ്ച്ച രാത്രിയാണ് സംഭവം. തലക്ക് ഗുരുതരമായി പരിക്കേറ്റ രജീഷ് കണ്ണൂരില്‍ സ്വകാര്യ ആശുപത്രിയില്‍ ചികില്‍സയിലാണ്. വിദ്യാര്‍ഥി വീട്ടില്‍ അക്രമ സ്വഭാവം കാണിച്ചതിനെ തുടര്‍ന്ന് വീട്ടുകാര്‍ അറിയിച്ചതു പ്രകാരം സമാധാനശ്രമത്തിന് എത്തിയതായിരുന്നു അയല്‍വാസിയായ രജീഷ്. വീട്ടില്‍ ബഹളം ഉണ്ടാക്കി റോഡിലേക്ക് ഇറങ്ങിപോയ വിദ്യാര്‍ഥിയെ തേടി നാട്ടുകാരും റോഡില്‍ ഇറങ്ങി. വീട്ടില്‍ നിന്ന് മീറ്ററുകള്‍ അകലെ റോഡില്‍ നില്‍ക്കുകയായിരുന്ന 1 വിദ്യാര്‍ത്ഥി കയ്യില്‍ കരുതിയ വാക്കത്തി ഉപയോഗിച്ച് അപ്രതീക്ഷിതമായി രജീഷിനെ അക്രമിക്കുകയായിരുന്നു. തലക്ക് വെട്ടേറ്റ് ഗുരുതരമായി പരിക്കേറ്റ രജീഷിനെ നാദാപുരം ഗവ ആശുപത്രിയിലും പിന്നീട് കണ്ണൂരിലെ സ്വകാര്യ ആശുപത്രിയിലും പ്രവേശിപ്പിക്കുകയായിരുന്നു. അക്രമം നടന്ന സ്ഥലത്തുനിന്ന് തിങ്കളാഴ്ച്ച രാവിലെ അക്രമത്തിന് ഉപയോഗിച്ച വാക്കത്തി പോലീസ് കണ്ടെത്തി. വിരലടയാള വിദഗ്ധരും ഫോറന്‍സിക് സംഘവും പരിശോധന നടത്തി. സംഭവ സ്ഥലത്ത് നിന്ന് കസ്റ്റഡിയിലെടുത്ത വിദ്യാര്‍ഥിയെ ജുവനൈല്‍ ജസ്റ്റീസ് ബോര്‍ഡിന് മുന്നില്‍ ഹാജരാക്കി. നാദാപുരം ഇന്‍സ്‌പെക്ടര്‍ ശ്യാം ജെ. നായര്‍, എസ്‌ഐ എം.പി. വിഷ്ണു എന്നിവര്‍ നടപടികള്‍ക്ക് നേതൃത്വം നല്‍കി.

പാതിവില തട്ടിപ്പിനിരയായവര്‍ ധര്‍ണ നടത്തി

കോടഞ്ചേരി: കോടഞ്ചേരിയില്‍ പാതിവില തട്ടിപ്പിന് ഇരയായവര്‍ ധര്‍ണ നടത്തി. ഗ്രാമശ്രീ മിഷന്‍ എന്ന സംഘടന സ്ത്രീ ശാക്തീകരണത്തിന്‍റെ പേര് പറഞ്ഞ് പകുതി വിലക്ക് ഇരു ചക്രവാഹനവും ലാപ്‌ടോപ്പും നല്‍കാം എന്ന് വാഗ്ദാനം നല്‍കി കോടികളുടെ തട്ടിപ്പ് നടത്തിയെന്നു സമരക്കാര്‍ ആരോപിച്ചു. സംഘടനയുടെ ചെയര്‍മാന്‍ ജോയി നെടുംപള്ളിക്കെതിരെ നിയമനടപടി സ്വീകരിക്കണമെന്നും സമരസമിതി ആവശ്യപ്പെട്ടു. സിപിഎം ജില്ലാ കമ്മറ്റി അംഗം വി.കെ. വിനോദ്, സമരസമിതി കണ്‍വീനര്‍ റൈഫില്‍ രാജു, ചെയര്‍മാന്‍ ഷിജി ആന്‍റണി, പി.ജി സാബു, ബിന്ദു ജോര്‍ജ്, സി.എസ്. ശരത്, സെബാസ്റ്റ്യന്‍ കുപ്പായകോട്, ജോബി നൂറാംതോട് എന്നിവര്‍ പ്രസംഗിച്ചു.

"കാര്‍ഷിക മേഖലയെക്കുറിച്ച് കോണ്‍ഗ്രസിന് വ്യക്തമായ കാഴ്ചപ്പാട്'

കോഴിക്കോട്: രാജ്യത്തെ കാര്‍ഷിക മേഖലയെക്കുറിച്ചും കര്‍ഷകരടക്കമുള്ള തൊഴിലാളികളെക്കുറിച്ചും വ്യക്തമായ കാഴ്ചപ്പാടുള്ള രാഷ്ട്രീയ പ്രസ്ഥാനം ഇന്ത്യന്‍ നാഷണല്‍ കോണ്‍ഗ്രസാണെന്ന് തെലങ്കാന ഉപമുഖ്യമന്ത്രി മല്ലു ഭട്ട്യ വിക്രമാര്‍ക്ക. ഡി.സി.സി ഓഫീസ് ഉദ്ഘാടനത്തോടനുബന്ധിച്ചുള്ള ത്രിവര്‍ണോത്സവത്തിലെ തൊഴിലാളി - കര്‍ഷക സംഗമം ഉദ്ഘാടനം ചെയ്തു സംസാരിക്കുകയായിരുന്നു വിക്രമാര്‍ക്ക. സ്വാതന്ത്ര്യത്തിനു ശേഷം കാര്‍ഷിക മേഖല ശക്തിപ്രാപിക്കുകയും ഭക്ഷ്യോല്പാദനമേഖലയില്‍ ഒന്നാമതെത്തിയതും കോണ്‍ഗ്രസിന്‍റെ ഈ കാഴ്ചപ്പാടിന്‍റെ ഫലമായിരുന്നു. ഇന്ദിരാഗാന്ധിയും ലാല്‍ ബഹദൂര്‍ ശാസ്ത്രിയും പോലുള്ളവരുടെ ഈ മേഖലയിലെ സംഭാവനയാണ് ഇതിന് പ്രധാന കാരണം. കൃഷിയെ ഒരു തൊഴിലായി മാത്രമല്ല സംസ്‌കാരത്തിന്‍റെ പിന്‍തുടര്‍ച്ച കൂടിയായാണ് കോണ്‍ഗ്രസ് കാണുന്നതെന്നും അദേഹം പറഞ്ഞു. എഐസിസി ജനറല്‍ സെക്രട്ടറി ദീപാ ദാസ് മുന്‍ഷി മുഖ്യാതിഥിയായിരുന്നു. ഡിഡിസി പ്രസിഡന്‍റ് കെ. പ്രവീണ്‍ കുമാര്‍ അധ്യക്ഷത വഹിച്ചു.

താമരശേരി ചുരത്തില്‍ പാറ അടര്‍ന്നു വീണ് ഗതാഗതക്കുരുക്ക്

താമരശേരി: താമരശേരി ചുരത്തില്‍ കൂറ്റന്‍ പാറ റോഡിലേയ്ക്ക് പതിച്ച് ഏറെ നേരം ഗതാഗതം സ്തംഭിച്ചു. ഇന്നലെ രാവിലെ 11.50ഓടെയാണ് സംഭവം. ഈ സമയം വാഹനം കടന്നുപോകാതിരുന്നതിനാല്‍ വന്‍ ദുരന്തം ഒഴിവായി. ചുരത്തിലെ ഒമ്പതാം വളവിന് താഴെ റോഡിന് അധികം വീതിയില്ലാത്ത ഇടുങ്ങിയ ഭാഗത്താണ് പാറ അടര്‍ന്ന് റോഡിലേക്ക് വീണത്. പാറ ഇളകി വീണതിനൊപ്പം മണ്ണും റോഡിലേക്ക് വീണു. സംഭവത്തെ തുടര്‍ന്ന് ചുരത്തില്‍ ഭാഗികമായി ഗതാഗതം തടസപ്പെട്ടു. പോലീസും ചുരം സംരക്ഷണ സമിതി പ്രവര്‍ത്തകരും ചേര്‍ന്ന് ഒറ്റവരിയായി വാഹനങ്ങള്‍ കടത്തിവിട്ട് ഗതാഗതം നിയന്ത്രിച്ചു.

വികസിത കേരളം കണ്‍വന്‍ഷന്‍ നടത്തി

ബാലുശേരി: വികസനം മുരടിച്ച കേരളത്തില്‍ സമഗ്ര വികസനം കൊണ്ടുവരാന്‍ ബിജെപി സര്‍ക്കാരിനേ കഴിയുവെന്ന് ബിജെപി സംസ്ഥാന പ്രസിഡന്‍റ് രാജീവ് ചന്ദ്രശേഖര്‍. ബിജെപി കോഴിക്കോട് റൂറല്‍ ജില്ലാ കമ്മിറ്റി സംഘടിപ്പിച്ച വികസിത കേരളം കണ്‍വെന്‍ഷന്‍ ഉദ്ഘാടനം ചെയ്ത് സംസാരിക്കുകയായിരുന്നു അദേഹം. മുന്‍ സംസ്ഥാന അധ്യക്ഷന്‍ കെ. സുരേന്ദ്രന്‍, കോഴിക്കോട് റൂറല്‍ ജില്ലാ പ്രസിഡന്‍റ്ടി. ദേവദാസ്, സംസ്ഥാന സെക്രട്ടറി എസ്. സുരേഷ്, ജില്ലാ ജനറല്‍ സെക്രട്ടറിമാരായ ഗിരീഷ് തേവള്ളി, എന്‍.പി രാമദാസ്, കെ. രജനീഷ് ബാബു എന്നിവര്‍ സംസാരിച്ചു.

ഓടിക്കൊണ്ടിരുന്ന കാറിന് തീപിടിച്ചു

തിരുവമ്പാടി: തിരുവമ്പാടി- പുന്നക്കല്‍ റോഡിലെ ഹൈസ്‌കൂള്‍ മൈതാനത്തിന് സമീപം ഓടിക്കൊണ്ടിരിക്കുന്ന കാറിനു തീപിടിച്ചു. രാവിലെ ഒന്‍പതോടെയായിരുന്നു അപകടം. കുടുംബസമേതം യാത്ര ചെയ്യുകയായിരുന്ന പാമ്പഴിഞ്ഞപാറ സ്വദേശി വിനീത് കുമാറിന്‍റെ ഉടമസ്ഥതയിലുള്ള കാറിനാണ് തീ പിടിച്ചത്. എസിയില്‍നിന്ന് ഷോര്‍ട്ട് സര്‍ക്യൂട്ടായതാണ് തീപിടിക്കാന്‍ കാരണം. നാട്ടുകാരുടെ നേതൃത്വത്തില്‍ തീ നിയന്ത്രണവിധേയമാക്കി. മുക്കം അഗ്‌നി രക്ഷാ നിലയം സ്റ്റേഷന്‍ ഓഫീസര്‍ ഇന്‍ ചാര്‍ജ് പയസ് അഗസ്റ്റിന്റെ നേതൃത്വത്തില്‍ സീനിയര്‍ ഫയര്‍ ഓഫീസര്‍മാരായ എം. അബ്ദുള്‍ ഷുക്കൂര്‍ സി.മനോജ്, ഫയര്‍ ഓഫീസര്‍മാരായ പി.ടി. ശ്രീജേഷ്, കെ. മുഹമ്മദ് ഷനീബ്, വൈ.പി.ഷറഫുദ്ദീന്‍, എം.നിസാമുദ്ദീന്‍, സി. വിനോദ്, കെ.എസ്. ശരത്, കെ.കെ ജയിഷല്‍, സജിത അനില്‍കുമാര്‍, പി.കെ. രാജന്‍ എന്നിവരടങ്ങിയ രണ്ട് യൂണിറ്റ് സംഭവ സ്ഥലത്തെത്തി.

സലീം കൊളായിക്ക് നാട്ടുകാരുടെ ആദരം

മുക്കം: മണിപ്പുരില്‍ നടന്ന ദേശീയ അണ്ടര്‍ 19 സീനിയര്‍ ഫുട്‌ബോള്‍ ചാമ്പ്യഷിപ്പില്‍ 15 വര്‍ഷങ്ങള്‍ക്ക് ശേഷം ജേതാക്കളായ കേരള ടീമിന്‍റെ പരിശീലകന്‍ സലീം കൊളായിക്ക് കൊടിയത്തൂരില്‍ സ്വീകരണം നല്‍കി. യംഗ് സ്റ്റാര്‍ കാരക്കുറ്റിയും കൊടിയത്തൂര്‍ ജനകീയ കൂട്ടായ്മയും സംയുക്തമായാണ് സ്വീകരണവും ആദരവുമൊരുക്കിയത്. പൊതുയോഗത്തില്‍ സലിം കൊളായിക്കുള്ള ഉപഹാരം പഞ്ചായ ത്ത് മുന്‍ പ്രസിഡന്‍റ് വി. ഷംലുലത്ത് നല്‍കി. എം.എ അബ്ദുല്‍ അസീസ് ആരിഫ് അധ്യക്ഷത വഹിച്ചു. വാര്‍ഡ് മെമ്പര്‍ ടി.കെ അബൂബക്കര്‍, നാസര്‍ കൊളായി, കെ.ടി മന്‍സൂര്‍, ഗിരീഷ് കാരക്കുറ്റി, ശരീഫ് അമ്പലക്കണ്ടി, എം.എ കബീര്‍, സുനില്‍ കാരക്കുറ്റി, സി.പി സൈഫുദ്ദീന്‍ ഇര്‍ഷാദ് കൊളായ്, കെ.പി. അഷ്‌റഫ്, സലാം കുട എന്നിവര്‍ സംസാരിച്ചു.

ഓട്ടത്തിനിടെ സ്‌കൂട്ടര്‍ കത്തിനശിച്ചു

കൂരാച്ചുണ്ട്: യാത്രയ്ക്കിടെ സ്‌കൂട്ടര്‍ തീപിടിച്ചു കത്തിനശിച്ചു. കേളോത്തുവയല്‍ സ്വദേശിയായ എഴുത്താണിക്കുന്നേല്‍ അനൂപ് ആന്‍റണി യാത്ര ചെയ്ത ടിവിഎസ് ജൂപ്പിറ്റര്‍ കെ എല്‍ 77 ഇ 0432 നമ്പര്‍ സ്‌കൂട്ടറാണ് കത്തിനശിച്ചത്. ഇന്നലെ വൈകുന്നേരമാണ് സംഭവം. കൂരാച്ചുണ്ടില്‍ നിന്നും കോളോത്തുവയലിലേക്കുള്ള യാത്രാമധ്യേ പുളിവയലില്‍ എത്തിയപ്പോള്‍ വാഹനം താനെ നിന്നു. പിന്നീട് വീണ്ടും സ്റ്റാര്‍ട്ടു ചെയ്തപ്പോഴാണ് തീ പിടിച്ചത്. അനൂപിന്‍റെ സഹോദരന്‍ അമല്‍ ആന്‍റണിയുടെ പേരിലുള്ള വാഹനമാണിത്. ഒരു വര്‍ഷത്തോളം മാത്രമെ സ്‌കൂട്ടറിനു പഴക്കമുള്ളു. കൂരാച്ചുണ്ട് പോലീസും പേരാമ്പ്ര അഗ്‌നിശമന സേനയും സ്ഥലത്തെത്തി.

പൊതുവഴി കൈയേറിയെന്ന ആക്ഷേപം പരിശോധിക്കണം: മനുഷ്യാവകാശ കമ്മീഷന്‍

കോഴിക്കോട്: കോട്ടൂര്‍-പുതിയപ്പുറം റോഡിലെ പെരവഞ്ചേരി റേഷന്‍ കടയ്ക്ക് സമീപം നിന്നുമാരംഭിക്കുന്ന പൊതുവഴി പഞ്ചായത്തും പോലീസും നിര്‍ദേശിച്ചിട്ടും സ്വകാര്യ വ്യക്തി കൈയേറി മതില്‍കെട്ടിയെന്ന പരാതി അടിയന്തരമായി പരിശോധിക്കണമെന്ന് മനുഷ്യാവകാശ കമ്മീഷന്‍ ജുഡീഷ്യല്‍ അംഗം കെ. ബൈജുനാഥ്. കോട്ടൂര്‍ പഞ്ചായത്ത് സെക്രട്ടറി പരാതി പരിശോധിച്ച് 15 ദിവസത്തിനകം റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ ആവശ്യപ്പെട്ടു. മേയില്‍ കോഴിക്കോട് ഗവ. ഗസ്റ്റ് ഹൗസില്‍ നടക്കുന്ന സിറ്റിംഗില്‍ കേസ് പരിഗണിക്കും. പഞ്ചായത്ത് ഉദ്യോഗസ്ഥര്‍ നേരിട്ടെത്തി നിര്‍ദേശം നല്‍കിയിട്ടും പൊതുവഴി കൈയേറി അതിര് നിര്‍മ്മിച്ചെന്നാണ് പരാതി. ബിനീഷ് അത്തൂനി സമര്‍പ്പിച്ച പരാതിയിലാണ് നടപടി. അത്തൂനി ദേവിക്ഷേത്രത്തിലേക്കുള്ള വഴിയാണ് ഇതെന്ന് പരാതിയില്‍ പറയുന്നു.

മെഹന്തി ഫെസ്റ്റ് ശ്രദ്ധേയമായി

കോഴിക്കോട്: "ഒരുവട്ടം കൂടി ' എന്ന സിപിഎം ഹൗസ് കുടുംബ സംഗമത്തോടനുബന്ധിച്ച് നടത്തിയ മെഹന്തി ഫെസ്റ്റ് ശ്രദ്ധേയമായി.തറവാട് മുറ്റത്ത് നൂറോളം പേര്‍ പങ്കെടുത്ത മൈലാഞ്ചി മല്‍സരം കൗണ്‍സിലര്‍ പി.മുഹസിന ഉദ്ഘാടനം ചെയ്തു. കുടുംബ സമിതി ചെയര്‍മാന്‍ സി.പി.എം സഈദ് അഹമ്മദ് അധ്യക്ഷത വഹിച്ചു.വിവിധ മല്‍സരങ്ങളിലെ വിജയികള്‍ക്ക് സി.പി.എം കദീജ, ട്രഷറര്‍ സി.പി.എം സാദിഖ് എന്നിവര്‍ ഉപഹാരങ്ങള്‍ നല്‍കി.സി.പി.എം റസിയ, എം.എം.അബ്ദുല്‍ ഗഫൂര്‍, കെ.വി.എം ഷുഹൈബ് എന്നിവര്‍ സംസാരിച്ചു.മൈലാഞ്ചി മല്‍സരത്തില്‍ യു.വി.ഷ കുന്നത്ത് ഒന്നാം സ്ഥാനം കരസ്ഥമാക്കി. കെ. ഫാത്തിമ ഷെന്‍ഹ,എന്‍.കെ.വി ഷൈക്കലി എന്നിവര്‍ യഥാക്രമം രണ്ടും മൂന്നും സ്ഥാനം നേടി.

വിജ്ഞാനകേരളം ശില്‍പശാല സംഘടിപ്പിച്ചു

പേരാമ്പ്ര: വിജ്ഞാന കേരളം ജനകീയ ക്യാമ്പയിന്‍റെ ഭാഗമായി സംഘടിപ്പിച്ച പേരാമ്പ്ര ബ്ലോക്ക് തല ശില്‍പശാലയുടേയും ജോബ് സെന്‍ററിന്‍റെയും ഉത്ഘാടനം ബ്ലോക്ക് പ്രസിഡന്‍റ് എന്‍.പി. ബാബു നിര്‍വ്വഹിച്ചു. വൈസ് പ്രസിഡന്‍റ് സി.കെ. പാത്തുമ്മ അധ്യക്ഷത വഹിച്ചു. വികസന സമിതി ചെയര്‍മാന്‍ കെ. സജീവന്‍, വിദ്യാഭ്യാസ സമിതി ചെയര്‍മാന്‍ ശശികുമാര്‍ പേരാമ്പ്ര, അംഗങ്ങളായ പി.ടി. അഷറഫ്, ഗിരിജശശി, ബിഡിഒ കാദര്‍, പി.കെ.രജിത എന്നിവര്‍ പ്രസംഗിച്ചു. സംസ്ഥാന കോ ഓര്‍ഡിനേറ്റര്‍ സി. മുഹമ്മദ് ക്ലാസ് എടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]